26
Ngə Agripa tə nar nyi nə Bulus, “Laku tsa kə ka ko ɓwanya ka kərngha.” Ngə Bulus tə har cha cha ga ghəya chaɗə hu'u dza kərnyi. Cha na, 2 “Təl Agripa, biyo vi ɗa mənakəu, ənda ka ɗa ndə nda kwa səhimi da ənda yo chaɗə hu'u dza kərɗa ənya, a təkəra dəhə sə'inda njir Yahuda kwa pə nyandəla ya. 3 Wi nə kwa zəndəbiya kə dəhə sər jival nə njir Yahuda ana sə'inda kwa shili na kəpal ku pama nda. Aka ənga yo gədi nghə ka səhimi daya ana susu'a!4 “Dəhə njir Yahuda zəndətə ənda ya ngya fwatə ku zərkur ɗa, ghəya tə tangərmar ngya ɗa aku mələm ɗa ana avu Urshalima. 5 A zəndə ɗa tə nda ɗəɗəməu, ya nda kwa nau dəkar macha kwa i nda, ənda wi nda tə ea ka dzuku ka dzuku ku lakur nəu kəea, naya ndər Farisi ya, dzuku nda kwa ɓəlatə gadlagadla ndiya matsa alenya dzuku. 6 Kəl ja, sakana aka fəkər nda ya nə təkəra sənda Hyel tə mərtə nyi alkawal nə ka adan ea nə ya mar nəuma ənya. 7 Nənnə ngə alkawal nda nyandəla ea ngə kwabəmətlə ngə kwa səka, nda gwa'atə nda kwa həsəli nə Hyel vu'i na pəchi, nda la'a ənda cho nyabiyadza. A təkəra nawa fəkər nə njir Yahuda kwa wula ɗa ja aləvari. 8 Mya gwa'atə hyo har ənda Hyel da kwa hya'andə nji kuɗəkuɗə wa?
9 “Ma'a naya haaɗa a dləukərtə ya ənda tsa'atsa'a tanyi ya mər dəhə sə ka ga ya səwandə tləmər Yesu ndər Nazarat. 10 Ya nacha ngə sənda ya mər vu Urshalima. Ana gyalkur nda ya dləutsə tsa wawa'ar fərist, ya pəu nji chichi ɗang ku jarum, ya ku bəji nda njo tsa nda, a dləukərtə ya nja tsəya nda. 11 Ɗang tanyi bəji nda ya ma'i kyo vi pətlənya hya'atə ku nənna yo vanyi yo nənda ɓwaɓwatə ana yo mbadzə yo chiu nda na tuku ka nda pə ɓwanya həyatə təkəra Yesu. Aka huɗətla nda ya nə təkəra nda, yo nəu nda ma'a kyatə hə'i nda a da nəkənda wa, ka ya ɗa məndza'u na nda.
12 “Vanya pəchi yo yi Dimaska ana gyalkur wawa'ar fərist tsəfətsəfə nyi tsa ya. 13 Aləvari, nda ya ku laku, ya kaɗə pəchi ɗa tangkər, ya la'a vimbəlmbəl tə səya kya huɗamələm, kwa mbəl ndiya matsa pəchi, ga ɓandə ɗa ka bazhi ma'i ɗa. 14 Ea dla səya hu'i dəhə ea, ngə ya ngatə kurakə kwa na na'a na nya njir Aramaya, ‘Shawulu, Shawulu, mya gwa'atə ko ɗa məndza'u na ya? Dzau nənghə ka ɓəlandə sənda ku kəra ya, cho ɗa sə ɓwa'atanyi wi ngə tla kwa da zəwa ɓəla.’ 15 Kəl ya jawa, ‘Nakə wa nə Tlakəu?’ Ngə Tlakə tə wuma, ‘Naya Yesu nə ko ɗa məndza'u nə na. 16 Hya'atə sakana. Ya chabiya nghə dza ka ga ya mərtə nghə ka ndər mər tlər na'a, ana ka ndər ɓwanya təkəra sənda ka la'a təkəra ya ana sənda yo char ngha biyama. 17 Yo dləuya nghə tsa njir Yahuda ana tsa nji nda pa'a njir Yahuda, nji'inda yo sə nghə yada nda. 18 Ka ga ka mbəɗiya lya nda ana ka shabiya nda tsa kutla ya ku vimbəlmbəla, ana tsa gyalkur Shantan yada Hyel, təwa jirikur kənda ku ya nda kwa uya farbikər səpəla'a ana nəkənda na mbwa ku huɗa nji'inda Hyel tə ɗəmtsi.’
19 “Aka ənga ja, təl Agripa, a da ya ɗa kangal nə shi'uni pəchi nda tə səya kya huɗamələm nda wa. 20 Tangərma ya bəzə mafakə nə njir Dimaska, ahir nga nə nji'inda vu Urshalima ana dəhə Yahudiya, ana nə nji'inda pa'a njir Yahuda tsəu, ya bəzə ənda nda ngyar səpəla'a kənda nda sha yada Hyel ana nda chabiya tubi kənda na sənda nda kwa məra. 21 Nacha ngə sənda gwa'atə njir Yahuda tə səya ɗa ku Mbwa'alə ga gwa'a nda tsəya ɗa. 22 Kəl ja, Hyel kwa vala ɗa tsa'a tə bəji na, nacha nə yo pə nə nji wawa'a ana nji shiɗəɗəu. A da vanya sə da yo pə pam matsa sənda njir mətakər ana Musa tə na kwa ɗa wa, 23 ənda tuku Kəristi kwa sa ɓwaɓwatəu, nacha ngə ndə nda kwa hya'atə ku hu tangərma, kwa bəzə vimbəlmbəla Hyel nə njir Yahuda ana nji'inda pa njir Yahuda.”
24 Təma ngə Festus tə tsabiya ɓwanya ku nya cha, ga na ana kurakə dzəgam dzəgaməu, “Tsəu kərakə da tsəkə Bulus wa! Nə nghə na dlədləɓə dəgal nə ka nau nə gwaɗətə təkəra ka.”
25 Ngə Bulus tə ɓəlakə nyi, “Kəra yada gwaɗə aləvari Festus wa, sə nə yo dəkə nə jiri, ya sər jigadəma cha. 26 Təl zəndətə sə'ina, ya yo nau ɓwanya gangkərtiyi nənyi. A zəndətə ya mada zhang ku huɗa sə'inə da nda pa'a cha zəndə wa, aka a na nja mər nyi tə ɗəwa wa. 27 Təl Agripa, a nənyi təkə jiri nə njir mətakər ya? A zəndətə ya a nənyi təka.”
28 Kəl Agripa tə nar nyi nə Bulus, “Ko har wi ku zər bəji kushi nə ko shandə ɗa ka Kərista wa?”
29 Ngə Bulus tə wuma, “Ndara ku zər bəji kushu ndara 'ualəu, yo pətlənya nə Hyel a da kəl nakə ma'a wa, ma'a dəhə nji'inda kwa səhimi da ya ənya nda ɗa wi nə ya na, kəl ja, a da na dzəra lyang wa.”
30 Ngə təl tə hya'atə, əngə ma'a ngwamna ana Banis ana nji'inda tə ngya kə'i nda. 31 Nda nda kwa biya ku vi nda, nda kwa ɓwanya ku pama kərnənda, nda kwa na, “Ndə nə da mər sənda njo kina tsəya nyi ndara cha ngya ku jarum wa.”
32 Ngə Agripa tə nar nyi nə Festus, “Macha a ndə nə da nda ma'i na wula nyi ya huɗə Kaisar wa, njo nda wuniya nyi.”