—¡Xan chiekal naeweꞌe! Xanlap tapaeyaxaelen nakoewan, Aarón, naksiyaliajwa xamliajwa faraónxotam wʉt. Samata, Aarón jʉmchiyaxael xam jʉmchiyaxaelampoxan faraónxot. Me-ama profetas jijʉm-aech xan bʉxtoꞌaxpoxan jiwliajwa, Aarónlap-is jachiyaxael, me-ama xam nejchaxoelam naksiyaliajwam faraónxot. 2 Xan jʉm-anpoxan, ¡japoxan puexa chiekal chapaem nakoewan Aarón! Do jawʉx, Aarón japoxan naksiyaxael faraónxot japon tapaeliajwa israelitas chijialiajwa pejtʉajnʉxot. 3 Pe xan tajaxtat faraón nejliaklan wʉt jachiyaxaelon. Faraón japox ja-aech wʉt, xan xabich koechaxan isaxaelen Egipto tʉajnʉxot. 4 Pe, faraón kamta owchiyaxilon. Samata, xan koechaxan isaxaelen tajpamamaxtat Egipto tʉajnʉpijiw kastikaliajwan. Do jawʉx, tajjiw, israelitas, bʉꞌweyaxaelen Egipto tʉajnʉxot. 5 Japoxan, koechaxan, tajpamamaxtat isx wʉt, jukx wʉtbej tajjiw, israelitas, Egipto tʉajnʉpijiw japox taen wʉt, jawʉt pajut chiekal matabijsaxaeli diachwʉajnakolax xanlap Diosnan —aech Dios Moisésxot.

6 Do jawʉx, Moisés, Aarón sʉapich, islisi puexa, me-ama Dios toꞌaspi. 7 Japamatkoiyan, Moisés ochenta waechan, ma-is Aarón ochenta y tres waechan, faraónxot naksiya wʉti.

8 Do jawʉx, Dios toꞌa wʉt Moisés, Aarón sʉapich, Dioslap jʉm-aech ampox Moisésxot:

9 —Faraón kitoꞌa wʉt xamal koechax isliajwam, jawʉt, ¡xam jʉm-amde ampox Aarónxot: ‘¡Kilanaeya kofchaxaelam satadik faraón wʉajnalel, japakilanaeya jom nadofchaliajwa!’ —amde japox Aarónxot! —aech Dios Moisésxot.

10 Do jawʉt, Moisés, Aarón sʉapich, ow-aech wʉt, fʉlaechlisi faraón poxade isliajwa Dios toꞌaspox. Pat wʉti faraónxot, Aarón pejkilanaeya kofcha satadik faraón wʉajnalel, japon pejpaklochiw wʉajnalelbej. Do jawʉt, kilanaeya satat jop wʉt, jom nadofchapox.

11 Faraón japox taen wʉt, lapon pejew, pinjoeꞌiw, Egipto tʉajnʉpijiw. Japibej xajʉpi koechaxan isliajwa pejpinjoeꞌaxtat. 12 Japi pinjoeꞌiwbej kaenanʉla pejkilanaeyan kofa wʉt satadik, jawʉtbej, pinjoeꞌiw pejkilanaeyan jom nadofba. Pe jawʉt, Aarón pejkilanaeya, jom nadofapox, xaelpox pinjoeꞌiw pejkilanaeyan, jom nadofapi pejpinjoeꞌaxtat. 13 Faraón japox taen wʉt, nakiowa, nejliaklan wʉt ja-aechon. Samata, faraón owchi-el chijiyax tapaeliajwa israelitas pejtʉajnʉxot, me-ama Dios chajia jʉm-aech japox jachiliajwa.

14 Do jawʉx, Dios jʉm-aech ampox Moisésxot:

—Diachwʉajnakolax faraón nejliaklan wʉt ja-aechon. Samata, tapae-elon israelitas chijiyaliajwa Egipto tʉajnʉxot. 15 Kandiawa, kandiawasap wʉt, faraón fʉlaek wʉt naweladik, ¡xam xabʉaꞌdik, japon sʉapich, nospaeliajwam japonxot! ¡Faraón wʉajnawesaxaelam nawelbabʉꞌtat! ¡Xalaem nejkilanaeya, jom nadofapox! 16 Jaxotam wʉt, ¡xamlap jʉmchiyaxaelam ampox faraónxot: ‘Xanal hebreosjiwan tajDios, nabʉxtoꞌa wʉt jʉm-aechon ampox xamxot jʉmchiliajwan ampox: “¡Tajjiw tapaem chijiyaliajwa Egipto tʉajnʉxot, japi itpaeliajwa pejsitaeyax xanliajwa, pajilaxxot wʉt!” —aech Dios xamxot. Pe xam, hasta amwʉt, naexasis-emilfʉk.’ 17 Dios jʉm-aechbej ampox, xan nabʉxtoꞌa wʉt xamxot jʉmchiliajwan ampox: ‘Xam taenam wʉt koechax, isaxaelenpox, diachwʉajnakolax xam najut chiekal namatabijsaxaelam, xanlap Diosnan. Nawel itboesax wʉt kilanaeyatat nawel chiekal jalkalaxael. 18 Jawʉtlap xabich baxi tʉpaxael. Nawelxot xabich itxasaeyaxael. Ampatʉajnʉpijiw itawelkaxaesi min feliajwa —aech Dios xamliajwa’ —chiyaxaelam faraónxot! —aech Dios, bʉxtoꞌa wʉt Moisés.

19 Do jawʉtbej, Dios kaes jʉm-aech ampox Moisésxot:

—Aarón ¡kitoꞌim nejkilanaeya xachosliajwade nawelan poxade, minlajan poxadebej, pukan poxandebej, pinamʉthan, minan cha-owapoxande! Japoxanxot puexa jal xajʉpaxael. Tawlafachantat isaspi, me-ama canecaxan min cha-eliajwapoxan, iaꞌkʉarnarbej, puexa japaminanxot jal xajʉpaxael —aech Dios Moisésxot.

20 Do jawʉt, Moisés, Aarón sʉapich, fʉlaechlisi isliajwa Dios toꞌaspox. Pat wʉti nawelxot, do jawʉt, Aarón kilanaeya athʉ xachose itboesaliajwa nawel. Jawʉt, nawel itboesa wʉton faraón wʉajnalel, japon pejpaklochiw wʉajnalelbej. Do jawʉt, puexa nawelmin chiekal jalkalisox. 21 Jawʉt, xabich baxi tʉp. Xabich xasaei nawel. Samata, Egipto tʉajnʉpijiw xabich nabijat, min ijil xot min feliajwa. Egipto tʉajnʉxot puexa minan xabich jalkal.

22 Pe faraón pejew, pinjoeꞌiw, pejpinjoeꞌaxtat min jal kiladofapi. Samata, faraón japox taen wʉt, Moisés, Aarón sʉapich, jʉm-aechpox naexasis-elon. Me-ama Dios chajia jʉm-aech faraón naexasisaxilpox, diachwʉajnakolax faraón naexasis-el. 23 Do jawʉt, faraón nawiat pejba poxade. Taen wʉton japoxan, natxasis-elon. 24 Egipto tʉajnʉpijiw nawelmin feyaxil, xabich xot jal. Samata, puexa Egipto tʉajnʉpijiw minmʉthan kow nawelbabʉꞌanxot min faekaliajwa.

25 Siete matkoi xentlisox Dios koechax ispox, nawelmin jal kiladofapox.