Timtawus tə Nəu ka Bulus ana Sila
16
Ka Bulus tə shili ku mələm Dyarba ahir nga nda təra yo mələm Listra, a hinda vanya ndər nəu da tləm nyi Timtawus. Ama nyi ndər nəuwa ya kwa Yahuda, kəl ja, ada nyi ndər Heleni. 2 Njir nəu inda vu Listra ana Ikoniya kwa fal nyi. 3 Bulus tə gwa'a cha hətə nyi ka cha ləbiya nyi, ngə cha tlanda nyi bədzang aka ga njir Yahuda inda na ngya tangnda la'a nda dləukər na Timtawus, aka zəndətə nda ənda Adanya Timtawus ndər Heleni cha. 4 Nda nda kwa zhuli ka mələm ka mələm, nda kwa dəkə nə njir nəuwa, sənda kə'i changhabal ana wawa'ar njir nəu tə ɓatliya vu Urshalima, ka nda nəubiya. 5 Kəl ngə njir nəu tə tsakətə ɗa na dunama ku jirikur, kəl tsakə nda kwa tsakə ɗangkur kala pəchi.Bulus tə Shi'uni Puchi təkəra Ndər Makidoniya
6 Bulus ka bazhi ma'i nyi tə zhulitə ɓələr hə'i Firijiya ana Galati, aka Shanguɗə Karti tə katə nda tsa nda da gwatə hə'i Asiya ka bəzə mafakə Tlakəu. 7 Manda nda shili tə ɓələr hə'i Misiya, ngə nda mər ka ga nda gwatə hə'i Bitiniya, kəl ja, ngə Shanguɗə Yesu tə katə nda. 8 Kəl ngə nda təra tahə hə'i Misiya, ga təra səya Toruwas mələm nda nya dəl. 9 Əvu'i pəshinda, shi'uni pəchi tə ɗa na Bulus, cha la'a ndər Makidoniya ta'iu, kwa gədi nyi cho na, “Səgwa ku Makidoniya ka ga ka vala ea.” 10 Ahir shi'uni puchi nda, təma ea ɓatliya ka ea təra ya tə hə'i Makidoniya, aka zəndətə ea təkəɗə ənda Hyel ngə tə nga ea ka ga ea yi bəzə Mafakə Mənakə nə nda.
Lidiya tə Nə Nyi Jiri nə Yesu
11 Ngə ea hya'atə ku param vu Toruwas ga təra yi Samotras tahə dəl, vanya zəkəu ea yi Niyapolis. 12 A tangnda ea hya'atə ga təra yi Filibi, tangərmar mələm dəgal nda tə hə'i Makidoniya, nda tə kiɗa təlkur njir Roma, ngə ea ngya tangnda ga hanyar pəchi. 13 Atə Pəchir Ngyaməngya ea biya ku mələm ga təra gwa nya dəl, ndə ea nda tsəu ea uya mbwa nda njir Yahuda kwa pətlənya ti. Ngə ea ngya ga ɓwanya nə mahi'i inda kwa tsəmdzə tangnda. 14 Zhang ku pama njir səhimi da ea na cha ngə vanya malakə na tləm nyi Lidiya, ndər dzədza pa'ua nda nja pugu cha nda njo ɗəl na kwaba 'ualəu, hya'atə vu Tiyatira, ndər həsəli nə Hyel cha. Ngə Tlakə tə mbəɗiya ɗufwa cha ka ga cha səndzə himi mənakə da sənda Bulus kwa dəka ga nənyi jiri. 15 Ahir nja mərtə nyi baɓtisma ka njir ki nyi, ngə cha nga ea, “Anda ma hya shili ngwaɓə ku ki ɗa, ma cha dləukərtə hi ənda naya ndər nəu Tlakə na jiri ya.” Ana ənga cha pətətə ea ngə ea təra.
Nja Tsau ka Bulus na Sila ku Jarum avu Filibi
16 Vanya pəchi nda eo ma'i ya tə vir pətlənya nda, ngə ea ɓə na vanya kwatəra na vanya shanguɗə ku kəra cha nda kwa gwa'atə cho nau dəkə sə'inda kwa ɗa biyama. Kə'i tlakə nyi kwa uya kwaba 'ualəu təwa hakəzə nyi. 17 Ngə cho maka nəu ea naea kə'i Bulus daɓə cho pə kurakəu cho na, “Nji'ina, mavi'i Hyel ndə nda tə Ndiya na Səli ina! Nda kwa bəzə nə hi ənda hya kwa ɗana mbəɗa!” 18 Əngə tanyi cho na ənya əzəkəu. Kəl ngə huɗa Bulus tə tla, ngə cha sha ga nar nyi nə kwadzaɓi nda, “Aku tləmər Yesu Kəristi yo nar nghə ka biya ku cha!” Təma kwadzaɓi nda təkə nacha.
19 Manda hyanjinyi tə la'a ənda lakur uya kwaba tsə'u da wa, ngə nda səya ka Bulus na Sila ga mbəlatə nda ya tə suku ya mar njir nəuma. 20 Nda nda shili mar njir nəuma, nda na, “Nji'ina, njir Yahuda ina, ya janə nda kwa gwazhiya mən mələm kəmən. 21 Nda kwa dlədləɓə chul ngya inda gadlagadla kəmən tə katə namən njir Roma tsa dləukəri, ndara məna məra.”
22 Təma ngə dlama nji'inda dəhə tə ghəya daɓəsar təkəra nda, ngə njir nəuma inda tə tanda ləkutə dzər ka Bulus na Sila ga na, nja dəgə nda na zəwa. 23 Ahir nda pətlənda nda parahu, ngə nja vakəu nda gu jarum, ga tsau nyi bar nə ndə nda təkəra jarum nda, ənda cha ɓəla nda mənakəu. 24 Manda cha uya ngəna tsaubar, ngə cha təra na nda da'u da gwa, ga tsau nda ku gang.
25 Adala vu'i ka Bulus na Sila kwa pətlənya nda kwa na miya fal Hyel, alenya nji'inda tə mba ku jarum nda tsəu kwa səhimi da nda. 26 A tləkər da wa kəl hə'i tə dzədzi ga ngəngəɗətə hyavi jarum nda. Ɗəɗəu tanyi dəhə nyavi jarum nda tə mbəɗa, ngə dzəra lyang nda nja mbiya dəhə nji nə ku jarum nda tə tlətla. 27 Ndə nda təkəra jarum nda tə hya'ati, manda cha la'a nyavi jarum inda banghəu, ma cha fiya dəhə nji'inda ku jarum nda hwibiya ti, kəl ngə cha təsəbiya katsakər nyi cho gwa'a cha tsəya kərnyi.a 28 Kəl ja, Bulus tə har kurakə ga nar nyi, “Ngwa ka da takasiya kərnghə wa! Janə ea kəchipəu ku na!”
29 Ngə ndə nda təkəra jarum nda tə na nja shili na təkəsəu, ngə cha gwa na hwi ga bəzənda kərnyi mar ka Bulus na Sila daɓə dza cha kwa tsamətlaɗəu aka ləvəra. 30 Ngə cha təra na nda biya ga na, “Kə'i aləvara, mi sənda ya kwa mər ka ga ya uya mbəɗa?”
31 Ngə nda wum ga na, “Nənyi jiri nə Tlakə Yesu, ko uya mbəɗə dəhə hi ka njir ki ngha.” 32 Ngə nda dəkətə nyi mafakə təkəra Tlakəu, ana nə dəhə nji'inda ku ki nyi. 33 Ku bəji nda tanyi əvu'i nda ndə nda təkəra jarum nda tə təra na nda ga chinda nda kəti dəgə inda. Ɗəɗəu tanyi nja mərtə nyi baɓtisma dəhə nda kə'i njir ki nyi. 34 Ngə cha təra na ka Bulus na Sila yo ki nyi ga yi nə nda sərsuma. Na cha ka njir ki nyi dəhə nda kwa mər hirgyaɗi gagaɗa aka nda nənyi jiri nə Hyel.
35 Manda vi tə wura ngə njir nəuma inda tə sə ləvaləva kənda yi nə dəgalər njir ɓəla jarum nda bəra, “Wunda ma nji nga nda təra.” 36 Kəl ngə ndə nda təkəra jarum nda tə nar nyi nə Bulus, “Njir nəuma tə na ənda nja wunda hi naka ana Sila, sakana hyo nau təra. Ma'i ma ku piyarɗufəu.”
37 Kəl ngə Bulus tə nar nyi nə ləvaləva inda, “A mar nji a tə babal nda dəgə ea, ga vakəu ea ku jarum, ya a da nja tlanda ea nəuma wa, madangə njir Roma ea wa. Nacha nə nda kwa gwa'a ka nja wuniya ea tə ɗəuwa? Abada! Nda shili na kərnənda, nda shili ləbiya ea biya.”
38 Ləvaləva inda tə ɓəl ga yi dəkar nyi ɓwanya nda nə njir nəuma inda. Manda nda ngatə ənda ka Bulus na Sila njir Roma inda, ngə ləvəra səya nda. 39 Kəl nda yi ga yi gədi farbikə tsa nda, ga ləbiya nda biya ku jarum nda, ga gədi nda, nda ngyar mələm nda. 40 Ka Bulus na Sila tə ngyar jarum nda, ga təra yo ki Lidiya. A hinda nda ɓə ka njir nəu inda, ga tsətə nda ɗufəu. Kəl ngə nda ngyar mələm nda.