3 “Eo usaku nghə mada təwabari ana ku kala laku Felis ndə mənakəu. 4 Kəl ja, tsa yada ɗinya nghə bəji, aka mənakəkur nghə eo gədi nghə ka səhimi da ea nə zər bəji kushəu. 5 Ndə na, ndər ta bwal na, cha ghəya tlə mwali ku pama njir Yahuda ku dunəya dəhəu. Nacha ngə gau dzuku njir nəu ndər Nazarat. 6 Cha gwa'a ma'a cha dyaɓəndə Mbwa'alə Hyel, ngə ea səya nyi. 7 ^a 8 Təwa jau nya cha, ko zəndəbiya jirir sənə eo wula nyi təkər nə na kərngha.” 9 Njir Yahuda tə dləukər na kurakə zhang ga na aləvari səngə cha pə ngə jiri.

10 Nda ngwamna tə nənyi laku nə Bulus cha ɓwanya, ngə cha na, “A zəndətə ya ənda ndər nəuma kə təkəra njir hə'i na nə fa ɗang tanyi; aka ənga ana hirgyaɗi yo chaɗə hu'u dza kərɗa. 11 Kustanyi ko nau gwa'abiya tsa alenya nji ənda a da ndiya hanyi kwabəmətlə yahi wa, ya gi Urshalima ka həsəli. 12 Njir wula ɗa inə da taa həya ɗa yo kəpal na madawa ndara ya hya'a jigadəma dlama nji ku Mbwa'alə ndara vi pətlənya ndara kala mbwa ku ta mələm wa. 13 Ya a da nda kwa nau chabiya nghə təkəɗəkura sə'inə nda kwa wula ɗa təkər nə wa. 14 Kəl ja, a dləukərtə ya sə zhang na, ənda yo həsəli nə Hyel nə Adan mən təwa ndana laku, nda nda kwa nga laku gəzhi. A nənyi təya jiri nə dəhə sənda ku gadlagadla ana sənda tsəfətsəfə nyi ku likatəkatə njir mətakər, 15 ya fəkər ɗa ku Hyel sə zhang na nə nji'ina, ənda hya'atər nji kuɗəkuɗə da nə nji tsa'atsa'a ana nji pu'iu. 16 Aka ənga wa'atanyi yo mbadzə ya ɗa na kər taltal mar Hyel ana nji.

17 “Ahir fa ɗang ya ɓəl shili Urshalima shili da na'awa nji ana ga'a aka nji ɗaliɗali ana ga ya handa təmachi. 18 A nəubiya təya tsaubar ga ɗa chichinyi ku bəji nda nda həya ɗa ku Mbwa'ala yo mər səna. A dlama nji da dzə ɗa wa, ya a da ya hya'a jigadəma nji wa. 19 Kəl ja, alenya njir Yahuda da hya'atə tə hə'i Asiya, na nda ngə kwa nda kina shili manghə na wula macha vanya sə da nda nə təkəra ya. 20 Ma'a əngə wa nji'inə jigar səɗimi inda nda uya ɗa nə nda ya ta'i mar njirawawa'a kənda nda, 21 kəl nda macha wula kənda təkəra ənda ya har kurakə sakanda ya ta'i manda ga na, ‘A təkəra hya'atər nji kuɗəkuɗa nacha nə ya huɗə nghə ənya.’ ”

22 Felis wurtə ngabiya sə ɗang təkəra lakur Yesu, ngə cha təɗənda nəuma nda biyama. Ga na “Ma Lisiyas gau ləvaləva tə shili yo tlanda hi nəuma.” 23 Cha nar nyi nə dəgal ləvaləva cha ɓəla Bulus, kəl ja, cha tləlar nyi sə'i ana cha ngyar ka bazhi nyi nənyi sənda cho gwa'a.

24 Ahir hanyi mətlə makərəu Felis tə shili ana mala nyi Durusila, nda ndər Yahuda. Cha sə nja shili na Bulus ana cha səhimi da cha ənda cho ɓwanya təkəra jirikur ku Kəristi Yesu. 25 Nda Bulus tə ɓwanya ka nda təkəra tsa'atsa'akur, kərəukur ana nəuma nda kwa shili, ləvəra səya Felis ngə cha na “A njitə sakana! Ko nau təra. Ma ya uya bəji yo tsəu sətə nghə ka shili.” 26 Ya tsəu, cho hari ənda Bulus kwa nənyi vangula, aka ənga cha nga nyi atə vanyi atə vanyi ga ɓwanya nacha.

27 Ahir fa mətləu, ngə Pokiyos Festus tə dləu cha Felis, kəl ja, manda Felis kwa i cha zhitə bazhi ka njir Yahuda, ngə cha ngyar Bulus ku jarum.