2 “Israelitas bʉnwiaꞌmich kaxade bʉꞌbijaliajwam trestabijlaxanxot. Kaetabijla pawʉl Pi-hahirot. Asatabijla pawʉl Migdol. Asatabijla pawʉl Baal-zefón. ¡Jaxot nej duipi pejcarpabʉꞌan mox marbabʉꞌxot! 3 Ja-am wʉt, faraón nejchaxoel wʉt, jʉmchiyaxaelon ampox: ‘Israelitas matabijs-el fʉlaeyaxael poxade. Samata, ma amwʉt, puexa israelitas chiekal matxalisi pajilaxxot’ —chiyaxael faraón, nejchaxoel wʉt. 4 Pe xan tajaxtat, faraón, nejliaklan wʉt, jachiyaxaelon. Samata, faraón, pejsoldaw sʉapich, kawʉxanjaesaxaelon xamal. Jawʉtlap, japi taeyaxael xabich tajpamamax, xanlap diachwʉajnakolax Diosnan, xabich mamnikaxponan” —aech Dios, Moisésxot.

Do jawʉx, Moisés toꞌa puexa israelitas kaxa fʉlaeliajwadin bijaliajwa mox marbabʉꞌxot. Do jawʉt, israelitas ow-aechi Moisés jʉm-aechpox. 5 Do jawʉtbej, israelitas kaxaliajwa wʉt bijaliajwa mox marbabʉꞌxot, asew jiw chapaeipi faraónxot israelitas dʉkpox. Do jawʉt, faraón, pejpaklochiw sʉapich, nospaei wʉt, jʉm-aechi ampox: “¿Ma-aech xotkat xatis tapaeis israelitas chijiyaliajwa wajtʉajnʉxot? ¡Kaes xatis naktanbichaxillisi!” —aechi, nospaei wʉt faraón pejpaklochiw, faraón sʉapich.

6 Do jawʉt, kamta faraón toꞌa pejsoldaw xathilsliajwapi faraón pejcarro. Do jawʉt, fʉlaechon, pejsoldaw sʉapich, israelitas kawʉxanjaesliajwa. 7 Faraón chafol pejcarrotat, asew, pejsoldaw, chafol seiscientos carrotat. Japi carro xabich chimia. Puexa japi carro, seiscientos carro, kaenanʉla japacarroxot chafol soldawcomandante. Xabich asacarrotatbej faraón pejsoldaw chafol. 8 Dios pijaxtat, faraón, nejliaklan wʉt, ja-aechon. Samata, pejsoldaw sʉapich, kawʉxadʉkpi israelitas, japilap chijiapi Egipto tʉajnʉxot Dios pejpamamaxtat.

9 Do jawʉt, Egipto tʉajnʉpijiw, soldaw, asew tʉaktat foli. Asew carrotat chafol. Asew chafol kawaeitat. Puexa japi, soldaw, israelitas fʉlchaklas. Samata, israelitas bijaxot fʉlpach marbabʉꞌxot, Pi-hahirotxot, Baal-zefóntabijla. 10 Israelitas atʉaj taen wʉti faraón, japon pejsoldaw sʉapich, fʉlchaklaspox, moxsfʉldin wʉtbejpi japilel, jawʉt israelitas piajtkal jʉm-aechi ampox:

—¡Taeꞌnik faraón, pejsoldaw sʉapich! ¡Japi nakchakifʉlaen puexa xatis chiekal naktoesliajwa! —aechi israelitas.

Do jawʉt, israelitas xabich pejlewla. Samata, Dios kawʉajan wʉt, wʉljowpi kajachawaesliajwas bʉꞌweliajwasbej. 11 Jawʉtbej, israelitas lot wʉti Moisés, jʉm-aechi ampox:

—¿Egipto tʉajnʉxot satkat ijil patʉpa mʉthaliajwa? Samata, xanal najukam Egipto tʉajnʉxot amxot pajilaxtat tʉpx wʉt namʉthaliajwam. ¿Ma-aech xotkat xam japox isam xanalliajwa? 12 Ampox xanal chajia jʉm-an xamliajwa, Egipto tʉajnʉxotan wʉtfʉk: ‘¡Xanal natapaem Egipto tʉajnʉpijiw malech tanbichliajwan! Kaes pejme pachaem xanal japi pej-esclawanliajwan. Pachaema-el xanal tʉpaliajwan pajilaxxot’ —anlach xanal —aech israelitas Moisésxot, xabich beljow xoti.

13 Pe Moisés jʉmnot wʉt, jʉm-aechon ampox israelitasliajwa:

—¡Puexa xamal nabej nejlewlaꞌ! ¡Jʉmch chiekal natachaemam Dios isaxaelpox xatis nakbʉꞌweliajwa amwʉt! Soldaw, Egipto tʉajnʉpijiw, ma amwʉt, taenspi, japi kaes taeyaxisal —aech Moisés israelitasliajwa.

14 Moisés pejme jʉm-aech ampox israelitasliajwa:

—¡Xabich nabej nejlewlaꞌ! Dios nabeyaxael, japi sʉapich, xatisliajwa —aech Moisés puexa israelitasliajwa.

15 Jawʉt, Dios jʉm-aech ampox Moisésxot:

—¿Ma-aech xotkat nawʉljowam tajkajachawaesax? ¡Puexa israelitas matxoela fʉlaeyax toꞌim! 16 ¡Nejkilanaeya xachoꞌmich martuchade, mar koloeyax nadiajnaliajwa, japoxade israelitas fʉlaeliajwa, pʉt mamoꞌlax poxade xenaliajwapi martu! 17 Xan tajaxtat Egipto tʉajnʉpijiw, soldaw, nejliakal wʉt, jachiyaxaeli, israelitas kawʉxadʉkpaliajwa. Samata, ma amwʉt, xan itpaeyaxaelen tajpamamax faraón, japon pejsoldawbej, chafoli carrotat, kawaeitatbej. 18 Ja-an wʉt, puexa Egipto tʉajnʉpijiw pajut chiekal taeyaxael, xanlap kaenan, Diosnan, xajʉpxponan puexa isliajwan —aech Dios Moisésxot.

19 Do jawʉt, Dios pej-ángel, itloejen sʉapich, pinjiyaxpox, athʉleldukafʉlpox, pakchowaxsepox, liaxtlisox dukaliajwa israelitas pejwʉchakallel. 20 Samata, japox, itloejen, duklisox Egipto tʉajnʉpijiw, soldaw, fʉlaenlel. Duklisox patutat. Egipto tʉajnʉpijiw, soldawlel, xabich itkʉaꞌnik japox-itloejen. Pe israelitaslel itliaklax japa-itloejen. Samata, soldaw, Egipto tʉajnʉpijiw, xabich mox pasaxili israelitasxot. 21 Do jawʉt, Moisés mʉaxxochoꞌe martuchade. Jawʉtbej, Dios toꞌa joewa xabich wikaliajwa mar najʉpanadiajnaliajwa patuchadik. Ja-aech wʉt, pʉt chiekal mamoꞌlafʉlde. 22 Pʉt mamoꞌal poxade israelitas fʉlaech pasliajwa we-enlelde. Min mox nataelanukafʉl kolelelje. Me-ama pared wʉt, ja-aech marmin.

23-24 Dolisox, nalian wʉt, Dios taen itloejen tamdadusaxtat Egipto tʉajnʉpijiw, soldaw, chafʉlaenpi kawaeitat, chaflaen wʉti. Taenbejpon soldaw chaflaenpi carrotat, chaflaen wʉt. Chiekal marfatat wʉtlisi, chalechkal japi soldaw Dios pijaxtat xabich pejlewlapi. Jawʉt, dʉkpasiapi. 25 Jawʉt, soldaw pejew carro wetʉaknatacholnas. Chaflaeyax tʉadut wʉti, xabich bijiatkolaxtat chafoli. Do jawʉt, soldaw, Egipto tʉajnʉpijiw jʉm-aech ampox:

—Ma amwʉt, ¡dʉkpaxaes israelitasxot! ¡Dios naba, xatis sʉapich, israelitasliajwa! —aech soldaw, Egipto tʉajnʉpijiw.

26 Do jawʉt, Dios jʉm-aech ampox Moisésxot:

—¡Muaxdolmich martuchade min pejme matawaekchaliajwa, japamin natacholnaliajwasikbej soldaw matwʉajasik, chaflaeni carrotat, kawaeitat chafolnibej! —aech Dios, toꞌa wʉton Moisés.

27 Do jawʉt, Moisés ow-aech Dios kitoꞌaspox. Mʉaxxachoꞌalison martuchade. Jawʉt, nalian wʉt, min chiekal pejme kawʉtat, me-ama majt wʉt, ja-aechox. Jawʉt, soldaw, Egipto tʉajnʉpijiw, dʉkpax tʉadut wʉti, min chiekal matawaekchaslisi. Jasoxtat Dios pijaxtat soldaw Egipto tʉajnʉpijiw chiekal buꞌal. 28 Min pejme chiekal namatawaekcha wʉt, me-ama majt wʉt, ja-aechpox. Samata, Egiptopijiw-soldaw, carrotat chafolpi, kawaeitat chafolpibej, xabich buꞌallisi. Puexa soldaw, Egipto tʉajnʉpijiw, fʉlaeni israelitas pejkawʉchadin, chinax japixot kaen soldawan we-el. 29 Pelax, israelitas pʉt mamoꞌal poxade fʉlaech min mox nataelanuklelakal.

30 Japamatkoitat, Dios puexa chiekal bʉꞌwia israelitas Egipto tʉajnʉpijiw, soldawxot. Do jawʉx, israelitas taenlisi xabich patʉpa, Egipto tʉajnʉpijiw, soldaw, buꞌali, duil wʉti marbabʉꞌtat. 31 Jawʉt, puexa israelitas taen wʉti Dios pejpamamax, malechas wʉt Egipto tʉajnʉpijiw, soldaw, israelitas itpaei sitaeyax Diosliajwa. Do jawʉtbej, israelitas chiekal xanaboejtlisi Dios, Moisésbej, Moiséslap Dios pamakan.