6 Ahir cha hanyi chisəu ndara kuma vu Urshalima, cha təra yi Kaisariya, vanya zəkəu ngə cha ngyata nyi tə mbwar ngya nyi ku vi nəuma ga sə nja shili na Bulus ma nyi. 7 Manda Bulus tə shili, njir Yahuda nda tə hya'atə vu Urshalima tə ta'i ga ɓandə nyi, nda kwa jiga bikə nda cha məra, nda a da nda kwa nau char sənda kwa chabiya təkəɗə kuracha wa.

8 Ngə Bulus tə ghəya chaɗə hu'u dza kərnyi, “A da ya zandə nyi sə nə gadlagadla njir Yahuda, ndara nə Mbwa'ala, ndara nə Kaisar wa.”

9 Kəl ja, Festus kwa i cha mərtə ɗufwa njir Yahuda twasəu, ngə cha na, “Kwa i kə ka gi Urshalima ka yi ta'i ma ɗa hinda ka ya mərtə nghə nəuma təkəra sə'inə njo wula nghə təkər nə ya?”

10 Bulus tə wum ga na, “Aku vi nəuma nə Kaisar nə ya sakana, ta nda təki njo mərtə ɗa nəuma. A sə da ya zandə mada kush nə njir Yahuda wa, wi nda ma'a kərnghə zəndətə mənakəu. 11 Macha ndər bikə ya tsəu nda njo kina tsəya, a da yo ɗa tsa tə wa. Kəl ja, macha wula nə njir Yahuda tə shili ni nə da jiri wa, a ndə da na gyalkur yi na ya huɗən nda da wa. Yo ma'i na wula ɗa ya mar Kaisar!”

12 Ahir Festus tə ɓubiya ɓəli ka njirawawa'a patla nyi, ngə cha na “Ka gədi nja ma'i na wula nghə ya mar Kaisar, ya huɗə nyi ko təra.”

13 Ahir hanyi yiɗau ngə təl Agripa ana kwamə nyi nda na tləm nyi Banis tə dzəva Kaisariya ka nda usa Festus na gwa ku dzəga təlkur. 14 Mangə nda kwa hanyi ɗang tanyi hinda, Festus tə ɓwanya təkəra nəuma Bulus nə təl. Ndə cha, “Vanya ndə da tangnə nda Felis tə ngyar ku jarum. 15 Nda ya gi Urshalima, wawa'ar fərist ana ka gau nə njir Yahuda tə shili na nəuma təkəra cha ga gwa'a kəl naya səya nyi na bikəu.

16 “Ngə ya nar nda ənda, naea njir Roma da tsəl na tlanda nyi nəuma nə ndəu, kəla nja yi nacha mar nəuma na nda ka njir wula nyi, ga cha uya lakur chaɗə hu'u dza kərnyi, təkəra bikə nda nja wula nyi təkər wa. 17 Aka əngə nda ya shili tangnə kə'i nda, a naya ɗə bəji wa, kəl ja, vanya zəkəu ya ngya ku vi nəuma ga sə nja səgwa na ndə nda. 18 Manda njir wula nyi tə hya'atə ka nda kwa ɓwanya, a da nda ɓwanya təkəra mada zhang ku huɗa bikə nda ya har ku kəra ya wa. 19 A təvəra ənga, nda kəpal ka cha təkəra vanya sə nə lakur nəu kənda ana təkəra vanya ndə nda a təti ana tləm nyi Yesu nda Bulus kwa na ana pi cha. 20 Nga wendə ɗa laku nda yo ɗana chukuɗabiya ngawa səu, aka ənga ya jau ndara kwa i cha gi Urshalima cha yi ta'i mar nəuma təkəra wula nga. 21 Manda Bulus tə gwa'a kəl təl ngo tlanda nyi nəuma, ngə ya gəzəya nyi kəl ma yada lətənyi yi nə Kaisar.”

22 Kəl ngə Agripa tə nar nyi nə Festus, “Yo i ya ngatə ɓwanya ndə ngə na kərɗa.” Ngə cha ɓəlakə nyi, “Əzəkə ko ngatə nyi.”

23 Vanya zəkəu Agripa ana Banis tə shili ku səlir təlkur kənda, nji tsəu kwa həsəli nənda gagaɗa, nda gwa ku vi nda nji kwa tsəmdzə kwa, nanda kə'i gau nə ləvaləva ana kə'i njirawawa'a mələm. Ngə Festus tə na nja səgwa na Bulus. 24 Ngə Festus tə na, “Təl Agripa ana dəhə nji'inda tangnə kə'i ea, kwa la'a hi ndə na! Dəhə mələm njir Yahuda tə ɓwanya təkəra cha na'a vu Urshalima ana tangnə vu Kaisariya, nda kwa pə kurakə ənda a da ki tsəutanyi na pi wa. 25 Kəl ja, a da ya uya nyi na bikə nda nji ka njo tsəya nyi wa, kəl nda aka cha gwa'a ka cha ma'i na wula nyi yi mar Kaisar, ngə ya ɓatliya ka ya mbəlatə nyi yi Roma. 26 Kəl ja, a sə da yo nau tsəfətə nyi nə aləvari təkəra cha wa. Aka ənga, janə ya shili tə nacha manə hi dəhə hi, a mar ma'a nakə təl Agripa, aka ahir nəna ɗəm ngwahya'a yo uya sənda yo tsəfəti. 27 Aka cho ɗa sə kəlakər nja lətə ndə hya'atə ku jarum ya huɗə təl kəla nja chabiya sənda nja wula nyi təkəri.”