Dios chaxduwpox israelitas maná japi xaeliajwa
16
Do jawʉx, puexa israelitas chijia wʉt Elimxot, patlisi pajilax, pawʉlxot Sin. Sin chiekal naman pafatat pasliajwa Sinaíxot. Israelitas chijia wʉt Egipto tʉajnʉxot, pat wʉtbejpi Sin pawʉlxot, japamatkoi quince matkoiyan wʉt, segundojuimt wʉtlisox. 2 Jaxot pajilaxxot wʉt, puexa israelitas pejme tʉaduti jʉmchiliajwa babejjamechan Moisésliajwa, Aarónliajwabej. 3 Jawʉt, israelitas jʉm-aechi ampox Moisésliajwa, Aarónliajwabej:—¡Kaes chiekal pachaemaxael, Dios naktapaeyaxael wʉt tʉpaliajwas Egipto tʉajnʉxot! Egipto tʉajnʉxotlax pawi taxchalaks maramtat. Xaes wʉt chiekal nafniaspoxantat kaechakofas. ¡Pe xamal nabʉflaeman pajilax poxadin xanal tajlit tʉpaliajwan amxot! —aech israelitas, lot wʉti Moisés, Aarónbej.
4 Do jawʉx, Dios jʉm-aech ampox Moisésxot:
—Xan tajaxtat naxaeyaxan, athʉpijiwpi, natacholnaxoek wʉt, me-ama iam thilan wʉt, jachiyaxaeli. Japanaxaeyaxan israelitas nosaxael japamatkoiliajwakal. Xan chiekal matbijsasian, masi japixot chiekal naexasisaxael tajtatoꞌlaxan. Xan chiekal matabijsasianbej, masi naexasisaxil tajtatoꞌlaxan. 5 Posemanan, sextomatkoi wʉt, israelitas pin-iat nosaxael japinaxaeyaxan sextomatkoi wʉt xaeliajwa, séptimomatkoi wʉt xaeliajwa —aech Dios Moisésxot. 6 Do jawʉx, Moisés, Aarón sʉapich, jʉm-aechi ampox puexa israelitasliajwa:
—Ma amwʉt, kaliax wʉt, xamal najut chiekal matabijsaxaelam, Dioslap, xamal juk Egipto tʉajnʉxot, esclavowam wʉt. 7 Kandiawakolaxtat wʉtbej, xamal taeyaxaelam, Dios fʉloeyaxoek wʉt, xabich itliakaxtat. Dios jʉmtaen, xamal naksiyam wʉt babejjamechan xanalliajwa. Babejjamechan naksiyam wʉt, naksiya-emil xanalkalliajwa. Japajamechan naksiyam Diosliajwabej. Xanal xabich kaes pachaema-enil. Xanal isx Dios natatoꞌalpoxankal —aech Moisés puexa israelitasliajwa. 8 Moisés pejme jʉm-aech wʉt, jʉm-aechon ampox puexa israelitasliajwa:
—Ma amwʉt, kaliax, Dios chaxduiyaxael pawi xamal xaeliajwam. Chiekal kandiawasap wʉtbej, Dios chaxduiyaxael xabich pan xamal xaeliajwam. Dios jʉmtaen, xamal babejjamechan naksiyam wʉt xanalliajwa. Xanal xabich kaes pachaema-enil. Babejjamechan xamal naksiyam wʉt, naksiyam Diosliajwa. Xanalliajwa naksiya-emil babejjamechan —aech Moisés puexa israelitasliajwa chiekal matabijsliajwapi.
9 Do jawʉx, Moisés toꞌa wʉt, jʉm-aechon ampox Aarónxot:
—¡Puexa israelitas laem natamejlaliajwa amxot, Dios kawʉajnasxot, Dios jʉmtaens xoti, naksiya wʉt babejjamechan xatisliajwa, Diosliajwabej! —aech Moisés Aarónxot.
10 Do jawʉx, Aarón jʉm-aech ampox Moisés bʉxtoꞌaspox puexa israelitasliajwa. Aarón japox naksiya wʉtfʉk puexa israelitasliajwa, israelitas natachaema wʉt pajilaxlel, jawʉt Dios pej-itliakax chalechkal natulaelt itloejentat. Japox xabich itliak. 11-12 Do jawʉt, Dios jʉm-aech ampox Moisésxot:
—Xan tajut jʉmtaenx, israelitas babejjamechan naksiya wʉt xamalliajwa, xanliajwabej. Naksiyam wʉt israelitasliajwa, jʉm-amde ampox: ‘Ma amwʉt, kaliax, xamal pawi xaeyaxaelam. Do jawʉx, kandiawasap wʉtbej, pan xaeyaxaelam, hasta chiekal nafneyaxtat kachikofsaxaelam. Ja-aech wʉt, xamal matabijsaxaelam xanlap nejpaklokolan, Diosnan’ —aech Dios Moisésxot.
Do jawʉx, Moisés chapaeilison israelitasxot Dios bʉxtoꞌaspox.
13 Do jawʉx, japamatkoitat, kaliax wʉt, xabich totar pajut pat israelitas bijaxot. Xabich totar wʉlʉk. Do, kandiawasap wʉtbej, dol jasi, sattat chanlian. Israelitas bijaxot dol jasi, masajiat. 14 Dol nadusax toep wʉt, siow wʉt dol, xabich chimiaxpi oel sattat. 15 Israelitas japoxan taen wʉt, chiekal matabijs-eli japoxanlap, naxaeyaxan. Japoxan taen wʉti, piajtkal jʉm-aechi ampox: “¿Ampi masikat amaꞌ, satat oeli?” —na-aechi. Do jawʉt, Moisés jʉm-aech ampox puexa israelitasliajwa:
—Ampilap pan, Dios nakchaxduwpi, xatis xaeliajwas. 16 Ampoxlap Dios naktoꞌa xatis isliajwas. Kaenanʉla xamal nejmʉtanpijiwliajam, notam wʉt, chiekal jʉmch xajʉsaxaelam pin-iatampox nejcarpabachanxot. ¡Kaenanʉla xamal nejmʉtanpijiwliajwa nosaxaelam dos litros! —aech Moisés puexa israelitasliajwa.
17 Puexa israelitas not, me-ama Moisés kitoꞌa. Chiekal naexasitbejpi. Pe asew israelitas kaes xena kolekilo notpoxan. Asew israelitaslax jʉmch kaesʉapich noti. 18 Xabich pin-iat noti, chinax wenamae-esal. Ma-is kaesʉapich notpi, chinax weweꞌpa-esal.
19 Do jawʉx, Moisés jʉm-aech ampox puexa israelitasliajwa:
—¡Kaen xamalxot chiekal malaxil japoxan naxaeyaxan kandiawa xaeliajwa! —aech Moisés puexa israelitasliajwa.
20 Pe asew israelitas naexasis-el Moisés jʉm-aechpox. Japi nakiowa mal kandiawa xaeliajwa. Jawʉt, japoxan naxaeyaxan mal wʉti, kandiawa taen wʉti, japoxan naxaeyaxan xabich xasaei. Japoxan naxaeyaxan xabich tafilasbej. Samata, xabich chaemil xaeliajwa. Moisés japox jʉmtaen wʉt asew nakiowa malpox, jawʉt Moisés xabich palala japi israelitasliajwa.
21 Pomatkoicha, kandiawasap, israelitas not weweꞌpspoxan xaeliajwa. Masxaenk wʉt, japoxan naxaeyaxan juꞌnas, oeli tathoetat. 22 Pe sextomatkoi wʉt, puexa israelitas kaes noti naxaeyaxan, fʉloekpi athʉxotsik. Jawʉt, kaenanʉla israelitas, me-ama wʉlʉtpi cuatro kilos naxaeyaxan. Paklochiw japox taen wʉt, fʉlaechi japox chapaeliajwa Moisésxot. Do jawʉt, pat wʉti Moisésxot, japox chapaeilisi. 23 Jawʉt, Moisés jʉm-aech ampox paklochiwliajwa:
—Japoxlap wajpaklon Dios naktoꞌa, kandiawa napatamatkoiyaxael wʉt. Japamatkoitat, puexa xamal napataxaelam itpaeliajwam sitaeyax Diosliajwa. Samata, ma amwʉt, ¡chatꞌem chatꞌeyaxaelampi! ¡Bowimbej bowaxaelampi! ¡Maembej puexa namanpoxan kandiawa xaeliajwam! —aech Moisés puexa israelitasliajwa.
24 Jawʉt, puexa israelitas chiekal naexasiti Moisés jʉm-aechpox naxaeyaxanliajwa. Ja-aech wʉt, kandiawa, puexa israelitas chatꞌiapoxan, naxaeyaxan, chiekal pachaem. Chinax xasaeya-el. Tafila-esalbej.
25 Dolis, napatamatkoi wʉt, Moisés jʉm-aech ampox puexa israelitasliajwa:
—Ma amwʉt, ampamatkoi, xaeyaxaelam naxaeyaxan, chat-iampi, o, bowampibej, xaeliajwam napatamatkoi wʉt. Pe nabichaxisal, napatamatkoi wʉt. Chiekal napataxaes itpaeliajwas sitaeyax Diosliajwa. ¡Fʉlaeyaximildebej naxaeyaxan wʉlwekaliajwam! Napatamatkoi wʉt, Dios toꞌaxildik naxaeyaxan. 26 Posemanan, sextomatkoi wʉt, kandiawasap, puexa xamal naxaeyaxan nosaxaelam. Pe séptimomatkoi wʉt, napatamatkoi wʉt, Dios toꞌaxildik naxaeyaxan —aech Moisés puexa israelitasliajwa.
27 Pe napatamatkoi wʉt, asew israelitasxot nakiowa fʉlaechi naxaeyaxan nosliajwa. Jaxotde paꞌa wʉt, naxaeyaxan chiekal ijil satat. Japi israelitas masox pejme kaxanaweni. 28 Dios japox taen wʉt, palalapon israelitasliajwa. Samata, Dios jʉm-aech ampox Moisésxot:
—¿Hasta maswʉtkat, israelitas naexasisaxil tajtatoꞌlaxan, tajnaewʉajnaxanbej? 29 Israelitas pajut chiekal matabijsaxael napatamatkoi wʉt, japamatkoi, xanlap, me-ama chaxdutx malech, ja-aechpox, israelitas chiekal napataliajwa japamatkoitat. Samatalap, sextomatkoi wʉt, naxaeyaxan chaxduwx kolematkoije xaeliajwam. Ja-aech wʉt, séptimomatkoi wʉt, chiekal kaweta puexa napataxaelam —aech Dios Moisésxot.
30 Samata, séptimomatkoi wʉt, puexa israelitas chiekal napatapi.
31 Israelitas wʉlduw manáwʉltat notpoxan. Japi chiekal papoei. Me-ama cilantro-ʉth wʉt, jakabʉan-aech. Maná chiekal xathʉꞌbej, me-ama hojuelas miel joelaspi wʉt, xa-aech, japi maná.
32 Do jawʉx, Moisés jʉm-aech ampox israelitasliajwa:
—Ampoxlap Dios jʉm-aech, xan nabʉxtoꞌa wʉt xamal jʉmchiliajwan: ‘Maná noꞌe, me-ama kolekilos xajʉmpoxantat, cha-esliajwam, asamatkoi namojiwbej, wachakalpijiw, taeliajwa, xamal chaxduwxpox manáxaeliajwam, pajilaxxotam wʉt, xamal jukx wʉt Egipto tʉajnʉxot’ —aech Dios xanliajwa —aech Moisés israelitasliajwa.
33 Do jawʉt, Moisés toꞌa wʉt, jʉm-aechon ampox Aarónxot:
—¡Fiꞌe jarro, isaspox orotat! ¡Japottat maná jem kolekilo! Do jawʉtbej, ¡japot jarro cha-eꞌe Dios wʉajnalel, matampox, asamatkoi, namojiwbej pajut chiekal taeliajwa japox maná! —aech Moisés Aarónxot.
34 Do jawʉx, Aarón is, me-ama Dios toꞌa wʉt, jʉm-aech Moisésliajwa. Do baxael, Aarón japot jarro cha-et Dios pejbaúl wʉajnalel.