—¡Xabʉaꞌde pejme faraón poxade! Japon jʉm-amo ampox: ‘¡Dioslap jʉm-aech, ampox xan nabʉxtoꞌa wʉt, xamxot jʉmchiliajwan ampox: “¡Xam tapaem israelitas chijiyaliajwa Egipto tʉajnʉxot, japi na-itpaeliajwa pejsitaeyax! Xam tapae-emse wʉt israelitas chijiyaliajwa, xan kastikaxaelen xam. Samata, xam xabich nabijasaxaelam, tajkastikaxtat xabich kabuyo pat wʉt potʉajnʉcha Egipto tʉajnʉxot xajʉpaxael. 3 Nawelxotlap xabich kabuyo nakolaxoen. Nejbaxot xabich wʉlʉkaxael kabuyo. Xam moejtampiezaxot, nejcamaxotbej, xabich kabuyo wʉlʉkaxael. Nejpaklochiw pejbachanxotbej xabich kabuyo wʉlʉkaxael. Asew Egipto tʉajnʉpijiw pejbachanxotbej xabich kabuyo wʉlʉkaxael. Xamliajwa isxoti pan-sapan, pan bowaxanxotbej, jaxot xabichaxael kabuyo. 4 Japi kabuyo xabich nanlapaxaen xamlel. Ma-is jachiyaxaes nejpaklochiwxot, asew nejtʉajnʉpijiwxotbej” —aech Dios xamliajwa’ —amo faraónxot! —aech Dios, bʉxtoꞌa wʉton Moisés.

5 Dios pejme jʉm-aech ampox Moisésxot:

—¡Aarón kitoꞌim kilanaeya xachosliajwa nawelan poxade, minlajantufachan poxadebej, pukan poxadebej! Jawʉt, jaxotdin xabich kabuyo nakolaxoen. Do ja-aech wʉt, japi kabuyo puexa Egipto tʉajnʉ xajʉpaxael —aech Dios Moisésxot.

6 Dolisdoꞌ, Aarón kilanaeya xachoꞌa nawelan poxade, minlajan poxade, pukan poxadebej, me-ama Moisés kitoꞌa. Jawʉt, xabich kabuyo pin-iakola nakolin jaxotdin puexa Egipto tʉajnʉ xabich xajʉpaliajwa. 7 Pe, pinjoeꞌiw pejpinjoeꞌaxtat nakolin-is kabuyo Egipto tʉajnʉxot. 8 Do jawʉx, faraón toꞌa asew Egipto tʉajnʉpijiw japi wʉljaesliajwa Moisés, Aarón sʉapich. Do jawʉx, bʉflaen wʉti Moisés, Aarón sʉapich, faraón jʉm-aech ampox Moisésxot, Aarónxotbej:

—¡Xamal kawʉajande nejDios, xanalxot ijiliajwa kabuyo! Kabuyo ijil wʉt, xan tapaeyaxaelen nejjiw, israelitas, chijiyaliajwa Egipto tʉajnʉxot, choef xʉaꞌasliajwam nejDios pej-ofrenda isliajwa —aech faraón Moisésxot, Aarónxot.

9 Jawʉt, Moisés jʉmnot wʉt, jʉm-aechon ampox faraónxot:

—¿Achahora wʉtkat pachaem xamliajwa, xan kawʉajnaliajwan Dios xamliajwa, nejpaklochiwliajwabej, asew Egipto tʉajnʉpijiwliajwabej, kabuyo chiekal ijilaliajwa xamxot, nejbaxotbej, puexa kabuyo nawelxotaliajwa? —aech Moisés faraónxot.

10 Do jawʉt, faraón jʉm-aech ampox Moisésxot, Aarónxotbej:

—Kandiawa —aech faraón Moisésliajwa, Aarónliajwabej.

Moisés jʉmnot wʉt, jʉm-aechon faraónliajwa:

—Kandiawa kabuyo chiekal ijilaxael xamxot. Dios japox isaxael xam najut chiekal matabijsliajwam Dios xajʉpox puexa isliajwa. Kaes asan Dios ijil, me-ama ampon Dios, jason, japonlap xanal tajDios. 11 Kabuyo nejbaxot ijilaxael. Nawelxotaxaeli. Japi kabuyo xam kaes taliasaxil. Nejpaklochiw, puexa Egipto tʉajnʉpijiwbej, kaes taliasaxisal kabuyo —aech Moisés faraónxot.

12 Moisés nakolt, Aarón sʉapich, faraón pejbaxot. Baxael, Moisés Dios kawʉajan kabuyo chiekal ijilaliajwa faraónxot. 13 Dios is Moisés kawʉajanpox faraónliajwa. Do jawʉt, kabuyo tʉp, bachanxoti, bafʉlmakanxotibej, tathoetatxotibej. 14 Jawʉt, puexa Egipto tʉajnʉpijiw noti kabuyo patʉpa, kaeyaxtat atʉaj tamejaliajwa. Japi kabuyo xabich atʉaj xasaeꞌok Egipto tʉajnʉxot. 15 Faraón taen wʉt puexa kabuyo chiekal ijilpox, jawʉt naexasis-elon Moisés, Aarón sʉapich, jʉm-aechpox. Me-ama Dios chajia jʉm-aech faraón naexasisaxilpox, diachwʉajnakolax naexasis-elon. Tapae-elbejpon israelitas chijiyaliajwa Egipto tʉajnʉxot.

16 Do baxael, Dios pejme jʉm-aech ampox Moisésxot:

—¡Aarón kitoꞌim kilanaeyatat asthumba boesaliajwa! Jawʉt, chalechkal xabich waekf potʉajnʉcha Egipto tʉajnʉxotaxael —aech Dios Moisésxot.

17 Do jawʉt, Moisés, Aarón sʉapich, islisi Dios toꞌaspox. Aarón kilanaeya athʉ xachose wʉt, boesapon asthumba. Jawʉt, puexa asthʉmbaxot xabich, me-ama waekf, jasi, chalechkal xabichpi Egipto tʉajnʉxot. Do jawʉt, Egipto tʉajnʉpijiw xabich xaespi waekf. Choefbej xabich xaes waekf. 18 Pinjoeꞌiw, Egipto tʉajnʉpijiw, japibej isasia koechax, pejpinjoeꞌaxtat, chalechkal xabichaliajwa waekf jaxot. Pe pinjoeꞌiw xajʉpa-el isliajwa japox koechax, chalechkal pejpinjoeꞌaxtat xabichaliajwa waekf jaxot. Egipto tʉajnʉpijiw xabich waekf xaespi. Choefbej xabich xaes. 19 Ja-aech wʉt, japi pinjoeꞌiw naksiya wʉt jʉm-aechi ampox faraónxot:

—¡Chalechkal waekf xabichpox, japox ja-aech Dios pijax koechaxtat! —aechi naksiya wʉt faraónxot.

Pe faraón japox jʉmtaen wʉt, nejliaklan wʉt, ja-aechon. Naexasis-elon pinjoeꞌiw jʉm-aechpox. Me-ama Dios chajia jʉm-aech faraón naexasisaxilpox, diachwʉajnakolax faraón naexasis-el.

20 Dios pejme jʉm-aech ampox Moisésxot:

—Kandiawasap faraón fʉlaeyaxaek naweladik. Samata, ¡xabʉaꞌde jaxotde jʉm-amo ampox faraónxot: ‘Tajpaklon Dios nabʉxtoꞌa wʉt, jʉm-aechon ampox xamxot jʉmchkiliajwan ampox: “¡Tajjiw tapaem chijiyaliajwa Egipto tʉajnʉxot, japi itpaeliajwa pejsitaeyax xanliajwa! 21 Xam, tajjiw chijiyax tapae-emse wʉt, xan toꞌaxaelen chalechkal xabichaliajwa papaꞌ xam poxade, nejpaklochiw poxadebej, puexa Egipto tʉajnʉpijiw poxadebej. Xabichaxael papaꞌ nejbachanxot. Japi papaꞌ wʉlʉkaxael Egipto tʉajnʉpijiw pejbachanxot. Japi papaꞌ potʉajnʉcha Egipto tʉajnʉxot xabich xajʉpaxaeli. 22 Pe, xabich wʉt papaꞌ Egipto tʉajnʉxot, Gosénxot, tajjiw duilxot, kaen papaꞌt jaxot chiekal ijilaxael. Japox ja-aech wʉt, xam chiekal matabijsaxaelam, xan ampatʉajnʉxotxpox. 23 Kaen papaꞌt chiekal ijilaxael tajjiw duilxot. Nejjiw duilxotlax bijiata-ese papaꞌ. Japox jachiyaxael kandiawa” —aechlap Dios japox xamliajwa’ —amo faraónxot! —aech Dios, bʉxtoꞌa wʉton Moisés.

24 Do jawʉx, Dios is japox. Kandiawasap wʉt, Dios pijaxtat papaꞌ chalechkal xabich. Me-ama itloejen pafoeyax fol wʉt, ja-aech xabich papaꞌ. Xabich papaꞌ pat wʉt faraón dukxot, pejpaklochiw duilxotbej, potʉajnʉcha, Egipto tʉajnʉxot papaꞌ xajʉp. Papaꞌ xabich xajʉp wʉt Egipto tʉajnʉxot, japatʉajnʉpijiw papaꞌ xabich xaes wʉt, bʉꞌtabejtas. 25 Faraón japox taen wʉt, toꞌapon asew Egipto tʉajnʉpijiw wʉljaesliajwapi Moisés, Aarón sʉapich. Do jawʉx, bʉflaen wʉti Moisés, Aarón sʉapich, faraón jʉm-aech ampox Moisésxot, Aarónxotbej:

—¡Puexa xamal xabʉaꞌde choef xʉaꞌasliajwam ofrenda isliajwam nejDiosliajwa! Pe ampatʉajnʉxot chijiyaximil —aech faraón Moisésxot, Aarónxotbej.

26 Jawʉt, Moisés jʉmnot wʉt, jʉm-aechon ampox faraónliajwa:

—Xam jʉm-ampox chiekal nawepachaema-el xan japox isliajwan. Ampatʉajnʉxot xanal choef xʉaꞌatax wʉt ofrenda isliajwan tajpaklon Diosliajwa, Egipto tʉajnʉpijiw taeyaxael, japox isx wʉt. Ja-aech wʉt, Egipto tʉajnʉpijiw nejchaxoel wʉt, jʉmchiyaxaeli ampox: ‘Israelitas, me-ama jasi choef, xʉaꞌasaxil Dios pej-ofrendaliajwa’ —chiyaxaeli, nejchaxoel. Do jawʉt, xanal nadadaepaxaeli iaꞌtat namatkaejabaliajwa. 27 Xanal fʉlaesian tres matkoi pajilax poxade, jaxotde choef xʉaꞌasliajwan Dios pej-ofrenda isliajwan, me-ama japon xanal natoꞌa isliajwan japox —aech Moisés faraónxot.

28 Jawʉt, faraón jʉm-aech ampox:

—Tapaeyaxaelen xamal puexa fʉlaeliajwam pajilax poxade, jaxotde choef xʉaꞌasliajwam ofrenda isliajwam nejpaklon Diosliajwa. Pe atʉaj xabich fʉlaeyaximil. ¡Xanliajwabej nejDios kawʉajande! —aech faraón Moisésxot.

29 Moisés jʉmnot wʉt, jʉm-aechon ampox faraónliajwa:

—Ma amxot nakoltax wʉt, Dios kawʉajnaxaelen. Kandiawa, papaꞌ chiekal ijilaxael xamxot, nejjiw paklochiwxotbej. Puexa asew nejtʉajnʉpijiwxotbej ijilaxael papaꞌ. Xam kaes kichachajba-emil wʉt, ¡israelitas nej chijiya choef xʉaꞌasliajwa ofrenda isliajwa tajpaklon Diosliajwa! —aech Moisés faraónliajwa.

30 Moisés nakolt wʉt faraón dukxot, Moisés kawʉajan. 31 Jawʉt, Dios is Moisés kawʉajan wʉt wʉljowpox. Do jawʉtbej, papaꞌ chiekal ijil faraónxot, pejjiw paklochiwxotbej, puexa asew Egipto tʉajnʉpijiwxotbej. 32 Pe faraón japox taen wʉt, pejme nejliaklan wʉt, ja-aechon, tapae-el wʉt israelitas chijiyaliajwa Egipto tʉajnʉxot.