23
Ngə Bulus tə pəkər li tsəp təkəra njirawawa'a patla nda ga na, “Ka zamə ɗa, ngya təya tsa'atsa'a mar Hyel ku dəhə jigadəma ɗa ba'a tə bəjin ənya na.” 2 Manda Hananiya gau fərist tə ngatə ənga, təma cha nar nyi nə nji'inda lələhə dzər Bulus nda zhau nyi chi. 3 Ngə Bulus tə nar nyi, “Nakə ma'a Hyel kwa zhau nghə chi, nakə bangu nda nja ɓəsəndzə nyi sə pərtəu, ka ngya tang hinga ka kə mərtə ɗa nəuma wi sənda gadlagadla Musa tə na, ya nakə na kərngha ɓəlnda tə gadlagadla, təwa na nja zhau ɗa chi!”4 Nji nda tə ta'i ləhə dzər Bulus tə na, “Gau fərist Hyel nə ko ngəl ya?”
5 Ngə Bulus tə na, “Ka zamə ɗa, a da ya zəndə ənda gau fərist nə wa, aka tsəfətsəfə nyi cha, ‘Ngwa ka da pə səɗimi təkəra ndə nda kwa gəla nənghə na nji wa.’ a” 6 Nda Bulus tə ngabiya ənda nji'inda tə patla nda, daɓədzər njir Saduki ana alenya njir Farisi inda, cha har kuraka cha ga na, “Ka zamə ɗa, Naya ndər Farisi ya, zər ndər Farisi tsəu. Janə ya huɗə nəuma aka yo fəkər da hya'atər nji kuɗəkuɗa.” 7 Nda cha na ənga, təma kəpal tə hya'atə ku pama njir Farisi ana njir Saduki, ngə daɓədzə nda tə təkəbiyadza. 8 (Aka njir Saduki nənyi tə jiri ənda a hya'atər nji kuɗəkuɗə da wa, ya kə'i chama ndara shanguɗə da wa, kəl ja, njir Farisi nəkənda nənyi tə jiri ənda sə'ingə da dəhəu.)
9 Ngə kurakə tə hya'ati, alenya maləm gadlagadla inda njir Farisi tə hya'atə tə ta'i nda kwa kəpal na dunama, nda kwa na; “Naea uya bikər ndə nə wa, kwa nau ɗa Chama ndara Shanguɗə da tə ɓwanya nənyi.” 10 Kəpal nda tə tsakətə ɗa ɗimiɗimi gagaɗa, ngə ləvəra səya gau ləvaləva tsa nja da ba'a kukuchiɗənda Bulus. Ngə cha nar nyi nə ləvaləva inda nda səya hənda Bulus na hatlə nda təra na cha yo ngakə ləvaləva.
11 Pəshinda əvu'i ngə Tlakə tə shili ta'i ləhə dzər Bulus ga na “Tsətə ɗufwa ka! Wi nda ka ɓwanya təkəra ya vu Urshalima nda, əngə tanyi ko ɓwanya təkəra ya tsəu vu Roma.”
Nja Gwa'a nja Tsəya Bulus
12 Nda via wura alenya njir Yahuda tə mbatə nya ga səmənda fəla ənda a da nda kwa səm sərsum ndara nda sa wa, kəl nda tsəya Bulus. 13 Nji nda mbanya ɗimi nga, kwa ndiya nji fwaɗəkumənyi. 14 Nda təra yada gau fərist ana njirawawa'a ga na, “Səmənda təea fəla a da eo səm vanya sə wa kəl ea tsəya Bulus. 15 Aka ənga, nahi ka njir patla, hya gədi gau ləvaləva cha shili na Bulus manə hi, a təkəra hyo gwa'a hya jaubiya təkəɗər sənda tə ɗa. A batliya tə ea ka eo tsəya nyi təvi njo shili nacha tangna.”
16 Kəl ja, zər kwamənya Bulus tə ngatə ngəna mbanya, ngə cha təra yo ngakə ləvaləva ga yi nar nyi nə Bulus.
17 Ngə Bulus tə nga zhang ku huɗa wawa'ar ləvaləva ga nar nyi, “Ma'i na zər nə yada gau ləvaləva, səda cho i cha nar nyi.” 18 Ngə cha təra na cha yada gau ləvaləva, ga na, “Bulus ndə nda ku jarum nda na nga ɗa ga nar ɗa ya shili na zər nə da ka aka sə da cho i cha nar ngha.” 19 Ngə gau ləvaləva nda gəzəya cha zər nda ga təɗənda nyi ya mar sə ga jau nyi, “Minə ko gwa'a ka dəkar ɗa?”
20 Ngə zər nda na: “Alenya njir Yahuda mbatə tə nya ənda nda kwa gədi nghə ka yi na Bulus mar wawa'ar patla zəkəu, a təkəra nda kwa gwa'a nda ngabiya təkəɗər sənda tə ɗa. 21 Ngwa ka dləukə nda wa, aka nji kwa ndiya fwaɗəkumənyi kwa mbu nyi ku laku. Səmnda tə nda fəla a da nda kwa sa ndara səm sərsum wa kəl nda tsəya nyi. Ɓatliya tə nda sakana, nda kwa səkə sənda ku jigadəma nghə təkəra gədi kənda.”
22 Ngə gau ləvaləva nda tə nar nyi nə zər nda cha təra, ana təɗəhimi ənda, “Ngwa ka da par nyi nə madawa ənda nar ɗa təkə ɓwanya nə wa.”
Nja Təra na Bulus yi Kaisariya
23 Kəl ngə gau ləvaləva nda nga wawa'ar ləvaləva tsa'a mətlə ga na, “Batliya ɗa ma ləvaləva gharəu mətləu, dzarma taku məɗəfəkumnyi, ana shili masəu gharəu mətlə ka yi Kaisariya saka dlə nə vu'i ənya. 24 Hya uya taku nda Bulus kwa gi ti, hya yi nacha nə ngwamna Felisb ngwa sə da uya nyi wa.” 25 Cha tsəfətə kainau bəra:
26 Hya'atə tsa Kalaudiya Lisiyas, Yada Aləvari, Ngwamna Felis, Usi gwanghəu.
27 “Njir Yahuda tə səya ndə na ya nda gwa'a nda tsəya nyi, kəl ja, ya shili ka ləvaləva ɗa ga dləuya nyi, aka ya ngabiya ənda ndər Roma cha. 28 Ya gwa'a ya zəndəbiya sənda nda kwa wula nyi təkəri, ngə ya yi nacha huɗə njirawawa'a patla kənda. 29 Ngə ya ngabiya ənda wula kənda, kəpal nga təkəra gadlagadla kənda, kəl ja, a vanya bikə da nja səya nyi nə nda kwa gwa'atə nja tsəya nyi ndara nja fəu nyi ku jarum wa. 30 Nda nja nar ɗa ənda nja ɓatliya ka nja tsəya nyi, ngə ya kusa lətənyi shili da ka, ngə ya nar nyi nə njir gwa'a bikə nyi nda shili wula nyi huɗə ngha.”
31 Ngə ləvaləva inda tə mər wi nda nja nar nda, nda hətə Bulus ga təra nacha ba'a vu Antipatris əvu'i. 32 Zəbiya mbudla ləvaləva taku tə təra na Bulus, ngə alenya ləvaləva inda ɓəl ta nda yo ngakə kənda vu Urshalima. 33 Ləvaləva taku inda yi Kaisariya, ga nənyi Bulus nə ngwamna Felis ga nənyi kainau nda. 34 Ngwamna tə kəratsəntə kainau nda, ngə cha jau Bulus nda hya'atə tə mətla hə'i manə cha. Nda cha ngabiya ənda hya'atə vu Kilikiya cha, 35 cha na, “A da yo səhimi dakə wa kəl ma njir wula nghə tə shili.” Ngə cha tsau Bulus ku cha njir ɓəla ki ngwamna.