5 Ndə cha “Nakə wa ngə ja Tlakəu?”

Ngə kurakə nda tə na, “Naya Yesu ndə nə ko ɗa məndza'u nə na. 6 Kəl ja, hya'ati, ka təra gu mələm, kunda ngə njo gwa dəkar nghə sənda yo i ka məra.”

7 Nji'inda kwa ma'i ka Shawulu nda tə ta'i hinghəu, na nda uya sər shau wa, kwa ngatə nda kurakəu, ya na nda la'a ndə wa. 8 Nda Shawulu tə hya'atə hu'i nda, ma cha wuniya lya cha, a tsə'u cho la'a sə wa. Kəl ngə nda gəzəya cha cha ga ma'i na cha gu Dimaska. 9 Cha hanyi makər a cho la'a səu wa, a cho səm səu wa, ya a səda sa cha wa.

10 Sakanda, vanya ndər nəu da na ngya vu Dimaska tləm nyi Hananiya. Ngə Tlakə tə shili da cha ga na, “Hananiya!”

Ngə cha wum ga na, “Jan ya Tlakəu!”

11 Ngə Tlakə tə nar nyi, “Hya'atə ka təra yo laku ngə njo nga ‘Laku Tandar’ nga, ka gwa'a ki Yahuda, ka jau vanya ndəu da tə hya'atə vu Tarsus tləm nyi Shawulu. Jan cha kwa pətlənya sakana, 12 aka a char nyi təya ənda vanya ndə tləm nyi Hananiya tə shili ga fəkənyi chi, ga lya cha mbəɗə cha la'a səu.”

13 Ngə Hananiya tə wum ga na, “Tlakəu, ɗang nji'inda tə ɓwanya na'a təkəra ndə nga, a təkəra chul ɗimikur nda cha mər nə njir nəu ngha avu Urshalima. 14 Ya jan cha shili vu Dimaska ana gyalkur nda dləutsə cha tsa wawa'ar fərist ka cha səya dəhə nji'inda kwa nga tləm ngha.”

15 Kəl ja, Tlakə tə nar nyi, “Ma'i, aka a wurtə ya tabiya nyi ka mər tlər ɗa, nacha ngə kwa dəkar nyi tləm ɗa nə nji shilishili, ana nji təltəl, ana nə njir Isra'ila. 16 Naya təkərɗa tsəu kwa char nyi dəhə ɓwaɓwatə nda cha kwa sa a tə nyar tləm ɗa.” 17 Ngə Hananiya təra yo ki nda, ga gwa fəkə nyi chi. Cha na, “Zamə ɗa Shawulu, Tlakə Yesu ndə nda chabiya nghə kərnyi sakanda kə ku lakur shili tə nda nga sə ɗa shili da ka, ka ga ka la'a səu səkəu, ana ga Shanguɗə Karti nyandə ngha.” 18 A tangnda tanyi vanya sə wi lilibi ya kalfi tə pəpə kyatə lya Shawulu, ngə lya cha tə mbəɗə cho la'a sə charasəu. Ngə cha hya'ati, nja mərtə nyi baɓtisma. 19 Ahir nda cha səm sərsuma, ngə dunama nyi tə ɓəl shili. Cha hanyar pəchi avu Dimaska na nda ka njir nəuwa. 20 Təma cha yi gwa ku vi pətlənya nə njir Yahuda, ga ghəya bəzə ənda Yesu Zər Hyel nga.

21 Dəhə nji'inda tə ngatə nyi kwa mər məngəl ana nda kwa jawa, “A ndə nə nda vu Urshalima kwa dlə njir nəu Yesu wa ya? A da na cha nda tə shili tangnə tsəu aka ga cha fa'atə nda tə sə'i cha yi na nda nə wawa'ar fərist ma?” 22 Kəl ja, Shawulu tə tsakətə uya dunamar bəzə Mafakə Mənakəu, ngə cha chabiya nyi nə njir Yahuda inda na ngya vu Dimaska, ənda Yesu ngə Kəristi. Ya a da nda nau kəpaliya nyi wa.

23 Ahir hanyi ɗanghəu, njir Yahuda tə tsəmtədza, ga haɓətə ənda nda kwa tsəya Shawulu, 24 kəl ja, ngə nja dəkar nyi sənda nja haɓətə a nyandəla Shawulu. Vu'i na pəchi nda kwa ɓəla nyi ku lakur gwa ku mələm ka ga nda tsəya nyi. 25 Kəl ja, a ba vu'i ka shawa Shawulu tə hya'ati ga hətə nyi ga fəu nyi ku tsəla ga lətənyi biya təwa vanya fwanghə tə ɓangtili mələm nda ana sə'i.

26 Manda Shawulu tə yi Urshalima, ngə cha gwa'a ka cha daɓətəkər ka njir nəuwa, ləvər kwa tənda tsa cha aka a da nda nənyi jiri ənda ndər nəu cha wa. 27 Kəl ngə Barnabas tə yi na cha da changhabal Yesu inda. Ngə cha dəkar nda ənda Shawulu tə la'a Tlakə ku lakur yi Dimaska, ana ənda Tlakə tə ɓwanya na cha. Ngə cha dəkar nda tsəu ənda Shawulu tə ɓwanya ku tləmər Yesu vu Dimaska ba'akərtəyi. 28 Aka əngə Shawulu tə ngya kə'i nda ga zhulitə Urshalima dəhə kwa ɓwanya aku tləmər Tlakə ba'akərtəyi. 29 Cha ɓwanya ga kəpal ka alenya njir Yahuda nda kwa ngatə nya njir Heleni, ngə nda gwa'a ka nda tsəya nyi. 30 Nda njir nəu tə ngatə ngəna səu, ngə nda təra na Shawulu yi Kaisariya, ngə nda yi lənda nyi yi Tarsus mələm yah nyi.

31 Sakanda ngə njir nəu a tə hə'i Yahudiya, ana Galili, ba'a Samariya tə uya piyarɗufəu. A təwa vala nə Shanguɗə Karti nda uya dunama ga tsakə ku ɗangkur, nda kwa ngya tsəu ku ləvər Tlakəu.

32 Bitrus tə zhulitə mbwa pampaməu, ngə vanya pəchi cha yi Lidda, ga cha yi usar njir nəuwa. 33 A hinda cha həya vanya ndəu tləm nyi Iniyas, shiləkə tə tsəya dza cha, fa chisəu a da cha kwa nau sha tə sərpiya wa. 34 Ngə Bitrus tə nar nyi “Iniyas, Yesu Kəristi mbandə nghə ti. Hya'atə ka pəɗətə sər biya ngha.” Ɗəɗəu tanyi Iniyas tə hya'ati. 35 Dəhə nji'inda na ngya vu Lidda ana Sharon tə la'a nyi, ngə nda sha yada Tlakəu.

36 Avu Yafa vanya malakə nda tləm nyi Tapita, ndər nəu cha (Tləm nyi ku nya njir Heleni Dokas). Ku dəhə ngya nyi kəl tlər mənakəkur cho mər ana vala nji butəbutəu. 37 Aku bəji nda ngə shiləkə tə səya nyi ngə cha tah. Ngə nja tlanda nyi dza ga gi pinda nyi aku vi nda nja hərtə təkəra vanyi. 38 Yafa da naɗəu tsa Lidda wa, aka ənga, nda njir nəu inda vu Yafa inda tə ngatə ənda Bitrus vu Lidda, ngə nda səndzə nyi nji mətləu ka nda gədi nyi, “Matikuɗi shili da ea kuskusəu.” 39 Kəl ngə Bitrus tə hya'atə ga nəu nda. Nda nda yi, ngə nja təra nacha gyo vi nda nja hərtə təkəra vanyi nda nja pinda ndəu tətə kwa nda. Dəhə mahi'ifi nda tangnda tə shili tsəmtədza, ga ɓandə nyi, nda kwa tiwi nda kwa cha chul dzaki nda Dokas tə mbətə nda sakana cha na pi.

40 Ngə Bitrus tə nar nda, nda ngyar vi nda, nda təra biya, ngə cha uzhi ga pətlənya; cha sha mbakəu gangang na ndə tətə nda ga na, “Tapita, hya'ati!” Ngə cha mbəɗiya lya cha, nda cha la'a Bitrus, ngə cha hya'ati tə ngya. 41 Ngə Bitrus tə hatə nyi cha cha ga hya'andi nyi a tə ta'i. Kəl ngə cha tsəmtə njir nəuwa, ka mahi'ifi inda ga nənda Tapita na pi. 42 Nəna səu tə wiɗa tə hə'i Yafa dəhəu, nga gwa'atə nji ɗang tə nənyi jiri anə Tlakəu. 43 Bitrus hanyar tə pəchi ɗang vu Yafa na nda na vanya ndər dəɗə chi tləm nyi Shiman.