—Xanfʉk asax tajkastikax toꞌaxaelen faraónliajwa, puexa Egipto tʉajnʉpijiwliajwabej. Do jawʉx, faraón asew bʉxtoꞌaxil. Japon pajutlap chijiyax toꞌaxael xamal chajiyaliajwam ampatʉajnʉxot. 2 Ma amwʉt, ¡toꞌim israelitas, poejiw, wathoꞌbej, japi wʉljoeliajwa Egipto tʉajnʉpijiw, mox duili, malech chaxduiliajwas isaspi orotat, isaspibej platatat! —aech Dios Moisésxot.

3 Dios kajachawaet israelitas puexa Egipto tʉajnʉpijiw xabich pachaemaliajwa israelitasliajwa. Do jawʉtbej, faraón pejpaklochiw, japatʉajnʉpijiw, nejchaxoel wʉt, jʉm-aechi ampox Moisésliajwa: ‘Ampon poi xabich puexa matabijt’ —aech faraón pejpaklochiw, puexa Egipto tʉajnʉpijiw sʉapich, Moisésliajwa.

4-5 Do jawʉx, Moisés jʉm-aech ampox faraónxot:

—Tajpaklon Dios nabʉxtoꞌa wʉt, jʉm-aechon ampox xamxot jʉmchiliajwan ampox: ‘Ampamadoitat, pinmadoikolaxtat, xan xentax wʉt Egipto tʉajnʉxot, jawʉt Egipto tʉajnʉpijiw kaenanʉla paxi, matxoelapijiw, poejiwkal, wetʉpaxaes. Naxʉlan, matxoelapijin, japonlach asamatkoi, reyaxaelpon xam wʉlela, japonlap, tʉpaxael. Hasta wathoꞌ esclavas iaꞌtat xatkianapi trigo, japi paxibej, poejiw, matxoelalaelapi, wetʉpaxaes. Tʉpaxaelbej puexa choef matxoelapijiw, poejiwkal. 6 Japox ja-aech wʉt, potʉajnʉcha Egipto tʉajnʉpijiw, xabich wʉnoeyaxael, matxoelapijiwkal wetʉpaxaes xoti paxi poejiw. Majt japoxan amxot jachi-elpoxan, japoxanlap, jachiyaxael. Pe japoxwʉx, xamal, puexa Egipto tʉajnʉpijwam, kaes japox taeyaximil’ —aechlap japox tajpaklon Dios —aech Moisés faraónxot.

7 Moisés pejme jʉm-aech ampox faraónxot:

—Xamal Egipto tʉajnʉpijwam najut chiekal matabijsliajwam japoxlap jachiyaxael. Pe Israelitasxotlax, Dios pejjiwpixot, jaxot chiekal jʉmjilaxael wʉnoeyaxan japahora wʉt. Israelitas duilxot, chinax kaen wʉr tajʉawaxil israelitas-aton, pejchoefbej. 8 Japox wejatis wʉti, puexa nejpaklochiw fʉlaeyaxaen xanlel nuilaxael brixtat xan tajwʉajnalel. Jawʉt, nejpaklochiw jʉm-aechiyaxael ampox xanxot: ‘¡Puexa nejjiw bʉflaem ampatʉajnʉxot!’ —chiyaxaellap nejpaklochiw xanxot. Hasta japi japox jʉm-aech wʉt xanliajwa, jawʉt xanlap ampatʉajnʉxot tajjiw bʉflaeyaxaelen —aech Moisés faraónxot.

Do jawʉt, Moisés xabich palala wʉt, nakolton faraónxot. 9 Do jawʉx, Dios pejme jʉm-aech ampox Moisésxot:

—Faraón naexasisaxil xamal. Samata, xabich kaes koechaxan isaxaelen Egipto tʉajnʉxot —aech Dios Moisésxot.

10 Moisés, Aarón sʉapich, islisi puexa japoxankoechaxan, majt ispoxan, faraón wʉajnalel. Pe faraón taen wʉt japoxan koechaxan, Dios pijax poxan japon pejme, nejliaklan wʉt, ja-aechon. Tapae-el wʉton israelitas chijiyaliajwa pejtʉajnʉxot.