5 Kəl ja, alenya njir Yahuda tə ngatə shishi kənda, ngə nda ki tsəmtə nji kawakawa inda kwa ngya tə suku, ngə nda ɗa ka dlama ɗimikur ga ghəya tlə mwali ku mələm. Ngə nda yi dla'a ki Jason nda kwa gwa'a mbwa nda ka Bulus na Sila tə ka ga nda biya na nda mar dlama nji. 6 Kəl ja, manda a da nda uya nda wa, ngə nda səya Jason ana alenya njir nəuwa ga yi na nda mar wawa'ar mələm nda, nda kwa pə kurakəu nda kwa na, “Nji nda kwa tlə mwali ku dəhə dunəya shilitə tangnə sakanə tsəu. 7 Ya janə ma'a Jason dləutsə nda tə ku ki nyi. Dəhə nda kwa ɓəl gadlagadla Kaisar, ana nda kwa na ənda vanya təl da na tləm nyi Yesu.” 8 Nda njir mələm ana wawa'ar mələm tə ngatə ənga, nda mər huɗətla gagaɗa. 9 Ngə wawa'ar mələm inda tə dləutsə kwaba pəlkər tsa Jason ka alenya njir nəu inda ga wuniya nda nda təra.

10 Manda akə tə ɗa, ngə njir nəu inda tə kusa fəu ka Bulus na Sila ku lakur yi Biriya. Nda yi nda, ngə nda təra yo vi pətlənya njir Yahuda. 11 Njir Biriya ndiya tə njir Tasalonika na dləukər səu, aka nda dləutsə mafakə nda ana ɗufəu, nda kwa ngwahi likatəkatə kala bəji ka ga nda la'a ndara, sənda Bulus tə na nda jiri. 12 Njir Yahuda ɗang tə nənyi jiri, əngə ma'a mahi'i njir Heleni inda njo la'a səli kənda, ana shili njir Heleni ɗanghəu.

13 Kəl ja, ma nda njir Yahuda nda vu Tasalonika tə ngatə ənda Bulus kwa bəzə ɓwanya Hyel vu Biriya, ngə nda təra yi nda ga yi tsəkutə nji hinda tsəu, ka nda tliya mwali. 14 Ɗəɗəu tanyi njir nəu tə kusa lənda Bulus gwa nya fa'a, kəl ja, Sila ana Timtawus tə ngya nəkənda vu Biriya. 15 Nji nda tə ma'i na Bulus nda tə təra na cha tsa'a vu Atina, təma ngə nda ɓəl tanda yi Biriya səkəu, ana mafakə hya'atə tsa Bulus yada Sila ana Timtawus ənda nda kusa yi həya nyi ɗəɗəu.

16 Sakanda Bulus kwa səkə ka Sila na Timtawus vu Atina, huɗa cha tə tla ɗimiɗimi aka cha la'a chul katə inda nji kwa həsəli nə nda mada təwabari ku mələm nda. 17 Ngə cha gwa ku vi pətlənya njir Yahuda, ngə nda kwa ɓwanya ka njir Yahuda ana alenya nji'inda pa'a njir Yahuda inda na ləvər Hyel, kala pəchi tsəu anya suku cha kwa kəpal ka nji'inda tangnda. 18 Əngə tsəu nda tlə kəpal ka alenya maləm zəndə sə nə Abikuriya ana Sitokiya. Nda cha dəkar nda Mafakə Mənakə təkəra Yesu ana ənda cha hya'atə ku hwa, ngə nda na, “Mi nə ndə nyanyakər nə kwa gwa'a dəka?” Alenya nji tə na “Cho gwa'a cha ɓwanya təkəra alenya hyel.” 19 Ngə nda təra na nacha gyatə mbwar tsəmdzə nə wawa'a nda njo nga Dəgəl Arasa, ngə nda na, “Kwa nau ka dəkəbiya ea nawa taɗər dlədləɓə nə ko mər nə ya? 20 Alenya sə'ingə eo ngatə ko dəkə nga sər məngəl nda nə ea, ya eo gwa'a ea zəndə ndara mi sənda cha kari.” 21 (Aka dəhə njir Atina ka nji shilishili inda na ngya tangnda, kwa hətə bəji kənda tə mbwar ɓwanya ana səhimi taɗər səu.)

22 Ngə Bulus tə hya'atə mar nji'inda tə tsəmtədzə mar njirawawa'a patla Arasa inda, ga na, “Nahi njir Atina, a la'a təya ənda nahi njir i həsəli nə hyel pampaməu hi gagaɗa. 23 Aka sakanda ya kwa zhuli ya ndzamtə sə'inda hyo həsəli nə nda, ngə ya la'a vanya dzəgana nda nja tsəfətə tsəfə ti, bəra, ‘Anə Hyel nda pa'a njo zəndi.’ Sakana sə nə hyo həsəli nənyi ya a da hya kwa zəndə nyi wa na, nacha nə ya kwa bəzə nə hi.

24 “Hyel nda tə mər dunəya ana dəhə sənda kwa, na cha ngə Tlakə nə huɗamələm ana hə'i, ya a da cha kwa ngya ku vi nda nji tə hər na cha nda wa. 25 Ya a da cha kwa gwa'a madami tsa ndə wa, ndara nja mərtə nyi tlər wa, aka na cha təkərnyi kwa nənyi pi ana səpi ana kala səu, nə dəhə nji. 26 Aku nyandəla ndə zhang ngə cha mərtə dəhə jul njir dunəya, aka nda ngya ku dunəya dəhəu. Na cha təkərnyi tə ɓatliya kala sə na bəji nyi, ana ba ɓələr mbwa nda nda kwa ngya ti. 27 Hyel tə mər ənga aka ga nda gwa'a nyi nda tətəɓa nda tsə'u nda uya nyi, madangə a da cha naɗə tsa kala zhang lya mən wa. 28 Aka aku cha ngə məna kwa ngya, məna kwa ma'i, məna kwa ɗa da. Wi ngə tə alenya miya dəla kəhi tə na, ‘Namən nyandəla cha mən.’

29 “Mangə nyandəla Hyel mən ja, ngwa mən da har ənda Hyel wi bəjingha, ndara wi azurfa, ndara hangu pabiya da sənda ndə tə mər na nau nyi, ana tlalwakur nyi wa. 30 Ku bəji nda nji ku tar zəndi, Hyel da i jiga bikə nda njo mər wa. Kəl ja, nəchana, a tsau nyi tə cha bar nə dəhə nji, mada amani, nda tubi nda ngyar mər səpəla'a. 31 Aka a fiya tə cha pəchir nəumar jiri nyi nə dəhə dunəya, təwa ndə nə cha tabiya na. A char tə cha təkəɗəkura səngə nə dəhə nji təwa hya'andə nyi ku hwa.”

32 Nda nda ngatə ɓwanya təkəra hya'atər nji kuɗəkuɗa, ngə alenya nji ku huɗa nda tə mərtə nyi ɓwanya gwa'a gyaɗi, kəl ja, alenya nji tə na, “Kwa i ea ka ea ngatə sə təkəra sə'ingə səkəu.” 33 A tangnda ngə Bulus tə ngyar daɓədzər njirawawa'a nda, 34 kəl ja, ngə alenya nji tə sha ga daɓətəkər ka Bulus ga ɗaka njir nəuwa. Aku huɗa nda, vanya ndə tləm nyi Diyonisiyus, zhang cha ku huɗa njirawawa'a Arasa nda. Ana vanya mala tləm nyi Damaris, ba'a alenya nji tangnda.