Bitrus tə Ɓwanya təkəra Sənda Cha Mər nə Njir Nəuwa
11
Changhabal inda, ka alenya njir nəu inda tə dəhə hə'i Yahudiya, tə ngatə ənda ma'a alenya nji'inda pa'a njir Yahuda dləukərtə ɓwanya Hyel. 2 Nda Bitrus tə yi Urshalima, njir Yahuda inda njir nəu inda kwa gwa'a kəl nja tlanda nyi bədzang nə nji'inda pa'a njir Yahuda tə ghəya kəpal kə'i cha, 3 nda kwa na, “Ka gu ki nji kəla tla bədzang, ga səm ma'a sərsum kə'i nda.” 4 Kəl ngə Bitrus tə dəkar nda dəhə sənda tə ɗa, fwatə tə ghəyanyi, ga na.5 “Sakanda ya ku mələm Yafa, nda yo pətlənya ngə shi'uni pəchi tə ɗa naya. Ya la'a vanya səu kwa səya kya huɗamələm wi sərtula, nja mbatə sə'i tə məngum fwaɗə nyi, nga səya ta'i ləhə dzə ɗa. 6 Nda ya ngau lya ya kwa, ya la'a sərshishi ki ana nə takəu, sər təɗə na ta i'i, ka eakəu. 7 Kəl ngə ya ngatə kurakə kwa na na'a, ‘Bitrus, hya'atə ka tsəya, ka ɗa!’
8 “Kəl ja, ngə ya na, ‘Abada Tlakəu, a sə hiɗahiɗa sər həɗə wi inə da ta gyo nya ya wa.’
9 “Ngə kurakə tə ɓəla səya kya huɗamələm, ‘Ngwa ka da ba'a fiya sənda Hyel tə mərtə chaməu, ka sə hiɗahiɗa wa.’ 10 Zhaka makər sənga tə ɗa naya təvi nja nda tsənda sənda dəhə ka sərshishi inda kwa sha huɗamələm.
11 “Kəl janə nji makər inda nja sə shili daya hya'atə vu Kaisariya nda shili ku ki nda ya kwa nda. 12 Ngə Shanguɗə tə nar ɗa, ngwa yada dzədzə tsa ma'i kə'i nda wa. Ka zama kwah inə tə ma'i ka ya, ngə ea hya'atə vu Yafa ga təra yi Kaisariya kə'i nda, ngə ea go ki Karniliyus. 13 Ngə cha dəkar ea ənda cha la'a Chama Hyel tə chabiyadzə ku ki nyi, ga na ‘Sə nji yi Yafa, nja ngar nghə Shiman ndə nda njo nga Bitrus. 14 Cho shili dəkar nghə ɓwanya ənda hyo uya mbəɗə ka njir ki ngha.’
15 “Nda ya ghəya ɓwanya nə nda, kəl ngə Shanguɗə Karti tə səya təkəra nda, tang wi nda tə səya təkəra mən tangərma pəchir Pentikos. 16 Kəl ngə ya ɗənghatə sənda Tlakə tə na abəra, ‘Yohana tə mərtə nyi baɓtisma nə nji na ɓiti, kəl ja, nahi njo mərtə hi baɓtisma na Shanguɗə Karti. 17 Aka əngə mangə Hyel tə nənyi ga'a nə nji'inda pa'a njir Yahuda chul nda cha nə mən ku bəji nda məna nənyi jiri nə Tlakə Yesu Kəristi nda ya, na ya wa ngə tatlər katə tlər Hyella?’ 18 Manda nda ngatə ənga, na nda zhaka uya sər kəpal wa, nda fal Hyel ga na, ‘Hyel nənyi tə laku ma'a nə nji'inda pa'a njir Yahuda nda tubi nda uya pi nda ba'anawa.’ ”
Njir Nəu vu Antakiya
19 Aku bəji nda, njir nəu tə wiɗətəkər na məndza'u nda njo ɗa na nda ku bəji nda nja tsəya Istifanus. Alenya nji tə təra ba'a yitə hə'i Finikiya ana Kubrus ba'a mələm Antakiya, nda kwa bəzə ɓwanya Hyel nə njir Yahuda tanyi. 20 Kəl ja, alenya njir nəu inda tə hya'ati vu Kubrus ana mələm Sayirin, tə təra yi Antakiya ga yi bəzə Mafakə Mənakə təkəra Tlakə Yesu nə nji'inda pa'a njir Yahuda. 21 Gyalkur Hyel Tlakəu tə ɗa tsa'a na nda, kəl nji ɗang tə nənyi jiri ga sha ga nəu Tlakəu. 22 Nda mafakə nə tə gwa ku himya daɓədzər njir nəu nda vu Urshalima, kəl ngə nda sə Barnabas yi Antakiya. 23 Sakanda dzəva cha vu Antakiya ga la'a chulkə papa'akur nda Hyel tə səkənyi nə nji, cha mər hirgyaɗi ga tsətə nda ɗufəu nda ɗana jiri nə Tlakə na dəhə ɗufwa nda. 24 Barnabas ndə dur cha, nyinyinyi na Shanguɗə Karti ana jirikur, aka ənga nji ɗang gagaɗa tə nənyi jiri nə Tlakəu.
25 Kəl ngə Barnabas tə təra yi Tarsus aka cha yi gwa'a Shawulu. 26 Manda cha uya nyi, ngə cha shili na cha vu Antakiya. Parakə fa nda kwa tsəmdzə ka njir nəu nda kwa dlədləɓə nə nji ɗanghəu. Avu Antakiya ngə nja ghəya nga njir nəu Yesu na Kərista.
27 Aku nda na bəji ngə alenya njir mətakər nə Hyel tə Hya'atə vu Urshalima ga yi Antakiya. 28 Zhang ku huɗa nda, tləm nyi Agabus cha hya'atə na gyalkur Shanguɗə Hyel ga takər nə nji ənda huɓa kwa tlə tə dunəya dəhəu. (Huɓə huɓə nyi tə ɗa, ku bəji nda Kalaudiya kwa səm təlkur.) 29 Ngə njir nəu Yesu inda vu Antakiya tə ɓatliya ku pama nda ənda kala ndə kwa shili na sənda cho nau nda tsəmtə ka vala kuvanda njir nəu inda tə hə'i Yahudiya. 30 Nda mərtə ndana səu, ga sətə ga'a kənda nə wawa'ar njir nəuwa, təwa cha ka Barnabas na Shawulu.