Yesu tə Mbandə Ndə nda Nja Yah Wuləfəu
9
Nda Yesu kwa tərabiya, ngə cha la'a vanya ndə nda nja ya wuləfəu. 2 Ngə shawa nyi tə jau nyi, “Maləm, səpəla'a wanga gwa'atə nja ya ndə nə wuləfa? Nə kərnyi zəma, aa nə njir yah nyi?” 3 Ngə Yesu tə nar nda, “A da səpəla'a kərnyi wa, ya a da nə njir yah nyi nga gwa'atə cha ɗa wuləfəu wa, kəl nda ga nja la'a gyalkur Hyel təkəra cha nga. 4 A ɗatə tuku məno mər tlər ndə nda tə sə ɗa, wi nə tsə'u tanyi pəchi na, aka vu'i kwa shili, nda a tsə'u madawa kwa nau mər tlər wa. 5 Wi nə ya tə dunəya na, naya ngə vichamər dunəya.”6 Ahir nda Yesu tə na ənga, ngə cha təfəya tuli hu'i ga zəkutə hə'i ni, ngə cha ɓəsətə tə lya ndər wuləfəu nda 7 ga nar nyi, “Təra ka yi chinda huɗəma kə hyo fa'a Siləwam.” (nda njo nga “Sə sənyi”). Ngə ndə nda təra ga ki chinda macha, a tə lakur ɓəl shili, kəl jan cha kwa la'a səu.
8 Ka təwul nyi ana dəhə nji'inda ɗaka zəndə ənda cho gədi, kwa na, “A ndər wuləfə nda kwa ngya tangnə kwa gədi da nə wa ya?” 9 Alenya nji ku huɗa nda na, “Na cha nga.” Ndə alenya nji, “A da nacha ngə wa, kəl ja, a patə nda dza.” Kəl ndə nda na kərnyi tə na, “Naya nda na.”
10 Kəl ngə nda jau nyi, “Aman lya ka ɗa na mbəɗa?”
11 Cha wum ga na, “Ndə ngə njo nga Yesu nda nga zəkutə hə'i ga ɓəsətə ɗa tə lya ya ga nar ɗa, ‘Ma'i ka yi chinda huɗəma ka aku fa'a Siləwam.’ Ma nda ya yi chinda, ngə ya ghəya na la'a səu.”
12 Nda jau nyi, “Aman cha?” Ngə cha na, “A da ya zəndə wa.”
Njir Farisi tə Chukuɗa Sə təkəra Ndər Wuləfə nda
13 Nda yi na ndər wuləfəu nda Yesu tə mbandə nda nə njir Farisi, 14 aka tə Pəchir Ngyaməngya ngə Yesu tə zəkutə hə'i ga wuniya lya ndə nda ni. 15 Ngə njir Farisi inda jau nya ndə nda ənda cha ghəya la'a səu. Ngə cha nar nda, “Cha ɓəsətə ɗa hə'i miɗakə tə lya ya, nda ya chinda ngə ya ghəya la'a səu.”
16 Alenya njir Farisi inda tə na, “A da kyada Hyel ndə nə tə hya'atə wa, aka a cha ɓəlatə Pəchir Ngyaməngya wa.” Alenya nji tsəu tə na, “Ya aman ndər mər səpəla'a kwa nau mər səshinshin wi na?” Anya nda da shili zhang wa. 17 Nda tsakətə jau ndər wuləfə nda səkəu, “Nakə nənghə ya, mi ko na təkəra ndə nga, nakə ngə cha mbəɗiya lya ka?” Ngə cha na, “Ndər mətakər Hyel nga.”
18 Kəl ja, njir Yahuda da nənyi jiri ənda ndər wuləfəu cha ɗəɗəm, ya jan sakana kwa la'a cha səu wa, kəl nda nda nga njir yah nyi shili. 19 Ngə nda jawar nya njir yah nyi, “Zər kəhi nə ndə nə ya? Hya na nja yah nyi wuləfəu? Aman nə cha kwa la'a sə sakana?”
20 Njir yah nyi tə wuma, “Sənda zəndə ea, zər kəea cha, ya zəndətə ea tsəu wuləfə yah nyi nji. 21 Kəl ja, a da ea zəndə nda aman cha ɗana uya la'a sə wa, ndara wa tə wuniya lya cha a da ea zəndə wa. Jan cha jawar ma nya cha, aka ndə dəgal nga, cho nau ɓwanya təkəra kərnyi!” 22 Njir yah nyi tə na ənga aka nda kwa ləvər ɓwanyar njirawawa'a nə Yahuda, aka ɗəɗəm a ta'ində tə nda təkəra madawa tə na Yesu, Kəristi cha, kəl nja gədləbiya tlakə nyi ku vi pətlənya. 23 Nacha ngə sənda tə gwa'atə njir yah nyi tə na, “Ndə dəgal nga, jawar ma nya cha!”
24 Nda ɓəla nga ndə nda nja yah wuləfə nda gwa səkəu, ga nar nyi, “Ləvər Hyel, ka pə jiri! Kərnəea, a zəndətə ea ənda ndə nga ndər mər səpəla'a nga.”
25 Ngə ndə nda wum ga na. “Naya a da ya zəndə ndara ndər mər səpəla'a cha wa, sə zhang zəndə ya, sakanda wuləfə ya, ya jan yo la'a sə sakana.”
26 Nda tsakətə jau nyi, “Mi mərtə nghə cha? Aman cha wuniya lya ka?”
27 Cha nar nda, “A wurtə ya dəkar hi, ya a da hya səndzə himi wa. Mi sənda hyo i ya dəkar hi səka? Aa na hi tsəu ya, kwa i hi hya ɗa ka shawa nyi ya?”
28 Ngə nda hya'atə na ngəl nyi, “Nakə ngə shawa nyi səngha! Ba naea nəkəea, shawa Musa ea. 29 A zəndətə ea ənda Hyel tə ɓwanya nə Musa, sal ngə nənyi a da ea zəndə mbwa nda cha hya'atə tə wa.”
30 Kəl ndə nda wum ga na, “Jan ma səshinshin nya ja! A da hya zəndə mbwa nda cha hya'atə tə wa, ya jan cha wuniya tə lya ya! 31 Aka zəndətə mən, a Hyel da kwa səhimi da ndər mər səpəla'a wa, kəl dəhə ndə nda kwa həsəli nə Hyel ana kwa mər sənda cho i. 32 Ɗəɗəm Hyel tə mər dunəya ya a məna ta ngatə vanya ndə tə wuniya lya ndə nda nja ya wuləfəu wa. 33 Macha ndə nga a da hya'atə kya kə Hyel cha wa, a da cho nda nau mərtə səngə wa.”
34 Nda wum ga nar nyi, “Nakə nda nja ya ku səpəla'a, nakə nə kwa dlədləɓə nə ea?” Kəl nda gədləbiya nyi biya ku vi pətlənya nda.
Wuləfə təwa Shanguɗəu
35 Yesu tə ngatə ənda nda gədləbiya ndə nda biya, nda cha həya nyi, cha jau nyi, “Nakə nənghə ya, a nənyi təkə jiri nə Zər Ndə ya?”
36 Ngə ndə nda wuma, “Maləm, dəkar ɗa nda wa cha, ga ya nənyi jiri.”
37 Ngə Yesu tə nar nyi, “A wurtə kə la'a nyi, ya nacha nə kwa ɓwanya na ka.”
38 Ngə cha nar nyi, “A nənyi tə ya jiri, Tlakəu!” Kəl cha uzhi huɗə Yesu, ga hətə nyi səli.
39 Yesu tə nar nyi, “Shili ɗa tə dunəya ka ga ya mərtə nyi nəuma nə njir dunəya, ga nji'inda pa'a kwa la'a səu nda la'a səu, nji'inda kwa hətə ənda kwa la'a nda səu tsəu, nda wuləfa.”
40 Nda njir Farisi inda ləhə dzə nyi inda tə ngatə ɓwanya nga, ngə nda jau nyi, “Ma'a naea wuləfə ea ya?”
41 Yesu tə nar nda, “Ma cha njir wuləfə hi, a bikə kəhi da wa, kəl ja, mangə hya wur na kwa la'a hi səu, bikə kəhi mbiya hi ti.”