Səyar Shanguɗə Karti təkəra Njir Nəuwa
2
Sakanda pəchir ladər nə Pentikos tə shili, dəhə njir nəuwa tə tsəmtədzə tə mbwar zhang. 2 Gəɗə tanyi kəl ngə nja ngatə kurakə tə səya kya huɗamələm, wi gyang nda kwa fi na dunama ga shili nyandə dəhə ki nda tə nda kwa nda. 3 Kəl ngə nda la'a alenya sə tang wi kyara hu'u tə səya təkəbiyadzə ga ta'i təkəra madawa ku pama nda. 4 Dəhəkura nda tə nyi na Shanguɗə Karti kəl nda ghəya ndəra ana nya alenya nji pampaməu, wi sənda Shanguɗə Karti tə nənda gyalkur pənyi.5 Aku bəji nda, njir Yahuda da inda na ləvər Hyel ana ngya vu Urshalima, nda hya'atə tə mbwa pampamə ku dunəya. 6 Manda nda ngatə chul ngə na kurakəu, ngə dlama nji tə tsəmtədza. Nda mər məngəl, aka njir nəu inda kwa ndəra aku nya kənda i. 7 Nda mər məngəl, nda kwa na, “Əzəm ya, a njir Galili nə nji'inə ndanə wa ya? 8 Aman ngə tə ɗa ya, dəhə mən kwa ngatə nda kwa ndər ku nya ajin mən na? 9 Jan mən njir Fartiya, ana njir Midiya, ana njir Elama, ana njir Mesopotamiya, ana təwa Yahudiya, ana Kapadokiya, ana Pantus, ana Asiya, 10 ana Firijiya, ana Pamfiliya, ana Masar, ana nji'inda ləhə dzər Sayirin a tə hə'i Libiya, ana mihiɓi inda hya'atə vu Roma. 11 (Njir Yahuda ka nji'inda gu lakur nəu njir Yahuda). Jan tsəu njir Kərita, ana njir Arabiya, dəhə məno ngatə nda kwa ɓwanya, ana nya kəmən a təkəra sər məngəl nda Hyel tə məra!” 12 Dəhə nda kwa mər məngəl ga wi, nda kwa jau kərnənda, “Mi nə sənə ja?”
13 Alenya nji tsəu tə gyaɗi nda nda, ga na, “Mbadlə ngə nda sa ga wi.”
Ɓwanyar Bitrus nə Nji
14 Kəl Bitrus tə hya'atə na nda ka alenya nji kwabəzhang inda, cha ghəya ɓwanya nə dlama nji'inda ana kurakə dzəgam dzəgaməu, “Kə'i zamə ɗa, njir Yahudiya ka dəhə nji'inda na ngya vu Urshalima, səya ma himi, yo dəkəbiya hi səna ɗa na. 15 A mbadlə nə nji'ina wi nə wi ngə hyo har ngə wa, bəji saka dlə tanyi na, tsəu mbudla vi.a 16 Sə nə ya, na cha nda Joel ndər mətakər nə Hyel tə ɓwanya təkər ga na,
17 ‘Hyel tə na, bəjir udiyar jwaməu,
ya kwa pəkər Shanguɗə ɗa təkəra dəhə nji,
Nguli shili kəhi ka ku'i mahi'i kəhi
kwa pə ɓwanya mətakər.
Nguli tlakala kəhi tsəu njo takər nənda,
njirawawa'a kəhi tsəu kwa shi'uni
18 Aku hanyi inga yo pəkə nyi Shanguɗə ɗa
təkəra mavi'i ɗa mahi'i ka shili,
ya nda kwa mər mətakər.
19 Ya kwa mər sər məngəl kya huɗamələm
ana sər muniya aku dunəya.
Mashi ana hu'u ba'a ear ndalndala.
20 Pəchi kwa ɗa ka kutla,
ana hya tsəu kwa ɗa dəzəu njong wi mashi,
təvi pəchi dəgal nə səlir Tlakə ngə kwa shili.
21 Kəl ja, dəhə ndə nda tə nga tləmər Tlakəu
kwa uya mbəɗa.’
22 “Ngatə ma ɓwanya nə ja njir Isra'ila, Yesu nga, ndər Nazarat nda gyalkur nyi tə chabiyadzə təwa səshinshin, ana sər muniya inda Hyel na kərnyi tə mər ku pama hi a təwa nyi, nda nahi təkərnəhi zəndəti. 23 Aku ikur Hyel ana zəndəkur nyi ngə cha ɓatliya ənda njo nə hi Yesu, hya kukwanda nyi tə taməngəla ga tsəya nyi təwa cha njir mər səpəla'a. 24 Kəl ja, ngə Hyel tə hya'andə nyi ku hwa ana pi ga pəliya nyi tsa ɓwaɓwatər tah, aka tə da kwa nau gəzəya nyi wa. 25 Aka Dauda ɓwanya tə təkəra cha bəra,
A la'atə ya Tlakə biyama ɗa mada sakamani.
A da ya kwa dzədzə wa,
aka a tə chisəma ya cha.
26 Aka əngə nga ɗufwa ya mərtə hirgyaɗi,
kyara ya hətə səli.
Ana tsə'u dzaya kwa ngya ana fəkər.
27 Aka a da ka kwa ngya ɗa ku huɗa njikə mambəl wa,
ya a da ka kwa ngyar Ndə Karti nghə
cha yiɗa ku hu wa.
28 A char ɗa tə kə laku nda ya kwa uya pi;
aka ngya nghə dzə ɗa
kwa nyandə ɗa na hirgyaɗi.
29 “Ka zama, ɓwanya jirikur nə ya kwa dəkə nə hi tsa'anyata, təkəra jival kəmən Təl Dauda, nda cha tah ngə nja haɗənda nyi, hu nyi tsəu tangnə kə'i mən ba'a tə pəchi nə ənya. 30 Kəl ja, na cha ndər mətakər cha, ya zəndətə cha alkawal nda Hyel tə mərtə nyi. Hyel tə səmnda fəla ənda vanya ndə kwa biya ku nyandəla Dauda, cha kwa ɗa təl tang wi nda tə Dauda. 31 Dauda la'atə sənda Hyel kwa da mər biyama, ngə cha ɓwanya təkəra ənda Kəristi kwa hya'atə ku hu na pi, abəra ‘A da nja ngya nyi ku huɗa njikə mambəl wa, dza cha tsə'u a da tə yiɗa wa.’
32 “Hyel tə hya'andə Yesu nga ku hwa ana pi, ya dəhə mən la'ati. 33 Hyel tə hətə nyi ga fiya nyi tə chisəma cha ga nənyi Shanguɗə Karti wi nda cha mər alkawal. Sənə hyo la'a ana ngatə sakan na, ga'a nyi nga nda cha pəkər təkəra ea. 34 Aka Dauda təkərnyi a da cha təra shi huɗamələm wa, kəl ndara cha na,
‘Tlakə tə nar nyi nə Tlakə ɗa,
Ngyata nghə tangna tə chisəma ya,
35 Kəl sakanda ya fiya njir dawa nghə ka təmbəl pə hya ka.’
36 “Aka ənga, ngwa dəhə njir Isra'ila zəndi, a kəpal da wa ənda Hyel tə mərtə Yesu nda hya kukwanda, aka Tlakəu ana Kəristi.”
37 Nda nji tə ngatə ənga, ngə tə tsəkar ɗufwa nda, ngə nda nar nyi nə Bitrus ana alenya Changhabal inda, “Mi sənda ea kwa mər ka zama?” 38 Ngə Bitrus tə nar nda, “Tubi ma, hya shili da Hyel, nja mər tə nyi baɓtisma nə madawa ku tləmər Yesu Kəristi, aka ga nja farbikər səpəla'a kəhi. Ya hyo uya ga'ar Hyel nə Shanguɗə Karti. 39 Aka alkawal Hyel nda mər cha ka hi ana ngulisha'a kəhi, ka nji'inda naɗəu, dəhə nji'inda Hyel Tlakən mən tə ngatə shili da cha.”
40 Bitrus tə chatə nda təwa ɓwanya ɗanghəu; ngə cha gədi nda, “Dləuya ma kərnəhi ku ɓwaɓwatə ngə kwa shili təkəra nji zazaɓə nga.” 41 Nji'inda tə dləukər mafakə nyi nda tə uya baɓtisma, nji'inda tsakəngər dzə nə njir nəuwa pəshinda kwa ɗa dəbu makərəu.
42 Kəl ngə nda fəu kəra nda ku dlədləɓə tsa Changhabal inda, ana daɓəkər, ana səm sərsuma, ba'a pətlənya.
Ənda Njir Nəu tə Ngya
43 Kəl ngə ləvər tə səya madawa, aka səshinshin ana sər məngəl inda Changhabal inda kwa məra. 44 Dəhə njir nəu inda tə tsəmtədzə tə mbwar zhang nda kwa mər tlər na dəhə sənda tsa nda ku pama kərnənda. 45 Nda ɗəlnda sənda tsa nda dəhəu, ngə nda təkəya nyi kwaba kwaba nyi nə madawa, məlməl na sənda tlakə nyi kwa gwa'a. 46 Kala pəchi nda kwa shili ɓəa ku Mbwa'alə Hyel ana jigadəma zhang. Nda kwa səm sərsum tə mbwar zhang aku ki kənda i, nda kwa sa nda kwa səma ana hirgyaɗi, ana ta zhang, 47 nda kwa fal Hyel nda kwa uya mənakəkur tsa dəhə nji. Kala pəchi Tlakəu kwa tsakə nji'inda tə uya mbəɗa shili təkəra nda.