4 Ngə cha ulə hwa'a ya təkəra Chama Hyel nda ana ləvəra ga na, “Mi ja Tlakəu?”

Ngə Chama Hyel nda nar nyi, “Hyel dləutsətə pətlənya ngha ana ga'a nghə i'i anə nji ɗaliɗali ga ɗənghatə naka. 5 Sə alenya nji yi Yafa nəchana, nda yi ngar nghə vanya ndə hinda tləmən nyi Shiman Bitrus. 6 Mihiɓi cha ku ki vanya ndər dəɗə chi, tləmən nyi Shiman, ana ki nyi ləhə nya dəl.” 7 Ngə Chama Hyel nda tə təra, kəl Karniliyus tə nga mətləu ku huɗa mavi'i nyi daɓə ləvaləva nda na ləvər Hyel patləu, ndə nda ləhə dzə nyi. 8 Nda cha dəkəbiya nda dəhə səu, cha sə nda yi Yafa.

9 Vanya zəkəu, manda ku lakur ma'i, kaɗə nda yi Yafa, ngə Bitrus tə təra gyo kəra pakə vi nda nja dzəɓəti, upəchi ka cha pətlənya. 10 Ngə cha ngatə huɓə kwa tə nyi, tsə'u tanyi nja kwa mər sərsuma nənyi, ngə hanyi tə har nyi. 11 Cha la'a wi huɗamələm tə wuna, daɓə cha la'a səu wi pahuɗə tlərəməu, nja mbatə sə'i tə ngum fwaɗə nyi njo lə səya tə dunəya. 12 Akwa nja tsəməu səu pipi pampaməu, sər hi fwaɗə ana sər təɗə na ta, ana eakə i'i. 13 Ngə kurakə tə na nyi, “Hya'atə zah Bitrus, ka tsəya ka ɗəa!” 14 Kəl ngə Bitrus tə na, “Abada Tlakəu! Naya taa ɗə sə hiɗahiɗa wi inən nə wa.” 15 Ngə kurakə nda ɓəla nar nyi, “Ngwa ka da nga kala səu nda Hyel tə mərtə chaməu, ka sə hiɗahiɗa wa.” 16 Sənda ɗa zhaka makərəu, ngə nja tsənda pahuɗə nda shi huɗamələm səkəu.

17 Ma Bitrus tsəu kwa mər məngəl təkəra ndara mi ba'adar sə inda cha la'a nda, kəl nji'inda Karniliyus tə sə inda tə uya mbwa nda ki Shiman ti, ngə nda ta'i nya nyaki. 18 Ngə nda jawa, “Mihiɓi da ku ki nə na tləm nyi Shiman Bitrus ya?” 19 Tsə'u tanyi Bitrus kwa jigadəma təkəra ndara sər mi inda cha la'a inda, ngə Shanguɗə Hyel tə nar nyi, “Janə nji makər kwa gwa'a ngha. 20 Hya'atə ka təra səya hu'i, ngwa ka da dzədzə tsa ma'i ka nda wa, aka naya ngə tə sə nda.” 21 Ngə Bitrus tə səya ga nar nyi nə nji'inda, “Naya ngə ndə nə hyo gwa'a na. Mya shili na hya?”

22 Ngə nda wum ga na, “Karniliyus dəgalər ləvaləva nə tə sə ea. Na cha ndər mər sə tsa'atsa'a cha, ndər ləvər Hyel nda dəhə njir Yahuda kwa la'a nyi na səli. Chama Hyel tə nar nyi cha nga ngha yo ki nyi, aka ga cha ngatə sənda ko dəkar nyi.” 23 Ngə Bitrus tə nga nji'inda gu ki ka nda hənda hanyi.

Vanya zəkəu, cha hya'atə ga təra ka nji'inda, alenya njir nəu inda vu Yafa tə ma'i kə'i nda. 24 Vanya zəkə ngə ndə həya Kaisariya. Karniliyus kwa səkə nda, nanda ka njikə nda ka alenya bazhi nyi inda cha nga. 25 Nda Bitrus kaɗə gu ki, ngə Karniliyus tə səya kupərkə ma nyi cho həsəli nyi. 26 Kəl ja, ngə Bitrus tə hya'andə nyi ga na, “Hya'ati, aka naya kərɗa ndə ya wi naka.”

27 Manda nda kwa təra gu ki, Bitrus kwa ɓwanya na cha, cha həya nji ɗang ku ki nda tə tsəmtədza. 28 Ngə cha nar nda, “Nahi təkərnəhi a zəndətə hi chakəu ənda a lakur nəu Hyel ndər Yahuda da ngya nyi cha daɓəkər ka nji shilishili ndara cha yi dzən nda wa. Kəl ja, Hyel ngə tə char ɗa ənda ngwa yada nga madawa sə hiɗahiɗa wa. 29 Na cha ngə ja, nda hya səndzə ɗa nji, naya ɗa tsari wa, jan ya shili ti. Ya kwa jau hi ja ya, mi sənda gwa'atə hya nga ɗa?”

30 Ngə Karniliyus tə na, “Fwaɗə ngə hanyi cha, tangnə tə vi ti, ya kwa pətlənya ku vi ɗa a ba puchi a tə bəji saka makərəu. Kəl ngə ya la'a vanya ndə ta'i ma ɗa ana dzaki kwa mbəl dzə nyi. 31 Ngə cha nar ɗa, ‘Karniliyus! Hyel ngatə tə pətlənya ngha, ga la'a tlər ga'a nda ka mər nə nji ɗaliɗali. 32 Sə vanya ndə yi Yafa nja yi ngar nghə vanya ndə hinda ana tləm nyi Shiman Bitrus. Cha kwa mər mihiɓikur ku ki vanya ndə na tləm nyi tsəu Shiman ndər dəɗə chi, ana ki nyi ləhə nya dəl.’ 33 Na cha ngə tə gwa'atə ja ya kusa sətə nghə nji, ana mənakəkur ngha janə ka shili ti. Nəchanə ja, janə ea tsəmtə tə dzə dəhə a mar Hyel, aka ga ea ngatə sənda Tlakə tə nar nghə ka dəkar ea.”

34 Bitrus tə ghəya ɓwanya ga na, “Nəchana a zəndətə ya, ənda vəlvəl Hyel da kwa tazhira wa, laku zhang cha kwa nəu na dəhə nji. 35 Kala nji'inda kwa ləvər nyi ga mər sənda tsa'atsa'a, Hyel kwa dləutsə nyi mada ku jul nji manə biya cha. 36 A zəndətə hi mafakə nda Hyel tə sətə nyi nə njir Isra'ila, ənda piyarɗufəu tə shili təwa Yesu Kəristi nda Tlakə nə dəhə nji. 37 A zəndətə hi tsəu dəhə sə'inda tə ɗa tə hə'i Yahudiya ghəya vu Galili ahir nda Yohana tə ghəya bəzə mafakə təkəra baɓtisma. 38 A zəndəti hi ənda Hyel tə nyandə Yesu ndər Nazarat na Shanguɗə Karti ana gyalkur. Ngə cha ma'i mada abari cho mər mənakəkur, ana cho mbandə nji'inda sərtakə tə uya gyalkur təkəra nda, aka Hyel tsa'a nacha.

39 “Na ea ngə tə la'a sə'inda cha mər tə hə'i njir Yahuda ana vu Urshalima. Nda kukwanda nyi kyatə taməngəla ga tsəya nyi. 40 Kəl ja, Hyel tə hya'andə nyi ku hwa ana pi a tə pəchir makərkunyi, ka ga nja la'a nyi, 41 a da dəhə nji wa, kəl na ea inda Hyel tə ɗaka ɗəmtsi. A ngya tə ea ga səm sərsum kə'i cha ahir cha hya'ati ku hu na pi. 42 Cha nar ea ənda ea ki bəzə Mafakə Mənakə nə nji, ga ea dəkar nda ənda nacha ngə ndə nda Hyel tə fiya ka ndər tla nəuma, nə nji'inda na pi ka nji kuɗəkuɗa. 43 Dəhə njir mətakər nə Hyel tə ɓwanya təkəra cha ga na ənda kala ndə nda tə nənyi jiri cho uya farbikər səpəla'a təwa tləm nyi.”

44 Tsə'u tanyi Bitrus kwa ɓwanya, ngə Shanguɗə Karti tə səya təkəra dəhə nji'inda kwa səhimi da ɓwanya nda. 45 Njir Yahuda inda kwa nəu Yesu tə hya'atə vu Yafa kə'i Bitrus tə mər məngəl, ənda Hyel kwa nənyi Shanguɗə Karti ma'a nə nji shilishili. 46 Aka nda ngatə ənda nda kwa ɓwanya na alenya nya nda pa'a nda kwa ngati, ana nda kwa fal Hyel. Ngə Bitrus tə ɓwanya ga na; 47 “Nji inən dləutsətə Shanguɗə Karti tsəu, tang wi nda məna dləutsi, ndər katə tsa njo mərtə nda baɓtisma na ɓiti da ya?” 48 Kəl ngə Bitrus tə na, nja mərtə nda baɓtisma ku tləmər Yesu Kəristi. Ahir nga, nda gədi nyi cha hanyar pəchi kə'i nda təvi cha təra.