—Xan fʉlaechx wʉt israelitas poxade, nabʉxtoꞌampoxan xan jʉm-an wʉt, japi naexasisaxili xan. Owchiyaxilbej naexasisliajwa xan chapaeix wʉt japixot. Japilax jʉmch jʉmchiyaxael ampox xanliajwa: ‘Diachwʉajnakolaxa pae-emil Dios natulael-el xamxot —chiyaxaeli jʉmch xanliajwa’ —aech Moisés Diosxot.

2 Do jawʉt, Dios pejme naksiya wʉt jʉm-aechon ampox Moisésxot:

—¿Achaxkat xam xanukam nejke-etat? —aech Dios, wʉajnachaemt wʉt Moisés.

Moisés jʉmnot wʉt, jʉm-aechon ampox:

—Xan xanukx tajkilanaeyaxkal —aechon.

3 Dios pejme jʉm-aech ampox Moisésxot:

—¡Nejkilanaeya kofchim satadik! —aech Dios.

Do jawʉt, Moisés pejkilanaeya kofcha wʉt satadik, pejkilanaeya jom nadofchapox. Jawʉt, Moisés napiakcha japon jomxot. 4 Pe jawʉt, Dios jʉm-aech ampox Moisésliajwa:

—¡Toꞌthitlel jaelde japon jom! —aech Dios.

Do jawʉt, Moisés toꞌthijaelt wʉt jom, japon jom pejme kilanaeya nadofcha. 5 Do jawʉt, Dios pejme jʉm-aechon ampox Moisésxot:

—Xanlap diachwʉajnakolax Diosnan, xamxot natulaeltaxponan. Xanlap nejwʉajnapijiw pejDiosnan, Abraham, Isaac, Jacob, japi pejDiosnan. 6 ¡Nejke-e jemk nejmatiaftadik! —aech Dios kitoꞌa wʉton Moisés.

Do jawʉt, Moisés kijek wʉt pejmatiaftadik, kijusan wʉt pejmatiaftxot, leprawaxae kiwaechpon. Japawaxae papoeiwaxae. Me-ama paputh papoei wʉt, ja-aech Moisés pejke-e japawaxae pijaxtat. 7 Dios pejme jʉm-aech ampox kitoꞌa wʉton Moisés:

—¡Nejke-e pejme jemk nejmatiaftadik! —aech Dios.

Moisés pejke-e jek wʉt pejmatiaftadik, kijusan wʉtbej pejmatiaftxot, Moisés pejke-e pejme chiekal pachaem. Me-ama majt wʉt, ja-aech pejke-e. 8 Dios pejme jʉm-aech ampox Moisésxot:

—Japox koechax, kaeyax isam wʉtfʉk, israelitas naexasisaxilfʉk xam jʉm-ampox. Pejme asakoechax isam wʉt, jawʉtlap israelitas naexasisaxael. 9 Pe japi naexasisaxil wʉtfʉki kolekoechax isampox, ja-aech wʉt, ¡Nilo-nawelmint poꞌe! Japanawelmint pʉtat chafakcham wʉt, jawʉt japanawelmint jal nadofaxael —aech Dios Moisésxot.

10 Jawʉt, Moisés pejme jʉm-aech ampox Diosxot:

—Xan namaknan, chiekal pachaema-enil naksiyaliajwan. Jel-xan jachi-enil. Chajia xan ja-an, naksiyax wʉt, bʉxwʉajnachaemilax xot —aech Moisés Diosxot.

11 Dolisdoꞌ, Dios palala Moisésliajwa. Samata, Dios jʉm-aech ampox Moisésliajwa:

—¿Achankat jiw pejkaechan is wʉt, bʉxwʉajan duw jiw naksiyaliajwa? ¿Achankat jiw is jʉmtaeliajwa, naekʉaꞌnikaliajwabej? ¿Achankat jiw is taeliajwa, o, itliakliwliajwabej? 12 ¡Xabʉaꞌde! Xanlap tajut xam kajachawaesaxaelen chiekal naksiyaliajwam —aech Dios Moisésliajwa.

13 Moisés xabich jʉmbisnik. Samata, jʉm-aechon ampox:

—Tajpaklon Dios, ¡asan aton toꞌim! ¡Xan nabej natoꞌe! —aech Moisés Diosliajwa.

14 Do jawʉt, Dios palala Moisésliajwa. Samata, Dios jʉm-aech ampox:

—Nakoewan Aarón, levita-aton, japon chiekal matabijt naksiyaliajwa. ¡Taem! Malis nakoewan fʉlaen xam xabʉꞌkʉlsliajwa. Xabich nejchachaemlaxaelon, xam taen wʉt. 15 ¡Nakoewan puexa chiekal chapaem, japonbej chiekal chanaekabʉanaliajwa puexa asew, israelitas! Xanlap kajachawaesaxaelen nakoewan. Xambej kajachawaesaxaelen chiekal naksiyaliajwam. Xanlap tajut toꞌaxaelen xamal isaxaelampoxan. 16 Xam jʉmchiyaxaelam nakoewan Aarón. Me-ama xan tajut jʉm-an wʉt, jachiyaxaelam. Do jawʉt, nakoewan Aarón jʉmchiyaxael puexa israelitasxot xam jʉm-anpoxan. 17 ¡Nejkilanaeya xalaem! Japoxkilanaeyatat xabich koechaxan isaxaelam, me-ama xam kitoꞌax —aech Dios, toꞌa wʉt Moisés.

18-19 Moisés kaweta wʉtfʉk Madián tʉajnʉxot, Dios pejme jʉm-aech ampox Moisésxot:

—¡Xabʉaꞌde Egipto tʉajnʉ poxade! Xam boesasiapi, japi puexa tʉplisi —aech Dios toꞌa wʉton Moisés.

Dios naksiya bʉxtoet wʉt, Moisés fʉlaech pʉax Jetro pejba poxade. Pat wʉton pʉaxxot, jʉm-aechon ampox pʉaxxot:

—Xan pejme Egipto tʉajnʉ poxaxaechan, tajjiw israelitas poxade. Xan japi xabich taesian, nakiowa laelp wʉti —aech Moisés pʉax Jetroxot.

Pʉax Jetro jʉm-aech ampox Moisésxot:

—¡Najaw! Chiekal taenam, folam wʉt —aech pʉax Moisésliajwa.

20 Do jawʉt, Moisés chijia wʉt Egipto tʉajnʉ poxade, bʉꞌfolon pijow, paxʉlan kolenje sʉapich. Japi chafol kaen burtat. Moisés xafol pejkilanaeya, Dios toꞌaspox kilafolon. 21 Do pejme, baxael, Dios jʉm-aech ampox Moisésxot:

—Xam patam wʉt Egipto tʉajnʉxot, ¡majt chiekal nejchaxoelde, koechaxan isliajwam wʉt faraón wʉajnalel! Xan tajaxtat faraón, nejliaklan wʉt, jachiyaxaelon. Samata, israelitas makach tapaeyaxisal chijiyaliajwapi faraón pejtʉajnʉxot —aech Dios Moisésxot. 22-23 Ampoxlap jʉmchiyaxaelam faraónxot: ‘Dios nabʉxtoꞌa wʉt xam jʉmchiliajwan, jʉm-aechon ampox xamliajwa: “Israelitas, xanliajwa, me-ama taxʉlan, matxoelapijin wʉt, ja-aechi. Xan chajia jʉm-an ampox xamliajwa: ‘¡Tapaem tajjiw, israelitas, chijiyaliajwa nejtʉajnʉxot, japi itpaeliajwa pejsitaeyax xanliajwa! Pe xam tapae-emse wʉt tajjiw chijiyaliajwa nejtʉajnʉxot, naxʉlan, matxoelapijin, tʉpaxael, xan tajkastikaxtat’ —aech Dios xamliajwa” —amo ampox faraónxot’ —aech Dios, bʉxtoꞌa wʉton Moisés.

24 Moisés atʉaj chatuil, pijow sʉapich, paxi sʉapichbej, fol wʉti. Japamadoitat, Dios natulaelt Moisésxot. Jawʉt, Dios kijsasia waxaetat Moisés paxʉlan, wachakalpijin, Moisés circuncida-el xot paxʉlan. 25 Samata, Séfora fit iaꞌsierach. Jawʉt, circuncidapow paxʉlan. Do jawʉt, Moisés pejtʉaktame xajachapow paxʉlan pejbo-oefbʉꞌt, tathalpox. Jawʉt, jʉm-aechow ampox Moisésxot: “Diachwʉajnakolax xan japox isx, Dios kastika-elaliajwa xam” —aech Séfora Moisés pajut chiekal matabisliajwa. 26 Do jawʉt, Dios pejwaxae Moisés boejthʉs. Do jawʉx, Moisés fʉlaech Egipto tʉajnʉ poxade. Do jawʉt, Séfora jʉm-aech ampox Moisésxot: “Puexa nejjiwpoejiw circuncidaspikal” —aech Séfora Moisésxot.

27 Dioslap chajia jʉm-aech ampox Aarónxot: “¡Xabʉaꞌde pajilax poxade xabʉꞌkʉsliajwam nakoewan Moisés!” —aech Dios. Do jawʉt, Aarón ow-aech wʉt, fʉlaechon pajilax poxade, xabʉꞌkʉsliajwa Moisés Dios pejmʉax poxade. Pajilaxxot xabʉꞌkʉlt wʉt pakoewan Moisés, jawʉt nakaewa nawʉjaelapi, xabich nejchachaemil xot. 28 Do jawʉt, Moisés puexa chapaei pakoewan Aarónxot Dios bʉxtoꞌaspoxan, Dios toꞌaspoxanbej koechaxan isliajwa. 29 Do baxael, Moisés, pakoewan Aarón sʉapich, fʉlaechlison tamejaliajwa israelitas pej-ancianos. 30 Jawʉt, Aarón puexa chiekal chapaei israelitas pej-ancianosxot, Dios jʉm-aechpoxan Moisésxot. Moisésbej is koechaxan Dios kitoꞌaspoxan. 31 Jawʉt, puexa israelitas pej-ancianos pajut chiekal matabijti Dios taeflaspox, nabijasfʉl wʉt Egipto tʉajnʉxot. Samata, brixtat nuil wʉt, sat makxabijdiki itpaeliajwa sitaeyax Diosliajwa.