Daɓədzə vu Urshalima
15
Alenya nji tə shili hya'atə vu Yahuda dzəva Antakiya nda kwa dlədləɓə nə njir nəu inda pa'a njir Yahudiya ənda, “Kəl nja tlanda nghə bədzang wi sənda Musa tə na, ko dzugwa uya mbəɗa.” 2 Ka Bulus na Barnabas tə gwa ku kəpal gagaɗa ka nda təkəra gəna səu, ngə nji'inda vu Antakiya ɗəmtsə ka Bulus na Barnabas daɓə alenya njir nəuwa, ka nda təra yi Urshalima, yi da kə'i changhabal ana njirawawa'a təkəra ngəna jawa. 3 Ngə njir nəu tə səu nda ku laku. Sakanda nda kwa ma'i tahə Finikiya ana Samariya, nda kwa dəka təkəɗər ənda nji'inda pa'a njir Yahuda tə ɗa ka njir nəuwa. Nəna ɓwanya tə nənyi hirgyaɗi 'ual'ual nə dəhə njir nəuwa. 4 Nda shili nda vu Urshalima, kəl ngə njir nəuwa ana kə'i changhabal, ka njirawawa'a, tə dləutsə nda, ngə ka Bulus tə dəkar nda dəhə sə inda Hyel tə mər təwanə nda.5 Kəl alenya njir nəu inda ku dzuk njir Farisi tə hya'atə fwatə ga na, “Tuku kəl njir nəu inda pa'a njir Yahuda tlanda bədzang, ana nja nar nda nda ɓəlatə gadlagadla Musa.”
6 Kəl ngə changhabal inda ka njirawawa'a tə daɓa, ka nda ndzam sə təkəra nəna jawa. 7 Ahir nda ɓwanya nə bəji 'ualəu, ngə Bitrus tə hya'atə ga ɓwanya nə nda, ga na, “Kə'i zamə ɗa, a zəndətə hi ənda ɗəɗəməu Hyel tə tabiya ɗa ku huɗa hi ənda təwa ɗa nji'inda pa'a njir Yahuda kwa ngatə Mafakə Mənakəu, nda nənyi jiri. 8 Ya Hyel nda kwa zəndə ɗufwa ndə char mən tə ənda dləutsə nda tə cha təwa nənda Shanguɗə Karti, tang wi nda cha nə mən. 9 A da cha takəl ku pama mən kə'i nda wa, aka cha chibiya ɗufwa nda təwa jirikur tang wi nda cha chibiya ɗufwa mən təwa jirikur. 10 Aka əngə ja ya, mya gwatə hyo gwa'a dzə Hyel na fəkənyi sə tədəɓə nə njir nəu nda pa'a njir Yahuda, nda mada ajin mən ndara kərnəmən da kwa nau hətə wa? 11 A da əngə kwa kina ɗa wa! A nənyi təmən jiri ənda təwa ɗanghali Tlakə Yesu ngə məna uya mbəɗə tang wi ngə nda uya nga.”
12 Dəhə nji'inda tə daɓə tangnda tə bəgə shwanghəu nda kwa səhimi nda ka Barnabas na Bulus kwa dəkə səshinshin ana sər məngəl inda Hyel tə mər təwanə nda ku pama nji'inda pa'a njir Yahuda. 13 Nda nda wurandə ɓwanya, ngə Yakubu gau Ikələsiya nda vu Urshalima tə na, “Səya ma himi ka zama! 14 Shiman dəkəbiya mən tə ənda Hyel tə ghəya char nyida təwa tabiya nji ku huɗa nji'inda pa'a njir Yahuda ka kərnyi. 15 Səna ɗa na nji'inda pa'a njir Yahuda nə ngə təkəɗər sənda njir mətakər Hyel tə ɓwanya təkəri, wi nda cha tsəfətsəfə nyi,
16 ‘Tlaka na, a biyama yo ɓəl shili
ya kwa ɓəla hərtə kwapatəa Dauda nda dla nda.
Madangə dlatə cha,
yo ɓəla hərti, ətsəu ya kwa ɓəlandi.
17 Məlna həyadzər njir dunəya dəhə kwa gwa'a Tlakəu,
ana dəhə nji'inda pa'a njir Yahuda
inda ya nga ka nda ɗa ka na'a.
18 Əngə Tlakə tə na, ndə nda tə chabiya chul nəna sə ɗəɗəməu.’ ”
19 Yakubu tə biyama na ɓwanya ga na, “Na'a wa jigadəma nga, aka ənga ngwa mən da wendə nji'inda pa'a njir Yahuda inda kwa sha shili da Hyel wa. 20 A təvəra ənga, mən tsəfətə nda, mən nar nda, ngwa nda da səmə sərsum nda nja tla katə nə wa, nda ɓəlatə kərnənda tsa kasalikur, ngwa nda da ɗə sərshishi nda nja ndaləkər wulya wa, ya ngwa nda da səm mashi wa. 21 Aka ɗəɗəməu, kwa dlədləɓə nji gadlagadla Musa ku dəhə mələm, ya ba'aka sakana kwa kəratsən nji ku vi pətlənya kala Pəchir Ngyaməngya.”
Kainau nə Nji'inda Pa'a Njir Yahuda inda kwa Nəu Yesu
22 Kəl ngə kə'i changhabal ka njirawawa'a, ana dəhə njir nəuwa, tə ɓatliya ənda nda ɗəmtsə alenya nji ku pama nda, nda sə yi Antakiya tsa'a na kə'i Bulus na Barnabas. Ngə nda tabiya shili mətlə nda njir nəu kwa la'a səli kənda, Yahuda nda njo nga Barsabas, ana Sila. 23 Ngə nda sə nda na mafakə inənna:
“Hya'atə tsa naea changhabal, njirawawa'a, ka zamən hi, Yada nji'inda pa'a njir Yahuda nda kwa nəu vu Antakiya, Suriya ana Kilikiya.
“Ea kwa usa hi.
24 “A ngatə təea ənda alenya nji'inda ku pama ea tə yada hi nda a da naea tə sə nda wa. Nda yi wendə hi, ga səwandə jigadəma kəhi na sə'inda nda kwa pəa. 25 Aka ənga dəhə ea dləukərtə ənda ea ɗəmtsə nji, ea sə nda yada hi, tsa'a na ka bazhi nə mən nda məno nyida ka Barnabas ana Bulus, 26 nji'inda tə sənda pya nda ka mər tlər Tlakən mən Yesu Kəristi. 27 Janə eo sə tə hi Yahuda ana Sila tsəu, nji'inda kwa dəkar hi nya na nya, tang wi sə ngə ea tsəfətə hi nga. 28 A ɗatə mənakə nə Shanguɗə Karti ana nə ea, ngwa nja tso fəkəhi sə tədəɓə matsa tsaubar yiɗau inda hyo kina nəubiya inə wa. 29 Ngwa hya səm sərsum nda nja tla katə nə wa, ngwa hya da səm mashi wa, ngwa hya da ɗə sərshishi nda nja ndaləkər wulya wa, hya ɓəlati kərnəhi tsa kasalikur. Ma hya ɓəlati kərnəhi tsa sə'inga hyo ngya mənakəu.
“Kəl vanya pəchi.”
30 Ngə nji'inda nja sə na mafakə inda tə hya'atə ga təra yi Antakiya, a hinda nda tsəmtə njir nəu inda, ga nənda tsəfətsəfər mafakə nda. 31 Nda nji'inda tə kəratsənti, ngə nda mər hirgyaɗi na chul nda wa tsəɗufəu. 32 Ka Yahuda na Sila nda ma'a nanda ma'a njir mətakər Hyel nda, nda ɓwanya ɗanghəu, nda kwa tsəɗufəu ana tsakə dunama nə njir nəuwa. 33 Ahir nda hanyar pəchi hinda, ngə njir nəu inda tə səu nda ku laku na piyarɗufəu, ngə nda ɓəl yada nji'inda tə sə nda inda. 34 b 35 Ka Bulus na Barnabas tə hanyar pəchi vu Antakiya, nda kwa dlədləɓə ana nda kwa bəzə Mafakə ɓwanya Tlakəu na nda ka alenya nji.
Bulus ana Barnabas tə Təkə Ma'i
36 Ahir nda hanyar pəchi, Bulus tə nar nyi nə Barnabas, “A mi'i ɓəl yahi, ma ki usar njir nəu nda ku kala mələm inda ma bəzə ɓwanya Tlakə kwa, ma la'a ndara ama ɗa nda.” 37 Barnabas tə gwa'a nda ma'i ka Yohana nda njo nga Markus. 38 Kəl ja, Bulus tə ta'i təkəra a da nda kwa ma'i kə'i cha wa, aka haaɗa cha ngya nda vu Pamfiliya, a da cha biyama na mər tlər nda kə'i nda wa. 39 A tangnə ngə kəpal tə gwa ku pama nda gagaɗa, ngə nda təkəbiyadza. Barnabas tə hətə Markus, ngə nda gu param ga təra yi Kubrus, 40 kəl ja, Bulus tə tabiya Sila nda təra, ngə njir nəu tə tsau nda ku cha Tlakəu. 41 Nda ma'i tahə Suriya ana Kilikiya, nda kwa tsakə dunama nə njir nəuwa aku jirikur.