—Jehoválap, xanal israelitas tajDios, japonlap jʉm-aech ampox xamliajwa: ‘Tajjiw, israelitas, ¡tapaem fʉlaeliajwa pajilax poxade fiesta isliajwa, itpaeliajwa pejsitaeyax xanliajwa!’ —aech Jehová tajDios xamliajwa —aech Moisés, Aarón sʉapich, naksiya wʉti, faraónxot.

2 Pe jawʉt faraón japox jʉmtaen wʉt, jʉm-aechon ampox:

—¿Achankat Jehová, japon nejDiospon? Xankatlap japon naexasisaxaelen chijiyax tapaeliajwan israelitas ampatʉajnʉxot? Xan chinax matabijs-enil japon Jehová, nejDios. ¡Tapaeyaxinilbej israelitas ampatʉajnʉxot chijiyaliajwa! —aech faraón Moisésliajwa, Aarónliajwabej.

3 Jawʉt, Moisés, Aarón sʉapich, jʉm-aechi ampox faraónxot:

—Xanal hebreos tajDios, paskon xanalxotsik. Japonlap xanal nabʉxtoꞌa xam jʉmchiliajwan ampox. Xampil natapaem xanal israelitas fʉlaeliajwan tres matkoije pajilax poxade, choef xʉaꞌasliajwan ofrenda isliajwan tajDiosliajwa. Jachi-enil wʉt, Dios nakastikaxael xanal waxaetat tʉpaliajwan. O, japoxa-el wʉt, espadatat xanal nabeyaxaelon —aech Moisés, Aarón sʉapich naksiya wʉti, faraónxot.

4 Pe faraón jʉmnot wʉt, jʉm-aechon ampox Moisésliajwa, Aarónliajwabej:

—¿Ma-aech xotkat xamal itsaltam asew israelitas, nabisti? ¡Xamal-is xabʉaꞌde nabichliajwam! —aech faraón toꞌa wʉton nabichax Moisés, Aarónbej.

5 Do jawʉt, faraón pejme jʉm-aech ampox Moisésliajwa, Aarónliajwabej:

—Ma amwʉt, xamal, israelitas, xabich AC¿ pin-iskolwam. ¿Xamalkat taesiam israelitas kofaliajwa pejbichaxan? —aech faraón Moisésliajwa, Aarónliajwabej.

6 Do jawʉt, japamatkoitat, faraón toꞌa pejpaklochiw, japi xabich kaes tatoꞌlaliajwa israelitas xabich kaes nabichliajwa. 7 Samata, jawʉt, faraón jʉm-aech ampox pejpaklochiwxot:

—Ma amwʉt, israelitas jukaliajwa wʉti adobes, ¡kaes nabej chaxdui trigotonan, cebadatonanbej, majowpi! ¡Israelitas pajut chiekal nej jalweka jukaliajwa adobes! ¡Pajut nej wʉljaesbejpi japatonan! 8 Pe israelitas toꞌam wʉt wʉljaesliajwa japatonan, ¡toꞌimbej jukaliajwa adobes! Me-ama majt pomatkoicha adobes juka wʉti, pin-iatpoxan, ¡jasʉapich nej jukapi adobes! ¡Nej weꞌpa-elebej kae-adobes japi kiwecha nabichliajwa! Samata, japi israelitas pinjametat jʉm-aechi ampox: ‘¡Chijias pajilax poxade choef xʉaꞌasliajwas wajDios pej-ofrenda isliajwas!’ —aech israelitas. 9 Samata, ¡japi israelitas kaes xabich nabichax toꞌim! ¡Chinax kaematkoi nej wejila-esal bichax nabichliajwa naexasisasamatapi kiwecha jʉm-aechpoxan, kichachajbaspoxan! —aech faraón, pejpaklochiw toꞌa wʉt.

10 Do jawʉt, japi paklochiw ow-aechlisi faraón toꞌaspox. Do jawʉx, japi paklochiw, israelitasxot pat wʉt jʉm-aechi ampox:

—Faraón xanal nafiast xamal kaes chaxdui-elaliajwan trigotonan, cebadatonanbej, adobes jukaliajwam. 11 Ma amwʉt, xamal najut trigotonan, cebadatonanbej, wʉlwekaxaelam faekaxaelamxot. Xamal jajut wʉljaetam wʉt japatonan, me-ama majt pin-iat adobes jukam wʉt, jasʉapich jukaxaelam najutpomatkoicha. ¡Weꞌpaxil kae-adobes! —aech faraón pejpaklochiw israelitasxot.

12 Do jawʉx, puexa israelitas potʉajnʉcha nasalpi Egipto tʉajnʉxot jalwekaliajwa trigotonan trigo chatsiaptaspoxanxot, cebadatonan cebada chatsiaptaspoxanxotbej. 13-14 Pomatkoicha, faraón pejpaklochiw, xabich toꞌapi israelitas adobes xabich jukaliajwa, me-ama majt juk wʉti adobes. Adobes weꞌp wʉt pin-iatpox, jawʉt israelitaspaklochiw bebalaspi. Jʉmtisbejpi ampox: “¿Ma-aech xotkat kaeliw, ma amwʉtbej, adobes jukam wʉt, juka-emil pin-iat? Me-ama majt jukam wʉt, ¡jachi-emil!” —tispi, baes wʉt israelitaspaklochiw.

15 Japox ja-aech wʉt, israelitaspaklochiw fʉlaechlisi faraón pejba poxade japi naksiyaliajwa faraónxot. Do jawʉt, israelitaspaklochiw naksiya wʉt jʉm-aechi ampox faraónxot:

—Tajpaklon, ¿ma-aech xotkat xam jasoxtat xabich toꞌam nejpaklochiw jasoxtat japi xanal natatoꞌlaliajwa? 16 Ma amwʉt, nachaxdui-ellisi trigotonan, cebadatonanbej. Pe nakiowa, japi xanal natoꞌa jukaliajwan adobes, me-ama majt jukx wʉt, jasʉapich jukaliajwan. Nejpaklochiw nakastika wʉt, xabich nabebalapi iwatat. ¡Nejpaklochiw pejbʉꞌwʉajan, xanal pin-iat juka-enil xot adobes! ¡Japox wʉajan xanal tajaxa-el! —aech israelitaspaklochiw naksiya wʉti faraónxot.

17 Pe faraón jʉmnot wʉt, jʉm-aechon ampox israelitaspaklochiwliajwa:

—Xamal kiwechwam xot, ¡japox jʉm-am: ‘¡Chijias pajilax poxade choef xʉaꞌasliajwas wajDios pej-ofrenda isliajwas!’ —am, xamal nanʉamtam wʉt! 18 ¡Xabʉaꞌde nabichliajwam! Xamal ma amwʉt chaxdui-el wʉti trigotonan, cebadatonanbej, pe nakiowa, ¡me-ama majt pomatkoicha adobes jukam wʉt, jasʉapich pin-iatpox jukaxaelam! —aech faraón israelitaspaklochiwxot.

19 Israelitas japox jʉmtaen wʉt, chiekal matabijti wepachaema-esalpox, jʉmtis xoti japox: ‘Me-ama majt pomatkoicha adobes jukam wʉt, jasʉapich pin-iatpox jukaxaelam adobes’ —tis xoti.

20-21 Israelitaspaklochiw nakola wʉti faraónxot, jawʉt xabʉꞌkʉlti Moisés, Aarón sʉapich. Moisés, Aarón sʉapich, wʉajnawechpi israelitaspaklochiw faraón pejba tathoetlel. Jawʉt, Moisés, Aarón sʉapich, lochpi israelitaspaklochiw. Loch wʉt, jʉmtispi ampox:

—¡Dios nej kastika xamal, faraónxot naksiyampoxliajwa! Xamal nijaxtat faraón, pejpaklochiw xabich, palalapi xanalliajwa. Xamal nijaxtatbej japi xanal nabeyaxael espadatat —aech israelitaspaklochiw lot wʉti Moisés, Aarónbej.

22 Do jawʉt, Moisés Dios kawʉajan wʉt, jʉm-aechon ampox Diosliajwa:

—Tajpaklon Dios, ¿ma-aech xotkat israelitas tapaeyam kastikaliajwas? ¿Ma-aech xotbejkat xan nabʉxtoꞌam xan naksiyaliajwan faraónxot? 23 Faraónxot naksiyax wʉt xam nabʉxtoꞌampox, ja-aech wʉt, jʉmch kaes kastikaspi nejjiw israelitas. Pe, xam chinax kajachawaes-emil bʉꞌweliajwam nejjiw —aech Moisés, Dios kawʉajan wʉt israelitas kastikaspoxanliajwa.