—Xam najut taeyaxaelam, xan koechaxan isx wʉt faraón paju chiekal taeliajwa. Tajpamamax pijaxtat faraón tapaeyaxael tajjiw, israelitas, chijiyaliajwa japon pejtʉajnʉxot. Faraónlap pajut toꞌaxael tajjiw israelitas chijiyaliajwa japon pejtʉajnʉxot —aech Dios Moisésxot.

2-3 Dios pejme jʉm-aech wʉt, jʉm-aechon ampox Moisésxot:

—Xanlap Diosnan, xanlap tawʉl Jehová. Xan chajiakolaxtat natulaeltx Abrahamxot, Isaacxot, Jacobxotbej. Xanlap Diosnan, xabich mamnikaxponan xajʉpxponnanbej ijili puexa tulaelsliajwan, japi tapae-enil matabijsliajwa, tawʉlkolax, xanlap tawʉl Jehová. 4 Xan isx convenio japixot chaxdusliajwan Canaán tʉajnʉ. Japatʉajnʉxot xamal nejwʉajnapijiw majt piach duil, paꞌan wʉti asatʉajnʉxotdin. 5 Xan tajut chiekal israelitas xabich nabijasfʉlpox Egipto tʉajnʉpijiw pijaxtat, xabich tatoꞌlas wʉti nabichliajwa. Samata, xan nejchafaetx chajia jʉmdutxpox, convenio, nejwʉajnapijiwxot. 6 ¡Xabʉaꞌde israelitas poxade! ¡Japi jʉm-amo ampox: ‘Jehová, wajDios jʉm-aechlap ampox xamalliajwa: “Xamal jukaxaelen xabich malech nabistamxot Egipto tʉajnʉpijiwliajwa. Xan tajut chiekal isaxaelen koechaxan japatʉajnʉpijiw kastikaliajwan, xamal bʉꞌweliajwan.

7 Puexa xamal israelitas, tajjiwaxaelam. Xanbej puexa xamal nejDiosnaxaelen. Ja-aech wʉt, xamal najut chiekal matabijsaxaelam xanlap Jehová, nejDiosnan, xanlap jukx xamal malech xabich nabistamxot Egipto tʉajnʉpijiwliajwa. 8 Xamal chijiyaxaelam wʉt Egipto tʉajnʉxot, xan bʉflaeyaxaelen chajia jʉmdutxtʉajnʉ poxade. Japatʉajnʉ jʉmdutx chaxdusliajwan Abrahamxot, Isaacxot, Jacobxotbej. Japatʉajnʉ xamal chaxdusaxaelen nejtʉajnʉkolaxliajwa. Xanlap Jehová jʉm-an ampox” —aech Dios xamalliajwa’ —amo tajjiw israelitasxot! —aech Dios Moisésxot.

9 Do jawʉx, Moisés pejme jʉm-aech ampox israelitasxot. Pe israelitas naexasis-el Moisés jʉm-aechpox. Israelitas xabich nejchachaemla-el, xabich nabist xoti malech. 10 Dolis Dios jʉm-aech ampox Moisésxot:

11 —¡Xabʉaꞌde faraón poxade japonxot naksiyam wʉt jʉm-amdepon ampox: ‘Dios jʉm-aech ampox xamliajwa: “¡Israelitas chijiyax tapaem Egipto tʉajnʉxot!” —aech Dios xamliajwa’ —amde faraónxot! —aech Dios, bʉxtoꞌa wʉton Moisés.

12 Pe Moisés jʉmnot wʉt, jʉm-aechon ampox Diosxot:

—Tajpaklon Dios, chinax kaen israelitasxot xan naexasis-eli, chapaeix wʉt xam nabʉxtoꞌampox. Nawoesa faraón chinax naexasisaxil, xan jʉm-an wʉt nabʉxtoꞌampox, xan chiekal pachaema-enil xot naksiyaliajwan —aech Moisés Diosxot.

13 Do jawʉt, Dios nakiowa bʉxtoꞌa Moisés, Aarón sʉapich, japi jʉmchiliajwa ampox israelitas, faraónbej: “Dios natoꞌa xanal bʉflaeliajwan israelitas Egipto tʉajnʉxot” —chiliajwapi faraónxot, israelitasliajwabej.