3 Do jawʉt,

kaesʉapich fariseos mox soepa Jesús xapaejsliajwapi.

Do kawʉajnachaemt wʉt,

jʉm-aechi:

—¿Poejiwkat tapaeis,

nejmach masoxtat pelsliajwa pejwathoꞌ?

—aech fariseos.

4 Jesús jʉmnot wʉt,

jʉm-aechon fariseosliajwa:

—¿Xamalkat xaljoe-emil Moisés chajia lelpox?

Japox jʉm-aech:

‘Dios ampathat is wʉt,

isbejpon jiw.

Dios is aton,

pawisbej’ —aechox.

5 Dios jʉm-aechbej:

‘Samata,

aton fit wʉt pawis,

japi nakolaxael paxxot,

penxotbej,

japon aton,

pijow sʉapich,

pejlel dukaliajwa’ —aech Dios.

6 Do ja-aech wʉt,

japi kolenje,

me-ama kaen wʉt,

jachiyaxaeli.

Ja-aech wʉt,

japilis,

me-ama majt kolenje wʉt,

jachi-ellisi.

Amwʉtjel japi,

me-ama kaen wʉt,

ja-aechlisi.

Samata,

aton foꞌaxil pijow,

Dios pijaxtat nakjiya xot —aech Jesús fariseosliajwa.

7 Japi fariseos kaes wʉajnachaemt wʉt,

jʉm-aechi Jesúsliajwa:

—Moisés chajia jʉm-aech:

‘Poejiw pelsasia wʉt pejwathoꞌ,

matxoela lelaxael pelfʉt japow chaxdusliajwapon.

Japon lelpox jʉmchiyaxael,

ma-aech xot foꞌaxaelon pijow.

Ja-aech wʉt,

pachaem japon aton foꞌaliajwa pijow’ —aech Moisés chajia lelpox.

¿Ma-aech xotkat Moisés japox tapaei?

—aech fariseos.

8 Do jawʉt,

Jesús jʉm-aech fariseosliajwa:

—Xamal matnaetinkam xot,

Moisés tapaei japox.

Samata,

Moisés xamal tapaei pelsliajwam nejwathoꞌ.

Majt,

akaseskolaxtat,

Dios nejxasink,

aton pijow fit wʉt foꞌa-elaliajwa,

japowxot pomatkoicha laejaliajwapon.

9 Pe xan jʉm-an.

Aton pijow foꞌa wʉt asbʉan jʉmch masoxtat,

asaow fit wʉton,

japox xabich chaemil Diosliajwa,

bʉꞌmoejt xoton asaow pawis,

pijowkolwa-elpow.

Pe pawis pakmolow,

asan aton bʉꞌmoejt wʉt,

ja-aech wʉt,

Dios tapaei aton foꞌaliajwa pijow —aech Jesús fariseosliajwa.

10 Do jawʉt,

xanal pejnachalwan jʉm-an Jesúsliajwa:

—Pachaema-el wʉt poejiw pejwathoꞌ pelsliajwa,

ja-aech wʉt,

kaes pejme pachaemaxael poejiw wathoꞌ nos-elaliajwa,

tamach laelpaliajwa —an xanal.

11 Do jawʉt,

Jesús xanal najʉmnot wʉt,

jʉm-aechon:

—Puexa jiw najʉmmatabijaxil xan jʉm-anpox.

Dios tapaeispikal,

japikal najʉmmatabijaxael japox.

12 Poejiwxot asew nakjiyaxil,

ʉthjilax chanlaela xoti.

Asew poejiw nakjiyaxil,

ʉthjuks xoti.

Asew poejiwbej nejxasinkaxil nakjiyaliajwa,

Dios puexa pejjiw tatoꞌalmatkoi mox pawʉajna xot.

Xamal xajʉpam wʉt matabijaliajwam xan jʉm-anpox,

¡chiekal matabijim!

—aech Jesús xanal pejnachalwanliajwa.

13 Asamatkoi jiw paxi bʉflaen Jesúslel,

Jesús ke-osliajwa yamxi pejtaꞌanxot Dios wekawʉajnaliajwapon japi yamxiliajwa.

Xanal pejnachalwan japox taenx wʉt,

japi jiw fiatx paxi bʉflaesamatapi Jesúslel.

14 Do jawʉt,

Jesús najʉm-aech xanalliajwa:

—¡Tapaem yamxi xanlel bʉflaeliajwadin!

¡Nabej fias!

Diosxotse,

Dios jiw tatoꞌalxotse,

japi jiw,

me-ama ampi yamxi,

ja-aech,

kamta naexasit xoti Dios —aech Jesús.

15 Do jawʉt,

Jesús ke-ot japi yamxi pejtaꞌanxot Dios kawʉajnaliajwapon.

Dios kawʉajnax bʉxtoet wʉt,

jaxot chijialison,

xanal pejnachalwan sʉapich,

asalel fʉlaeliajwa.

16 Kaen pansian fʉlaen taeliajwapon Jesús.

Pat wʉton Jesúsxot,

wʉajnachaemt wʉt,

jʉm-aechon:

—Jiw chanaekabʉanan,

xam pachaemamponam,

¿achaxkat xan naweweꞌp isliajwan pachaempox,

pomatkoicha dukaliajwan Diosxotse?

—aechon.

17 Jesús jʉmnot wʉt,

jʉm-aech:

—¿Ma-aech xotkat xan najʉm-am:

‘Xam pachaemamponam’ —na-amkat?

Kaen Dios,

japon pachaempon.

Pasasiam wʉt Diosxotse,

¡naexasisfʉlde Dios tatoꞌalpoxan!

—aech Jesús.

18 Pansian wʉajnachaemt wʉt,

jʉm-aechon:

—¿Masoxkat,

Dios tatoꞌalpoxan,

xan naexasisfʉlaliajwan?

—aechon.

Do jawʉt,

Jesús jʉm-aech:

—‘¡Asew jiw nabej beꞌ!

¡Asaow pawis,

nijwa-elpow,

nabej bʉꞌmoejsbej!

¡Nabej natkoweꞌbej!

¡Nabej kichachajbeꞌbej asan aton xam tasalaliajwam,

babijax is-el wʉton!

19 ¡Sitaembej nej-ax,

nej-enbej!

¡Nejxasinkdebej asew jiw!

Me-ama xam najut nanejxasinkam wʉt,

¡ja-amde asew jiwliajwa!’

—aech Jesús.

20 Pansian jʉm-aech:

—Xam najʉm-ampoxan,

xan chiekal naexasisfʉlax.

¿Pe achaxkat xan kaes naweweꞌpfʉk?

—aechon.

21 Jesús jʉmnot wʉt,

jʉm-aechon:

—Chiekal pachaemasiam wʉt,

¡xabʉaꞌde nejba poxade nejew mowaliajwam!

Mowam wʉt,

¡japaplata chaxduim kejila!

Ja-am wʉt,

xabichaxael nejew Diosxotse.

Do jawʉx,

¡xam xabʉaꞌde xan naknanʉamsliajwam,

tajnachalnamliajwabej!

—aech Jesús pansianliajwa.

22 Pansian japox jʉmtaen wʉt,

xabich nejxaejwas,

xabich kemaenk xoton.

Samata,

jawʉt Jesúsxot asbʉan jʉmch chijialison.

23 Do jawʉt,

Jesús xanal najʉm-aech:

—Diachwʉajnakolax xan jʉm-an.

Xabich tampoel kemaeya pasliajwa Diosxotse.

24 Xamal chiekal matabijam.

Camello pinjin xot,

xajʉpaxil xensliajwadepon kuthatʉakreꞌwʉaj poxade.

Ja-aechbej kemaeyaliajwa.

Xabich tampoel kemaeya pasliajwa Diosxotse —aech Jesús.

25 Xanal Jesús pejnachalwan japox jʉmtaenx wʉt,

nejchaxoelanuilx.

Do jawʉt,

xanal jʉm-an Jesúsliajwa:

—¿Achankatlax bʉꞌweyaxaes pasliajwa Diosxotse?

—an xanal.

26 Do jawʉt,

Jesús xanal chiekal natachaem wʉt,

najʉm-aechon:

—Jiw pajut pasaxil Diosxotse.

Pelax Dios xajʉp puexa isliajwa.

Samata,

xajʉpbejpon jiw bʉꞌweliajwa.

Kajachawaesaxaelbejpon jiw pasliajwa japonxotse —aech Jesús xanalliajwa.

27 Do jawʉt,

Pedro jʉm-aech:

—Xanal puexa tejew waelax xam nakfʉlaeliajwan.

¿Achaxkat Dios xanal nachaxduiyaxael?

—aech Pedro Jesúsliajwa.

28 Do jawʉt,

Jesús jʉm-aech:

—Diachwʉajnakolax xan jʉm-an.

Xan,

puexa jiw pakoewkolnan,

tatoꞌlaxaelen wʉt ampathatat,

pajelthat wʉt,

jawʉt ekaxaelen tajtʉa-ekaxtat,

xabich pachaempoxtat.

Ja-aech wʉt,

chiekal pachaemaxael puexa jiw tatoꞌlaliajwan.

Xamal tajnachalwam chalakaxaelambej asatʉa-ekaxantat tatoꞌlaliajwam docemʉtanpijiw,

Israel tʉajnʉpijiw.

29 Xan tajaxtat xamal waelam wʉt nejew,

nejbachan,

nakoewbej,

nej-enbej,

nej-axjiwbej,

naxibej,

nejsatanbej,

ja-am wʉt,

Dios kaes cien veces chaxduiyaxael xamal.

Asamatkoi tʉpam wʉtbej,

pasaxaelam Diosxotse pomatkoicha duilaliajwam jaxotse.

30 Xabich jiw,

paklochowpi,

ampathatat.

Pe japi Diosxotse wʉt paklochowaxil.

Ampathatat xabich jiw,

paklochowa-elpi,

japilax Diosxotse wʉt,

paklochowaxael —aech Jesús xanal pejnachalwanliajwa.