—¡Xabʉaꞌde pejme faraón poxade! ¡Jʉm-amopon ampox: ‘Xanal israelitas tajDios nabʉxtoꞌa wʉt, jʉm-aechon ampox xamxot jʉmchiliajwan ampox: “¡Tajjiw israelitas tapaem chijiyaliajwa Egipto tʉajnʉxot, japi xan na-itpaeliajwa pejsitaeyax. 2-3 Xam nakiowa tapae-emse wʉt israelitas chijiyaliajwa nejtʉajnʉxot, moech jelnutaelam, xan toꞌaxaelen pinjikolax waxae. Japoxwaxaetat xabich nejew choef tʉpaxael. Tʉpaxael kawaei, bur, camello, pak, ovejabej. 4 Pe xan tapaeyaxinil japoxwaxae waeliajwas tajjiw israelitas pejew choefbej. Me-ama nejtʉajnʉpijiw pejew choef tʉpaxael, jasox jachiyaxil japi pejew choefxot. Israelitas pejew choefxot kaen tʉpaxil” —aechlap Dios japox jʉmchiliajwan xamxot, xan nabʉxtoꞌa wʉt’ —amo faraónxot! —aech Dios Moisésxot.

5 Diosbej kaematkoi mark wʉt, jʉm-aechon ampox Moisésxot, japox waxae toꞌaliajwa wʉt:

—Xan kandiawa japox waxae toꞌaxaelen —aech Dios Moisésxot.

Do jawʉx, Moisés fʉlaechlison chapaeliajwa faraónxot, maswʉt Dios toꞌaxaelpox japox pinjikolax waxae.

6 Do, kandiawa wʉt, Dios is jʉmdutpox, pat wʉt. Puexa Egipto tʉajnʉpijiw pejew, choefxot, xabich tʉp. Pe israelitas pejew, choefxot, chinax kaen tʉpa-el. 7 Faraón pejew, choef, tʉp wʉt, toꞌapon pamak taeliajwa israelitas pejew, choef. Taen wʉti israelitas pejew, choef, tʉpa-elpox, jawʉt nawenlisi faraón poxadin. Pat wʉti chapaei wʉt jʉm-aechi ampox faraónxot: “Israelitas pejew, choef, chinax kaen choefan, tʉpa-el” —aechi chapaei wʉt faraónxot. Do jawʉt, faraón japox jʉmtaen wʉt, nejliaklan wʉt, ja-aechon, tapae-el wʉt israelitas chijiyaliajwa Egipto tʉajnʉxot.

8 Do jawʉx, Dios pejme jʉm-aech ampox Moisésxot, Aarónxotbej:

—¡Xamal nejke-etat mojde hornothumba! Do jawʉt, Moisés athʉlese thosabaxoei faraón wʉajnalel. 9 Japathumba xabich nasalaxael puexa Egipto tʉajnʉ xajʉpaliajwa. Do jawʉt, tamamulawaxae waeyaxaes puexa Egipto tʉajnʉpijiw, pejew choefbej —aechlap Dios ampox Moisésxot.

10 Do jawʉt, Moisés, Aarón sʉapich, pejke-etat mojti hornothumba xalaeliajwa faraón poxade. Pat wʉti faraónxot, Moisés japox thumba, thosaba athʉlese. Jawʉt, xabich jiw, Egipto tʉajnʉpijiw, xabich pinbʉꞌitfachan, ma-is pejew choef ja-aech. Me-ama saꞌlaxan wʉt, ja-itfa-aech. Pe kaes xabich pin-itfachan. 11 Pe jawʉt, pinjoeꞌiw xajʉpa-el isliajwa japox koechax Moisés wʉajnalel. Japi pinjoeꞌiwbej, japox waxae waeispi, xabich pobʉꞌta pinbʉꞌitfachan. Asew Egipto tʉajnʉpijiw xabich pinbʉꞌitfachan, me-ama pinjoeꞌiw, jabʉꞌitfachan. 12 Dios tapaei faraón nejliaklan wʉt, jachiliajwa. Samata, naexasis-elon Moisés, Aarón sʉapich, jʉm-aechpox. Me-ama Dios chajia jʉm-aech Moisésxot, faraón naexasisaxilpox, diachwʉajnakolax japox ja-aech.

13 Do jawʉx, Dios jʉm-aech ampox Moisésxot:

—Chijianansnikam wʉt, ¡xabʉaꞌde faraón poxade! ¡Japon jʉm-amo ampox: ‘TajDios nabʉxtoꞌa wʉt, xanalxot najʉm-aechon ampox xamxot jʉmchiliajwan ampox: “¡Tajjiw israelitas tapaem chijiyaliajwa nejtʉajnʉxot, xan na-itpaeliajwa pejsitaeyax israelitas. 14 Pejme toꞌaxaelen asax babijax xamliajwa, nejpaklochiwliajwabej, puexa Egipto tʉajnʉpijiwliajwabej, puexa xamal chiekal matabijsliajwam, do kaes chiekal ijil asan dios, me-ama xan, jason. 15 Xan xajʉpx tajpamaxtat xamal tajkastikax wʉt tʉpaliajwam najut chiekal taeliajwam, nejpaklochiw sʉapich. Pe xan jasox isaxinil. 16 Pelax, xan tapaeyaxaelen xam laejaliajwam ampathatat najut chiekal taeliajwam tajpamamax, puexa ampathatpijiwbej pajut chiekal namatabijsliajwa. 17 Pe nakiowa, xam nijaxtat tajjiw nakiowa nabijasfʉl. Xam tapae-emilbej tajjiw chijiyaliajwa nejtʉajnʉxot. 18 Samata, kandiawa, ampa-hora wʉt, xan toꞌaxaelen xabich granizo natacholnaliajwa nejtʉajnʉxot. Japox majt jachi-el, granizo natacholan wʉt Egipto tʉajnʉxot. 19 Samata, ¡namak toꞌim japi jeliajwa choef jebachanxot puexa nejew, choef, tathoetat nuili, weliajwa, granizo natacholan wʉt! ¡Asaxanpi nejew, tathoetatpoxan, nej jepi bachanxot! Granizo cha-aex xapae-enil. Pinanʉl, me-ama iaꞌtan, jasilap, natacholnaxael granizo. Japi granizo natacholan wʉt, xabich jiw matkaeijabaxaes, xabich choefbej matkaeijabaxaes” —amo faraónxot!’ —aech Dios, nabʉxtoꞌa wʉt xanal xamxot jʉmchiliajwan ampox —aech Moisés faraónxot.

20 Paklochiw, nabisti faraónliajwa, japox jʉmtaen wʉt, xabich pejlewlapi, Moisés jʉm-aech wʉt Dios bʉxtoꞌaspox jʉm-aech wʉton ampox: ‘Choef, je-esalpi, choef jebachanxot, japi choef matkaeijabaxaes’ —aech wʉt Moisés Dios bʉxtoꞌaspox. 21 Pe asew Egipto tʉajnʉpijiw chiekal naexasis-el. Pejew choef tathoetat nuilax tapaeipi. Je-eli choef jebachanxot. Japi choef, tathoetat nuili, puexa chiekal we-el. Granizo natacholan wʉt, matkaeijabaspi. 22 Do jawʉt, Dios pejme jʉm-aech ampox Moisésxot:

—¡Athʉ mʉaxxachosmach granizo natacholnaliajwa potʉajnʉcha Egipto tʉajnʉxot. Granizo natacholan wʉt, natacholnaxael jiwxotsik, choefxotsikbej, Egipto tʉajnʉpijiw mʉthaxotsikbej! —aech Dios Moisésxot.

23 Jawʉt, Moisés athʉlese mʉaxxachoꞌse wʉt, Dios toꞌa thatbaxo najuiliajwa, xabich chamx jʉmseliajwabej. Do jawʉtbej, xabich granizo natacholan Egipto tʉajnʉxot. 24 Granizo natacholnax chinax matdukjaba-el. Kaelel natacholan. Chamx jʉmseyaxbej chinax matdukjaba-el. Jasox majt jachi-el, granizo xabich natacholan wʉt Egipto tʉajnʉxot. 25 Granizo natacholan wʉt Egipto tʉajnʉxot, tathoetatpi xabich tabejtas. Jiw xabich tʉp. Choef xabich tʉpbej. Mʉthaspibej jaljabas. Puexa naechanbej xabich daltathiaꞌjabas. 26 Granizo xabich natacholan wʉt Egipto tʉajnʉxot, Gosénxotlax, israelitas duilxot, chinax kaegranizo jopa-el.

27 Do jawʉt, faraón asew pamak toꞌa japi wʉljaesliajwa Moisés, Aarón sʉapich. Moisés, Aarón sʉapich, pat wʉti faraónxot, faraón jʉm-aech ampox Moisésxot, Aarónxotbej:

—Xan tajut chiekal matabijtax babijax isxpox Diosliajwa, tapae-enil xot japon pejjiw chijiyaliajwa tajtʉajnʉxot. Samata, japox wʉajan xan tajax, puexa tajjiw sʉapich. 28 Xabich chamx jʉmseyax chinax matdukjaba-el. Granizo natacholanpoxbej chinax matdukjaba-el. Samata, israelitas kaes fiasaxinil chijiyaliajwa tajtʉajnʉxot. ¡Xanalliajwa Dios nawekawʉajandebej! Ja-am wʉt, xan tapaeyaxaelen israelitas chijiyaliajwa tajtʉajnʉxot —aech faraón Moisésxot, Aarónxotbej.

29 Moisés jʉmnot wʉt, jʉm-aechon ampox faraónxot:

—Ma amwʉt, ampapaklowaxxot nakoltax wʉt, athʉlese mʉaxxachosaxoeyan Dios kawʉajnaliajwan. Do jawʉt, kaes granizo natacholnaxil. Kaes chamx jʉmseyaxilbej puexa xamalxot, xam najut chiekal matabijsliajwam ampathatlap, Dios pejthat. 30 Pe nakiowa, xan chiekal matabijtax xam nejlewla-emilfʉk Diosliajwa. Ma-is nejpaklochiw pejlewla-elfʉk Diosliajwa —aech Moisés faraónxot.

31 Matkaeijabaspi lino, japilap natalapi matkaeijabas. Matkaeijabasbej cebada, naboetpilis. 32 Pe trigo, centeno sʉapich, tabejs-esal, naboes-el xotfʉki.

33 Moisés bʉxtoet wʉt nospaeyax, faraón sʉapich, nakolt wʉt japapaklowaxxot, jawʉt Moisés athʉlese mʉaxxachose wʉt, Dios kawʉajanpon. Do jawʉt, kamta granizo kaes natacholna-el. Iambej kaes thilna-el. Chamxbej kaes xabich jʉmse-el. Puexa japoxan chiekal toep Egipto tʉajnʉxot, Moisés kawʉajan wʉt Dios. 34 Pe faraón taen wʉt, kaes granizo natacholna-elpox, kaes iam thilna-elpoxbej, kaes chamx jʉmse-elpoxbej, jawʉt faraón asax jʉmch nejchaxoel Diosliajwa. Kaen faraón kaenejchaxoelaxana-el. Japon pejpaklochiwbej asanejchaxoelaxan Diosliajwa. Pejme nejchaxoelpi tapae-elaliajwa israelitas, chijiyaliajwa Egipto tʉajnʉxot. 35 Pejme faraón, nejliaklan wʉt, ja-aechon, tapae-el wʉt israelitas chijiyaliajwa Egipto tʉajnʉxot, me-ama Dios chajia jʉm-aech Moisésxot, faraón kamta owchiyaxilpox israelitas chijiyaliajwa tapaeliajwa pejtʉajnʉxot.