José nabistpox Potifar pejbaxot
39
Ismael pamojiw José bʉꞌfol wʉt Egipto tʉajnʉ poxade, jawʉt mowapi José Potifarxot. Potifar, Egipto tʉajnʉpijin, nabistpon faraónliajwa. Japonbej soldawcapitán, faraón chalapi. 2 Pe José chalas Dios. Samata, xabich wepachaemspon, nabist wʉt Potifar pejbaxot. Josélap esclavo Potifarliajwa. 3 Potifar pajut chiekal matabijt, José chalas xot Dios, puexa José ispoxan chiekal pachaem. 4 Potifar xabich nejchachaemil Joséliajwa. Samata, Potifar wʉlduwpon José pejkajachawaesan. Potifar toꞌa José puexa tataeflaliajwa Potifar pejbaxot, japon pamakjiwbej. 5 Japamatkoiyan wʉt, José pijaxtat Dios xabich kajachawaet Potifar. Samata, puexa chiekal pachaem Potifar pejbaxot, japon pejbichaxbej. 6 Potifar xabich nejchaxoela-el pejbaliajwa, José chiekal puexa tataeflafʉl xot. Potifar nejchaxoelon xaeyaxaelpoxkal.José xabich chamianpon. Mamnikbejpon. 7 Samata, Potifar pijow chiekal natachaem wʉt xabich nejxasinkpow José. Do, asamatkoi wʉt, jʉm-aechow ampox Joséliajwa:
—¡Xan nak-okde! —aechow.
8 Pe José owchi-el Potifar pijow jʉm-aechpoxliajwa. José japox jʉmtis wʉt, jʉm-aechon ampox:
—¡Chiekal nanaeweꞌe! Tajpaklon xabich nejchaxoela-el ampabaliajwa, xan kaenan chiekal tataeflax xot. Natoꞌabejpon puexa pamakjiw chiekal tataeflaliajwan. 9 Ampabaxot xan puexa tatoꞌlax. Pe nejmol xan tapae-el xam tatoꞌlaliajwan, xam japon pijwam xot. Samata, xam nak-okaxinil. Xan japox, babejkolax, isaxinil nejmolliajwa, Diosliajwabej —aech José Potifar pijowliajwa.
10 Japow pomatkoicha jʉmbisnik japoxliajwa, chalaliajwasbejpow. Pe, José owchi-el. 11-12 Asamatkoi, José low isliajwa pejbichax. Jawʉt, jaxot asew jiw ajil. Jawʉt, José pejnaxoelax jaeltow. Jaelt wʉt, jʉm-aechow ampox:
—¡Xan nak-okde! —aechow tadʉt wʉton José.
Pe José najaeꞌe wʉt, pejsumta-osax waelchapon japowxot. 13-15 Japow taen wʉt xanukafʉlpox José pejsumta-osax, jawʉt pinjametat nejlakchapow pamakjiwliajwa. Dolis pamakjiw pat wʉt japowxot, japow chapaei wʉt jʉm-aechow ampox pamakjiwxot:
—¡Taem ampox! Hebreo-aton, tamal bʉflaenpon ampabaleldin, japon xatis naksitae-el. Japon low tajpiezaxxot, xan nabʉꞌokaliajwa. Pe xan pinjametat xabich nej-ʉax wʉt, najaeꞌepon. Samata, waelchapon thʉch naxoelpox —aechow, kichachajba wʉt pamakjiwxot.
16 Do jawʉx, José pijax, naxoelax, otow, pamal pat wʉt itpaeliajwa. 17 Potifar pat wʉt pejbaxot, japow chapaei wʉt, kichachajbaxtat jʉm-aechow ampox Potifarxot:
—Esclavo, hebreo-aton, xam bʉflaemanpon, japon low tajpiezaxxot nabʉꞌokaliajwa. 18 Pe xan xabich nej-ʉax wʉt, japon najaeꞌe tathoetade. Ma jawʉt, waelchapon pijax, naxoelax. 19 Jasox ja-aechpon japon esclavo —aech japow, chapaei wʉt pamalxot.
Jawʉt, Potifar xabich palala, jʉmtaen wʉton pijow chapaeispox. 20 Samata, Potifar kitoꞌa pejsoldaw José jaelsliajwas, jiw jebaxot jeliajwas. Jaxotbej faraón pamakjiw jias, babejchiwpi. Do jaxot Josébej jias. 21 Pe José chalas Dios. Kajachawaetbejpon, jiw jebaxot wʉt. Samata, jiw jeba tataeflan xabich nejchachaemil Joséliajwa. 22 Asamatkoi, jiw jeba tataeflan, japon toꞌa José tataeflaliajwa asew jiw, jaxot jiaspi. Samata, José puexa tatoꞌal, jiw jebaxot jiaspi, japi isliajwa japon tatoꞌalpoxan. 23 Jiw jeba tataeflan, japon José pejpaklon, kaematkoisfʉl fʉlaeyaxillison tataeflaliajwa jiw jebaxot jiaspi, José puexa chiekal tataefʉl xot. Diachwʉajnakolax José Dios chalas. Samata, puexa José ispoxan chiekal pachaem.