Ovejas tataefʉlpon faenpox pijan oveja, wenafoꞌaspon
15
Impuesto mat-omwʉljoew gobiernoliajwa,
asew jiw,
babijaxan ispibej,
japi pat Jesúsxot jʉmtaeliajwa Jesús naewʉajanpox.
Lucas 15.1-10
2 Fariseos,
judíos chanaekabʉanapibej,
japi taen,
asew jiw pat wʉt Jesúsxot.
Jawʉt japi jʉm-aech babejjamechan Jesúsliajwa.
Nakaewa najʉm-aechi:
—Jesús bʉꞌkʉla jiw babejchow.
Japi sʉapich,
xaelbejpon —aechi Jesúsliajwa.
3 Samata,
Jesús japox jʉmtaen wʉt,
jʉm-aechon ampawʉajan fariseosliajwa,
judíos chanaekabʉanapiliajwabej:
4 “Xamalxot kaen aton cien ovejas wʉt,
kaen oveja wenafoꞌas wʉton,
asew noventa y nueve ovejas waelaxaelon jalwekaliajwa wenafoꞌaspon.
5 Do faen wʉton oveja,
wenafoꞌaspon,
xabich nejchachaemlaxaelon.
Taka-osfʉlaxaenon oveja wenafoꞌaspon.
6 Dolison,
ba pat wʉt,
laeyaxaelon pejnachala,
mox duilibej,
chapaeliajwa wenafoꞌasponliajwa.
Jawʉt jʉmchiyaxaelon:
‘¡Nejchachaemilde,
xan sʉapich,
xan pejme faenx xot tajan oveja,
nawenafoꞌapon!’
—chiyaxaelon pejnachalaliajwa.
7 Diachwʉajnakolax xan jʉm-an.
Jachiyaxaelbej,
Dios pej-ángeles nejchachaemil wʉti Diosxotse,
kaen aton koft wʉt babijaxan ispoxan ampathatat,
japon naexasisfʉlaliajwa Dios.
Dios pej-ángeles kaes pejme nejchachaemlaxael japon atonliajwa.
Me-ama noventa y nueve jiw,
pachaempiliajwa,
Dios pej-ángeles nejchachaemil wʉt,
jachiyaxili,
japon atonliajwa” —aech Jesús fariseosliajwa,
judíos chanaekabʉanapiliajwabej.
Pawis faenpox pejkafef, japox pejwʉajan
8 Jesús naewʉajan asawʉajan fariseosliajwa,
judíos chanaekabʉanapiliajwabej.
Jʉm-aechon:
“Pawis diez kafefachan wʉt,
kaekafef wenafoꞌas wʉtow,
japow tamdusaxael lámpara japa-itliakaxtat batu athoesliajwa chiekal jalwekaliajwa pejkafef.
9 Dolisow,
faen wʉt,
laeyaxaelow pejnachala,
mox duilibej,
chapaeliajwa.
Do jawʉt,
jʉmchiyaxaelow:
‘¡Nejchachaemilde,
xan sʉapich,
pejme faenx xot tajkafef,
nawenafoꞌa wʉt!’
—chiyaxaelow.
10 Diachwʉajnakolax xan jʉm-an.
Jachiyaxaellap-is Dios pej-ángeles,
nejchachaemil wʉt,
kaen aton koft wʉt babijaxan ispoxan japon naexasisfʉlaliajwa Dios” —aech Jesús fariseosliajwa,
judíos chanaekabʉanapiliajwabej.
Pax beltaenpox paxʉlan, japox pejwʉajan
11 Jesús naewʉajan asawʉajan,
fariseosliajwa,
judíos chanaekabʉanapiliajwabej.
Jʉm-aechon:
“Kaen aton kolenje paxʉlan.
Lucas 15.11-32
12 Wʉchakalpijin jʉm-aech paxliajwa:
‘Ax,
¡amalis xan nachaxduꞌe tejwaxaelpi!’
—aech wʉchakalpijin.
Do jawʉt,
pax diajan wʉchakalpijin pejewpi.
13 Jawʉx,
kaematkoi sʉapich wʉt,
wʉchakalpijin puexa pejew mowa.
Japaplata xafolon,
chijia wʉt atʉaj,
asatʉajnʉlel.
Jaxotde babijaxan isfʉldepon.
Jasoxtat puexa pejew,
plata,
chiekal xatoeton.
14 Puexa pejew plata chiekal xatoet wʉt,
japamatkoiyan piach naxaeyaxan ajil japatʉajnʉxot,
xabich piach iam thilna-el xot.
Samata,
japon litaxaelafʉl.
15 Do jawʉt,
fʉlaechon japatʉajnʉpijin bichax wʉljoeliajwa.
Bichax faen wʉt,
paklon toꞌason maran tataeflax,
chaxajialspi.
16 Do jawʉt,
japon aton maran xaelpoxan,
japonbej xaesia,
xabich litaxaela xoton.
Pe chinax chaxdus-esal japon xaeliajwa maran xaelpoxan.
17 Do jawʉt,
japon pajut chiekal nejchaxoel wʉt,
jʉm-aechon:
‘Pomatkoicha taj-ax pejbaxot xabich naxaeyaxan pamakjiw chaxduiliajwa.
Taj-axxot naxaeyaxan nama.
Xanlax amxot tajlit tʉpaxaelen’ —aechon,
nejchaxoel wʉt.
18 Do jawʉt,
japon nejchaxoel wʉt,
jʉm-aechon:
‘Xan nawoesa nawiasaxaelen taj-ax poxade.
Patx wʉt taj-axxot,
xan jʉmchiyaxaelen:
“Ax,
xan xabich babijaxan isx Diosliajwa,
xamliajwabej.
19 Xan babejnan.
Samata,
xan tadala kaes naxʉlnan napaeliajwam.
Me-ama namakan tatoꞌlam wʉt,
¡ja-amde xanliajwa!”
—chiyaxaelen,
taj-axxot patx wʉt’ —aechon,
nejchaxoel wʉt.
20 Dolison,
japox nejchaxoel wʉt,
chijialison pax poxade nawiasliajwa.
“Do baxael,
atʉaxach fʉlaen wʉtlejen,
pax taenson.
Jawʉt pax xabich beltaen paxʉlan.
Do jawʉt,
najaeꞌepon paxʉlan bʉꞌkakʉlnaliajwa.
Jawʉt wʉjaelton paxʉlan.
Wʉjaelt wʉt,
xusuwpon paxʉlan.
21 Jawʉt paxʉlan jʉm-aech paxliajwa:
‘Ax,
xan xabich babijaxan isx Diosliajwa,
xamliajwabej.
Xan babejnan.
Tadala kaes naxʉlnan napaeliajwam’ —aech paxʉlan paxliajwa.
22 Pe jawʉt,
pax jʉm-aech,
pamakjiw toꞌa wʉt:
‘¡Xabʉaꞌde!
¡Wʉljaeꞌe naxoelax kaes chamoeyaxpox!
¡Xajoembejpon!
¡Anillo kothiyaxajoeldebejpon!
¡Tʉakxajoeldebejpon tʉakxajoelax!
23 Do jawʉx,
¡bʉflaeman pak jeltiꞌsan,
kaes dalpon!
¡Japon xʉaꞌalde!
Amwʉt fiesta isaxaes xaeliajwas.
24 Taxʉlanliajwa nejchaxoelx wʉt,
jʉm-an:
“Diachwʉajnakolax taxʉlan asatʉajnʉtat bej nawetʉpbej” —an,
nejchaxoelx wʉt.
Pe laejapon.
Nejchaxoelxbej:
“Bej nafoꞌabejpon” —an,
nejchaxoelx wʉt.
Pe nawepaton’ —aech pax pamakjiwliajwa.
Do jawʉx,
fiesta isax tʉadutlisi.
25 “Pakoewan pat wʉt pax pejbatat,
matxoelapijin lultat nabistpon.
Pejbichax kekoft wʉt,
ba mox itwefʉlaen wʉt,
thiataenpon jajuiyax.
Thiataenbejpon nababoelax.
26 Jawʉt matxoelapijin lapon pamakan.
Wʉajnachaemt wʉt,
jʉm-aechon:
‘¿Ma-aech xotkat amwʉtjel fiesta isam?’
—aechon.
27 Pamakan jʉmnot wʉt,
jʉm-aechon:
‘Nakoewan pat.
Samata,
nej-ax xanal naketoꞌa pak jeltiꞌsan,
kaes dalpon,
xʉaꞌlaliajwan’ —aech pamakan.
28 Matxoelapijin japox jʉmtaen wʉt,
xabich palalapon.
Palala xot,
ba le-elon.
Samata,
pax nakolde.
Paxʉlan leyax toꞌaliajwa.
29 Matxoelapijin jʉm-aech paxliajwa:
‘Xabich pin-iawaechan xam tanbistax.
Chinax owchila-ela-enil,
natoꞌam wʉt.
Xanlax chinax kaen cabra,
jeltiꞌsan,
nachaxdus-emil,
xan fiesta isliajwan,
tajnachala sʉapich.
30 Amwʉtjel naxʉlan pat,
nejew plata xatoetpon wathoꞌtat,
poejiw bʉꞌmoejtpitat plata kanaliajwa.
Japonliajwalax xam fiesta isam.
Japonliajwabej namakjiw ketoꞌam pak jeltiꞌsan xʉaꞌlaliajwa,
kaes dalpon’ —aech matxoelapijin paxliajwa.
31 “Pax jʉmnot wʉt,
jʉm-aechon paxʉlanliajwa:
‘Wʉa,
xam pomatkoicha xanxotam.
Puexa xan tejewpi,
japoxan xam nejwaxael.
32 Amwʉtjel pachaem fiesta isliajwas,
puexa nejchachaemlaliajwas.
Nakoewanliajwa nejchaxoelx wʉt,
jʉm-an:
“Diachwʉajnakolax asatʉajnʉtat taxʉlan bej nawetʉpbej” —an,
nejchaxoelx wʉt.
Pe laejapon.
Nejchaxoelx wʉt,
jʉm-anbej:
“Bej nafoꞌabejpon” —an,
nejchaxoelx wʉt.
Pe nawepaton amwʉtjel’ —aech pax matxoelapijinliajwa” —aech Jesús fariseosliajwa,
judíos chanaekabʉanapiliajwabej.