Jacob jʉmnot wʉt, jʉm-aechon ampox Diosliajwa:

—Xan ma amxotan Dios —aech Jacob.

3 Do jawʉt, Dios jʉm-aech ampox Jacobxot:

—Xanlap nej-ax pejDiosnan. ¡Xam nejlewlaxil fʉlaeliajwam Egipto tʉajnʉ poxade! Jaxotam wʉt, xan tajaxtat xam xabichaxael namojiw. 4 Xam chalaxaelen, fʉlaech wʉt Egipto tʉajnʉ poxade. Asamatkoi, xan tajut jukaxaelen namojiw japatʉajnʉxot, pejme bʉflaeliajwan ampatʉajnʉleldin. Asamatkoi, mox nawʉajna wʉt tʉpaliajwam, naxʉlan José xamxotaxael —aech Dios Jacobxot, japamadoitat.

5 Do jawʉx, Jacob, pejjiw sʉapich, chijialisi pawʉlxot Beerseba. Jacob paxi pejwathoꞌ, japi paxibej, Jacob sʉapich, chafoli carretantat, faraón xatoꞌaspitat japi chaflaeliajwa. 6 Jacob, puexa pejjiw sʉapich, fʉlaechlisi Egipto tʉajnʉ poxade. Xabich bʉꞌfolbejpi pejew choef. Japibej xafol puexa pejew, faekpoxan Canaán tʉajnʉxot duil wʉt. 7 Jacob puexa pejjiw bʉꞌfolon. Bʉꞌfolon paxi, japi pejwathoꞌbej. Bʉꞌfolbejpon pamojiw.

8 Ampilap fʉlaech Egipto tʉajnʉ poxade. Puexa japilap Jacob paxi, japon pamojiwbej. Malap japi pejwʉlan.

Jacob paxʉlan, matxoelapijin, pawʉl Rubén. 9 Japonlap pawʉl Rubén. Rubén paxʉlan matxoelapijin pawʉl Hanoc. Asan pawʉl Falú. Asan pawʉl Hezrón. Asan pawʉl Carmí.

10 Asan, Jacob paxʉlan, pawʉl Simeón. Japon paxilap ampilape. Matxoelapijin pawʉl Jemuel. Asan pawʉl Jamín. Asan pawʉl Ohad. Asan pawʉl Jaquín. Asan pawʉl Zohar. Asan pawʉl Saúl. Japon nalaeltpon cananea-atowxot.

11 Asan Jacob paxʉlan pawʉl Leví. Japon paxi ampilape. Matxoelapijin pawʉl Gersón. Asan pawʉl Coat. Asan pawʉl Merari.

12 Asan Jacob paxʉlan pawʉl Judá. Japon paxi ampilape. Matxoelapijin pawʉl Er. Asan pawʉl Onán. Asan pawʉl Sela. Asan pawʉl Fares. Asan pawʉl Zara. Er, Onánbej, japilap Canaán tʉajnʉxot tʉp. Ampilape Fares paxi. Matxoelapijin pawʉl Hezrón. Asan pawʉl Hamul.

13 Jacob paxʉlan asan pawʉl Isacar. Japon paxi ampilape. Matxoelapijin pawʉl Tola. Asan pawʉl Fúa. Asan pawʉl Job. Asan pawʉl Simeón.

14 Jacob paxʉlan asan pawʉl Zabulón. Japon paxi ampilape. Matxoelapijin pawʉl Sered. Asan pawʉl Elón. Asan pawʉl Jahleel.

15 Japilap Jacob paxi, seis poejiw, nalaelapi Leaxot. Kaen pawʉl, Rubén, asan pawʉl Simeón, asan pawʉl Leví, asan pawʉl Judá, asan pawʉl Isacar, asan pawʉl Zabulón, nalaelapi, Jacob duk wʉt Padan-aram tʉajnʉxot. Lea paxʉlowbej, pawʉlow Dina, nalaeltow japatʉajnʉxot. Puexa Jacob paxi, japilap Lea paxi, puexa xajʉs wʉt, japi pamojiwbej, nakolti treinta y tres jiw.

16 Jacob paxʉlan asan, pawʉl Gad. Japon paxi ampilape. Matxoelapijin pawʉl Zifión. Asan pawʉl Hagui. Asan pawʉl Ezbón. Asan pawʉl Suni. Asan pawʉl Eri. Asan pawʉl Arodi. Asan pawʉl Areli.

17 Asan Jacob paxʉlan, pawʉl Aser. Japon paxi ampilape Aser paxi. Matxoelapijin pawʉl Imna. Asan pawʉl Isúa. Asan pawʉl Isúi. Asan pawʉl Bería. Japi pakoewow pawʉl Sera. Japon paxi ampilape. Matxoelapijin pawʉl Heber. Asan pawʉl Malquiel.

18 Gad, Aser sʉapich, japi kolenje, Zilpa paxilap, nalaelapi Jacob paxiliajwa. Zilpa, japow esclava-atow, Labán chaxdutpow paxʉlow Lea, japow pej-esclavaliajwa. Puexa Jacob paxi, japilap Zilpa paxi, xajʉs wʉt, japi pamojiwbej, puexa nakolti dieciseis jiw.

19 Jacob pijow, Raquel, japowlap kolenje paxʉlan. Matxoelapijin pawʉl José. Asan pawʉl Benjamín. 20 Egipto tʉajnʉxotlap José kolenpon paxʉlan pijowxot. Japow pawʉl Asenat. Josés kolenjepon paxʉlan. Matxoelapijin pawʉl Manasés. Asan pawʉl Efraín. Asenat pax pawʉl Potifera. Japonlap sacerdote On paklowaxxot. 21 Benjamín paxi. Ampilape, matxoelapijin pawʉl Bela. Asan pawʉl Bequer. Asan pawʉl Asbel. Asan pawʉl Gera. Asan pawʉl Naamán. Asan pawʉl Ehi. Asan pawʉl Ros. Asan pawʉl Mupim. Asan pawʉl Hupim. Asan pawʉl Ard. 22 José, Benjamín sʉapich, japi kolenjelap, Raquel paxi, nalaelapi Jacob paxiliajwa. Puexa Jacob paxi, japibej Raquel paxi, xajʉs wʉt, japi pamojiw sʉapich, nakolti puexa catorce jiw.

23 Jacob paxʉlan asan pawʉl Dan. Dan paxʉlan pawʉl Husim.

24 Jacob paxʉlan asan awʉl Neftalí. Japon paxi ampilape. Matxoelapijin pawʉl Jahzeel. Asan pawʉl Guni. Asan pawʉl Jezer. Asan pawʉl Silem.

25 Dan, Neftalí sʉapich, japi kolenjelap, Bilha paxi, japilap-is Jacob paxi. Bilha, japow esclava-atow, Labán chaxdutpow paxʉlow Raquelliajwa. Puexa Jacob paxi, japibej Bilha paxi, xajʉs wʉti, japi pamojiw sʉapich, nakolti puexa siete jiw.

26 Puexa jiw pati, Jacob sʉapich, Egipto tʉajnʉxot, japi pejjiwkal, japi puexa xajʉs wʉt, nakolti sesenta y seis jiw. Xajui-esal Jacob pafamjiwwathoꞌ. 27 José paxi, nalaelapi Egipto tʉajnʉxot, japi kolenje. Xajʉs wʉti, José sʉapich, pax sʉapichbej, jawʉt, puexa nakolti setenta jiw.

28-29 Jacob mox wʉt pasliajwa Gosénxot, Egipto tʉajnʉxot, jawʉt toꞌapon paxʉlan Judá, Gosénxot José bʉꞌkakʉlnaliajwa pax Jacob. Jacob, pejjiw sʉapich, pat wʉt Gosénxot, José toꞌa pamakan pejcarro chaemsliajwa chaflaeliajwa pax poxade, chiekal bʉꞌkakʉlnaliajwapon pax, asewbej. Do jawʉt, pat wʉton paxxot, José wʉjaelt pax. Jawʉt, José piach nowpon pax wʉtakʉksaxtat. 30 Do jawʉt, Jacob jʉm-aech ampox paxʉlan Joséxot:

—Ma amwʉt, pachaem xan tʉpaliajwan, xan tajut chiekal xam taenx xot —aech Jacob Joséxot.

31 Jawʉt, José jʉm-aech mpox pakoewliajwa, pax pejjiwliajwabej:

—Xan faraón taeyaxaelen japon jʉmchiliajwan ampox: ‘Taj-ax, pejjiw sʉapich, takoew sʉapichbej, japi chajia duili Canaán tʉajnʉxot, patlisi Gosénxot, duilaliajwa mox xanxot. 32 Bʉflaeni pejew choef. Puexa pejew xalaenbejpi. Japi pejbichax choef thinax’ —chiyaxaelen tajpaklon faraónxot. 33-34 Do jawʉt, faraón xamal la wʉt fʉlaeliajwam japon poxade, jaxot xamal wʉajnachaemt wʉt, jʉmchiyaxaelam ampox: ‘¿Achabichaxkat xamal nabistam?’ —aech wʉton, xamal jʉmchiyaxaelam ampox: ‘Xanal tajbichax choef thinax. Me-ama tajwʉajnapijiw, ja-an xanal’ —chiyaxaelam. Japox jʉm-am wʉt, faraón xamal toꞌaxael duilaliajwam Gosén pawʉlxot, jaxot xabich pachaem choef thinaliajwam —aech José chanaekabʉana wʉt pejjiw.

José japox jʉm-aech, matabijt xoton Egipto tʉajnʉpijiw fiach, oveja thinpi sʉapich, duilalaliajwa.