2 —Ma amwʉt, ampakaewaechan wʉt, ampajuimt wʉtbej, tʉadusaxael waechan xamalliajwa. 3 ¡Puexa israelitas jʉm-amde ampox: ‘Ampajuimt, diez matkoi wʉt, kaenanʉla xamal, nejjiwmʉt sʉapich, kaen cordero, o, kaen cabrito xʉaꞌlaxaelam. ¡Japoxanlap isaxael kaenanʉla bachanpijiw! 4 Xamal kaecham wʉt nejbaxot, xajʉpaximil wʉt ponachoefan chabotampon toelaliajwam, ja-aech wʉt, tadʉsaxaelam mox duili, kaeyaxtat xaeliajwam nejbaxot. Xamal israelitas nadiajkam wʉt, najʉpamʉtan nadiajkaxaelam, pota xaeliajwam, pawi namanasamata. 5 Japafiesta wʉt, xamal xaeyaxaelam choef. Japi choef chiekal kaewaechanpi. Choef chiekal poejwaxael. Chiekal pachaempibej, cordero wʉt, o, cabrito wʉtbej. 6 Japamatkoi wʉt, choef, itfetampi, ¡chiekal tataefʉlde, hasta kaliax catorce matkoi wʉt! Japahora wʉt, cha-aex itkʉaꞌnik wʉt, ¡kaenanʉla xamal bachanpijwan, choefan xʉaꞌlaxaelam! 7 Japachoefanjaltat pobafafachan joelaxaelam, japabaxotlap japon choefan xaeyaxaelam. 8 Japamadoitat, chabowawi xaeyaxaelam. Pan levadurajilabej xaeyaxaelam. Xaeyaxaelambej xasaxa-ʉaf. 9 Xaeyaximil tathʉalawit, chat-eswitbej. Choefan ponachabotam wʉt, ¡matnaet, patʉak sʉapich, chiekal kamjafaxaelam! 10 Do jawʉt, choefan chabotampon xaelam wʉt, ¡chinax chabotamwit masaximil kandiawa xaeliajwam! ¡Chiekal puexa toelde! Pawi naman wʉt, ¡bowaxaelam jitat chiekal toejafaliajwam! 11 Choefan chabotampon, xaeliajwam wʉt, ¡naxoelaxaelampoxkal bʉꞌlaxaeyaxaelam! ¡Tʉakxajoelaxaelampoxkal tʉaklaxaem! ¡Kilaxaeyaxaelam kilanaeya! ¡Bakaxaeyaxaelam choefan chabotampon, Pascuafiesta wʉt, Dios pejfiesta xot! 12 Amwʉt, ampamadoitat, xan xensaxaelen potʉajnʉcha Egipto tʉajnʉxot, Egipto tʉajnʉpijiw paxi, matxoelapijiw, poejiwkal, webeyaxaelen. Pejew, choef, matxoelapijiw, poejiwkal, webeflaxaelenbej. Egipto tʉajnʉpijiw pej-ídolos toesaxaelenbej. Xanlap, Diosnan, jʉm-an japox’ —aech Dios Egipto tʉajnʉxot Moisésxot, Aarónxotbej.

13 Dios pejme jʉm-aech ampox Moisésxot, Aarónxotbej chiekal chanaekabʉanaliajwa:

—Choefjal pachaemaxael xamal joelaliajwam bafafachan. Choefjal bafafachan joelasxot xamallap japabachanxotampox. Xan beflax wʉt, Egipto tʉajnʉpijiw paxi, matxoelapijiw, poejiwkal, xamalxot kaen naxʉlan tʉpaxil, matxoelapijiw, poejiw. Taenx wʉt choefjal nejbafafachanxot, matnoch jʉmch chiekal xensaxaelen athʉkal. 14 Japamatkoi, xamal najut chiekal nejchaxoelaliajwam, isliajwambej pinjiyax fiesta, Pascuafiesta, itpaeliajwam xan nasitaenampox. Naxi chiekal chanaekabʉanaxaelam, japibej japafiesta isliajwa, kaewaechan wʉt. 15 Japamatkoi wʉt, xaeyaxaelam pan levadurajila siete matkoiyan. Samata, siete matkoiyan wʉt, nejbachanxot cha-eyaximil levadura sapan. Japamakoiyan wʉtbej, nejmach-aton xael wʉt pan, levadura tanialaspi, japon-aton chijiyaxaelon xamalxot. Kaes japon-aton dukaxil xamalxot. 16 Matxoelamatkoi wʉtlap pan levadurajila xaelam wʉt, puexa xamal kaeyaxtat natamejlaxaelam xan nakawʉajnaliajwam. Do jawʉx, séptimo-matkoi wʉt, xamal pan levadurajila xaelam wʉtfʉk, xamal pejme kaeyaxtat natamejlaxaelam xan nakawʉajnaliajwam. Japakolematkoitat, puexa xamal nabichaximil. Napataxaelam. Pelax, japamatkoi kolematkoi wʉt, xan tapaeix naxaeyaxan isliajwam. 17 Pan levadurajila xaefiesta isaxaelam, japamatkoi wʉtlap xan jukx xot puexa xamal Egipto tʉajnʉxot. Japamatkoilap, xamal kaes xabich sitaeyaxaelam. Naxi chiekal chanaekabʉanaxaelambej, japibej japafiesta isliajwa, kaewaechfʉl wʉt. 18 Matxoelajuim wʉt, catorce matkoi wʉt, kaliax wʉt, hasta veintiuno matkoi wʉt, kaliax, pan xaeyaxaelam, levadurajila. 19 Japamatkoiyan, siete matkoiyan, nejbachanxot cha-eyaximil levaduran. Japamakoiyan, nejmach-israelitas-aton xael wʉt pan, levadura tanialaspi, japon israelita-aton chijiyaxael xamalxot. Asatʉajnʉpijin wʉt, o, japon nalaelt wʉt israelita-atowxot, pe, japon aton xamalxot kaelel chiekal chijiyaxaelon xamal israelitasxot. 20 Samata, japafiestamatkoiyan wʉt, xamal xaeyaximil pan, levadura tanialaspi. Nejmachtʉajnʉchanxot duilam wʉt, japafiestamatkoiyan wʉt, xamal pan xaeyaximil, levadura tanialaspi —aech Dios Moisésxot, Aarónxotbej.

21 Do jawʉx, Moisés wʉlala puexa israelitas pej-ancianos natamejaliajwa japonxot. Do jawʉx, puexa chiekal natameja wʉt, Moisés jʉm-aech ampox israelitas pej-ancianosxot: “Ma amwʉt, ¡xamal kaenanʉla xabʉaꞌde wʉljaesliajwam cordero noeliajwam nejbachanxot! Corderowa-el wʉt, cabritowaxael, nejjiw sʉapich, kaeyaxtat xaeliajwam. Xamal xʉaꞌasaxaelam choef, Pascuafiesta wʉt xaeliajwa ammadoitat. 22 Japachoefjal cha-esaxaelam tas, pinjiaftat. Do jawʉx, naedalach, pawʉlpox hisopo, ¡xathoꞌmik jaltadik! ¡Pobafafachan nataelajoelaxaelam choefjal! Amwʉt, pamadoitat, chinax kaen nakolsaxil nejbachanxot. ¡Puexa chiekal kaweta napataxaelam! 23 Ampamadoitat, Dios pask wʉt Egipto tʉajnʉxot beliajwa ampatʉajnʉpijiw paxi, matxoelanalaelapi, poejiwkal, Dios taen wʉt japachoefjal, pobafafachan joelaspoxan, ja-aech wʉt, matnoch xensaxaelon nejbachanxot. Ja-aech wʉt, Dios tapaeyaxil pej-ángel, jiw paxi, poejiw, matxoelapijiwkal, beyaxaelpon, leliajwa nejbachanxot. 24 Kaewaechan wʉt, xamal, naxi sʉapich, Pascuafiesta isaxaelam. 25 Xamal asamatkoi, patam wʉt Dios chaxdusaxaeltʉajnʉxot, japatʉajnʉxotam wʉt, kaewaechan wʉt, isaxaelam Pascuafiesta. 26-27 Naxi wʉajnachaemt wʉt, jʉm-aech wʉti ampox xamalxot: ‘¿Ampafiesta achax chiyaxaelkat?’ —aech wʉt naxi, xamal chiekal chanaekabʉanam wʉt, jʉmchiyaxaelam ampox naxi: ‘Choef xʉaꞌasax Pascuafiesta wʉt, japox xanal, pakdiachwan, isx nejchaxoelaliajwan ampox. Dios japamadoitat, xabich befʉl wʉt puexa Egipto tʉajnʉpijiw paxi, matxoelanalaelapijiwkal, poejiw. Jawʉt, japamadoitat, Dioslax matnoch athʉkal xent israelitas pejbachanxot. Japamadoitat, puexa wajjiw chiekal wia. Chinax kaen boejsa-esal’ —chiyaxaelam, naxi chiekal chanaekabʉanam wʉt” —aech Moisés israelitas pej-ancianosxot.

Do jawʉt, puexa israelitas pej-ancianos japox jʉmtaen wʉt, brixtat nuilisi, sat makxabijkaliajwadik, itpaeliajwa sitaeyax Diosliajwa. 28 Do jawʉx, israelitas fʉlaechlisi isliajwa puexa, me-ama Dios toꞌas Moisés, Aarón sʉapich, japi kolenje jʉmchiliajwa japox.

29 Dolisdoꞌ, japamadoi wʉt, pinmadoikolaxtat, Dios pask Egipto tʉajnʉxot. Jawʉt, Dios xabich befʉl puexa Egipto tʉajnʉpijiw paxi, poejiw chiekal, matxoelanalaelapikal. Faraón paxʉlan, matxoelanalaeltponbej boesaspon Dios. Japonlach reyaxaelpon, asamatkoi pax faraón pejkawʉtat. Tʉpbej puexa jiw jebaxot jiaspi paxi, matxoelanalaelapi, poejiwkal. Tʉpbej puexa choef, matxoelanalaelapi, poejiwkal.

30 Wetʉps wʉti paxi, jawʉt faraón, puexa pejpaklochiwbej, puexa Egipto tʉajnʉpijiwbej, potʉajnʉcha xabich paxi wʉnoenapi paxi pejpatʉpoxxanliajwa. Asew xabich nejlasna, paxi nejxaejwas xoti wetʉpspoxliajwa. Egipto tʉajnʉpijiw pejbachanxot, kaeba masox namana-el tʉpa-elpox. Puexa japi paxi matxoelanalaelapikal wetʉps wʉt japamadoitat. 31 Japamadoitat, faraón kamta toꞌa pejjiw, Moisés poxade wʉljaesliajwapi Moisés, Aarón sʉapich. Moisés, Aarón sʉapich, pat wʉti faraónxot, faraón jʉm-aech ampox Moisés chiekal jʉmtaeliajwa, Aarón sʉapich:

—¡Ma amwʉt, tajtʉajnʉxot puexa nejjiw bʉꞌchijiamde! ¡Xamalbej atʉajim tajjiw, Egipto tʉajnʉpijiwxot! ¡Chijiamde pajilax poxade itpaeliajwam nejsitaeyax nejDiosliajwa, me-ama nejDios toꞌa xamal! 32 ¡Bʉflaembej nejew oveja, pak! Me-ama xamal nejew choef bʉflaesiam, ¡bʉflaem! ¡Dios kawʉajandebej xanliajwa! —aech faraón Moisésxot, Aarónxotbej, toꞌa wʉton israelitas chijiyaliajwa japon pejtʉajnʉxot.

33 Jawʉt, puexa Egipto tʉajnʉpijiw toꞌapi israelitas nejthilslasamata chijiyaliajwa Egipto tʉajnʉxot. Egipto tʉajnʉpijiw puexa nejchaxoel wʉt, jʉm-aechi ampox: “Puexa xatiskas-is tʉpaxaes, me-ama wajxi matxoelapijiw tʉp, xatiskat-is jachiyaxaes” —aechxoti, nejchaxoel wʉt. Samata, xabich pejlewlapi.

34 Jawʉt, puexa israelitas xabich pansapan, levadura taniala-esalpifʉk, mojali xalaeliajwa cha-owaspitat, pawʉlpox artesa. Japa-artesa matchabenapi pejew naxoeipoxantat, fol wʉti wʉchaduiliajwa. 35 Puexa israelitas islisi, me-ama Moisés toꞌa japi wʉljoeliajwa malechpoxan, puexa Egipto tʉajnʉpijiwxot. Jawʉt, israelitas xabich nejmach wʉljowpi. Wʉljowpi isaspi orotat, platatatbej. Wʉljowbejpi ponan. 36 Dios pijaxtat puexa Egipto tʉajnʉpijiw, xabich pachaempi israelitasliajwa. Samata, puexa israelitas wʉljowpoxan xabich chaxduwspi Egipto tʉajnʉpijiw.

37 Do jawʉt, puexa israelitas chijia Ramsés paklowaxxot, Sucot xotbej. Wathoꞌ, yamxi sʉapich, xajui-esal. Israelitas chijiapi Egipto tʉajnʉxot, puexa japi poejiwkal seiscientos mil, xajʉpi nabeliajwa. 38 Israelitas chijia wʉt japatʉajnʉxot, xabich nejmachjiw, japi israelitas-eli, nakfoli israelitas. Israelitas pejew oveja bʉꞌfol. Bʉꞌfolbejpi pejew pak. 39 Israelitas xabich thilt xot, pan bowa-eli hornotat, Egipto tʉajnʉpijiw xabich toꞌa xot israelitas japatʉajnʉxot chijiyaliajwa. Israelitas pejew pansapan taniala-esalpifʉk levadura, japasapan xafoli. Do jawʉx, israelitas pajilaxxot pan ispi, pansapan xalaeni Egipto tʉajnʉxotdin.

40 Israelitas duil wʉt Egipto tʉajnʉxot, cuatrocientos treinta waechan chapati. 41 Cuatrocientos treinta waechan pat wʉt, israelitas chijiapi Egipto tʉajnʉxot, me-ama Dios chajia jʉm-aech wʉt japi chijiyaliajwapox. 42 Japamadoitat, Dios pajut chiekal tataefʉl pejjiw, israelitas, juk wʉton Egipto tʉajnʉxot. Samata, israelitas kaewaechan wʉt, japox islap wesfʉlpoxliajwa, japi pejwʉajnapijiw chijia wʉti Egipto tʉajnʉxot, itpaeflaliajwa pejsitaeyax pejDiosliajwa.

43 Dios jʉm-aech ampox Moisésxot, Aarónxotbej: “Xamallap isaxaelam ampoxan, Pascuafiesta wʉt. Asatʉajnʉpijin tapaeyaxisal choefwit, Pascuafiesta wʉt xaeliajwapon. 44 Pe esclavo-aton, wʉajtaspon platatat, japonlax tapaeis xaeliajwa pawit Pascuafiesta wʉt, japonlis circuncidas wʉt Pascuafiesta wʉajna. 45 Asatʉajnʉpijin jʉmch matthʉnpon, o, xamalxot nabistpon wʉt, japi xaeyaxil choefwi, Pascuafiesta wʉt. 46 Kaebatat choefwi xael wʉti, chiekal toelaxael pawi kaebachanpijiwxot. Asabapijin chinax chaxdusaxil japawi. Choefan pejthibej jalkaxil. 47 Puexa israelitas isaxael Pascuafiesta wʉt. 48 Pe asatʉajnʉpijin, dukpon xamalxot, japon nak-isasia wʉt Pascuafiesta, sitaeyax itpaeliajwapon Dios, japon atonlap majt circuncidaxaes, puexa pejjiw, poejiw sʉapich. Jasox is wʉt, japon aton, me-ama nejtʉajnʉxot nalaeltpon wʉt, jachiyaxaelon. Pe aton xaeyaxil choefwit, circuncida-esalpon. 49 Japox tatoꞌlax xamal chiekal naexasisaxaelam, japatʉajnʉxot nalaelapi. Japox tatoꞌlaxlap chiekal naexasisaxael asatʉajnʉchanpijiw, xamalxot duili” —aech Dios Moisésxot, Aarónxotbej.

50 Do jawʉx, puexa israelitas islisi Pascuafiesta, me-ama Dios toꞌa Moisés, Aarónbej. 51 Do jawʉt, japamadoitat, Dios juk israelitas kaenanʉla, pejmʉtan sʉapich, Egipto tʉajnʉxot.