Kəl ja, Yesu tə uzhi cho tsəfa na kwalyanghar cha cha a hu'i. 7 Nda nda uftənyi na jawa, ngə cha hya'atə ga nar nda, “Ndə nda zəndə a bikə da tsa cha wa, cha ɗa ka tangərmar ndə nda kwa ghəya vakə nyi na hangu.” 8 Ngə cha uzhi səkəu cho tsəfa a hu'i.

9 Ma nda nda ngatə ənga, ngə nda təra, kər zhang kər zhang, ghəya tə dəgal kənda ga ngyar kəl Yesu ana mala nda ta'iu. 10 Ngə Yesu tə hya'atə ga jau nyi, “Malaka, aman nda? A ndə da tə nau tlanda nghə nəuma ma?”

11 Ngə cha na, “Tlakəu, a ndə da wa.”

Ngə Yesu tə nar nyi, “Naya tsə'u a da ya tlanda nghə nəuma wa, ma'i tanghə ja, ngwa ka tsəu tsakətə mər səpəla'a wa.”

12 Yesu tə tsakətə ndər nə nda səkəu, “Naya ngə vichamər dunəya, ma ndə nda tə nəu ɗa, a da cho ma'i ku kutlə wa, kəl nda cho uya vicham nda kwa chabiyanyi lakur pi.”

13 Ngə njir Farisi tə nar nyi, “Sakanə ja anə ko pə sə təkəra kərngha, ya sə nə ko pə na, jiri da kwa wa.”

14 Ngə Yesu tə wum ga nar nda, “Mada mafakər kərɗa nə ya kwa dəka, jiri kwa, aka ɓwanya ɗa tsa'atsa'a tanyi, a zəndətə ya mbwa nda ya hya'atə ti, ana mbwa nda yo ya ti. Kəl ja, nahi a da hya zəndə mbwa nda ya hya'atə ti, ana mbwa nda yo ya tə wa. 15 Nahi, hya kwa mər nəuma chul nə ndəkurndəu, kəl nda naya a yo mər nəuma nə madawa wa. 16 Mada yo mər nəuma ɗa, tsa'atsa'a yo məra, aka a da ya zhang taa ɗa wa, kəl ja, tsa ea na Ada nda sə ɗa. 17 Tsəfətsəfə nyi cha ku gadlagadla kəhi, ənda ma ɓwanya tə biya ku nya nji mətləu, ɗatə jiri. 18 Naya ngə tangərmar ndə nda ɓwanya təkəra kərɗa, Ada nda sə ɗa ngə mətləkunyi.”

19 Ngə nda jau nyi, “Aman Ada ngha?” Ngə Yesu tə nar nda, “A hyo zəndə ɗa wa, ya a da hyo zəndə Ada ɗa wa, macha kwa zəndə ɗa hi, hyo kina zəndə Ada ɗa tsəu.” 20 Cha par nda ɓwanya inga sakanda cha kwa dlədləɓə ləhə dzər mbwar məɗəwa Mbwa'alə Hyel. Ya dəhə ka ənga a ndə da səya nyi wa, aka bəji nyi da taa ɗa gwadagə wa.

21 Yesu tə nar nda səkəu, “Yo təra, hyo gwa'a ɗa. Hyo tə ku səpəla'a kəhi. Vi nda yo ya ti, a da hyo nau yi nda wa.”

22 Sə ngə cha na nga, tə gwa'atə njirawawa'ar Yahuda tə na, “Manə cho na, ‘Mbwa nda yo ya tə a da hyo nau yi nda wa?’ Aa cho tsəya kərnyi ya?” 23 Ngə Yesu tə nar nda, “Kya hu'i hi, naya səya ki ya. Na hi, nə dunəya hi, kəl ja, naya a da ya nə dunəya wa. 24 Nacha gwa'atə ya nar hi, hya kwa kuɗə ku səpəla'a kəhi, ma cha a hya na'a jiri ənda naya ngə nacha wa, hyo kuɗə ku səpəla'a kəhi.”

25 Ngə nda jau nyi, “Nakə wa ka?”

Ngə Yesu tə wum ga na, “Naya ngə nacha nda ya dəkar hi tangərma nda. 26 Sə da ɗang yo nau dəkə təkəra hi, ya sə ɗang yo nau tlanda hi nəuma təkəri, kəl ja, a da yo mər wa, aka ndə nda tə sə ɗa ndər jiri cha, kəl sənda ngatə ya tsa cha nacha yo dəkə nə dunəya.”

27 Dəhə ka ənga a da nda ngabiya ənda təkəra Ada ngə Yesu kwa ɓwanya nə nda wa. 28 Ngə Yesu tə nar nda, “Ma bəji nda hya da kukwanda Zər Ndə tə taməngəla, hyo zəndə ənda naya ngə nacha, hyo zəndə tsəu ənda a da yo mər madami təkərɗa wa, kəl nda sənda Ada tə dlədləɓətə ɗa nacha yo məra. 29 Ndə nda tə sə ɗa tsa'a cha naya, a da cha ngya ɗa zhangta ɗa wa, aka mada sakamani yo mər sənda cho i.” 30 Ahir nda Yesu tə dəkə ɓwanya inga, nji ɗang tə nənyi jiri.

31 Yesu tə nar nyi nə njir Yahuda inda tə nənyi jiri nda, ma hya nənyi jiri nə ɓwanya ɗa, vəlvəl shawa ɗa hi. 32 Hyo zəndə jiri, jiri tsəu kwa pəliya hi. 33 Ngə nda wum nə nyi, “Na ea nyandəla Ibrahim ea, a da ea ta mərtə nyi mavakur nə madawa wa. Manə ko na, njo da pəl ea?”

34 Ngə Yesu tə wum nə nda, “Vəlvəl yo nar hi, madawa kwa mər səpəla'a, mava səpəla'a cha. 35 Aka mava a da kwa nau ɗaka tlakə nyi wa, kəl nda zər ndə nda nənyi, zər ki nda cha wa'atanyi. 36 Aka ma Zər tə pəliya hi, hyo ngya tə butər kərnəhi. 37 A zəndətə ya nahi nyandəla Ibrahim hi, kəl ja, jan hyo gwa'a ɗa ka tsa, aka ɓwanya ɗa da gwa ku ɗufwa hi wa. 38 Yo dəkar hi sənda la'a ya tsa Ada ɗa, na hi tsə'u hyo mər sənda ngatə hi tsa adan hi.”

39 Ngə nda nar nyi, “A adan ea Ibrahim ma.”

Ngə Yesu tə nar nda, “A'a, a hi nguli Ibrahim wa, macha nguli Ibrahim hi, hyo nda mər sə'inda Ibrahim tə məra. 40 Kəl ja, jan hyo gwa'a ɗa ka tsa, aka yo dəkar hi jiri nda ya ngatə tsa Hyel, ya a Ibrahim da mər əngə wa. 41 Anə hyo mər tlər nda adan hi tə məra.” Ngə nda nar nyi, “A da nguli mazagwa ea wa, adan ea zhang tanyi na cha ngə Hyel.” 42 Ngə Yesu tə nar nda, “Macha Hyel Adan hi, kwa nda hya nyida ɗa, aka kyada Hyel səya ya, a naya tə sə kərɗa wa, nacha tə sə ɗa. 43 Mi sənda gwa'atə a da hya ngabiya ɓwanya ɗa wa? Aka a da hyo səsə'uti səndzə himi da ɓwanya ɗa wa. 44 Aka əngə ja, sərtakə ngə adan hi, jigadəma kəhi, kəl nda ga hya nyabiya chul tlər adan hi. Aka ɗəɗəm, ndər tsa ndə cha, a da cho i nəu jiri wa, aka a jiri da tsa cha wa. Dəhə bəji nda cho tla gəzhi nyi ti, aka kərnyi cho tla, aka na cha ndər gəzhi cha. Təl gəzhi cha tsəu. 45 Yo dəkə jiri, kəl ja, a da hya na'a jiri wa. 46 Wa nə ku pama hi ta səya ɗa na bikəa? Macha jiri yo dəkə ya, mya gwa'atə a hya na'a jiri wa? 47 Ndə nda nə Hyel, cho səhimi da ɓwanya Hyel. Sənda gwa'atə a da hyo səhimi da ya wa, aka a da hi nə Hyel wa.”

48 Njir Yahuda inda nar nyi, “Tsa'atsa'a tanyi ngə ea na, ndər Samariya ka, ya məlləm ku kəra ka.” 49 Ngə Yesu tə nar nda, “A məlləm da ku kəra ya wa. Səlir Ada ɗa ngə yo həa, ya janə hyo həyatə ya. 50 Ada naya ngə kwa gwa'a səli nə kərɗa wa, pam ndə nda kwa gwa'a səli na'a, ya nacha ngə ndər nəuma. 51 Vəlvəl yo nar hi, madawa tə ɓəlatə ɓwanya ɗa, a tlakə nyi da kwa ɓə na tə pa'a wa.”

52 Kəl njir Yahuda inda tə nar nyi, “Sakan ja nənyi təea jiri məlləm ku kəra ka. Ibrahim təti, ka Njir mətakər, ya janə ko na, madawa tə ɓəlatə ɓwanya ɗa, a da cho ɓə na tə pa'a wa.” 53 A ndiya tə kə adan ea Ibrahim ndər mətakər ya? A tətə cha, maləm wawa'a kuɗətə tsəu. Aman ko la'a kərngha? 54 Ngə Yesu tə nar nda, “Macha yo həsəlir kərɗa, cho ɗa ka sə ɓwa'atanyi. Ada ɗa ngə kwa na'a səli. Ya nacha ngə Hyel kəhi. 55 A da hyo zəndə nyi wa, naya na'a, a zəndə nyi təya. Ma ya na a da yo zəndə nyi wa, a ndiya hi təya tla gəzhi. Kəl ja, a zəndə nyi təya, ga ɓəlatə ɓwanya nyi tsəu. 56 Adan hi Ibrahim, tə mər hirgyaɗi wi sə wa, ga cha la'a shili ɗa. A la'atə cha ga mər hirgyaɗi.” 57 Njir Yahuda nar nyi, “Naka, a da ka taa fa tufkumnyi wa, aman kə taa la'a Ibrahima?” 58 Kəl Yesu tə nar nda, “Vəlvəl yo nar hi, təvi nja ya Ibrahim, a da ya.” 59 Nda ngatə nda ənga, kəl nda fa'a hangu ka ga nda vakənda nyi ni. Ngə Yesu tə gwatanyi ku məkutla, ga biya tanyi ku Mbwa'alə Hyel nda.