—¡Ampi jiw pejkostalan wewʉluim trigo xalaeliajwa japi xajʉpoxtat! ¡Kaenanʉla pejbulankaechanxot pejplatafachan jembej! 2 Tajcopa, isaspox platatat, ¡japoxbej jem taxdukapijin pejtrigobultkaechaxot! ¡Jembej japon pejew, platafachan, japon motpitat trigo! —aech José toꞌa wʉton pamakan.

Dolis José pamakan ow-aechon José kitoꞌaspox. 3 Kandiawasʉp, itliakafʉl wʉt, José kijacha pakoew jaxot chijialiajwa. Dolis japi pejburtat xafoli trigobulan. 4 José pakoew jaxot chijia wʉt, xabich atʉaja-el wʉtfʉki paklowaxxot, José toꞌa wʉt pamakan, jʉm-aechon ampox:

—¡Xabʉaꞌde japi poejiw kawʉxanjaesliajwam. Fʉlpatam wʉt, ¡jʉm-amopi ampox: ‘¿Ma-aech xotkat xamal isam pachaema-elpox tajpaklonliajwa, japon is wʉt pachaempox xamalliajwa? ¿Ma-aech xotkat natkowam tajpaklon pejcopa, isaspox platatat? 5 Tajpaklon japacopa jixa-af. Japacopatatbej xabich tampoelpox matabijsliajwa. Xamal babijax isam tajpaklonliajwa’ —amo japi poejiw! —aech José toꞌa wʉt pamakan.

6 Dolison fʉlpat wʉt japi poejiw, José pamakan jʉm-aechon ampox José bʉxtoꞌaspox japiliajwa. 7 José pamakan japox jʉm-aech wʉt japiliajwa, jawʉtbej, japi jʉm-aech ampox:

—¿Ma-aech xotkat xam japox jʉm-am xanalliajwa? ¡Chinax xanal japox isaxinil, me-ama japox! 8 Xam chiekal matabijtam xanal pejme xalaenxpox platafachan Canaán tʉajnʉxot, faekxpi tajbulanxot, pejme woeyaliajwan xamxot. ¿Ma-aech xotkat nakilajatam xanal copa fisax, nejpaklon pijax? 9 Xanalxot copa fit wʉt, ¡japon nej tʉpe! Xanalbej malech tanbichaxaelen pomatkoicha nejpaklonliajwa, copa faenam wʉt xanalxot —aechi, jʉmnot wʉti José pamakanliajwa.

10 Do jawʉt, José pamakan jʉm-aechon ampox japiliajwa:

—Xamal najut jʉm-ampox xabich pachaem. Pe copa fitponkal, japonkal esclavowaxael nabichliajwa tajpaklonliajwa. Puexa xamal, asewam, bʉꞌwʉajanjilaxaelam —aech José pamakan.

11 Do jawʉt, kaenanʉla japi kamta pejtrigobulan joli pejburxotsik cha-eliajwa sattat. Satat cha-ia wʉt, fafajoli pejtrigobulan. 12 Do jawʉt, José pamakan tʉaduton tuchoeflaliajwa trigobulan, pejpaklon pejcopa jalwekaliajwa. Tʉaduton tuchoeliajwa matxoelapijin pejbultxot. Faena-el wʉt, tʉaduton tuchoeliajwa asan pejbultxot. Puexa ja-aechfʉlon, japi pejbulanxot tuchoefʉl wʉt. Do jawʉt, taxdukapijin Benjamín pejbultxot tuchowpon. Benjamín pejbultxot tuchow wʉt, faenon pejpaklon pejcopa isaspox platatat. 13 Jawʉt, Benjamín pakoew thiaꞌbapi pejnaxoe, xabich nejxaejwas xoti. Do jawʉt, kaenanʉla matakʉpi bur pejtrigobulan. Ja-aech wʉt, kaxadepi paklowax poxade. 14 Judá, pakoew sʉapich, pat wʉti José pejbaxot, José kawetafʉk pejbaxot. Jawʉt, japi pejbrixtat nuil sat makxabijkaliajwa José wʉajnalel. 15 Do jawʉt, José jʉm-aechi ampox:

—¿Ma-aech xotkat tajcopa nawenatkowam? ¿Xamalkat matabijs-emil kaen aton, me-ama xan jason, xajʉpon matabijsliajwa jiw maliach ispoxanliajwa? —aech José pakoewliajwa.

16 Judá jʉmnot wʉt, jʉm-aechon ampox Joséxot:

—¿Achaxkat xanal jʉmnosaxaelen xam? ¿Achaxtatkat xanal itpaeyaxaelen bʉꞌwʉajanxinilpox xamxot? Dioskas xanal nakastika, babijax isx xot chajiakolaxtat. Samata, ma amwʉt, xanal puexa malech nabichaxaelen xamliajwa, copa fitpon sʉapich —aech Judá naksiya wʉt pakoewan Joséxot.

17 Pe José jʉmnot wʉt, jʉm-aechon ampox pakoewliajwa:

—¡El! Xan jasox isaxinil xamalliajwa. Tajcopa fitpon, japon kaen taj-esclavowaxael nabichliajwa xanliajwa. Xamal, asewam, nejmach chiekal jʉmch naweyaxaelam nej-ax pejba poxade. Chinax kaen aton xamal taliasaxil, amxot chijiam wʉt —aech José pakoewliajwa.

18 Do jawʉt, Judá mox soepan wʉt, Joséxot jʉm-aechon ampox Joséxot:

—Tajpaklon, ¡xan natapaem naksiyaliajwan xam najut chiekal jʉmtaeliajwam! ¡Nabej nalaleꞌ xanliajwa! Xamlap-is, me-ama pajut faraón wʉt, ja-amlap-is xam. 19 Xam chajia chiekal nawʉajnachaemtam taj-ax laejepoxliajwa. Nawʉajnachaemtambej asan kaes takoewanpoxliajwa. 20 Japoxan xanal nawʉajnachaemtam wʉt, puexa chiekal chapaeix xamxot. Jʉm-an ampox: ‘Diasdoꞌ, xanal taj-ax xabich patiꞌin. Pe nakiowa, japon laejefʉk. Asan takoewan, kaes pajamanpon, kaweta naman taj-axxot. Japon pansian. Japon takoewan nalaelt, taj-ax patiꞌin wʉt’ —an xanal. Jʉm-anbej ampox: ‘Taj-ax xabich pasiawla paxʉlan, japonlap chiekal kaekolan naman xot, kae-enpijin. Japon pakoewan, matxoelpijin, chajia tʉp’ —an xanal xamliajwa. 21 Xam nawʉljowam japon bʉflaeliajwan ampaleldin, xabich taesiam xot. 22 Xanal chajia chiekal xam jʉm-an ampox xamxot: ‘Taj-ax tapaeyaxil paxʉlan ampalel fʉlaeliajwa. Asax babijax ja-aech wʉt, japonliajwa, taj-ax tʉpaxael paxʉlan xabich nejxaejwaxtat’ —an xanal chajia xamxot. 23 Pe xam jʉmbisnikam wʉt najʉm-am ampox xanalliajwa: ‘Nakoewan bʉflae-emil wʉt, ¡nabej fʉlaeꞌ ampaleldin xan pejme nataeliajwam!’ —am xam xanalliajwa —aech Judá Joséxot.

24 Judá kaes naksiya wʉt jʉm-aechon ampox Joséxot:

—Xanal nawiax wʉt tajtʉajnʉ poxade, puexa japoxan taj-ax chapaeix xam najʉm-ampoxan. 25 Do pejme, taj-ax natoꞌa wʉt, jʉm-aechon ampox xanalliajwa: ‘¡Xabʉaꞌde pejme Egipto tʉajnʉ poxade, kaesʉapich trigo wʉajsliajwam!’ —aech taj-ax natoꞌa wʉt xanal. 26 Pe jawʉt, xanal jʉm-an ampox taj-axliajwa: ‘Takoewan, taxdukapijin, nakfʉlaeyaxil wʉt Egipto tʉajnʉ poxade, xanal pejme fʉlaeyaxinil japoxade. Takoewan nakfʉlae-el wʉt xanal, Egipto tʉajnʉpijin, paklon, xanal pejme taeyaxinil’ —an xanal taj-axliajwa. 27 Do jawʉt, taj-ax jʉm-aech ampox xanalliajwa: ‘Xamal matabijtam xan xabich patiꞌnan wʉt, tajow Raquel kolenje paxʉlan. 28 Kaen japixot chajia chiekal nafoꞌa. Chinax kaes pejme japon tae-enil. Diachwʉajnakolax xaeskason pejmachoefan. 29 Xamal ampon taxʉlan xanxot nawebʉꞌfolam wʉt, asax babijax wejachiyaxaes wʉt, xamal pomatkoicha nejbʉꞌwʉajnaxael, xan patiꞌnan tʉpaxaelen wʉt nejxaejwaxtat’ —aech taj-ax —aech Judá Joséxot.

30-31 Judá kaes jʉm-aech ampox pakoewan Joséliajwa:

—Tajpaklon, xanal nawiax wʉt tajtʉajnʉ poxade, takoewan pansian pas-el wʉt taj-axxot, ja-aech wʉt, taj-ax tʉpaxael takoewan nejxaejwaxtat. Taj-ax xabich pasiawla takoewan. Ja-aech wʉtbej, xanal pomatkoicha tajbʉꞌwʉajnaxael, taj-ax nawetʉp wʉt nejxaejwaxtat. 32 Ampaleldin fʉlaeliajwan wʉt, xan taj-ax jʉm-an ampox: ‘Xan tajut chiekal tataeflaxaelen takoewan taxdukapijin’ —an xan. Taj-ax kaes jʉm-anbej ampox: ‘Wias-enil wʉt naxʉlan xamxot, pomatkoicha tajbʉꞌwʉajnaxaelen xamliajwa’ —an taj-ax. 33 Xan nawoesa namanalax amxot, nej-esclavoliajwan takoewanliajwa. ¡Japon tapaem nawiasliajwa, asew takoew sʉapich! 34 Xan nawiasaxinil taj-ax poxade, takoewan, taxdukapijin, nawias-el wʉt, xan sʉapich. Xanliajwa pachaema-el taeliajwan taj-ax nejxaejwas wʉt nabijasaxaelpoxliajwa, takoewan, taxdukapijin, pas-el wʉt japonxot —aech Judá naksiya wʉt pakoewan Joséxot.