Judíospaklochow nejchaxoelpox jaelsliajwapi Jesús
22
Mox pawʉajna Pascuafiestaliajwa.
Japamatkoiyan jiw xael pan levadurajila.
Lucas 22.1-22
2 Japamatkoiyan sacerdotespaklochow,
judíos chanaekabʉanapibej,
natameja wʉt,
nakaewa najʉm-aechi:
“¿Machiyaxaeskat Jesús boesaliajwas?”
—na-aechi nakaewa.
Pe Jesús boesaxisalfʉk,
japi pejlewla xoti jiwliajwa.
3 Do jawʉt,
Satanás low Judas pejmatpʉatxot.
Japon Judas Iscariote,
kaen Jesús pejnachalan.
Japontat doce.
4 Do jawʉt,
Judas fʉlaech sacerdotespaklochow poxade,
Dios pejtemploba wetipaklochow poxadebej.
Jaxotde paꞌa wʉt,
jʉm-aechon:
—Xamal nejxasinkam wʉt,
xan wiasaxaelen Jesús xamalxot —aech Judas.
5 Paklochow japox jʉmtaen wʉt,
xabich nejchachaemili.
Do jawʉt,
jʉm-aechi Judasliajwa:
—Xanalxot Jesús wiatam wʉt,
xanal mosaxaelen plata —aechi.
6 Do jawʉt,
Judas ow-aech.
Samata,
wʉajnawetlison pachaemmatkoi,
jiw ajil wʉt Jesúsxot,
japamatkoitat wiasliajwapon Jesús paklochowxot.
Jesús xaelpox, pejnachala sʉapich, Pascuafiestanaxaeyax
7 Dolisdoꞌ,
pascuafiestalisox.
Japafiestatat judíos xael pan levadurajila.
Japapascuafiesta wʉt,
jiw xʉaꞌat ovejas jeltiꞌs.
8 Do jawʉt,
Jesús toꞌa wʉt Pedro,
Juan sʉapich,
jʉm-aechon:
—¡Xabʉaꞌde naxaeyax isliajwam,
ovejawi xaeliajwas Pascuafiestatat!
—aech Jesús.
9 Japi wʉajnachaemt wʉt,
jʉm-aechi:
—¿Amxotkat xanal naxaeyax isaxaelen Pascuafiesta nabʉꞌxaeliajwam?
—aechi.
10 Jesús jʉmnot wʉt,
jʉm-aechon:
—Jerusalén paklowax patam wʉt,
kaen aton taeyaxaelam,
mint xafol wʉton kʉarnatat.
¡Japon aton fʉlfʉlaem,
ba lech poxade!
11 ¡Japabapijin jʉm-amo:
‘Jiw chanaekabʉanan jʉm-aech:
“¿Ampabatutatkat xan tajnachala bʉꞌxaeyaxaelen Pascuafiestanaxaeyax?”
—aech jiw chanaekabʉanan’ —amo bapijin!
12 Japon bapijin xamal itpaeyaxael athʉ pejbatupijax,
pinjiyax.
Wʉajna chajia chiekal chaemtas.
Jaxotse naxaeyax isaxaelam xatisliajwa —aech Jesús,
pejnachala toꞌa wʉt.
13 Do jawʉt,
pejnachala fʉlaechlisi Jerusalén paklowax poxade.
Pat wʉti,
puexa,
me-ama Jesús chajia jʉm-aech,
ja-aechlisox.
Samata,
jaxotse naxaeyax ispi Pascuafiestanaxaeyax xaeliajwa.
14 Xaeliajwa wʉt,
Jesús,
pejnachala sʉapich,
japi apóstolespi,
chalaklisi mesaxot.
15 Do jawʉt,
Jesús jʉm-aech pejnachalaliajwa:
—Xan xabich nejxasinkax,
xamal sʉapich,
xaeliajwan ampafiestanaxaeyax xan tʉpax wʉajna.
16 Diachwʉajnakolax xan jʉm-an.
Xan pejme xaeyaxinil Pascuafiestanaxaeyax ampathatat.
Asamatkoi,
Dios xamal bʉꞌwia wʉt,
jawʉt pejme xaeyaxaelen,
xamal sʉapich,
Pascuafiestanaxaeyax Diosxotse —aech Jesús.
17 Do jawʉt,
Jesús copa chafit puexa pejnachala fiaflaliajwa.
Jawʉt Jesús gracias-aech wʉt Diosliajwa,
jʉm-aechon:
—¡Maj ampot!
¡Kaenanʉla xamal fiafʉlde!
18 Diachwʉajnakolax xan jʉm-an.
Pejme feyaxinil vino ampathatat.
Hasta Dios puexa pejjiw tatoꞌal wʉt,
jawʉt pejme vino feyaxaelen —aech Jesús.
19 Do jawʉt,
Jesús panax fit wʉt,
Dios gracias-aech wʉton Diosliajwa,
panax jalkafʉl pejnachala kexadiajsliajwa.
Chaxduw wʉt pejnachala xaeliajwa,
Jesús jʉm-aech:
—Ampapan itpaei,
me-ama tajwit,
xan tʉpaxaelen xot xamalliajwa.
Asamatkoi,
pan xaelam wʉt,
xan nanejchafaekaliajwam —aech Jesús pejnachalaliajwa.
20 Xaeyax kaechatoel wʉt,
Jesús pejme copa chafit wʉt,
jʉm-aechon:
—Ampavino itpaei,
me-ama tajjal.
Xan tʉpx wʉt,
tajjal nakola wʉt,
jiw xan nanaexasitpi,
japi beltaeyaxaes babijaxan ispoxanliajwa,
tajjal pijaxtat.
21 Nawiasaxaelpon tadaelmajiwxot,
ma amxot nak-ekondoꞌ.
22 Xan,
puexa jiw pakoewkolnan,
tʉpaxaelen,
me-ama Dios pejjamechan chajia jʉm-aech.
Pe nawiasaxaelpon tadaelmajiwxot,
japon kaes pejme xabich nabijasaxael —aech Jesús pejnachalaliajwa.
23 Jesús pejnachala japox jʉmtaen wʉt,
nakaewa najʉm-aechnapi:
—¿Achankat xatisxot Jesús wiasaxael japon padaelmajiwxot?
—na-aechnapi nakaewa.
Lucas 22.23-38
Jesús pejnachalaxot, japixot achan kaes paklonaxaelpox
24 Do jawʉx,
Jesús pejnachala nakaewa najʉm-aechi:
“¿Achankat xatisxot kaes pejme paklonaxael?”
—na-aechi.
25 Jesús japox jʉmtaen wʉt,
jʉm-aechon japiliajwa:
“Asatʉajnʉpijiw,
Dios naexasis-elpi,
paklochow tatoꞌlas wʉt,
tatoꞌla-esal chamoeyaxtat.
Ja-aech wʉt,
paklochow nakiowa jiw nejxasinkas jʉmchiliajwas:
‘Wajpaklochow xabich pachaem’ —chiliajwas.
26 Pelax xamal jasoxtat tatoꞌlaximil.
Wʉljoeyaximilbej pamamax najutliajwa.
Xamalxot kaen paklonasia wʉt,
japon majt xamal malech tanbichaxael,
me-ama pamakan wʉt,
jachiliajwapon.
Me-ama yamxʉlan pakoew pakdiachowxot wʉt,
jachiyaxael japon aton.
27 Paklon ek wʉt xaeliajwa mesaxot,
pamakan chiekal tataeflison,
kamta isliajwa pejpaklon toꞌaspox.
Ja-aechon,
paklon kaes tatoꞌlan xot.
Xanlax jachi-enil.
Xamalxotx wʉt,
puexa kajachawaesfʉlax xamal.
Me-ama namaknan wʉt,
ja-an xan xamalliajwa” —aech Jesús pejnachalaliajwa.
28 Jesús pejme jʉm-aech pejnachalaliajwa:
“Xamal nachalafʉlam,
Satanás piach xan naxapaejkafʉl wʉt.
29 Samata,
tapaeyaxaelen xamal tatoꞌlaliajwam jiw.
Me-ama taj-ax Dios xan natapaei puexa jiw tatoꞌlaliajwan,
xamalbej jachiyaxaelen.
30 Xan tajmatkoi pat wʉt jiw tatoꞌlaliajwan,
jawʉt kaeyaxtat,
xamal sʉapich,
xaeyaxaelen.
Feyaxaelenbej.
Jawʉt chalakaxaelam asatʉa-ekaxanxot,
paklochow pejtʉa-ekaxanxot,
tatoꞌlaliajwambej docemʉtanpijiw,
Israel tʉajnʉpijiw” —aech Jesús pejnachalaliajwa.
Pedro xanaliyaxaelpox Jesús pejnachalanpoxliajwa
31 Jesús jʉm-aech Pedroliajwa:
—Simón,
¡chiekal najʉmtaem!
Satanás wʉljow Dios tapaeliajwas xam xapaejsliajwapon.
Xabich xapaejsasiapon xam xan nakofsliajwam.
32 Pe xan Dios kawʉajnax xam nanaexasisfʉlaliajwam.
Pejme xam xan chiekal nanaexasitam wʉt,
xam kajachawaesfʉlaxaelam asew tajnachala,
japi kaes xan nanaexasisfʉlaliajwa —aech Jesús Pedroliajwa.
33 Simón Pedro jʉm-aech:
—Tajpaklon,
asew jiw,
jiw jebatat xam jia wʉti,
¡japibej xan nej naje!
Xam boesa wʉtbejpi,
¡japibej xan nej naboesa!
—aech Simón Pedro Jesúsliajwa.
34 Jesús jʉmnot wʉt,
jʉm-aechon:
—Pedro,
xan chiekal jʉm-an xamliajwa.
Amwʉt,
kawaema nejlae-el wʉtfʉk,
tres veces xan naxanaliyaxaelam.
Jʉmchiyaxaelam:
“Xan japon aton matabijs-enil” —chiyaxaelam xanliajwa —aech Jesús Pedroliajwa.
Jesús pejnachala pejme fol wʉt xalaeyaxaelpoxan, naewʉajnaliajwa wʉti Dios pejjamechan
35 Do jawʉt,
Jesús jʉm-aech pejnachalaliajwa:
—Xamal toꞌax wʉt Dios pejjamechan naewʉajnaliajwam asapaklowaxanpijiw,
xamal kefiatx xalaesamatam nejchoxan,
plata,
asatʉakxajoebej.
Xamal masim folam wʉt,
¿paweweꞌpkat asaxan?
—aech Jesús,
wʉajnachaemt wʉt pejnachala.
Japi jʉmnot wʉt,
jʉm-aechi:
—Xanal naweweꞌpa-el —aechi.
36 Do pejme Jesús jʉm-aech:
—Xamal pejme folam wʉt,
xamalxot pejchoxanpi,
¡japi nej xalae pejchoxan!
Xamalxot pejplatapi,
¡japibej nej xalae pejplata!
Xamalxot espada kejilpi,
¡thʉch naxoelpox nej mowapi!
Mot wʉti,
¡japaplatatat nej wʉajspi pej-espada!
37 Diachwʉajnakolax xan jʉm-an.
Dios pejjamechan chajia jʉm-aech,
japox diachwʉajnakolax jachiyaxael xanliajwa.
Jʉm-aechox Dios pejjamechan xanliajwa:
‘Japon kastikaxaes.
Me-ama babejen wʉt,
jakechiyaxaeson’ —aechox xanliajwa.
Puexa chajia lelspox,
diachwʉajnakolax japox jachiyaxael xanliajwa —aech Jesús.
38 Do jawʉt,
pejnachala jʉm-aech:
—Tajpaklon,
ama kole-espada —aechi.
Jesús jʉmnot wʉt,
jʉm-aechon:
—Ma ampoxtat do madoꞌ —aechon.
Pawʉlxot, Getsemaní, Jesús Dios kawʉajanpox
39 Jesús nakolt wʉt Jerusalén paklowaxxot,
Olivonaechanmʉax poxade,
me-ama japon pejkabʉan.
Pejnachala wʉchakal fol.
Lucas 22.39-71
—Satanás xamal xapaejaxael.
Samata,
¡Dios kawʉajande!
Ja-am wʉt,
Dios xamal kajachawaesaxael babijax is-elaliajwam —aech Jesús.
41 Do jawʉt,
Jesús atʉaxachon pejnachalaxot tamachaliajwa.
Me-ama iaꞌt xadaps wʉt,
jas-isdepon.
Jaxotde brixtat nukon Dios kawʉajnaliajwa.
42 Dios kawʉajan wʉt,
jʉm-aechon:
“Ax,
nejxasinkam wʉt,
¡nabʉꞌwem nabijasaxaelenpox!
¡Pe nabej is xan nejxasinkaxpox!
¡Isde xam nejxasinkampox!”
—aech Jesús,
pax Dios kawʉajan wʉt.
43 [Do jawʉt,
chalechkal athʉlelsik Dios pej-ángel natulaelt Jesús mamnikaliajwa.
44 Jesús xabich nejchaxoel tʉpaxaelpoxliajwa.
Samata,
kaes pejme Jesús Dios kawʉajnafʉl.
Jawʉt xabich pasislanaton.
Pejsis satat natacholan.
Me-ama jal,
ja-aech pejsis.]
45 Jesús nant wʉt Dios kawʉajanxot,
kaxadin pejnachala poxadin.
Jaxot japi taenpon,
moejt wʉt.
Japi xabich damal,
nejxaejwas xoti.
46 Do jawʉt,
Jesús jʉm-aech pejnachalaliajwa:
—¿Ma-aech xotkat xamal moejtam?
¡Nanim!
¡Dios kawʉajande babijax isasamatam,
Satanás xamal xapaeja wʉt!
—aech Jesús.
Jesús jaeltaspox padaelmajiw
47 Jesús naksiya wʉtfʉk,
Judas xabich jiw bʉꞌpat Jesúsxot.
Japon Jesús pejnachalan,
japontat doce.
Do jawʉt,
mox soepanlison Jesús xusuiliajwa.
48 Pe jawʉt,
Jesús jʉm-aech:
—Judas,
¿xamkat nawiasaxaelam tadaelmajiwxot naxusuyaxtat,
xan,
puexa jiw pakoewkolnan?
—aech Jesús.
49 Taen wʉti ja-aechpox,
Jesús pejnachala jʉm-aech:
—Tajpaklon,
¿xanalkat ampi jiw beyaxaelen espadatat,
xam chamamosliajwan?
—aech Jesús pejnachala.
50 Do jawʉt,
chalechkal kaen Jesús pejnachalan pej-espadatat boesa wʉt,
kaen aton choꞌchikchapon poklalel pejchoꞌt.
Japon aton nabist sacerdotespaklokolanliajwa.
51 Pe jawʉt Jesús jʉm-aech pejnachalanliajwa:
—¡Nadokal!
—aechon.
Do jawʉt,
choꞌchikchaspon Jesús choꞌjacha wʉt,
jawʉt chiekal choꞌkoelon.
52 Pati Jesús jaelsliajwa,
japi sacerdotespaklochow,
temploba wetipaklochowbej,
judíos-ancianosbej.
Jawʉt Jesús jʉm-aech japiliajwa:
—¿Ma-aech xotkat xamal xafolam espada,
iwabej,
xan najaelsasiam wʉt?
¿Xankat xamalliajwa,
me-ama babejnan wʉt,
kabʉan-an?
53 Kaematkoisfʉl Dios pejtemplobatat xan naewʉajnafʉlax jiw xamalxot.
Pe jaxot najaels-emil,
Dios patapae-el xot xamal.
Pe amwʉtjel,
patlisox,
me-ama Dios pejjamechan chajia jʉm-aech xanliajwa,
japox jachiliajwa.
Samata,
amwʉtjel Satanás,
tatoꞌalpon itkʉataxxot,
xamal toꞌa xan najaelsliajwam —aech Jesús.
Pedro xanaliapox Jesús matabijtpoxliajwa
54 Do jawʉtlisdoꞌ,
Jesús jaeltas japi.
Jesús bʉflaech sacerdotespaklokolan pejba poxade.
Jawʉt Pedro atʉaxach fol wʉchakal.
55 Sacerdotespaklokolan,
japon pejbafʉlmaktxot,
temploba weti jit itfoti.
Jaxot jit suꞌchalakax masajiati.
Pedrobej jaxot naksuꞌcha-ek.
56 Do jawʉt,
kaeow pawis,
japabatat nabistpow,
chiekal natachaemtow Pedro,
jit naksuꞌcha-ek wʉton.
Do jawʉt,
jʉm-aechow jaxotpijiw jʉmtaeliajwas:
—Ama kaen,
jaeltaspon pejnachalan —aechow Pedroliajwa.
57 Pedro xanalia wʉt,
jʉm-aechon:
—Pawis,
xan chinax japon aton matabijs-enil —aech Pedro.
58 Do jawʉx,
asanbej pejme taenson.
Japonbej jʉm-aech:
—Diachwʉajnakolax xambej,
japon pejmʉtpijnam —aechon Pedroliajwa.
Pedro jʉmnot wʉt,
jʉm-aechon:
—¡El!
¡Xan japon pejmʉtpijna-enil!
—aechon.
59 Do jawʉx,
kaehora wʉtlejen,
asanbej pejme jʉm-aech:
—Diachwʉajnakolax ampon,
jaeltaspon pejnachalan.
Amponbej Galilea tʉajnʉpijin —aechon.
60 Pe Pedro pejme jʉm-aech:
—Xan matabijs-enil jʉm-ampox —aech Pedro.
Pedro jʉm-aech wʉtfʉk,
jawʉt kawaema nejla.
61 Kawaema nejla wʉt,
Jesús wʉltataen wʉt,
taenon Pedro.
Do jawʉt,
Pedro nejchafaet Jesús chajia jʉm-aechpox:
“Amwʉt,
kawaema nejlae-el wʉtfʉk,
xam tres veces xanliajwa naxanaliyaxaelam.
Jʉmchiyaxaelam xanliajwa:
‘Xan japon aton matabijs-enil’ —chiyaxaelam” —aech Jesús,
chajia jʉm-aech wʉt Pedroliajwa.
62 Do jawʉt,
japabafʉlmaktxot Pedro nakolt tathoet poxaliajwade.
Jaxotde xabich nowpon,
xabich nejxaejwas xot.
Jesús bʉꞌwʉajanpaeispox
63 Poejiw,
weti Jesús,
japi bʉꞌwʉajanpaeipi Jesús.
Baesbejpon.
64 Itfumatakʉsbejpon.
Jawʉt pejme xutulapas.
Kaenanʉla xutulapi jʉm-aechi Jesúsliajwa:
—¡Jʉm-amde,
achan xam xutulap!
—aechi.
65 Japibej jʉm-aechi babejjamechan Jesúsliajwa.
Jesús nukpox judíospaklochow pejwʉajnalel
66 Kandiawasap wʉt,
juimt julan wʉt,
natameja judíos-ancianos,
sacerdotespaklochow,
judíos chanaekabʉanapibej.
(Japi puexa natameja wʉt,
japox pawʉl Junta Suprema.)
Jesús bʉꞌfos wʉt,
bʉꞌpachpon Junta Suprema natamejaxot.
Japi pejwʉajnalel wʉt Jesús jʉmtis:
67 —¡Xanal jʉmtaeliajwan xam jʉm-amde!
¿Xamkat diachwʉajnakolax Cristowam,
Dios toꞌasponam jiw bʉꞌweliajwam?
—aechi.
Jesús jʉmnot wʉt,
jʉm-aechon:
—Xan jʉm-an wʉt:
‘Diasdoꞌ’ —an wʉt,
xamal naexasisaximil.
68 Xamal wʉajnachaemtax wʉtbej,
najʉmnosaximil.
69 Pe xan,
puexa jiw pakoewkolnan,
ekaxaelen taj-ax Dios poklalel jiw tatoꞌlaliajwan,
taj-ax sʉapich.
Dios pamamakolan,
japon xajʉp puexa isliajwa —aech Jesús.
70 Jawʉt Jesús wʉajnachaemtas wʉt,
jʉmtispon:
—¿Xamkatlap Dios paxʉlnam?
—tispon.
Jesús jʉmnot wʉt,
jʉm-aechon:
—¡Diasdoꞌ!
¡Xanlap japonan,
najʉm-amponan!
—aech Jesús.
71 Do jawʉt,
japi nakaewa najʉm-aech:
—Xatis nakweweꞌpa-el asew jiw nakjʉmchiliajwa Jesús pejbʉꞌwʉajanpoxliajwa.
Xatis wajut chiekal jʉmtaens,
jʉm-aech wʉton:
‘Xan Dios paxʉlnan’ —aech wʉton.
Japox jʉm-aech wʉt,
jʉm-aechon Dios nejweslapox.
Samata,
kastikaxaeson —na-aech nakaewa Junta Supremapijiw.