6 Kəl Bitrus tə nar nyi, “A bəjingha ndara azurfa da tsa ya pa'a wa, kəl ja, yo nə ngha sənda tsa ya. Aku tləmər Yesu Kəristi ndər Nazarat yo nar ngha, hya'ati ka ma'i!” 7 Ngə cha gəzəya chisəma cha ga hya'andə nyi. Təma hya ndə nda ka hwahwangha cha tə ɗa na dunama; 8 ngə cha fəla, ga ta'i tə hya cha ga ghəya ma'i. Kəl ngə cha gwa ku Mbwa'ala Hyel nda kə'i nda, cho ma'i cho fəla cho fal Hyel.

9 Nji nda tangnda tə la'a ənda cho ma'i cho fal Hyel. 10 Nda nda ngabiya ənda ndər gədi nda kwa ngya anya nyavi mbwa'alə nda njo nga gumaguma nda nga, kəl nda mər məngəl gagaɗa ana sənda tə ɗa na cha.

11 Tsə'u tanyi ndə nja mbandə nda kwa gəzə ka Bitrus ana Yohana, dəhə nji'inda kwa mər məngəl, nda mə na hwi yada nda, ya tə kiɗa madləɓa nda njo nga “Madləɓa Saloman.” 12 Nda Bitrus tə la'a nji'inda, ngə cha nar nda, “Kuvaɗa njir Isra'ila, anyar mi hyo mər məngəl təkəra chul nawa sa, ya anyar mi hyo ndzam ea? Hyo jigadəma ndara gyalkur kərnəea ana durdurkur kərnəea ngə tə gwa'atə ndə na ma'i ya? 13 Hyel nə Ibrahim, Ishaku, ana Jakop, Hyel nə jival kəmən, tə nənyi səli nə mava nyi Yesu. Kəl ja, hya səya nyi ga nənyi nə njir təlkur ka nja tsəya nyi, hya ngya nyi mar Bilatus, madangə Bilatus ɓatliya tə ka cho wuniya nyi. 14 Na cha ndə kəla bikə ndə tsa'atsa'a, kəl ja, hya ngya nyi ga gədi Bilatus cha dəliya hi ndər tsa ndəu. 15 Hya tsəya ndə nda tlakər pi, ya ngə Hyel tə hya'andə nyi ku hwa, naea a la'atə sə'inga. 16 Gyalkur nda ku tləmər Yesu ngə tə nənyi dunama nə ndər gadal na, kwa zəndə nyi hi. Təwa jirikur ku tləmər Yesu ngə ndə na uya mbəa, wi nə hyo la'a na.

17 “Nəchanə ja ka zamə ɗa, a zəndətə ya səngə hya mərtə nyi nə Yesu nahi ka wawa'a kəhi nga, hya mər nyi ku tar zəndəkur kəhi nga. 18 Hyel natə parang a təwa dəhə njir mətakər ənda Kəristi kwa sa ɓwaɓwatəu, təwa əngə ngə Hyel tə nyabiya sənda cha na. 19 Tubi ma ja, hya shili da Hyel, ga cha farbikər səpəla'a kəhi, 20 aka bəjir uya dunamar Shanguɗə kwa shili tsa Tlakəu, ya cho sətə Yesu, nda na cha ngə Kəristi nda cha tabiya hi. 21 Tuku cho ngya kya huɗamələm kəl bəji tə ɗa nda dəhə sə kwa ɗa bul, wi nda Hyel tə na a təwa njir mətakər karti nyi inda haaɗa. 22 Aka Musa tə na, ‘Hyel Tlakən hi kwa sətə hi ndər mətakər wi naya, ya cho ɗa zhang ku huɗa njikə hi. Tuku ngə ja, hya səhimi da sənda cho dəkar hi. 23 Kala ndə nda pa'a kwa səhimi da ɓwanya ndər mətakər ngə wa, njo həbiya nyi ku huɗa nji'inda nə Hyel ba'a tsəya nyi.’

24 “Ya dəhə njir mətakər ghəya tə Sama'ila, ana nji'inda tə shili a hi nyi tsə'u a ɓwanya tə təkəra hanyi ina. 25 Nahi ingə tə fa'aki alkawal nda Hyel tə mərtə nyi nə jival kəhi təwa njir mətakər nyi. Wi nda cha nar nyi nə Ibrahim, ‘A təwa nyandəla ka yo fəkənyi papa'akur nə dəhə njir dunəya.’ 26 Aka əngə ngə Hyel tə tabiya ga sə tə hi mava nyi tangərma, ka cha nə hi papa'akur təwa shandə madawa ku pama hi tsa mər zazaɓəkur.”