Bitrus na Yohana a Huɗər Njirawawa'a
4
Ma nda ka Bitrus ana Yohana tsəu kwa ɓwanya nə nji, kəl ngə fərist i ana ndə nda dəgal təkəra ɓəla Mbwa'alə Hyel ka njir Saduki tə shili da nda. 2 Huɗa nda tla tsa Changhabal Yesu inda mətlə inda, aka nda kwa dlədləɓə nə nji ənda Yesu tə hya'atə ku hu na pi, nda tə char ənda əngə dəhə nji kuɗəkuɗə tsəu kwa hya'atə na pi. 3 Kəl ngə nda səya Bitrus ana Yohana, ga pəu nda ku jarum kəl vanya zəkəu, aka akə wurtə ɗa. 4 Kəl ja, ɗang ku huɗa nji'inda ngatə mafakə kənda tə nənyi jiri; ngə ɗangkura njir nəu tə tsaka kwa ɗa dəbu tufu. A nji da jiga mahi'i ka ngulisha'a wa.5 Vanya zəkə kə'i gau njir Isra'ila, ana njirawawa'a nə Mbwa'ala Hyel, ba'a maləm gadlagadla tə tsəmtədzə vu Urshalima. 6 Hanana, gau fərist tangnda ba'a Kayafa ana Yohana ana Alekzanda, ka kə'i alenya njikə gau fərist. 7 Ngə nda ta'ində Changhabal Yesu inda manə nda ga jau nya nda, “Ana gyalkur wa ndara ku tləmər wa nə hya mər nəna sa?”
8 Bitrus, manda Shanguɗə Karti nyandə nyi ti, cha wum ga na, “Nahi gau i ka njirawawa'a njikə ea, 9 Na ea ngə hyo jau təkəra tlər mənakəkur ngə nja mərtə nyi nə ndər gadal nə ya? Kwa i hi hya zəndə ənda nja mbandə nyi ya? 10 Ngwa ya par hi ja bwabwa'a, dəhə hi hya zəndə ana dəhə njir Isra'ila, ənda ku tləmər Yesu Kəristi ndər Nazarat nə ndə nə ta'i manə hi yiying ənya. Hya kukwanda Yesu tə taməngəla, kəl ja, ngə Hyel tə hya'andənyi na pi. 11 A təkəra Yesu ngə Likatəkatə tə na,
Hangu nda nahi njir həra həyati
na cha ngə tə sha ga ɗa ka shimbal vi.
12 “Mbəɗə kəl təwa nyi zhang tanyi njo uya; aku dəhə dunəya a tləmər vanya ndə nda Hyel tə nə mən nda kwa dləuya mən wa.”
13 Daɓədzər njirawawa'a inda tə mər məngəl ənda a ləvər da tə ɗa nya ta ka Bitrus ana Yohana wa, ya a zəndətə nda ənda wanaka nji tanyi nda, ya a da nda uya dlədləɓə wa, ngə nda zəndə ənda ɗaka tə nda nəudzə ka Yesu. 14 Kəl ja, a vanya sə da nda kwa nau na wa, aka a la'atə nda ndə nda nja mbandə nda tə ta'i nanda ka Bitrus ana Yohana. 15 Kəl ngə nda gədləbiya nda ku vi nda, təma ngə nda ghəya mba ɓwanya ku pama kərnənda. 16 Nda jau kərnənda “Mi sənda məno mərtə nyi nə nji'ina? Madawa vu Urshalima zəndə ənda mər tənda səshinshin, na mən ma'a a da məno nəu kəpal wa. 17 Kəl ja, ənda məno katə ɓwanya ngə tsa cho wiɗa ku hima nji, kəl məna guhi nji inga ənda ngwa tsəu nda tsakətə ɓwanya nə nji təkəra Yesu wa.”
18 Kəl ngə nda ɓəla nga nda gwa ku vi səkə ga tsau nda bar, ngwa nda ɓəla ndəra ana dlədləɓə nə nji ku tləmər Yesu wa. 19 Kəl ngə ka Bitrus na Yohana tə wum ga nar nda, “Ndzamar ma ja, manə ngə tsa'atsa'a mar Hyella? Ea səhimi da hi zəma, aa ea səhimi da Hyel? 20 Aka a da ea kwa ngyari ndər təkəra sənda na ea təkərnəea tə la'a ga ngatə wa.” 21 Ngə njirawawa'a inda tə tsakətə guhi nda dəgaldəgal ga wuniya nda nda təra. Aka nda la'a ənda dza'u cha nda nənda ɓwaɓwatəu, aka dəhə nji kwa fal Hyel, 22 təkəra səshinshin nda, ənda nja mbandə ndə nda tə fa ndiya fwaɗəkumənyi ana gadal.
Njir Nəu tə Gwa'a Vala atsa Hyel
23 Nda nja wuniya ka Bitrus ana Yohana, ngə nda ɓəl kyakəra kuvanənda njir nəuwa, ga dəkar nda sənda wawa'ar fərist ka alenya njirawawa'a tə na. 24 Nda njir nəu inda tə ngatə sənda pə nda, ngə dəhə nda tə daɓətəkər aku pətlənya nə Hyel; “Tlakə ndər mər huɗamələm ana hə'i, ana dəl ka dəhə sənda kwa, 25 a təwa Shanguɗə Karti ngə ka ndər təwa ajin ea Dauda, nda mava ngha, ku nda cha na,
‘Anyar mi nji shilishili kwa mər huɗətla?
Anyar mi nji kwa mba nya ɓwa'atanya?
26 Ka təl ka təl nə dunəya tə ɓatliya kərnənda ka pa,
nji'inda na gyalkur tə tsəmtədza
kwa gwa'a laku nda nda kwa ɗana nənyi
ɓwaɓwatə nə Tlakəu ana Kəristi nyi.’
27 Vəlvəl ngə ənda Hiridus ana Buntus Bilatus tə mbatə nya ku mələm na, ka nji'inda pa'a njir Yahuda, kə'i njir Isra'ila təkəra Yesu, mava nghə nda karti nda ka tabiya ka cha dləuya nji. 28 Nda tsəmtədzə ka nda mər dəhə sənda nakə na gyalkur ngha ana ikur ngha wurtə ɓatliya ənda kwa ɗa. 29 Nəchanə ja Tlakəu, la'a ənda nda ndzamtə ea huɗəu, ka nə ea, na ea mavi'i ngha, gyalkur nə bəzə mafakə nghə a ləvər da wa. 30 Nə ea gyalkur nə mbandi, ana mər səshinshin ana muniya təwa tləmər mava nghə Yesu nda karti.”
31 Nda nda wur na pətlənya, kəl ngə mbwa nda nda tsəmtədzə tə nda tə dzədzi. Kəl ngə Shanguɗə Karti nə Hyel tə nyandə ɗufwa nda, ngə nda ghəya bəzə mafakə Hyel a ləvər da wa.
Dəhə Sər Njir Nəu tə Ɗa Zhang
32 Dəhə daɓədzər nə njir nəu tə ɗa jigadəma zhang ana ɗufəu zhang. A ndə nda ku pama nda kwa na sə ɗa nə naya sə ɗa wa, kəl ja, nda təkəya dəhə sənda tsa nda. 33 Ana dunama gagaɗə changhabal Yesu inda tə dəka nə nji ənda Yesu tə hya'atə ku hwa ana pi, ngə Hyel tə səkə nda papa'akur 'ual'ual dəhə nda. 34 A ndə nda ku pama nda nda tə tar sə wa. Nji nda na fa ka ki, tə ɗəlnda ga shili na kwaba kwaba nyi, 35 ga nənyi nə Changhabal inda; ngə nja nənyi nə madawa wi sənda cho gwa'a. 36 Vanya ndə da ku huɗa njir nəuwa, tləm nyi Yusufu nyandəla Levi cha, tə hya'ati vu Kubrus, changhabal inda fəndzə nyi tləm Barnabas (ba'adar tləm nga “Ndər tsəɗufəu”). 37 Ngə cha ɗəlnda vanya fa nyi ga shili na kwaba kwaba nyi ga nənyi nə changhabal Yesu inda.