6 Do baxael, Judá jalwek pawis, paxʉlan matxoelapijinliajwa, japon pawʉlpon Er. Judá faen wʉt pawis, paxʉlan kiduton pijowliajwa. Japow pawʉl Tamar. 7 Pe Diosliajwa pachaema-el Er ispoxanliajwa. Samata, Er tʉp Dios pijaxtat. 8 Do jawʉx, Judá jʉm-aech ampox paxʉlan Onánxot:

—¡Xam fiꞌe nakoewan naetʉpow! ¡Xam naxʉlwalde japowxot, me-ama nakoewan tʉpon paxi wʉt, jachiliajwa japox! Japoxlap xatis wajkabʉan —aech Judá toꞌa wʉton paxʉlan Onán.

9 Onán pajut chiekal matabijt, japowxot naxʉwal wʉt, japon paxikola-el wʉt, jachiyaxaelpox. Samata, japon japow fit wʉt, japon japow ki-aech wʉt, pejbomaech nakolaliajwa wʉt japowxot, tathoetat nejnakolax-aech, japow moejwasamata japon pijaxtat. 10 Dios xabich nejchachaemla-el Onán ispoxliajwa. Samata, Onánbej tʉp Dios pijaxtat. 11 Do jawʉt, Judá jʉm-aech ampox pafamow Tamarxot:

—¡Nawiaꞌmich nej-ax pejba poxade! ¡Jaxotde dukde! Taxʉlan Sela patiꞌin wʉt, xan toꞌaxaelen japon xam fisliajwa —aech Judá pafamowxot.

Judá nejchaxoel wʉt, jʉm-aechon ampox paxʉlan Selaxot: “Taxʉlan Selakas-is tʉpaxael, Dios kitis wʉt. Me-ama pakoew tʉp, jachiyaxaelkas-is Sela” —aech Judá, nejchaxoel wʉt. Samata, Judáliajwa pachaema-el Sela fisliajwa Tamar. Do jawʉt, Tamar fʉlaech dukaliajwa pax pejbaxotde.

12 Asamatkoi, Judá pijow tʉp, japowlap Súa paxʉlow. Do jawʉx, Judá xabich nejxaejwaspox wetoeps wʉt, fʉlaechon, pejnachalan Hira sʉapich, Timnat paklowax poxaliajwade. Hira, Adulam paklowaxpijin. Timnat paklowaxxot asew poejiw Judá pejew oveja bʉꞌlatasiaplap. 13 Tamar wʉltaen pʉax Judá fʉlaeyaxaelpox Timnat paklowax poxade. 14 Samata, japow jolt, nejxaejwas wʉt naxoelpox. Jawʉt, asax naxoelow. Xumatakatbejpow matabijsasamatas pʉax. Do jawʉx, pat wʉtow Enaim paklowaxxot, ekow mox paklowax laleyaxxot. Japanʉamt Timnat paklowax poxaliajwade. Tamar jasox is, pajut chiekal matabijt xot Sela patiꞌinlison. Pe Sela fis-el japow.

15 Do jawʉx, Judá taen wʉton japow nʉambabʉꞌtat, nejchaxoel wʉt, jʉm-aechon ampox: “Ampow poejiw bʉꞌmoejtpow plata kanaliajwa, japow xumatakat xot pathʉajlabʉꞌ, tampoel xutaeliajwas” —aech Judá, nejchaxoel wʉt. 16 Do jawʉt, Judá asalel nadut nʉamtxot, japow mox soepnaliajwa. Matabijs-elon japow pafamowpow. Samata, Judá jʉm-aech ampox japowliajwa:

—¿Xamkat na-owchiyaxaelam xam bʉꞌokaliajwan? —aech Judá japowliajwa.

Japow jʉmnot wʉt, jʉm-aech ampox Judáliajwa:

—¿Achaxkat majt nachaxdusaxaelam, nabʉꞌoka-om wʉt? —aech japow Judáliajwa.

17 Judá jʉmnot wʉt, jʉm-aechon ampox japowliajwa:

—Xam bʉꞌokx wʉt, cabraxʉlan xatoꞌaxaelen xamliajwa —aech Judá.

Japow jʉmnot wʉt, jʉm-aechow ampox:

—¡Najaw! ¡Pe amwʉtfʉk nijaxpox waelde xanxot! Xam xatoꞌam wʉt cabraxʉlan, nijax waeltampox xanxot pejme wiasaxaelen —aechow Judáliajwa.

18-19 Judá wʉajnachaemt wʉt, jʉm-aechon ampox japow:

—¿Achaxkat waelsaxaelen xamxot? —aech Judá japowxot.

Japow jʉmnot wʉt, jʉm-aechow ampox Judáliajwa:

—¡Xanxot waelde nejsello, sellomʉat sʉapich, wʉchajilampox, malis nejkilanaeya xanukampox! —aechow wʉljow wʉt.

Samata, jawʉt Judá japoxan waelapon japowxot. Do jawʉx, japow sʉapich ison. Do jawʉx, Judá chijia wʉt japowxot, japowbej jaxot chijia. Pat wʉtow batat, joltow xumatakatpox. Pejme naxoelow, nejxaejwas wʉt naxoelpox.

20 Do jawʉtlejen, japamatkoi wʉt, Judá xatoꞌa cabraxʉlan pejnachalan Hiraxot, japow woeyaliajwa Judá waelapoxan japowxot. Pe pejnachalan pat wʉt Enaim paklowaxxot, faena-elon japow. 21 Do jawʉt, japon wʉajnachaemt wʉt, jʉm-aechon ampox japapaklowaxpijiw:

—¿Amxotkat pawis, poejiw bʉꞌmoejtpow plata kanaliajwa, ampapaklowaxpijow? Japow majt ekpow nʉambabʉꞌtat —aech Hira.

Jaxotpijiw, poejiw, jʉmnot wʉt, jʉm-aechi ampox Hiraliajwa:

—Amxot ijil wathoꞌ poejiw bʉꞌmoejtpow plata kanaliajwa —aech japi poejiw Hiraliajwa.

22 Do jawʉt, Judá pejnachalan, Hira, nawiatlison Judá poxade. Pat wʉt Judáxot, japon chapaei wʉt jʉm-aech ampox Judáxot:

—Faena-enil poejiw bʉꞌmoejtpow. Japatʉajnʉpijiw, poejiw, jʉm-aechbejpi ampox: “Amxot ijil wathoꞌ poejiw bʉꞌmoejti plata kanaliajwa” —aech poejiw japatʉajnʉpijiw —aech Hira chapaei wʉt Judáxot.

23 Judá japox jʉmtaen wʉt, jʉm-aechon ampox pejnachalan Hiraliajwa:

—¡Nej xanmanapow tejew asew jiw nakxafafola-elaliajwa, asamatkoi nawias wʉt japoxade! Diachwʉajnakolax xan xatoꞌax cabraxʉlan japowliajwa. Pe xam faena-emil japow —aech Judá pejnachalanliajwa.

24 Baxael, tres juimtje wʉt, asew jiw chapaeipi wʉt jʉm-aechai ampox Judáxot:

—Nafamow Tamar, asew poejiw bʉꞌmoejt. Japowlis moejow —aech asew jiw chapaei wʉti Judáxot.

Do jawʉt, Judá pinjametat jʉm-aechon ampox:

—¡Juꞌepow pax pejbaxot! ¡Boꞌepow tathʉalin jittat tʉpaliajwapow! —aech Judá toꞌa wʉton japi jiw.

25 Do jawʉt, pax pejbaxot juch wʉt, bʉxtoꞌapow asan aton jʉmchiliajwa ampox pʉax Judáxot: “Xan tamoejwaxpon, ama japon pejew. ¡Chiekal taem achan pejsello, sellomʉat sʉapich, pejkilanaeya sʉapichbej!” —chiliajwa japow pʉaxxot.

26 Do jawʉx, japon aton xapat wʉajan chapaeliajwapon Judáxot. Judá japoxan pajut chiekal taen wʉt matabijton japoxan japon pejewpoxan, jawʉt Judá jʉm-aechon ampox: “Japow japox ja-aech moejwaliajwa, naexasit xotow levitas pejtatoꞌlax. Pelax, xan naexasis-enil japoxtatoꞌlax, tapae-enil xot taxʉlan Sela, fisliajwapow japonxot paxiliajwapow, matxoelatʉponliajwa” —aech Judá pafamowliajwa. Do jawʉt, Judá bos-elon pafamow. Judá kaes japox jachi-elon pafamow sʉapich.

27 Baxael, Tamar naxʉwal wʉt, faekow na-oꞌiw. 28 Nalaesliajwa wʉt kaen japixot, matxoelanalaelsaxaelpon, yamxʉlan, pejke-ekal matlʉt. Do jawʉt, wathoꞌ naxʉwal wʉt kajachawaetpow pasoeimʉat mʉaxwasikakʉlapow japoch yamxʉch. Mʉaxwasikakʉla wʉt, jʉm-aechow ampox: “Ampochlap matxoelanalaelpoch” —aechow. 29 Pe jawʉt, japoch pejme kaxase. Jasoxtat pakoewan matxoela nalaelt wachakal naelsaxaelpoch. Samata, japon wʉlduws Fareswʉltat, wathoꞌ naxʉwal wʉt kajachawaetpow jʉm-aech xotow ampox: “¡Xam, me-ama pianatam matxoela nalaelsliajwa nakoewan!” —aech xotow. 30 Do jawʉx, asach nalaelt, japoch mʉaxwasikakʉlaspoch pasoeimʉatat. Japon wʉlduws Zarawʉltat.