Moisés jajuwpox, puexa israelitas sʉapich
15
Egipto tʉajnʉpijiw, soldaw, puexa buꞌal wʉt, jawʉx Moisés puexa israelitas sʉapich, jajuwpi ampot jajuit Diosliajwa. Jajuw wʉt, jʉm-aechi ampox jajuitat:“Jajuws, Dios xabich pachaem xot, toet xotbejpon chiekal wajdaelmajiw min buꞌlaxtat, nakchakifʉlaenpi kawaeitat, carrotatbej.
2 Jajuws wajpaklon Diosliajwa. Japon nakkajachawaet pejpamamaxtat malechaliajwa wajdaelmajiw. Japonlap wajDios. Japon waj-axjiw pejDios. Samata, xatis jʉmchiyaxaes ampox Diosxot: ‘Xam xabich pachaemam’ —chiyaxaes.
3 Wajpaklon Dios, japon xabich matabijt nabeliajwa, padaelmajiw sʉapich. Samata, jimalechapon. Japon, Dioslap, pawʉl Jehová.
4 Dios, japox is faraón pejcarros napesliajwa mar Rojoxot, faraón pejsoldaw jaxot chiekal buꞌlaliajwa. Jaxotbej buꞌal faraón pejsoldawpaklochiw, xabich juspi nabeyaxan.
5 Japi soldaw, pejcarro sʉapich, buꞌal mar xabich pasoꞌaxkolaxxot, me-ama iaꞌ mintat natacholandik wʉt, ja-aechi soldaw carro sʉapich.
6 Tajpaklon Dios, xam nejpoklake-elel, xabich nejpamamaxke-etat, tadaelmajiw chiekal toetam.
7 Xabich nejpamamaxtat nadaelmajiw chiekal toetam, xam sʉapich, nabapi. Xam xabich nalala wʉt, nejpalaeyax, jit wʉt, tamdadutpox wʉt, ja-aechox. Samata, nadaelmajiw toetam wʉt, japi, me-ama toeix, mamoꞌalpi, chiekal toejwas wʉt, ja-aechi. 8 Palaeyaxtat xam min fʉlam wʉt, kaeyaxtat itnatamejal. Truxan, pinanʉl, me-ama pared kaweta nuil wʉt ja-aech xabich pinanʉl truxan. Samata, mar pasoꞌaxkolaxxot napatanuil truxan.
9 Nadaelmajiw nejchaxoel wʉtlach, jʉm-aechi ampox xanalliajwa: “Japi israelitas chakifʉlaeyaxaes fʉlpasliajwas. Japi pejew kinots wʉt, sasaxaes, wajjiw sʉapich. Waj-espadatat beyaxaesi. Xatis wajut japi chiekal toesaxaes” —aech nadaelmajiw, nejchaxoel wʉt xanalliajwa.
10 Pe xam pejme fulam wʉt, japi puexa chiekal buꞌal marxot. Me-ama iaꞌ wʉt, ja-aechi, buꞌal wʉt marxot.
11 Tajpaklon Dios, ¡kaes asan dios ijil, me-ama xam, jason! ¡Ijil kaes pejme pachaempon, xabich mamnikponbej, me-ama xam, jason! ¡Xam isam xabich pachaempoxan! Samata, pachaem xanal jʉmchiliajwan ampox xamliajwa: ‘Xam xabich pachaemam’ —chiliajwan!
12 Xam nijaxtat Egipto tʉajnʉpijiw, soldaw, marxot buꞌal wʉt, ¡itpaeyam nejpamamax! Samata, ¡Egipto tʉajnʉpijiw, soldaw, me-ama min biajas wʉt, jatispi!
13 Xanal nejjiwan xabich pachaemam xot, chiekal natataeflam, xamlap xanal nabʉꞌwiam. Xam nejpamamaxtat nabʉꞌfolam dukamtʉajnʉxot xanalbej duilaliajwan.
14 Potʉajnʉchanpijiw xabich tathʉlaxael pejlewt, matabijt wʉti, xam isampox Egipto tʉajnʉpijiw, soldaw, malecham wʉt. Filisteosbej pejlewt xabich nejchaxoelaxaeli.
15 Paklochiw, Edom tʉajnʉpijiwbej, mamnikaxil pejlewt. Moab tʉajnʉpijiwbej, japi paklochiwbej, tathʉlaxael pejlewt. Puexa cananeos xabich pejlewla wʉt, me-ama boejil wʉt, jachiyaxaeli.
16 Tajpaklon, Dios, ¡xanallap nejjiwan, nakajachawaeꞌe, japi pejtʉajnʉchan poxade xenax wʉt xenaliajwan wʉajanjilaxtat! Japatʉajnʉchanpijiw xabich pejlewla xoti xamliajwa, me-ama iaꞌ, chinax nachoela-el, ¡nej ja-aechapi japi jiw xanaliajwa pejlewla wʉti nejpamamaxtat!
17 Tajpaklon, Dios, ¡xanallap, nejjiwan, nabʉflaem duilaliajwan nejmʉax poxade, pawʉlmʉax Zión! Japamʉax chajia xam isam japamʉaxxot dukaliajwam.
18 ¡Dios, nej tatoꞌleꞌ pomatkoicha pothata!” —aech Moisés, jajuitat jajuw wʉt, puexa israelitas sʉapich.
Moisés pakoewow, Miriam, jajuwpox, puexa israelitaswathoꞌ sʉapich
19 Faraón pejsoldaw, carrotat chaflaeni, kawaeitat chaflaenibej, israelitas pejwʉchakal, japi soldaw mox fʉlaen wʉt, jawʉt, Dios tapaei marmin pejme matawaeꞌkchaliajwa, chiekal pejme kawʉtatliajwa. Ja-aech wʉt, marmin japi pejmatwʉajasik matawaeyakas. Ja-aech wʉt, japi puexa chiekal buꞌal. Pelax, israelitas fʉlaech pʉt mamoꞌlax poxade xenaliajwapi martu.
20 Samata, profeta-atow, pawʉlpow Miriam, japow Aarón pakoewow, fitow dakapox, jajuw wʉt. Japox pawʉl pandereta. Jawʉt, israelitaswathoꞌ xanbaboela wʉt panderetas, dakapi. Xabich nejchachaemili, bʉꞌwias xot Dios. 21 Jajuitat jʉm-aechi ampox, jajuw wʉt: “¡Jajuim wajpaklon Diosliajwa, xabich pachaem xoton! Japon xabich malecha faraón pejsoldaw, carrotat chaflaenpi, kawaeitat chaflaenpibej. Japi soldaw puexa chiekal buꞌal” —aech Miriam, jajuw wʉt, israelitaswathoꞌ sʉapich.
Min itxasaxnikpox
22 Do asamatkoi wʉt, Moisés bʉꞌfolon israelitas atʉaj mar Rojoxot. Do jawʉt, israelitas fol wʉt pajilax xot, pawʉlxot Shur poxade. Fol wʉtlisi tres matkoiyan, israelitas xabich minsilapi. Jaxot min chiekal ijil, pajilax xot. 23 Do jawʉx, patlisi cha-aelpukach, pawʉlxot Mara. Japapukach xabich xasaxnik feliajwa. Samata, israelitas min feyaxil. Jaxot wʉldʉwlisipox Marawʉltat, min xasaxnik xot. 24 Do jawʉt, israelitas palala xot, tʉaduwpi jʉmchiliajwa babejjamechan Moisésliajwa. Israelitas wʉajnachaemt wʉt, jʉm-aechi ampox Moisésliajwa: “¿Achaxkat xanal feyaxaelen?” —aechi Moisésliajwa. 25 Do jawʉt, Moisés wʉljow kajachawaesax Diosxot. Jawʉt, Moisés itpaeispon Dios cha-aelnaech. Do jawʉt, Moisés japanaedalach poꞌak minadik. Jawʉt, min chiekal xasaxjil. Pachaem minfeliajwa.
Jaxot Dios xapaejt israelitas chiekal matabijsliajwa, diachwʉajnakolax japi chiekal naexasisaxael wʉt Dios. 26 Dios jʉm-aech ampox israelitasliajwa: “¡Xamal chiekal naeweꞌe nejpaklon, nej-Dios! ¡Isfʉldebejbej xanliajwa pachaempoxan! ¡Naexasisfʉldebej tajtatoꞌlaxan! Ja-amsfʉlam wʉt, toꞌaxinil babijaxan xamal kastikaliajwan, me-ama Egipto tʉajnʉpijiwliajwa, jachiyaximil xamalliajwa. Xanlap Diosnan, nejpaklonan, puexa xamal boejthʉtpon” —aech Dios israelitasliajwa.
27 Do jawʉx, israelitas patlisi pawʉlxot Elim. Jaxot doce minan, satlelsin nakakolsan. Jaxotbej nuil setenta, me-ama nojtonan, jasi, jʉmbʉꞌnuil min nakakolsanxot. Jaxotlap, israelitas bija.