Diez tatoꞌlaxan, Dios pejtatoꞌlaxpox
20
Dios naksiya wʉt, jʉm-aechon ampajamechan israelitasliajwa:2 “Xanlap nejDiosnan, nejpaklonan, xamallap jukx, Egipto tʉajnʉxotam wʉt, esclavowam wʉt.
3 “Samata, ¡xamal kaes asew diosan wʉlwekaximil nejdiosanliajwa. Xanlap chiekal kaenan Diosnan!
4 “¡Ampoxanlap ael-isaximil ídolosliajwa kawʉajnaliajwam japoxan! ¡Ael-isaximil thatbaxoxotsepi! ¡Ael-isaximilbej ampathatatpi! ¡Ael-isaximilbej mintat laelpi! 5 ¡Japoxan wʉajnalel xamal nuilaximil brixtat sat makxabijkaliajwam, itpaeliajwam nejsitaeyax! ¡Ídolosliajwabej nabichaximil! Xanlap chiekal kaenan nejpaklonan, nejDiosnan. Xan kastikaxaelen babijaxan ispi, nejweslapibej xan. Samata, japoxan is wʉti, xan japi paxi, japi pamojiwbej, pamojiw paxibej, kastikaxaelen. 6 Pelax, xabich pachaempi xanliajwa, japi is wʉtbej xan tatoꞌlaxpoxan, japi paxi, pamojiwbej, pamojiw paxibej, chiekal jʉmch tataeflaxaelen xabich nejchachaemlaxtat.
7 ¡Tajwʉltat jʉmduiyaximil naekichachajbaliajwam asew jiw! Ja-am wʉt, ¡xamal kastikaxaelen!
8 “¡Nejkiowaximil napataliajwam, napatamatkoi wʉt, xan toꞌax xot japamatkoi xamal chiekal napataliajwam! 9 ¡Kaeseman nabistam wʉt nabichaxaelam seis matkoiyan, japamakoitat xanlap, puexa isaxpox chiekal isx! 10 Pe séptimomatkoi wʉt, japamatkoi wʉt xamal chiekal napataxaelam, itpaeliajwam sitaeyax xanliajwa. Japamatkoi wʉt, ¡chinax bichax isaximil! ¡Japamatkoi wʉtbej, naxipoejiw isaxil bichax, naxiwathoꞌbej, nej-esclavos, nej-esclavasbej! Nejchoefbej xanbichaximil japamatkoi wʉt. Asatʉajnʉchanpijiw, xamalxot duili, ¡japibej nabichaxil japamatkoi wʉt! 11 Xanlap, Diosnan, isx seis matkoitat thatbaxo, thatbej, marbej. Isxbej puexa thatbaxotatpi, thatatpibej, marxotibej. Do jawʉx, séptimomatkoi wʉt, kaes is-enil. Chiekal napatx. Japamatkoi, xan chiekal tajmatkoilape. Samata, xamalbej chiekal napataxaelam.
12 “Xamal puexa chiekal, ¡sitaeyaxaelam nej-axjiw, nej-enjiwbej! Ja-am wʉt, xamal piach laelpaxaelam, nejpaklon Dios, chaxdusaxael tʉajnʉxot.
13 “¡Asan aton boesaximil, nejwesla wʉt!
14 “¡Poejiw, kaenanʉla pejwathoꞌ sitaeyaxael. Asew wathoꞌ bʉꞌmoejsaxili!
15 “¡Natkowaximil asew jiw pejew!
16 “¡Jʉmchiyaximil kichachajbaxan asew jiwliajwa!
17 “¡Nejxasinkaximil asan pejba, japaba xam nejbaliajwa! ¡Nejxasinkaximilbej asan pijow, japow xam nijowliajwa! ¡Nejxasinkaximilbej asan pej-esclavo, o, esclavabej, japi xamal nej-esclavosliajwa! ¡Wenejxasinkaximilbej asan pejew woei, o, pejew bur, japi xanbichliajwam! ¡Chinax wenejxasinkaximilbej asan pijaxpox!” —aech Dios puexa israelitasliajwa.
Puexa israelitas pejlewlapox Diosliajwa
(Dt 5.22-33)
18 Puexa israelitas thiataen najuwpoxan, chamx xabich jʉmsiapoxanbej, xabich nakliafbala wʉt. Thiataenbejpi, me-ama trompeta thiachiyax. Sinaímʉax xabich tampoel itnumtat. Jawʉt, israelitas atʉaj taxnuili, xabich pejlewla xoti Diosliajwa. 19 Samata, israelitas jʉm-aechi ampox Moisésxot:
—¡Xam kaenam tamach naewesaxaelam Dios jʉm-aechpoxan xanalliajwa! Do jawʉx, ¡xanal nachapaeyaxaelam Dios jʉm-aechpoxan xamxot! Do jawʉx, japoxan xanal nachapaeyam wʉt, chiekal naexasisaxaelen. ¡Pe Dios pajut nej naksiya-ele xanalliajwa, xanal tajlewt xabich jʉmch tʉpasianxot! —aech israelitas Moisésxot.
20 Do jawʉt, Moisés jʉm-aech ampox israelitasliajwa:
—¡Xamal nejlewlaxil, Dios naksiya wʉt xamalliajwa! Dios pajut fʉloek xamal xapaejaliajwa, japon chiekal sitaeliajwam, is-elaliajwam babijaxan japonliajwa —aech Moisés israelitasliajwa.
21 Israelitas atʉaj nuil wʉt, jawʉt Moisés kaes chiekal moxsfʉlde itloejen, pafoeyax, poxade. Japox itloejen, pafoeyaxxot, jaxotlap Dios.
Dios toꞌapox pejtatoꞌlaxxot, machiyaxaelpox, israelitas is wʉt altar Diosliajwa
22 Do jawʉt, Dios jʉm-aech ampox Moisésxot, bʉxtoꞌa wʉton ampox:
“Ampoxlap xam jʉmchiyaxaelam puexa israelitasxot xan jʉm-anpox: ‘Xamal najut chiekal jʉmtaenam, xan naksiyax wʉt athʉxotsik xamalliajwa. Jawʉt, jʉm-anbej ampox: 23 “¡Isaximil ídolos orotat, platatatbej, japoxan kawʉajnaliajwam, me-ama xan nakawʉajnam wʉt, jachiliajwam! 24 ¡Nawe-isaxaelam astat altar, japox altarxot xamal choef xʉaꞌasliajwam! ¡Oveja wʉt, o, pak wʉtbej, japa-altarmatwʉajtat choef xʉaꞌatampi bowaxaelam, nejbabijaxan isampoxanliajwa xamal beltaeliajwan! Kaenanʉla tʉajnʉchanxot, jaxot xan xabich nejchachaemlaxaelen jiw nasitaeliajwa xan. Jaxotdebej pasaxaelen xamal kajachawaesliajwan, puexa chiekal pachaemaliajwa xamalliajwa. 25 Pe xanliajwa nawe-isam wʉt iaꞌaltar, isaximil iaꞌ, triawkampotan, xanbistampitat. Iaꞌ, xanbistampotan, pachaemaxil taj-altar isliajwam. 26 Xamal isam wʉtbej taj-altar, ¡isaximil escalones! Xamal jaxot julam wʉt, asan aton taeyaxael xamal nadalaxot asew jiw taeliajwa’ —chiyaxaelam israelitasxxot” —aech Dios Moisésxot.