5 Asamatkoi, japi kolenje kaemadoitat xamoejti. Japi kaenanʉla xamoejtpoxan, najʉpa-el. 6 Do kandiawasap, José fʉlaen wʉt japi taeliajwa, jawʉt taenpon japi nejchaemilpox. 7 Jawʉt, José wʉajnachaemt wʉt, jʉm-aechon ampox japi:

—¿Ma-aech xotkat xamal xabich nejchaemilam amwʉtjel? ¡Xamal jijachi-emil! —aech José, japi wʉajnachaemt wʉt.

8 Japi jʉmnot wʉt, jʉm-aechi ampox:

—Xanal xamoejtaxpox chiekal. Matabijsasian achax chiyaxael xanal xamoejtaxpoxan. Pe amxot aton, matabijsan, ijil xanal chiekal nachanaekabʉanaliajwa xamoejtaxpoxan —aechi Joséxot.

Do jawʉt, José chapaeispox jʉmtaen wʉt jʉm-aechon ampox japi kolenjeliajwa:

—Dios kaen xajʉp japon pijaxtat chiekal chanaekabʉanaxaelen xamal xamoejtampoxan achax chiyaxaelpox. ¡Xan nachapaem xamal xamoejtampoxan! —aech José japi kolenjeliajwa.

9-10 Do jawʉt, vinomin xalwʉajxananʉamtpon faraónliajwa, japonlap majt chapaei xamoejpox Joséxot. Do jawʉt, jʉm-aechon ampox:

—Xan xamoejtax wʉt, taenx uvanaech. Japa-uvanaech tresdaltje. Ʉafnakola wʉt, pa-ael natalabejpox. Do jawʉx, uvadunan naboet wʉt, foeilisi. 11 Xan ta-ael xanukx faraón pejcopa. Ta-ael asake-elel uvadun saeꞌkax copa wʉlʉsliajwan. Do jawʉt, ta-ael tajut xan chaxdutx faraón —aechon chapaei wʉt Joséxot.

12 Do jawʉt, Dios kamta kajachawaet José chiekal matabijsliajwa japi xamoejtpoxan, achax chiyaxael kaenanʉla japox. José jʉm-aech ampox vinomin xalwʉajxananʉamtpon faraónliajwa:

—Xam xamoejtampox tresdalt, japoxlap jʉmchiyaxael ampox: ‘Tres matkoi’ —chiyaxaelpox. 13 Tres matkoi wʉt, faraón toꞌaxael pejsoldaw xam wʉljaesliajwa, xam pejme vinomin xalwʉajxananʉamsliajwam faraónliajwa. Me-ama majt wʉt, nabijstam jachiyaxaelam. 14 Xam pejme nabistam wʉt, ¡naksiyaxaelam faraónxot, japon xan najusliajwa amxot! ¡Nejkiowaximil xanliajwa! 15 Chajia xan najaelt wʉti, asew jiw nabʉꞌfol tajtʉajnʉxot, hebreos tʉajnʉxot, ampalel nabʉflaeliajwa. Xan jiw jebaxot nejeliajwa babijax is-enil —aech José bʉxtoꞌa wʉt vinomin xalwʉajxananʉamtpon faraónliajwa.

16 Do jawʉt, paklon, japi pan ispi faraónliajwa, jʉmtaen wʉt vinomint xalwʉajxananʉamtpon pejme nabichaxaelpox faraónliajwa, jawʉt pan isanpon chapaeipon xamoejtpox Joséxot. Jawʉt, japon chapaei wʉt jʉm-aechon ampox Joséxot:

—Xanlap xamoejtax ampox. Ta-ael taꞌetx tres canasta, pancanasta. Japipan papoei. 17 Matxoela pejcanastaxotse nejmachpan oel faraónliajwa. Pe canastaxot mia pat, japi pan xaeliajwas —aech pan isan, chapaei wʉton xamoejtpox Joséxot.

18 Do jawʉt, José jʉmnot wʉt, jʉm-aechon ampox pan isanliajwa:

—Xam xamoejtampox tres canasta, japox jʉmchiyaxael ampox: ‘Tres matkoi’ —chiyaxaelpox. 19 Tres matkoi wʉt, faraón toꞌaxael pejsoldaw xam wʉljaesliajwa. Japon xam kastikaxael. Jawʉt, faraón kitoꞌaxael pejsoldaw xam kachiriamakeꞌsliajwa mʉatat, naexotsik dukjaliajwamsik patʉpanam. Jasoxtat xam tʉpaxaelam. Do jawʉx, thʉthan pasaxael xam patʉpanam xaeliajwa —aech José pan isanliajwa.

20 Do jawʉx, tres matkoi wʉt, faraón pejcumpleañosfiesta ispon. Japafiesta wʉt faraón tadʉt puexa pejpaklochiw, japi nabistpi faraónliajwa. Japi pat wʉt fiestaxot, japi wʉajnalel faraón toꞌa kolenje jiw jebaxot jiaspi bʉflaeliajwas japonlel. 21 Bʉflaens wʉton, faraón toꞌa vinomin xalwʉajxananʉamtpon pejme nabichliajwa pejbichax. Samata, pejme xalwʉajxananʉamtpon vinomin faraónliajwa. Me-ama majt, ja-aechon. 22 Pe pan isan faraón toꞌa kachariamakeꞌsliajwas mʉatat naexotsik patʉpan dukjaliajwasik, me-ama José chajia jʉm-aech, japox jachiliajwa. 23 Pe xalwʉajxananʉamtpon vinomin faraónliajwa, japon jʉmch chiekal nejkiowpon Joséliajwa. Chinax nejchafaes-elon José jʉm-aechpox.