Bulus avu Korinti
18
Ahir nga, Bulus tə ngyari Atina ga təra yi Korinti. 2 A hinda cha ɓə na vanya ndər Yahuda tləm nyi Akila, ndər hə'i Buntus, təka shili nda cha hya'atə tə hə'i Italiya, nanda na mala nyi Bəriskila, aka Kalaudiya təl Roma tə tsau nyi bar nə dəhə njir Yahuda nda ngyar hə'i Roma. Ngə Bulus tə təra yi da nda. 3 Bulus tə ngya, ka mər tlər kə'i nda, manda ndər ɓatlə madləɓa cha wi nda tə nda. 4 Kala Pəchir Ngyaməngya Bulus kwa ɓwanya ku vi pətlənya njir Yahuda, cha kwa gwa'a cha gadlətə njir Yahuda ka njir Heleni dəhəu nda dləukər nda shili da Kəristi.5 Nda ka Sila na Timtawus tə shili hya'atə vu Makidoniya, Bulus tə fiya bəji nyi dəhə ka bəzə ɓwanya Hyel, cho chabiya nyi nə njir Yahuda ənda Yesu ngə Kəristi. 6 Kəl ja, manda njir Yahuda tə kəpalnda nyi ga ngəlnda nyi, ngə cha dəgənda bərbər tə dzaki nyi ga na, “Dəhə sənda uya hi, na hya gwa'a, a na'a da kwa wa! Fwatə ənya, yo ma'i taa ɗa kya da nji'inda pa'a njir Yahuda.” 7 Kəl ngə cha ngya nda ga ma'i tanyi yo ki vanya ndə nda pa'a ndər Yahuda ana tləm nyi Titus Yustus, ndər nəu Hyel, nda na ki nyi ləhə dzər vi pətlənya njir Yahuda. 8 Kiribus, ndə nda təkəra vi pətlənya njir Yahuda nda, tə nənyi jiri nə Tlakəu, na cha ka njir ki nyi dəhəu, ɗang tanyi tsəu ku huɗa njir Korinti inda tə ngatə ɓwanya Bulus nda, tə nənyi jiri ngə nja mər tənda baɓtisma. 9 Vanya vu'i ku shi'uni pəchi, Tlakə tə nar nyi nə Bulus, “Ngwa ka da ləvər wa, pə tangha ɓwanya, ngwa ka da bəgə wa. 10 Aka tsa'a ya naka, ya ndə da kwa nau pa nghə ndara cha takasiya nghə wa, aka na'awa nji da ɗang ku mələm na.” 11 Kəl ngə Bulus tə ngya tangnda fa zhang na manyi, cho dlədləɓə ɓwanya Hyel nə nda.
12 Manda nja fiya Galiyo ka ngwamna hə'i Akaya, ngə njir Yahuda tə daɓətəkər ga səya Bulus ga yi nacha huɗə ngwamna ka nja mərtə nyi nəuma. 13 Nda na, “Ndə na, kwa dlədləɓə nə nji, nda nəu Hyel ku laku nda a da tsa'atsa'a na gadlagadla wa.”
14 Nda Bulus kwa gwa'a ɓwanya, ngə Galiyo tə nar nyi nə njir Yahuda, “Macha təkəra zazaɓəkur ndara bikə dəgal ngə hya wula nyi, yo nda səhimi da hi. 15 Kəl ja, mangə kəpal tanyi ngə hyo mər təkəra ɓwanya ana tləm ana gadlagadla kəhi, ɓatliya ma səkə hi na kərnəhi. A da yo ɗa ka ndər tla nəuma təkəra chul ngəna sə wa.” 16 Ngə cha gədləbiya nda ku vi nəuma nda. 17 Kəl ngə dəhə nda tə sha ya kəra Sostanis gau vi pətlənya, ga dəgə nyi mar vi nəuma. Ya a Galiyo da shau nda wa.
Bulus tə Ɓəl Yi Antakiya ku Hə'i Suriya
18 Bulus tə səkardzə vu Korinti. Kəl ngə cha ngyar njir nəu ga təra yi Suriya ku param, na nda ka Bəriskila ana Akila. Təvi nda ma'i ngə Bulus tə sənda shishir kəra cha vu Kankiriya aka salkur nda cha hətə. 19 Ngə nda dzəva Afisa, tangnda Bulus tə ngyar ka Bəriskila ana Akila. Tsə'u tanyi hinda ngə cha gu vi pətlənya, ga gwa ɓwanya ka njir Yahuda. 20 Nda nda gədi nyi cha tsakətə səkardzə ka nda, cha ngyari. 21 Kəl ja, nda cho təra ngə cha na, “Yo ɓəl shili ma Hyel tə i.” Kəl ngə cha ngyar Afisa ku param. 22 Nda cha shili Kaisariya, cha təra ga gi Urshalima ga usar njir nəuwa ngə cha təra səya Antakiya.
23 Ahir cha səkardzə vu Antakiya, Bulus tə ma'i ka mbwa ka mbwa ku dəhə hə'i Galati ana Firijiya cho tsəɗufəu nə njir nəuwa.
Apolos tə Bəzə Mafakə avu Afisa
24 Əngə tsəu vanya ndər Yahuda na tləm nyi Apolos ndər Alekzandariya tə shili Afisa. Ndər nau ɓwanya cha, ndər zəndə Likatəkatə cha gagaɗə tsəu. 25 A uyatə cha dlədləɓə ku lakur Tlakəu, ya cho ɓwanya nə nji tsəu na dunama, cho dlədləɓə nə nji təkəra Yesu a da na dalatsən wa, madangə kəl baɓtisma nə Yohana tanyi zəndə cha. 26 Ngə cha ghəya ɓwanya ku vi pətlənya a da na ləvər wa. Manda ka Bəriskila ana Akila tə ngatə ɓwanya nyi, nda nga nyi gu ki kənda, ga dəkəbiya nyi lakur Hyel mənakəu.
27 Manda Apolos tə i cha yi Akaya, njir nəu tə tsətə nyi ɗufəu ga tsəfətə nyi kainau nə njir nəu nda hi Akaya nda dləutsə nyi. Nda cha yi, cha ɗa na vala 'ual'ual nə nji'inda nənyi jiri təwa ɗanghali Tlakəu. 28 Cha chiya njir Yahuda ku kəpal a mar nji, cho char təkəɗə ku Likatəkatə ənda Yesu ngə Kəristi.