Jacob naksiyapox taxdukajamechan paxiliajwa
49
Do jawʉx, asamatkoi, Jacob puexa paxi wʉlala japi fʉlaeliajwadin japonxotaliajwa. Japi pat wʉt, Jacob jʉm-aech ampox japiliajwa:—Puexa xamal, ¡moxman xanxot! Kaenanʉla xamal jʉmchiyaxaelen asamatkoi jachiyaxaelpox xamalliajwa, namojiwliajwabej.
2 Xamal, ¡moxman xanxot chiekal naewesliajwam!
Xanlap nej-axnan, Israel, ¡chiekal nanaeweꞌe!
3 Xam Rubén, taxʉlnam, matxoelapijnam puexa nakoewliajwa.
Xan pansianan wʉtlejen, mamnikax wʉtfʉk.
Samata, xamlach majt kaes paklonam.
Kaes mamnikambej.
Me-ama asew nakoew, jachi-emil xam majt.
4 Pe ma amwʉt, xam kaes, me-ama matxoelapijnam wʉt, jachi-emil ma amwʉt.
Xam Rubén, me-ama minlajt, minbichax wʉt, ja-am.
Aton it-elaxil japamin xens-elaliajwa.
Xam bʉꞌmoejtam tamakow tajcamatat.
Ja-am wʉt, xam itpaeyam nasitae-emilpox.
Samata, ma amwʉt, xam kaes pakonaximil puexa nakoewliajwa.
5 Xam Simeón, Leví sʉapich, chiekal naxanaboejam, babijaxan isam wʉt.
Nej-espadatat xabich babijaxan isam, asew jiw bam wʉt.
6 Nalala wʉt, ma i-isasiamdoꞌ, do japox isam xamal.
Ja-am wʉt, asew jiw pabam, jasoxtat kastikaliajwam.
Xamal jasox isam wʉt, me-ama tor tʉakwasijalbalam fʉlae-elaliajwa, ja-am xamal babijaxan isam wʉt.
¡Chinax xan xamalxotaxinil maliach natamejlam wʉt nejchaxoelaliajwam machiyaxaelampox babijaxan isliajwam wʉt!
7 ¡Dios nej kastika xamal, xamal nalala wʉt,
xabich jiw pabam xot chinax beltae-elaxtat!
Samata, xamal namojiw nasalaxael potʉajnʉcha, Israel tʉajnʉxot.
8 Xam Judá, xamliajwa nakoew naksiyaxael chimiajamechan.
Nadaelmajiw malechaxaelambej.
Nakoewbej xam sitaeyaxael.
9 Wʉa Judá, xam, me-ama león, mamnikpon, xamlap-is ja-am.
León choefan jaelt wʉt, xaelon.
Do jawʉx, natxatdik wʉt, sattat chawʉla-oklison nʉafniapox.
Xamlap-is, me-ama león, pinjin, ja-am.
Samata, chinax kaen aton xam taliasaxil.
10 Nejpamamax chinax kaen aton kifeꞌnaxil xamxot.
Hasta namon pajut chiekal pat wʉt, japonlap japox pamamax japonliajwaxael.
Japonlap tatoꞌlaxael pomatkoicha.
Asatʉajnʉchanpijiw sitaeyaxaeson. Naexasisaxaesbejpon.
11 Asamatkoi, namojiw tatoꞌal wʉt ampatʉajnʉpijiw, xabichaxael uvanaechan.
Samata, burpijin xabich uvanaechanxot keꞌsaxaelon burxʉlan xaeliajwa uva-ʉaf.
Itkiasaxaelbejpon pejnaxoe vinotat, itsoeipotat, xabichaxael xot vino.
12 Namon pej-itfut kaes xabich itfu-soeyaxaelon, xabich af oton vinominan.
Japon pejbʉaꞌan xabich kaes bʉaꞌpoeyaxaelon.
Me-ama pakmit-ufan wʉt, jabʉaꞌchiyaxaelon bʉaꞌpoeipox.
13 Xam Zabulón, dukaxaelam mox marbabʉꞌxot.
Jaxot xabichaxael barkamochan owaxanxot.
Nejtʉajnʉ moxaxael Sidón paklowaxxot, nortelel.
14 Xam Isacar, me-ama bur,
mamnikpon, dewaxan noxtpon, jachiyaxaelam.
Bur kaes xalaeyaxil wʉt, damlathʉlaliajwa satat xa-okpon dewax.
15 Bur taen wʉt pachaem xot
damlathʉlaliajwa, jaxot damlathʉlon.
Taen wʉtbejpon pola, pachaempi matxaeliajwa,
japon bur nejchachaemil, pola mataxaeyaxael xoton.
Japoxade matwʉajlaflaechon bulan.
Nejchachaemilbej nabichliajwa.
Nabiston jʉmchi-elaxtat.
16 Xam Dan, tatoꞌlaxaelam nejjiwkola.
Tamojiwmʉtanxot, kaemʉt xam nejmʉtpijwaxael.
17 Xam chachoelaxaelam nadaelmajiwliajwa.
Me-ama jom, paxaechan, xabich chachoel xamlap, jachiyaxaelam, jom nʉamtbabʉꞌtat ek wʉt.
Diachwʉajnakolax xam jachiyaxaelam nadaelmajiwliajwa,
chachoelam wʉt.
Jom paxaechan kawaei tʉakjiꞌlalikla wʉt,
kawaei xabich matnochnukjala.
Ja-aech wʉt, aton jopdik satadik, tʉa-ekpon kawaei.
18 Tajpaklon Dios, ¡xan wʉajnawetx
nabʉꞌweliajwam, tadaelmajiwxot!
19 Xam Gad, chakipasaxael kithaka, nejew natkowaliajwa.
Pe xam, nejjiw sʉapich, nabam wʉt, japi jʉmch chiekal dʉkpaxael.
Ja-aech wʉt, xamal kawʉxadʉkpaxaelam japi kithaka beliajwam.
20 Xam Aser, nejtʉajnʉ xabich pachaem xot,
xabichaxael naxaeyaxan.
Japinaxaeyaxan xabich nejxasinkaxael
reyes xaeliajwa.
21 Xam Neftalí, me-ama awoi
nejmach nanʉamt yoxot,
xamlap-is jachiyasaxaelam.
Me-ama awoi chamiachiw, jachiyaxaellap-is naxi chamiachiwpoxliajwa.
22 Xam José, xam namojiw xabichaxael.
Me-ama uvanaech, minbabʉꞌxot chanuknaech wʉt xabich uvadunan, ja-am xam.
Padalan pase xajajialspoxmatwʉaj.
Uvadunan xabich chaduilje.
23 Nadaelmajiw xabich nejweslapi xam.
Samata, xam wʉltaxpajali buyantat.
Xabich itaxaxaelali xam.
24 Pe xam nejmʉaxan xabich mamnik.
Samata, xasensnikam nejfadoet, Dios pejpamamaxtat.
Japon, Dios, pawʉl ‘Israelitas Tataeflan’.
Japonlap asawʉl, ‘Israelitas Taxchalan’!
25 ¡Gracias-an xan tajDiosliajwa,
japonlap xabich mamnik puexa isliajwa!
Japon Dioslap xam kajachawaesaxael.
Dios toꞌa iam thilnaliajwa ampathatxot.
Toꞌabejpon min nakakolsliajwa satlelsan.
Diosbej kajachawaet xabichaliajwa yamxi,
xabichaliajwabej nejew choef.
26 Xan kaes Dios kawʉajnax xam kajachaxaesliajwa.
Me-ama taj-ax xanliajwa Dios kawʉajan wʉt
xan nakajachawaesliajwa, xan jachi-enil.
Samata, pachaempoxan, Dios chaxduiyaxael,
xabichaxael xamliajwa.
Japoxan kaeyaxtat thʉch sʉmtamejam wʉt, japi xabich athʉ mat-okaxael.
¡Puexa japoxan pomatkoicha nej ja-aecha xamliajwa,
xam paklonam xot puexa nakoewliajwa!
Dios makafit xot xam, ¡japox ja-aech xamliajwa!
27 Xam Benjamín, namojiw, me-ama lobo wʉt, jachiyaxael, malechafʉl wʉti padaelmajiw kifeꞌkaliajwa padaelmajiw pejew.
Lobo kandiawasap, choefan jaelt wʉt, xaeli.
Do jawʉx, kaliax wʉt, nejxae-aechi asew choef
xaeliajwa namanpox, —aech Jacob paxʉlan Benjamínliajwa.
28 Japoxanlap Jacob jʉm-aech kaenanʉla puexa paxiliajwa, naksiya wʉton taxdukajamechan. Jacob paxi, pamojiwbej, docemʉtanaxael asamatkoi Israel tʉajnʉxot.
Jacob tʉpox
29 Asamatkoi, Jacob jʉm-aech ampox puexa paxi chiekal jʉmtaeliajwa: “Xan naweweꞌp kaesʉapich matkoiyan tʉpaliajwan. Xan tʉpx wʉt, nachaxlaeyaxaelam Canaán tʉajnʉ poxade, jaxotde mʉaxwʉajxot namʉthsliajwam, tajwʉajnapijiw mʉthasxot, majt Efrón pejsatxot, japon hitita-aton. 30 Chajiakolaxtat, taj-am Abraham japasat wʉajt wʉt, matchawʉajtbejpon mʉaxwʉaj, jaxotde wajwʉajnapijiw mʉthaliajwas. Japasat pawʉl Macpela. Macpela Mamretabijla. 31 Jaxotde chajia Abraham pijow, Sara, mʉthton. Do jawʉxbej, jaxotbej Abraham mʉthtas. Do jawʉxbej, japamʉaxwʉajxot mʉthtas taj-en Rebeca. Do baxaelbej, taj-ax Isaac jaxotbej mʉthtaspon. Jaxotdebej xan mʉthtax tajow Lea. 32 Hititasjiw mowa wʉti japasat, matchamowabejpi mʉaxwʉaj waj-am Abrahamxot” —aech Jacob puexa paxiliajwa naksiya wʉt.
33 Jacob bʉxtoet wʉt naksiyapox puexa paxiliajwa, pejme okdik wʉt pejcamaxot, jawʉt tʉplison.