—¡Xabʉaꞌde faraón poxade! Xan japon tapaeix, nejliaklan wʉt, jachiliajwapon. Xanbej tapaeix japon pejpaklochiw, Egipto tʉajnʉpijiw, nejliakla wʉt, jachiliajwapi. Samata, japi ja-aech japox, xan itpaeliajwan tajpamamax, xan xajʉpx puexa nejmachkoechaxan isliajwan. 2 Xan japoxan, koechaxan, isx xam chapaeliajwam naxi, chapaeliajwambej namojiw. Xan japoxan koechaxan isx Egipto tʉajnʉpijiwxot japi kastikaliajwan. Ja-an wʉtbej, puexa xamal najut chiekal matabijsaxaelam xanlap Diosnan —aech Dios Moisésxot.

3 Do jawʉx, Moisés, Aarón sʉapich, fʉlaechlisi taeliajwa faraón. Faraónxot paꞌa wʉt, jʉm-aechi ampox:

—Hebreos pejDios, jʉm-aech ampox, xanal nabʉxtoꞌa wʉt xamxot jʉmchiliajwan ampox: ‘¿Hasta maswʉtkat xam naexasisaximil? ¡Tajjiw israelitas tapaeliajwa chijiyaliajwa Egipto tʉajnʉxot, japi itpaeliajwa pejsitaeyax xanliajwa! 4 Xam nakiowa tapae-emse wʉt tajjiw israelitas chijiyaliajwa nejtʉajnʉxot, ja-am wʉt moech kandiawa najut chiekal taelamdoꞌ, xan tapaeyaxaelen pasliajwa xabich suiꞌ, japi xajʉpaliajwa nejtʉajnʉxot xabich wʉlʉkaliajwabejpi. 5 Japi suiꞌ xabich wʉt, sat tampoelaxael. Matxaeyaxaeli naxaeyaxan nejtʉajnʉpijiw mʉthapi namapifʉk, natacholan wʉt granizo. Xabich nejmachnaechan mʉthaspi matxaeyaxael japi suiꞌ. 6 Japi suiꞌ xabich wʉlʉkaxael nejbachanxot. Nejjiw paklochiw pejbachanxotbej wʉlʉkaxaeli. Egipto tʉajnʉpijiw pejbachanxotbej xabich wʉlʉkaxaeli. Japoxanlap nej-axjiw, nej-amjiwbej, chinax tae-el. Xatisbej japox chinax tae-esal ma amwʉt, jachiyaxaelpox’ —aech Moisés, Aarón sʉapich, faraónxot.

Moisés bʉxtoet wʉt, natfoꞌcha wʉton, faraón pejbaxot nakoldepon, Aarón sʉapich. 7 Do jawʉt, faraón pejpaklochiw jʉm-aechi ampox faraónxot:

—¿Hasta maswʉtkat japon aton naktaliatpox kofsaxaeli? Tajpaklon, ¡tapaem israelitas chijiyaliajwa wajtʉajnʉxot israelitas kawʉajnaliajwa pejDios! ¿Xamkat chiekal matabijs-emil puexa Egipto tʉajnʉ xabich tabejtaspox japon aton pijaxtat? —aech paklochiw naksiya wʉti faraónxot.

8 Do jawʉt, faraón pejme toꞌa pamakjiw, japi wʉljaesliajwa Moisés, Aarón sʉapich. Moisés, Aarón sʉapich, pat wʉti faraónxot, jawʉt, faraón jʉm-aech ampox Moisésxot, Aarónxotbej:

—¡Xabʉaꞌde, nejjiw sʉapich, nejDios kawʉajnaliajwam! ¡Pe majt chiekal jʉm-amde xan matabijsliajwan, achankat fʉlaeyaxael! —aech faraón Moisésxot.

9 Pe jawʉt, Moisés jʉmnot wʉt, jʉm-aechon ampox:

—Xanal puexa tajjiw bʉflaeyaxaelen, puexa tejew choefbej bʉflaeyaxaelen. Xanal pinjiyax, fiesta, isaxaelen Diosliajwa —aech Moisés faraónxot.

10-11 Pe faraón jʉmnot wʉt, jʉm-aechon ampox:

—Xanlap japox tapaeyaxinil xamal bʉflaeliajwam nejwathoꞌ, naxibej. Ja-am wʉt, xamal nejchaxoelaxaelam babijax isliajwam xanalliajwa. Xamal poejwamkal, ¡xabʉaꞌde nejpaklon Dios kawʉajnaliajwam! Xamal puexa xabich kawʉajnasian nejpaklon Dios —aech faraón Moisésxot.

Do jawʉtbej, faraón toꞌa babijaxtat Moisés chijiyaliajwa faraónxot. Samata, Moisés nakolt faraón pejbaxot. 12 Do jawʉx, Dios jʉm-aech ampox Moisésxot:

—Mʉaxxachoꞌmich Egipto tʉajnʉ poxade, xabich suiꞌ pasliajwa, toelaliajwapi namapifʉk mʉthaspi, granizo natacholan wʉt —aech Dios Moisésxot.

13 Do jawʉt, Moisés mʉaxxachoꞌa wʉt, jawʉt Dios tapaei joewa xabich wikaliajwa esteleldin. Jawʉt, joewa xabich wikafʉl matkoi, madoibej, japatʉajnʉleldin. Do kandiawa, kandiawasap wʉt, xabich suiꞌ joewa xalaenspi, chanlianlisi Egipto tʉajnʉxot. 14 Potʉajnʉcha japatʉajnʉxot xabich suiꞌ wʉlʉk. Japox majt jachi-el, me-ama japamatkoi xabich suiꞌ wʉlʉkpox. 15 Xabichkolax suiꞌ wʉlʉk Egipto tʉajnʉxot. Sat tampoel sat taeliajwa, xabich suiꞌ xot. Japi suiꞌ xabich nejmach matxael. Japatʉajnʉpijiw mʉthapi xabich wematxaespi. Naechan, pabaechpibej, namapi granizo natcholan wʉt, japibej matxaes. Chinaxkat suiꞌ malal chiekal matoeli. Nʉaf-ʉaf majwa-eli. Chiekal puexa toeli. Nʉafuich dukja-el naechanxot. Chiekal ijil. Potʉajnʉcha Egipto tʉajnʉxot japi suiꞌ, ja-aech.

16 Faraón kamta toꞌa pamakjiw wʉljaesliajwapi Moisés, Aarón sʉapich. Do jawʉx, Moisés, Aarón sʉapich, pat wʉti faraónxot, faraón jʉm-aech ampox Moisésxot:

—Xan babijax isx nejDiosliajwa, naexasis-enil xot, xamalbej. 17 ¡Ma amwʉtfʉk xamal kaes nabeltaem tajbabijax isxpoxliajwa! Wʉljowxbej xamal nejDios nawekawʉajnaliajwam xanxot chiekal ijilaliajwa ampi suiꞌ, xabich tabejtxoti! —aech faraón Moisésxot.

18 Moisés, Aarón sʉapich, nakola wʉti faraón pejbaxot, Moisés kawʉajan Dios suiꞌ ijilaliajwa faraónxot. 19 Do jawʉt, Dios xaliaxt joewa wikax, xabich wikaliajwa oesteleldin, japox joewa xabich wik wʉt, japi suiꞌ xafos mar Rojo poxade. Ja-aech wʉt, kaen suiꞌt, chinax, namana-el potʉajnʉcha Egipto tʉajnʉxot. Do jawʉt, japi suiꞌ chiekal ijil. 20 Pe faraón, pejme nejliaklan wʉt, ja-aechon, Dios tapaeis xot naexasis-elaliajwa japoxan koechaxan. Samata, tapae-elon israelitas chijiyaliajwa pejtʉajnʉxot.

21 Do jawʉx, Dios pejme jʉm-aech ampox Moisésxot:

—¡Athʉlese mʉaxxachosmich! Ja-am wʉt, chalechkal xabich itkʉaꞌnikaxael potʉajnʉcha Egipto tʉajnʉxot. Xabich choenkaxael itkʉatax —aech Dios Moisésxot.

22 Moisés ow-aech. Do jawʉt, athʉlese mʉaxxachose wʉton, chalechkal xabich itkʉaꞌnik potʉajnʉcha Egipto tʉajnʉxot. 23 Tres matkoi xabich itkʉaꞌnik Egipto tʉajnʉxot. Samata, Egipto tʉajnʉpijiw nakaebapijiw natae-eli. Tae-elbejpi mox duili. Pelax, israelitas duilxot, jaxot itkʉaꞌnika-el. Do jaxot, nakiowa, ja-aech itliakpox.

24 Faraón pejme pamakjiw toꞌa, japi wʉljaesliajwa Moisés. Moisés jaxot pat wʉt, faraón jʉm-aech ampox Moisésxot:

—¡Nejjiw israelitas bʉflaem pajilax poxade nejpaklon Dios kawʉajnaliajwam! ¡Bʉflaembej naxi! ¡Pe nejew choef amxot waelim, oveja, pak sʉapich! —aech faraón Moisésxot. 25 Pe Moisés jʉmnot wʉt, jʉm-aechon ampox:

—¡El! ¡Xamlap najut xanal nachaxduiyaxaelam choef xʉaꞌasliajwan, bowaliajwanbej, tajpaklon Diosliajwa! 26 Pe xanal puexa tejew choef bʉflaeyaxaelen. Amxot chinax kaen choef waelsaxinil. Chinax kaen, choefan, namanaxil, amxot xanal chijian wʉt. Xanal tejew choefxot itfesaxaelen xʉaꞌasliajwan Dios pej-ofrendaliajwa. Chiekal matabijs-enil, pafolx wʉt, xanal naweweꞌpaxaelpox choef, Dios pej-ofrendaliajwa, itpaeliajwan tajsitaeyax Diosliajwa —aech Moisés, faraónxot.

27 ^a 28 Do jawʉt, faraón jʉm-aech ampox Moisésxot:

—¡Ma amxot xam chijiamde! ¡Kaxa nabej fʉlaeꞌ xan pejme nataeliajwam! Pejme fʉlaemen wʉt xan nataeliajwam, ¡jawʉt xam tʉpaxaelam amxot! —aech faraón, thiya wʉton Moisés.

29 Moisés jʉmnot wʉt, jʉm-aechon ampox faraón jʉmtaeliajwa:

—Xam chiekal najut jʉm-am. ¡Kaes xam taeyaxinilpox amxot! —aech Moisés jʉmnot wʉton faraón.