3 Vanya zəkə ea dzəva Sidon, kəl Juliyus ku papa'akur nyi nə Bulus cha ngya nyi na laku ka cha kyada ka bazhi nyi ka ga nda gwa'ar nyi sənda cho gwa'a. 4 Tangnda ea ɓəla gwa ku param ea tərabiya tə ya Kubrus tsa gyang nda kwa ka ea tsa ma'i. 5 Nda ea kwa tərabiya tahə fa'a nda ləhə dza hə'i Kilikiya ana Pamfiliya ea ta'i vu Mira nda tə hə'i Likiya. 6 Tangnda dəgal ləvaləva tə uya vanya param nda tə hya'atə vu Alekzandariya kwa təra yi Italiya ga pəu ea kwa. 7 Ea ma'i saməu nə hanyi ɗanghəu, tə ɗa dzaudza'u ea shili ləhə dza Kinidus. Nda a gyang da ngya ea, ea biyama na ma'i ba nda wa, ngə ea təra dzər Kərita ba nda a gyang da gagaɗə wa, ləhə dza Salmoni. 8 Dzaudza'u ea tərabiya ga shili tə vanya mbwa nda gyang kaf ti, nda nja ɓatliya ka fə param ləhə dza mələm Lasiya.

9 Manda ɗinya tə ea bəji, ya ngə ma'i ba ɗa na təmachi aka bəjir fwakə ɗati.^a Ngə Bulus tə təɗə himya nda, 10 “Nji, yo la'a wi ma'i kəmən nə kwa ɗa na təmachi gagaɗa ya kwa gwa'atə param kəmən kwa səwa, məno tar kar nda kwa, ana ma'a pya mən.” 11 Kəl ja, a dəgal ləvaləva nda da səhimi da sənda Bulus tə na wa, a təvəra ənga cha nəu sənda ndər ngiɗə param ana tlakər param kwa na. 12 Manda mbwar ta'i param nda da ɗa ka njo hənda vuya tangnda wa, badəgal nji tə na nja təra biyama, nda kwa fəkər na həya Foniki nda yi hənda vuya hinda. Foniki vanya mbwar ta'i param nga avu Kərita. Nda pyar kushi təwa chisəma təɗər pəchi ana pyar kushi təwa matsala təɗər pəchi.

13 Manda gyang tə ghəya sə kushkush hya'atə təwa holma, nda hari ənda uya tənda sənda nda kwa gwa'a, aka ənga nda təɗətə lyang nda kwa gəzə param ga nəu nya bam nə Kərita. 14 Səkardzə kushu, kəl gyang 'ual'ual tə hya'atə təwa pama vwa ana zədər pəchi, kwa sə tə hə'i nda dəl dəgal tə ɓandə nda. 15 Gyang nda kwa sə 'ual'ual a tsə'u param nda do nau ləkənyi gang wa, ngə ea kur ngyar gyang nda cha mbəla ea. 16 Nda ea nəu tahə vanya hə'i kushu nda dəl dəgal tə ɓandə njo nga Kauda, dzaudza'u ea təɗətə param shili dzər param nda. 17 Manda nda təɗətə param nda gya ku param nda, ngə njir mər tlər param nda tə mbatə param nda na sə'i tsa cho huɓa. Manda nda kwa ləvər tsa nda səya tə hə'i nda ku ndəla ɓiti nə hə'i Sartis, ngə nda həya lyang kasə param ga param ma'i saməu, ga ngyar gyang kwa mbəla nda. 18 Manda gyang nda kwa mbəla ea gagaɗa, vanya zəkə ngə nda ghəya fa'a kar ku param nda nda kwa pənda səyo ɓiti. 19 Pəshir hanyi makərkunyi, ana cha nda nda vakəbiya kar mər tlər nə param. 20 Aka hanyi ɗang pəchi ndara sasəlga da mbəl wa, ya kəl fi gyang par nda kwa fi, ngə ea sənda kər da mbəɗa.

21 Manda səkar tə nda dza a da nda səm sərsum wa, ngə Bulus tə hya'atə ga na, “Mazah, macha nahya nda səhimi da ya, nda ya na ngwa məna ngyar Kərita wa, a da hyo nda gwa ku chul nəna ɓwaɓwatər təmachi ana asar wa. 22 Kəl ja, sakana yo nar hi hya ɗa na tsəɗufəu, aka a ndə zhang da ku pama hi kwa sa wa, kəl param sənyi ngə kwa sa. 23 Əvu'i ənya Hyel nda ya nənyi jiri, ya a nənyi nə ya kwa mər tləra, tə sə Chama nyi shili da ya ga ta'i dzə ɗa 24 ga na, ‘Bulus, ngwa ka ləvər wa. Tuku ko ta'i mar Kaisar ka nəuma, ya a tə dəbar ngha Hyel ku papa'akur nyi cho mbəɗandə ka bazhi ma'i ngha.’ 25 Aka əngə ja nji, ngya ma na tsəɗufəu, aka ana jirikur ya ku Hyel ənda cho ɗa wi ngə cha nar ɗa nga, 26 madangə tuku param kwa səwa tə vanya hə'i nda dəl dəgal tə ɓandi.”

27 Əvu'i pəshir hanyi kwabəfwaɗəkunyi gyang nda kwa mbəla ea tahə fa'a Adiriyatik, kaɗə adala vu'i ɗa njir mər tlər param nda tə ɗari wi ɗatə ea ləhə dza hə'i. 28 Ngə nda dəkətə dzuɗwakəkura ɓiti nda ngə nda la'a kwa ɗa hi gharəu na mətləkumənyi. Səkardzə kushə nda ɓəla dəkətə ngə nda la'a hi dləkumənyi. 29 Aka nda kwa ləvər tsa param da ɓə na fafa, ngə nda həya lyang kasə param fwaɗə biyahi ga gədi Hyel ka vi kusa wura. 30 Nda njir mər tlər param nda kwa gwa'a hwi ta nda, ngə nda həya param nda ga mərtə kərnənda wi nji ngo həya alenya lyang kasə param biyama. 31 Kəl ngə Bulus tə nar nyi nə dəgal ləvaləva nda ana ləvaləva inda, “Macha nji nə da kwa ngya ku param nə wa, a da hyo mbəɗə wa.” 32 Aka ənga ləvaləva inda tə tsətsəɗənda sə'i inda gəziya param nda ga ngyar param nda təra tə ɓiti.

33 Nda kaɗə via wura, Bulus tə gədi nda nda səm sərsuma, cha na, “Hanyi kwabəfwaɗə nani ənya hyo ngya təkəra nda mi kwa ɗa, a da hya səm sə wa. 34 Sakana yo gədi hi hya səm sərsuma, tsa hya da kuɗa. A ndə zhang da ku pama hi nda mada shishir kəra cha zhang kwa sa wa.” 35 Ahir nda cha na ənga, cha hətə gwazhilakə ga mərtə nyi usaku nə Hyel təkəri a manə nda. Kəl ngə cha pastsə ga ghəya kwasa. 36 Kəl ngə dəhə nda tə uya tsəɗufəu, ngə ma'a nanda tə səm sərsuma. 37 Dəhə ea naea nda ku param nda, gharəu mətlə na məɗəfəkumnyi parnya kwah ea. 38 Nda nda səm sərsum ga nyi, nda pənda alkama gu ɓiti ga param nda ɗa kakafəu.

39 Nda via wura, nanda ngabiya nda tə hə'i manə nda wa, kəl ja, nda la'a vanya mbwa na məshishi'ua nya dəl, ngə nda gwa'a nda yi na param nda yi nda macha kwa nau nda. 40 Ngə nda tlanda sə'i lyang kasə param nda ga ngyar ku fa'a, əngə tsəu nda pəlnda sə'i nda kwa gəzə palai param nda. Ngə nda hya'andə pa'ua tlərəm nda biyamar param nda ga gyang mbəla nda, ga dləutsə lakur biya nya bam. 41 Kəl ja, param nda dəgə məshishi'ua ngə kəra cha chiu dzə ku məshishi'ua, nga ɗa tsəu do sha wa, ngə param nda ghəya huɓə biyahi, aka məlləm nda ɓiti nda kwa məra. 42 Ngə ləvaləva inda tə ɓatliya ka nda kuɗənda njir jarum inda tsa mada zhang ku huɗa nda da kibiya kərnyi cha hwi tanyi. 43 Kəl ja, dəgal ləvaləva nda kwa gwa'a cha ngyar Bulus na pi ngə cha katə nda tsa mərtə sənda nda ɓatliya. Ngə cha nar nyi nə nji'inda kwa nau dəl, nda dləgəl səya kyo param nda kibiya biyanya bam. 44 Nji nda həyadzə ku param nda tə biya tə kushishiɓər param nda, aka ənga kala ndə tə mbəɗə biya nya bam yiyinghəu.