3 Do jawʉx, Moisés jʉm-aech ampox puexa israelitasxot: “Puexa xamal nejkiowaximil ampamatkoi, Dios juk wʉt xabich pejpamamaxtat Egipto tʉajnʉxot, xamal duilam wʉt esclavo. Samata, ma amwʉt, pan xaeyaximil, levadura tanialaspi. 4 Xamal ma amwʉt, chiekal kaelel chijiam Egipto tʉajnʉxot, Abibjuim wʉt. 5 Samata, ampajuimt wʉt, xamal kaewaech wʉt, isaxaelam Pascuafiesta, Dios bʉflaeyaxael wʉt chimiatʉajnʉ poxade, puexa nejmachnaxaeyaxan xabich naboela poxade. Japatʉajnʉxot, amwʉtjel, duil cananeos, hititas, amorreos, heveos, jebuseos japilap duil ma amwʉt. Chajiakolaxtat, Dios jʉmdut nejwʉajnapijiwxot, xamal chaxdusliajwa japatʉajnʉ. 6 Siete matkoiyan xaeyaxaelam pan, levadurajila. Do jawʉx, kandiawade wʉt, séptimomatkoi wʉt, isaxaelam Pascuafiesta Diosliajwa. 7 Japamatkoiyan, siete matkoiyan xaelam wʉt pan, levadurajila, ¡xamal duilamtʉajnʉxot, chiekal nej ijila levadura! ¡Nej ijilabej pan levadura! 8 Japamatkoi, Pascuafiestamatkoi wʉt, jʉmchiyaxaelam ampox, naxi chanaekabʉanam wʉt: ‘Ampafiesta isas xatis nejchaxoelaliajwas Dios ispoxan xatisliajwa, chijias wʉt Egipto tʉajnʉxot’ —chiyaxaelam, naxi chanaekabʉanam wʉt, naxi chiekal matabisjliajwa Pascuafiestaliajwa. 9 Me-ama nejmʉaxanxot, nejmakanxot, mark wʉti nejchaxoelaliajwam naksiyaliajwam wʉt Dios pejtatoꞌlaxan, ¡xamallap jachiyaxaelam, isam wʉt Pascuafiesta nejchaxoelaliajwam Dios juk wʉt xamal pejpamamaxtat, Egipto tʉajnʉxot duilam wʉt! 10 Samata, kaewaechan wʉt, Abibjuim wʉt, ¡Pascuafiesta isaxaelam! —chiyaxaelam naxi chiekal chanaekabʉanam wʉt” —aech Moisés puexa israelitasxot.

11-12 Moisés pejme jʉm-aech ampox puexa israelitasxot: “Dios bʉꞌfol wʉt xamal cananeos pejtʉajnʉ poxade, japatʉajnʉlap xamal chaxdusaxaelon, me-ama chajia jʉmduton nejwʉajnʉpijiwxot. Ja-aech wʉt, naxʉlan chiekal matxoela nalaeltpon, japonlap nabichaxael Diosliajwa. Puexa naxi chiekal matxoela nalaelapi poejiw japoxlap jachiyaxael. Malap-is japox jachiyaxael nejew choefliajwa. Matxoelanalaeltpon choefan, japon choefan Dios piajnaxael. 13 Bur, nalaelt wʉt, poi wʉt, japon burxʉlan wathijalasamatam, xʉaꞌlaxaelam cordero, oveja jeltiꞌsan. Ja-el wʉt, xʉaꞌlaxaelam cabrito, jeltiꞌsan. Burxʉlan nalaelt wʉt, xʉaꞌla-emil wʉt cordero, o, cabrito, ja-aech wʉt, burxʉlan wathijalnasaxaelam. Me-ama naxi matxoelananaelapi weliajwa, choef xʉaꞌatam, jachiyaxaelam burxʉlanliajwa, matxoelanalaeltponliajwa. 14 Asamatkoi, naxi wʉajnachaemt wʉt, japi jʉm-aech wʉt ampox xamal wʉajnachaemt wʉti: ‘¿Ma-aech xotkat choef xʉaꞌatam, bur nalaelt wʉt poi, chiekal matxoelapijin wʉt?’ —aech wʉti xamal wʉajnachaemt wʉt, xamal jʉmnotam wʉt, ¡jʉmchiyaxaelam ampox naxi chiekal chanaekabʉanam wʉt: ‘Dios xabich pejpamamaxtat xanal najuk, esclavowan wʉt Egipto tʉajnʉxot. 15 Japamatkoiyan wʉt faraón, nejliaklan wʉt, ja-aech wʉt, xanal natapae-el wʉt chijiyaliajwan pejtʉajnʉxot, japamatkoitat, Dios befʉl puexa Egipto tʉajnʉpijiw paxi, poejiw, chiekal matxoelanalaelapikal. Jawʉtbej, Dios befʉl Egipto tʉajnʉpijiw pejew, choef, chiekal matxoelanalaelapikal, poejiw. Samata, ampamatkoiyan wʉt, xanal kaenanʉla paxjiwanpin, tejew yamxiliajwa, matxoelanalaelapiliajwa, choef paxʉaꞌatax, kaewaechanpi, japi choef Dios pej-ofrendaliajwa. Samata, xanal kaenanʉla tejew yamxi Dios nawebe-el, matxoelanalaelapi’ —chiyaxaelam naxiliajwa! 16 Japoxlap xanal kaenanʉla isx wʉt, Dios, me-ama namʉaxmark wʉt, o, me-ama namakmark wʉt, ja-aechpox xanaliajwa. Samata, japox islapax xamal nejchaxoelaliajwam Dios xabich pejpamamaxtat xanal najuk wʉt Egipto tʉajnʉxot” —aech Moisés puexa israelitasxot.

17 Do jawʉt, faraón tapaei wʉt, israelitas chijiyaliajwa, Dios bʉflae-esal matnochnʉamtade, filisteos pejtʉajnʉ poxade. Israelitaslax bʉflaech nʉamt fʉlaechpot pajilax poxade. Dioslap ampox nejchaxoel israelitasliajwa: “Israelitas kifafonaxil, beyaxaes wʉti filisteos. Asbʉan jʉmch nejchaxoelaxaeli pejme naweliajwa Egipto tʉajnʉ poxade” —aech Dios, nejchaxoel wʉt israelitasliajwa. 18 Samata, atʉaj bʉꞌjiaton nʉamt, fʉlaechpot pajilax poxade. Japanʉamt fʉlaech mar Roja poxade.

Israelitas chijia wʉt Egipto tʉajnʉxot, japi fol wʉt, me-ama ejercito fol wʉt, ja-aechi. Do jawʉt, israelitas bija Sucor pawʉlxot.

19 Israelitas chijia wʉt Egipto tʉajnʉxot, Moisés toꞌa chaxlaeliajwapi José patʉpan. José chajia jʉm-aech wʉt, jʉm-aechon ampox israelitas chaxlaeliajwas. Israelitasbej xabich jʉmduw japox isliajwa. Josélap chajia jʉm-aech ampox israelitasxot: “Diachwʉajnakolax Dios fʉlaeyaxoek xamal kajachawaesliajwa chijiyaliajwam ampatʉajnʉxot. Japox ja-aech wʉt, xamal xan patʉpnan nachaxlaem ampatʉajnʉxot” —aech José, chajia jʉm-aech wʉt pejjiwxot.

20 Israelitas chijia wʉt Sucotxot, pati bijaliajwa Etamxot. Do jaxot tʉadutlisox pajilax. 21-22 Matkoi wʉt, Dios itloejentat chala israelitas. Japox itloejen athʉlelse pakchowaxsepox, xabich pinjiyaxbejpox. Israelitas wʉajnalel japox itloejen dukafʉl. Jasoxtat israelitas fol. Madoi wʉt, Dios chala wʉt israelitas, japox itloejen tamdadusaxtat itliakpox. Israelitas wʉajnalel itliakafʉl japox itloejen. Ja-aech wʉt, pachaem israelitas fʉlaeliajwa, matkoi wʉt, madoi wʉtbej.