Min nakakolsanpox iaꞌbotxotdin
17
Do jawʉx, puexa israelitas chijia pajilaxxot, pawʉlxot Sin. Bijiat fʉlaefʉlisi, me-ama Dios toꞌas. Do baxael, bijapi pawʉlxot Refidim. Pe jaxot min chiekal ijil israelitas feliajwa. 2 Samata, israelitas palalaxot jʉm-aechi ampox Moisésliajwa:—¡Xanal min nachaxduim feliajwan! —aechi Moisésliajwa.
Moisés jʉmnot wʉt, jʉm-aechon ampox israelitasliajwa:
—¿Ma-aech xotkat xan nawʉljowam min? ¿Ma-aech xotbejkat xamal xapaejam Dios? —aech Moisés, jʉmnot wʉt israelitas.
3 Pe israelitas xabich minsila. Samata, naksiyapi babejjamechan Moisésliajwa. Japi jʉm-aech ampox:
—¿Ma-aech xotkat xanal najukam Egipto tʉajnʉxot? ¡Xanal najukam minsit amxot, pajilaxxot, tʉpaliajwan, puexa taxi sʉapich, puexa tajchoef sʉapichbej! —aech israelitas, lot wʉti Moisés.
4 Do jawʉx, Moisés xabich Dios kawʉajan wʉt, jʉm-aechon ampox Diosliajwa:
—¿Xan machiyaxaelenkat ampi jiw? ¡Ampi jiw xabich kaes palala wʉt, chalechkal iaꞌtat xan nadadaepaxaeli namatkaejabaliajwa! —aech Moisés, Dios kawʉajan wʉt.
5 Do jawʉt, Dios jʉmnot wʉt, jʉm-aechon ampox Moisésxot:
—¡Xamlap matxoela fʉlaeyaxaelam puexa israelitas fʉlfʉlaeliajwa! ¡Israelitas pej-ancianosbej bʉflaem! ¡Xam kilaflaem kilanaeya, Egipto tʉajnʉxot nawel itbeꞌbalamnaeya! 6 Xan wʉajnawesaxaelen pinamʉaxxot, pawʉlpot Horeb. Japa-iaꞌbotmʉax paꞌmich wʉt, ¡iaꞌbot boesaxaelam kilanaeyatat! Jawʉt, min nakakolsaxoen japot-iaꞌbotxotdin puexa israelitas min feliajwa —aech Dios Moisésxot.
Do jawʉx, puexa israelitas sʉapich, paꞌa wʉt, Moisés japot-iaꞌbot boesa Dios pejkilanaeyatat, israelitas pej-ancianos wʉajnalel, puexa israelitas wʉajnalelbej. Jawʉt, puexa israelitas min af, iaꞌbotmin. 7 Moisés jaxot wʉlduw Meribawʉltat, israelitas min wʉljow xoti palaeyaxtat Moisésxot. Do jaxotbej, Moisés wʉlduw Masahwʉltat, israelitas xapaeja xoti Dios, “¿Dioskat xatisxot? o, ¿Dioskat xatisxota-el?” —aech xot israelitas Diosliajwa, xapaeja wʉti Dios.
Israelitas nabapox, amalecitas sʉapich
8 Amalecitas natameja pawʉlxot Refidim nabeliajwa, israelitas sʉapich. 9 Samata, Moisés jʉm-aechon ampox Josuéxot:
—¡Poejiw makanoꞌe bʉflaeliajwam nabeliajwam, amalecitas sʉapich! Xan kandiawa, mʉaxmatwʉajtat, kaes athʉxotse, Dios pejkilanaeya xanukaxaelen —aech Moisés Josuéxot.
10 Do jawʉt, Josué ow-aechon Moisés toꞌaspox. Dolisdoꞌ, Josué bʉflaechon israelitas nabeliajwa, amalecitas sʉapich. Do jawʉtbej, Moisés, Aarón sʉapich, Hur sʉapich, julachi mʉax, kaes athʉ poxase. 11 Do jawʉt, Moisés mʉaxxachosnik wʉt athʉlelse, jawʉt israelitas malechafʉl amalecitas. Pe Moisés mʉaxdamalison, xabich piach mʉaxxachosnik xot. Jawʉt, mʉaxfeldik wʉt, amalecitas malechafʉl israelitas. Do ja-aech wʉtbej, israelitas malech beflas. 12 Pe Moisés xajʉpa-el pajut tamach mʉaxxachosnikaliajwa athʉlelse. Samata, chalaspi iaꞌt fiti, Moisés japot, iaꞌtxot, ekaliajwa. Do jawʉt, Aarón, Hur sʉapich, nataelamʉaxxanuilisi Moisés, hasta juimt tuila wʉt. 13 Do jawʉtbej, juimt tuila-el wʉtfʉk, Josué, israelitas sʉapich, chiekal toetpi puexa amalecitas-soldaw.
14 Do jawʉt, Dios jʉm-aech ampox Moisésxot:
—¡Lelde ampawʉajan pelfʉtxot asamatkoi israelitas nejchaxoelaliajwa nabampox, amalecitas sʉapich! ¡Josué jʉm-amdebej, xan chiekal toesaxaelen puexa amalecitas, asamatkoi pothatapijiw nejchaxoela-elaliajwas japi —amde Josué! —aech Dios Moisésxot.
15 Do jawʉt, Moisés altar is choef xʉaꞌasliajwa Dios pej-ofrendaliajwa. Japox altar wʉlduwbejpon, “Tajpaklon Dios, me-ama tajbandera”. 16 Moisés jʉm-aechbej ampox:
“¡Dios nakajachawaet mʉaxxachosnikaliajwan. Ja-an wʉt, tajkolemʉaxje, me-ama tajbandera wʉt, ja-an!
¡Wajpaklon Dios pomatkoicha nabeflaxaelon, amalecitas sʉapich!” —aech Moisés Diosliajwa.