Jetro taenpox pafaman Moisés
18
Jetro, japonlap sacerdote-aton, Madián tʉajnʉpijin. Japonlap Moisés pʉax. Jetro jʉmtaen Dios ispoxan Moisésliajwa, israelitasliajwabej. Jʉmtaenbejpon, Dios jukpox pejjiw, israelitas, Egipto tʉajnʉxot. 2-3 Majt Moisés Egipto tʉajnʉxot wʉt, toꞌapon pijow Séfora, kolenje paxʉlan sʉapich, japow pax poxaliajwade, asax japiliajwa jachisamata. Moisés paxʉlan, matxoelapijin, pawʉl Gersón, Moisés jʉm-aech xot ampox: “Xan asatʉajnʉpijnan dukx asatʉajnʉxot” —aech xot Moisés. 4 Moisés paxʉlan, wachakalpijin, pawʉl Eliezer, Moisés jʉm-aech xot ampox: “Taj-ax pejDios fʉloek xan nakajachawaesliajwa, nabʉꞌweliajwa, faraón naboejsasia wʉt espadatat” —aech xot Moisés. 5 Moisés, puexa pejjiw sʉapich, bijapi pajilaxxot, mox Dios pejmʉaxxot. Moisés jaxot wʉt, pʉax Jetro pat, paxʉlow sʉapich, japow Moisés pijow, kolenje paxʉlan sʉapich. 6 Jetro jʉm-aech ampox pafaman Moisésxot:—Xan nej-ʉaxnan, Jetro, fʉlaenx, nijow sʉapich, kolenje naxʉlan sʉapichbej, xam taeliajwan —aech Jetro pafaman Moisés.
7 Do jawʉt, Moisés nakolde pejcarpabaxot pʉax bʉꞌkʉlsliajwa. Do jawʉtbej, natxatdikon pʉax wʉajnalel. Moisés xusuw pʉax Jetro. Jawʉt, nawʉjaelapi. Do jawʉt, lowlisi carpaba. 8 Jawʉt, Moisés chapaeipon pʉax, puexa Dios ispoxanliajwa faraónliajwa, Egipto tʉajnʉpijiwliajwabej, japi xabich pachaemaliajwa israelitasliajwa. Chapaeibejpon puexa pʉax Dios ispoxanliajwa bʉꞌweflaliajwas israelitas, min chiekal ijil wʉt, naxaeyaxan chiekal ijil wʉtbej, fol wʉti pajilaxanxot.
9-10 Jetro japox jʉmtaen wʉt, xabich nejchachaemilon, israelitas xabich kajachawaech xot Dios, bʉꞌwias xotbejpi Egipto tʉajnʉpijiwxot. Samata, Jetro jʉm-aech ampox Moisésxot:
—Wajpaklon Dios, japon xabich pachaem. Kajachawaeton xamal weliajwam, faraónxot, Egipto tʉajnʉpijiwxotbej. 11 Ma amwʉt, xan tajut chiekal taenx, wajpaklon Dios xabich kaes pejme mamnik. Me-ama puexa asew diosan, jachi-el japon Dios —aech Jetro pafaman Moisésxot.
12 Do jawʉt, Jetro choefan xʉaꞌla bosliajwa itpaeliajwa sitaeyax Diosliajwa. Kaes asa-ofrenda chaxduwbejpon Dios. Do jawʉx, Aarón, puexa israelitas pej-ancianos sʉapich, fʉlaechlisi, Moisés pʉax sʉapich, xaeliajwa Dios wʉajnalel.
Moisés wʉlduwpox asew israelitasxot japi juecesliajwa
13 Kandiawa wʉt, Moisés eklison wʉajan chaemsliajwa, nakae-israelitas sʉapich, wʉajanpi, japi wechaemsliajwapon wʉajan, japi pejme chiekal pachaemaliajwa. Ja-aech wʉt, israelitas xabich wʉajnawet naliaxafʉlaliajwa wʉajan wechaemsliajwas. Japamatkoitat pomatkoicha israelitas xabic piach nuil Moisés wʉajnalel. 14 Moisés pʉax japox taen wʉt, jʉm-aechon ampox Moisésxot:
—¿Achaxkat xam isam ampi israelitasliajwa? ¿Ma-aech xotkat xamlax kaenam ekam, wʉajan wechaemsliajwam wʉt israelitas? ¿Ma-aech xotbejkat puexa israelitas kaematkoi xabich piach nuil, naliaxafʉlaliajwa wʉt, wʉajan xam wechaemsliajwam wʉt? —aech Jetro pafaman Moisésxot.
15 Moisés jʉmnot wʉt, jʉm-aechon ampox pʉaxliajwa:
—Israelitas fʉlaen xanlel, matabijsasia xoti, masox Diosliajwa pachaem japi isliajwa. 16 Nakae-israelitasxot wʉajan wʉt, xanlel fʉlaenpi, japi jʉmchiliajwan, achan japixot pejbʉꞌwʉajan. Ja-aech wʉt, xan japi naewʉajnax Dios pejtatoꞌlax —aech Moisés pʉax Jetroxot.
17-18 Pe jawʉt, Moisés pʉax jʉm-aech ampox Moisésxot:
—Xam ja-ampox israelitasliajwa, japox chiekal pachaema-el. Xam tamacham xot, xabich damlam japi jiwliajwa. Israelitasbej xabich damal, xabich piach wʉajnawet xoti. 19 ¡Xam chiekal naeweꞌe xan naewʉajnaxaelenpox! ¡Dios nej kajachawaes xam! Xam kawʉajnaxaelam Dios, puexa israelitasliajwa, wʉajan wʉt. 20 Israelitas naewʉajnam wʉt, ¡chiekal chanaekabʉanaxaelam Dios pejtatoꞌlaxan! ¡Naewʉajandebejpi, machiyaxaeli chiekal duilaliajwa nakaewaliajwa! ¡Naewʉajandebej, machiyaxaeli isaxaelpoxan isliajwa! 21 ¡Poejiw makanoꞌe israelitasxot, japi chiekal matabijtpi! Japibej sitaenpi Dios. Japibej nejweslapi asew jiw naekichachajbaliajwa. Japibej jalweka-elpi kanaliajwa pachaema-elaxtat. Jasi poejiwlap, xam makanosaxaelam wʉlduiliajwam israelitas pejpaklochiwliajwa. Samata, makanosaxaelampixot, asew japixot tatoꞌlaxael milmʉtan. Asew japixotbej tatoꞌlaxael cienmʉta. Asew japixotbej tatoꞌlaxael cincuentamʉtan. Asew japixotbej tatoꞌlaxael diezmʉtan. 22 Ja-am wʉt, japi paklochiw pajut kamta wʉajan chaemsaxaeli, wʉajan wʉt israelitasxot. Ja-am wʉt, xam kaenam xabich damlaximil, japoxan wʉajan chaemsliajwam wʉt. Pe wʉajan pinjiyax wʉt, tampoel wʉtbejpox chaemsliajwa, ja-aech wʉt, japi fʉlaeyaxaen xamlel, japox wʉajan chiekal wechaemsliajwam israelitasxot. Ja-aech wʉt japi paklochiw xam kajachawaesaxael. 23 Japoxlap Diosliajwa pachaem xam isliajwam. Ja-am wʉt, xam kaenam wʉajan chaemtam wʉt xabich xadamlaximil. Ja-aech wʉtbej, puexa israelitas pejcarpabachan poxade, nawech wʉt, xabich nejchachaemlaxaeli, wechaemtas xoti wʉajan” —aech Jetro, naewʉajan wʉt pafaman Moisés.
24-25 Do jawʉt, Moisés ow-aech pʉax Jetro jʉm-aechpox. Do jawʉtbej, Moisés makanot israelitas poejiw kaes chiekal matabijtpi tatoꞌlaliajwa. Jawʉtlap Moisés wʉlduw israelitasxot pejpaklochiwliajwa. Japilap tatoꞌlaxael milmʉtpijiw israelistas. Asew jʉmch tatoꞌlaxael cienmʉt. Asew tatoꞌlaxael cincuentamʉt. Asew tatoꞌlaxael diezmʉt. 26 Israelitasxot wʉajan wʉt, japi paklochiwlap japox wʉajan chaemsaxael. Pe wʉajan pinjiyax wʉt, japi paklochiw xajʉpa-el wʉt chaemsliajwa, japox wʉajan xabich tampoel wʉtbej, ja-aech wʉt, japi paklochiw fʉlaen Moisés poxadin, japox wʉajan chaemsliajwa Moisés. 27 Do jawʉx, Moisés kijachapon pʉax Jetro. Moisés pʉax pejme nawiaꞌe pejtʉajnʉ poxade.