—Ampajamechanlap jʉmchiyaxaelam Jacob pamojiw, japi israelitas: 4 ‘Dios jʉm-aech ampox, xan nabʉxtoꞌa wʉt xamal jʉmchiliajwan: “Xamal taenam xan isxpoxan Egipto tʉajnʉpijiwliajwa. Xamal najut chiekal taenam bʉflaenx wʉt ampaleldin. Me-ama kakoef paxi xafol wʉt, ja-anla-is xan, xamal bʉflaenx wʉt. 5 Xamal chiekal naexasitam wʉt puexa tajtatoꞌlaxan, chiekal isam wʉtbej, me-ama tajconvenioxot jʉm-an, ja-am wʉt, ampathatpijiwxot, xamal tajjiwaxaelam. Pe ampathatlap, xan tajthat jachiyaxaelen xamaliajwa. 6 Kaenanʉla xamalbej, me-ama sacerdote wʉt, jachiyaxaelam xanliajwa, xankal nakawʉajnaliajwam” —aech Dios xamalliajwa, xan nabʉxtoꞌa wʉt xamal jʉmchiliajwan’ —chiyaxaelam puexa israelitasliajwa —aech Dios Moisésxot.

7 Do jawʉt, Moisés ow-aech wʉt Dios jʉm-aechpox, baloeklison puexa israelitas pej-ancianos jʉmchiliajwa Dios bʉxtoꞌaspox. Do jawʉx, Moisés chapaeilison israelitas pej-ancianos puexa Dios jʉmtispoxan mʉaxxotse. 8 Do jawʉt, israelitas japox jʉmtaen wʉt, pota kaeyax chiekal jʉmnuiljalapi naexasisliajwa Dioskal:

—Dios natoꞌapoxan xanal kaenanʉla puexa chiekal isaxaelen —aech israelitas Moisésxot.

Do jawʉx, Moisés japox wʉajan xajulach Dios poxase chapaeliajwa, puexa israelitas kaenejchaxoelaxpox isliajwa Dios toꞌaspoxan.

9 Jawʉt, Dios jʉm-aech ampox Moisésxot:

—Xam nejwʉajnalel xan tajut tampaeyaxaelen itloejen xabich pafoeyaxtat. Naksiyax wʉt xamliajwa, israelitas pajut chiekal jʉmtaeyaxaeli tajjame. Ja-aech wʉt, japi naexasisaxael, naewʉajnam wʉt xanliajwa —aech Dios Moisésxot.

Moisés pejme jʉm-aech ampox Diosxot, puexa israelitas kaenejchaxoelaxpox isliajwa Dios toꞌaspoxan. 10-11 Jawʉt, Dios jʉm-aech ampox:

—¡Xabʉaꞌde! Ma amwʉt, kandiawa, ¡puexa israelitas nej nachaems natamejaliajwa xanxot! ¡Nej itkiasbejpi pejew naxoe, jakandiawa wʉt asjila naxoeliajwa! Jakandiawa wʉt, xan, Diosnan, fʉloeyaxoekan, Sinaí mʉax poxasik. Puexa israelitas pajut chiekal xan nataeyaxael. 12 ¡Chabakamarkde ampa-iaꞌbotmʉax jiw kaes xenasamata markampox! ¡Ampamʉax nej sitaepi! ¡Nej jula-elabejpi! ¡Xabich nej moxa-elabejpi ampamʉaxxot! Nejmach-aton moxaxael wʉt ampamʉaxxot, japon atonlap kastikaxtat tʉpaxael. 13 Japon aton kastikaxaes wʉt, chinax kaen aton beyaxisal ke-etat. Japon aton iaꞌtat dadaepaxtat matkaejabaxaes. Ja-el wʉt, pajlaxaeson bo-oenantat. Aton wʉt, choefan wʉtbej, pe nakiowa, japon aton tʉpaxael kastikaxtat. Pe, jiw thiataen wʉt carneromat-et nababeyax, jawʉt tapaeis jiw julaliajwa ampamʉaxxotsin —aech Dios Moisésxot.

14 Do jawʉx, Moisés baloek mʉaxxotsik puexa israelitas nachaemsax toꞌaliajwa, japi chiekal pachaemaliajwa, natameja wʉt sitaeyax itpaeliajwa Diosliajwa. Samata, israelitas itkiati pejew naxoe. 15 Moisés jʉm-aech ampox israelitasliajwa:

—¡Thilde tres matkoide wʉt naxoeliajwam! Pe jawʉt, ¡nijow sʉapich, moejtam wʉt, jachiyaximil!

16 Do jawʉt, tres matkoi wʉt, nalian wʉt, chamx xabich nakliafbala. Najuꞌbalabej. Do jawʉt, itloejen, xabich pafoekolax, fʉlaeflik japamʉaxxotsik. Trompetan xabich jʉmsenk wʉt, israelitas xabich tathʉlal, pejlewla xoti. 17 Do jawʉt, Moisés bʉꞌfoli israelitas bijaxot nafaenaliajwa, Dios sʉapich. Nuilisi mox mʉaxxot. 18 Pomʉaxa, Sinaimʉax, xabich itnum, Dios fʉloek xot jitat japamʉaxxotsik. Japa-itnuman athʉ itnum jul. Me-ama horno itnuman wʉt, ja-itnum-aechpox. Pomʉaxa japamʉax, me-ama xabich juiyas wʉt, ja-aechbejpox. 19 Jawʉtbej, trompetan jʉmsenkpoxan xabich kaes jʉmsenkafʉl. Do jawʉt, Moisés naksiya wʉt, Dioslap jʉmnot wʉtbej, me-ama xabich najuꞌbala wʉt, ja-aech Dios.

20 Dios fʉloek Sinaímʉaxxotsik, kaes xabich athʉxotsik. Jawʉt, Dios toꞌa Moisés julaliajwasin japoxase. Do jawʉt, Moisés julach Dios poxase. 21 Do jawʉtbej, Dios jʉm-aech ampox Moisésxot:

—¡Balaemk puexa israelitas jʉmchiliajwam ampox: ‘Dios nabʉxtoꞌa wʉt, jʉm-aechon ampox xamal jʉmchiliajwan: “Xamal tʉpasamatam ¡kaes xenaximil markaspox ampamʉaxxot, xan nataeliajwam! 22 Hasta tajsacerdotepi, xan tapaeix moxaliajwa xanxot, japi majt chiekal nachaemsaxael pachaemaliajwa xanliajwa. Nachaems-el wʉti, japibej xan kastikaxaelen” —aech Dios, xan nabʉxtoꞌa wʉt xamal jʉmchiliajwan!’ —aech Dios Moisésxot.

23 Moisés jʉmnot wʉt, jʉm-aechon ampox:

—Israelitas julaxil ampamʉaxxot, pawʉlpox Sinai. Xam chajia najʉm-am markaliajwan jiw kaes xena-elaliajwa markaxpox. Xambej chajia jʉm-am ampamʉaxliajwa, nejmʉaxpox —aech Moisés Diosxot.

24 Pe Dios jʉm-aech ampox Moisésxot:

—¡Xabʉaꞌdik wʉljaesliajwam Aarón! Do jawʉt, ¡julaman, japon sʉapich! Pe sacerdotes, israelitas, xenaxil markampox julaliajwasin xanxot. Pe nakiowa, julan wʉti, japibej kastikaxaelen —aech Dios Moisésxot.

25 Do jawʉx, Moisés baloek wʉt, pejme jʉm-aechon Dios bʉxtoꞌaspox jʉm-aechiliajwa puexa israelitasliajwa.