Do jawʉt, faraón nathikton. 5 Do, jawʉtpejme moejt wʉt, asax xamoejton. Taenpon kaetrigotot. Japatrigototxot siete trigo naboetsin, xabich babaetonanpi. Japowan xabich chamia. Xabich pachaembejpi. 6 Japatrigotathintxotsin asatrigotot naboelsan. Japatotxotbej siete trigobabaetanpi naboet. Pe japi trigo jʉmch chiekal pabok. Trigo, pabokpi, pa-ael selnaspi joewa pejpatʉajaxtat, wikdanpox pajilaxleldin 7 Jawʉt, pachaempi, trigobabaetonanpi, pa-ael xaespi chaemilpi. Japoxlap faraón xamoejt, moejt wʉt.

Do jawʉt, faraón nathikt wʉt, pajut chiekal matabijton japox xamoejtpox. 8 Pe kandiawasap wʉt, xabich nejchaxoelon. Samata, faraón jʉmxatoꞌa matabijtpi fʉlaeliajwadin, pinjoeꞌiwbej, Egipto tʉajnʉpijiw. Puexa japi chiekal pat wʉt faraónxot, faraón chapaeipox xamoejtpoxan japixot. Pe japixot, chapaeispox chinax kaen japixot chinax matabijs-el achax chiyaxael faraón xamoejtpoxan. 9 Do jawʉt, vinomin xananʉamtpon faraónliajwa, jawʉt jʉm-aechon ampox faraónxot:

—Ma amwʉt, xan chiekal nejchafaetx is-enilpox aton nawʉljowpox. 10 Chajia xam nalala wʉt xanliajwa, pan isanliajwabej, xam toꞌam nejsoldaw xanal najeliajwa jiw jebaxot. 11 Do jawʉx, jiw jebaxotan wʉt, baxael, asamatkoi, kaenanʉla xanal kaemadoitat xamoejtax. Kaenanʉla xanal xamoejtaxpoxan, achax chiyaxael. 12 Jiw jebaxot, xanal sʉapich, kaen pansianbej jaxot jias, japonlap hebreo-aton. Japon pansian, soldawcapitán pej-esclavo. Japi soldaw, xam taxchalapi. Kaenanʉla xanal chapaeix xamoejtaxpoxan japon pansian, hebreo-atonxot. Do jawʉt, japoxan chapaeix wʉt, japon chiekal xanal kaenanʉla nachanaekabʉana jachiyaxael xanal xamoejtaxpoxan. 13 Do jawʉx, puexa japoxan chiekal ja-aechlisox, me-ama japon chawʉajnajʉm-aech xanal kaenanʉla japox jachiliajwa. Me-ama japon jʉm-aech, xan pejme nabichaxaelenpox, diachwʉajnakolax xan pejme nabistax. Me-ama pan isanliajwa chawʉajnajʉm-aechon kachariamakeꞌsaxaespox mʉatat, diachwʉajnakolax japonliajwa japox chiekal ja-echlisox. Naetat patʉpan dukjaklison.

14 Do jawʉt, kamta faraón pamak toꞌa José wʉljaesliajwas jiw jebaxot. Juch wʉt, taxlalikaspon. Asax xajoesbejpon. Do jawʉt, José bʉflaenslison faraón poxadin. 15 José bʉꞌpaꞌnas wʉt faraónxot, faraón chapaei xamoejtpoxan Joséxot:

—Xanlap xamoejtax ampoxan. Pe chinax kaen aton amxotpijin chinax matabijs-el nachanaekabʉanaliajwa achax chiyaxaelpox xan xamoejtaxpoxan. Xamliajwa jʉmtaenx xajʉpampox jiw xamoejtpoxan chiekal chanaekabʉanaliajwam achax chiyaxael xan xamoejtaxpox —aech faraón chapaei wʉt Joséxot.

16 José jʉmnot wʉt, jʉm-aechon ampox faraónxot:

—Xan tajut tajaxtat matabijsaxil xam xamoejtampoxan chiekal chanaekabʉanaliajwan. Pe kaen Dios chiekal chanaekabʉanaxael xam xamoejtampoxan xamliajwa chiekal pachaemaliajwa —aech José faraónxot.

17 Do jawʉt, faraón chapaei wʉt jʉm-aechon ampox Joséxot:

—Xan ta-ael nukx Nilonawelbabʉꞌxot. 18 Japanawelxotsan siete pak julan pʉtasin. Japi pak xabich chamia. Xabich dalbejpi. Japi pak tʉadut pola matxaelpaliajwa papʉtat. 19 Japi pak pejwachakalxotsin asew siete pak julan pʉtasin nawelxotsin. Japi pak xabich chaemil. Xabich jiapbejpi. Xan chinax jasi pak, tae-enil Egipto tʉajnʉxot. 20 Do jawʉt, pak xabich dalpi xaespi. Pak xabich jiappilap xael, pak xabich dalpi 21 Diachwʉajnakolax pak xabich dalpi xaespi. Pe chinax aton matabijsaxil, japi pak xabich jiap xoti. Me-ama xae-el wʉt, ja-aech japi pak xabich jiapi. Japoxlap xan xamoejtax.

Jawʉt, nathiktax wʉt, xabich nejchaxoelx japoxliajwa. 22 Do pejme moejtax wʉt, asax pejme xamoejtax. Xamoejtax trigotot. Japatrigototxot siete trigo xabich babaetonan. Japowan xabich chamia. Xabich pachaembejpi. 23 Japatathintxotsin asatot naboelsin. Japatrigototxot siete trigo xabich babaetonanbej. Pe japitrigo papowan wʉt, jʉmch chiekal pabokkal. Japatrigoton pa-ael selnaspi, jiwjilaxlel joewa wikpox pejpatʉajaxtat. 24 Jawʉt, pachaempi, trigo xabich babaetonanpi, xaes trigo chaemilpi. Jasox taenx, xamoejtax wʉt. Japoxan chapaeix wʉt matabijtpixot, pinjoeꞌiwxotbej, chinax kaen japixot matabijs-el xan xamoejtaxpoxan, achax chiyaxael japoxan —aech faraón chapaei wʉton xamoejpoxan Joséxot.

25 Do jawʉt, José chapaei wʉt, jʉm-aechon ampox faraónxot:

—Tajpaklon, koloeyax xam xamoejtampox japox chiekal najʉp. Dios japox itpaei xamxot asamatkoi jachiyaxaelpox nejtʉajnʉxot. 26 Siete pak xabich dalpi, xam xamoejtam wʉt taenampi, japoxlap siete waechanch. Najʉpbej siete trigo xabich babaetonanpi, xam xamoejtam wʉt taenampi, pachaempi, japoxlap-is siete waechan. Japox koloeyax, xam xamoejtampoxan, chiekal najʉp. 27 Siete pak, xam xamoejtampi, xabich jiapi, julan wʉti pʉt pak xabich dalpi pejwachakalxotsin, japoxlap-is siete waechan. Siete trigo xabich babaetonanpi, xam xamoejtam wʉt taenampi, selnas wʉti joewa pejpatʉajaxtat, japoxanlap siete waechan. Taxdukasietewaechan wʉt, jawʉt, xabich naxaeyaxan ijilaxael ampatʉajnʉxot. 28 Me-ama xan jʉm-an, japoxlap diachwʉajnakolax jachiyaxael. Dios japox xam itpaei asamatkoi jachiyaxaelpox. 29 Siete waechan xabichaxael naxaeyaxan Egipto tʉajnʉxot. 30-31 Do jawʉx, siete waechan xabich naxaeyaxan ijilaxael Egipto tʉajnʉxot. Ja-aech wʉt, puexa jiw nejkiowaxael, siete waechan xabich wʉt naxaeyaxan Egipto tʉajnʉxot. Naxaeyaxan ijil wʉt, xabich chaemilaxael Egipto tʉajnʉxot.

32 Tajpaklon, xam xamoejtampoxan, japoxan chiekal najʉp. Dios japoxan xam itpaei, asamatkoi diachwʉajnakolax japoxlap Dios isaxael xot. Xabich piachaxillejen japox jachiliajwa.

33 “Samata, ma amwʉt, ¡aton makafisaxaelam, matabijtpon chiekal nejchaxoelponbej, japon aton puexa jiw tatoꞌlaliajwa, jiw tataeflaliajwabejpon ampatʉajnʉpijiw! 34 Tajpaklon, ¡makanosaxaelam gobernadores, japi nabichliajwa xamliajwa! Egipto tʉajnʉxot xabich wʉt naxaeyaxan siete waechan, japi fʉlaeyaxael potʉajnʉcha Egipto tʉajnʉxot chanosliajwa trigobulan. Cinco bulan wʉt, kaebult cha-osaxael cha-owaliajwa. Diez bulan wʉt, kolebult cha-owaxaeli, cha-owaliajwa. 35 Japilap cha-owaxael trigobulan siete waechantat. Japabulan pejlel namakjiw tataeflaxael. Japi trigobulan tataeflaxael popaklowaxanxot, asamatkoi naxaeyaxan ijil wʉt jiw xaeliajwa. 36 Jasoxtat trigo cha-owaxaeli Egipto tʉajnʉpijiwliajwa, pejlit tʉpa-elaliajwa, asamatkoi naxaeyaxan chiekal ijil wʉt siete waechantat” —aech José faraónxot.

37 José jʉm-aechpox faraónliajwa xabich pachaemspox. Ma-is faraón pejpaklochiwliajwa, japox xabich pachaem. 38 Samata, faraón jʉm-aech ampox pejpaklochiwliajwa:

—Diachwʉajnakolax aton ijil, me-ama ampon aton, jason. Dios pomatkoicha japonxotpon. Samata, pachaem japabichaxliajwa —aech faraón pejpaklochiwxot Joséliajwa.

39 Do jawʉt, faraón jʉm-aech ampox Joséliajwa:

—Egipto tʉajnʉxot, me-ama xam, jason aton ijil, xabich matabijtpon. Dios pijaxtat xam xabich matabijtam naxaeyaxan ijilaxaelpox Egipto tʉajnʉxot. 40 Samata, ma amwʉt xam makafitx puexa tataeflaliajwam ampatʉajnʉxot. Puexa ampatʉajnʉpijiw xam chiekal naexasisaxael, xam tatoꞌlam wʉt japi jiw. Xan kaenan kaes pejme paklokolnan. Me-ama xam jachi-enil, reynan xot. 41-42 ¡Xam chiekal naeweꞌe! Xam makafitx gobernadorliajwa, kaes pejme paklonaliajwam puexa ampatʉajnʉxot —aech faraón Joséliajwa.

Faraón japox jʉm-aech wʉt, anillo pejkothiyapijax kuton. Japox anillo, sellopijax, rey pijax. Japox anillo kothiyaxajoelon, José pejkothiyaxot. Do jawʉx, faraón pamakjiw kitoꞌa José xajoelaliajwas xabich chamoyaxpox. Chaxduchbejpon cadenamʉat, orotat isaspox, wʉchajilaliajwa. 43 Do jawʉx, faraón toꞌa José julaliajwa carrozaxot. Japacarroza faraón jifʉlchafospox, asalel fol wʉt pejcarrozatat. Faraón toꞌabej soldaw nejlasfʉlaliajwa José chaflaeyaxael poxade: “¡Napoeyam asalelaxach paklon xensliajwa!” —chiliajwapi, nejlasfʉl wʉt. Jasoxtat José makafich gobernadorliajwa, kaes pejme paklonaliajwa Egipto tʉajnʉxot.

44 Do jawʉx, faraón jʉm-aech ampox Joséliajwa:

—Xan reynan puexa ampatʉajnʉpijiwliajwa. Pe, xam tapae-emil wʉt, chinax kaen aton Egipto tʉajnʉpijin isaxil isasiapox —aech faraón Joséxot.

45-46 Jawʉt, faraón asawʉltat wʉlduwpon José, Zafnat-paneawʉltat, Egipto tʉajnʉpijiw pejwʉltat. Do jawʉt, José kiduchpon pawis. Japow pawʉl Asenat. Japow Egipto tʉajnʉpijow. Pax pawʉl Potifera. Potiferalap sacerdote-aton On paklowaxxot. José treinta waechan wʉt, juchpon jiw jebaxot bʉflaeliajwas faraón wʉajnalel.

Japamatkoitat, José tʉadut faraón tanbichliajwa. Jawʉx José nakolt faraón dukxot, tataeflaliajwa potʉajnʉcha, Egipto tʉajnʉ. 47 Japatʉajnʉxot xabich naxaeyaxan naboet siete waechantat. 48 José, asew gobernadores sʉapich, potʉajnʉcha tamejapi trigobulan siete waechantat. Japi cha-owafʉl trigobulan paklowaxanxot, mox trigolulanxot. 49 José cha-owafʉl wʉt trigobulan, xabich xot, xajʉpa-elon xajuiliajwa, trigobulan, me-ama thaejfu marbabʉꞌtat xabich wʉt, ja-aech xot trigobulan.

50 Naxaeyaxjilax wʉajna, José kolenje paxʉlan pijow Asenatxot. 51 José wʉlduw paxʉlan, matxoelapijin, Manaséswʉltat, nejchaxoel wʉt, jʉm-aech xoton ampox: “Dios nakajachawaet kaes nejchaxoela-elaliajwan majt nabijataxpoxan, puexa tajjiwbej, Canaán tʉajnʉpijiw” —aech xot José, nejchaxoel wʉt. 52 José wʉlduw paxʉlan, wachakalpijin, Efraínwʉltat, nejchaxoel wʉt, jʉm-aech xoton ampox: “Dios nakajachawaet tejew yaxiliajwa nabijataxtʉajnʉxot” —aech xot José, nejchaxoel wʉt.

53-54 Siete waechan toep wʉt, xabich wʉt naxaeyaxan Egipto tʉajnʉxot, do jawʉx tʉadut siete waechan naxaeyaxan ijilaliajwa. Me-ama José chajia chawʉajnajʉm-aech naxaeyaxan ijilaxaelpoxliajwa, japox chiekal ja-aechlisox. Potʉajnʉchan naxaeyaxan xabich ijil. Samata, jiw xabich litaxaela. Pelax, Egipto tʉajnʉxot naxaeyaxan, José cha-owafʉlpi. Samata, japatʉajnʉpijiwlax litaxaela-el. 55 Do baxael, Egipto tʉajnʉpijiw litaxaela wʉt, naxaeyaxan wʉljowpi faraónxot. Jawʉt, faraón jʉm-aech Egipto tʉajnʉpijiwliajwa:

—¡Xamal xabʉaꞌde José poxade! ¡Japon jʉm-aechpox ow-amde trigoliajwa! —aech faraón.

56 Potʉajnʉcha Egipto tʉajnʉpijiw litaxaela wʉt, jawʉt José toꞌa gobernadores mowaliajwa trigobulan Egipto tʉajnʉpijiwliajwa. Kaewaechfʉl naxaeyaxan chiekal ijilafʉl wʉt, jiw xabich kaes litaxaelafʉl. 57 Asatʉajnʉchanpijiwbej fʉlaeni Egipto tʉajnʉ poxadin wʉajsliajwa trigo Joséxot. Japi pejtʉajnʉchanxot naxaeyaxan xabich ijilxotbej japi xaeliajwa.