—Ax, ¡xam xabʉaꞌde nospaeliajwam, japow pax sʉapich, xan natapaeliajwa paxʉlow fisax! —aech Siquem toꞌa wʉton pax.

5 Do jawʉt, Jacob jʉmtae Siquem ki-aechpox, jaelt wʉton Dina. Japamatkoitat, Jacob paxi puexa atʉajpi, yoxot, tataefʉli pejew oveja. Samata, Jacob chinax jʉmchi-elfʉk, hasta puexa paxi pat wʉt jʉmchiliajwa ampox. 6 Jawʉt, Hamor fʉlaen, paxʉlan Siquem sʉapich, Jacob poxadin nospaeliajwa, Jacob sʉapich.

7 Jawʉt, Jacob paxi bʉnweni pax pejew oveja. Jawʉt, pajut chiekal matabijt ja-aechpox Dinaliajwa, jawʉt xabich palala Jacob paxi japoxliajwa. Japox japiliajwa xabich chaemil, xabich padalapoxbej Jacob pejjiwliajwa. Siquem japox, isaxil, ispox Dinaliajwa. 8 Do jawʉt, Hamor kawʉajan wʉt, jʉm-aechon ampox Jacob paxixot:

—Taxʉlan Siquem xabich nejxasink nakoewow. Samata, ¡xamal tapaem nakoewow taxʉlan pijowliajwa! 9 Xamal tajjiwaxaelam. Ma-is xanal nejjiwaxaelen. Jachiliajwa wʉt, tajjiw nakjiyaxael, xamal sʉapich. Ma-is nejjiw nakjiyaxael, tajjiw sʉapich. 10 ¡Amxot xamal duilde duilaliajwam, xanal sʉapich! Ampatʉajnʉ xamalliajwabej. Ampatʉajnʉxot mowaxaelam nejew. Xanal wʉajsaxaelen, xamal mowam wʉt nejew. Ma-is xamal wʉajsaxaelam tajsatan ampatʉajnʉpijiwxot —aech Hamor Jacob paxixot.

11 Dolis jawʉt, Siquem jʉm-aech ampox Dina paxxot, japow pakoewliajwabej:

—Xamal jʉm-an ampox kaenejchaxoelaxliajwas. Ja-am wʉt, xamal chaxduiyaxaelen nawʉljowampoxan. 12 ¡Nawʉljoem nejxasinkampoxan! Ommaeyaxtat xabich namat-omwʉljowam wʉt japowliajwa, xan mosaxaelen. Xabich pin-iakolatat malechpi nawʉljowam wʉt, pe nakiowa xamal chaxduiyaxaelen. ¡Xan natapaem nakoewo fisliajwan! —aech Siquem Jacobxot, Jacob paxixotbej.

13 Jacob paxi jʉmnot wʉt, jʉm-aechi ampox naekichachajba wʉti Siquem, Siquem paxbej:

14 —Xanal tapaeyaxinil takoewow fisliajwa, aton majt circuncida-esal wʉt japon Dios pejmarkaliajwa. Takoewow fit wʉt circuncida-esalpon, japox ja-aech wʉt, xanalliajwa xabich padalaxaelpox. 15 Puexa xamal poejwamkal circuncidam wʉt, me-ama xanal jachiliajwam, ja-am wʉt, xanal kaenejchaxoelaxaelen, xamal sʉapich. 16 Ja-aech wʉt, xanal tapaeyaxaelen xamal nakjiyaliajwam tajjiw wathoꞌxot. Ma-is xanal nakjiyaxaelen nejjiw wathoꞌxot. Jatis wʉt, chiekal kaemʉtaxaes. 17 Xamal kaenejchaxoelaxa-emil wʉt circuncidaliajwa, ja-aech wʉt, xanal amxot chijiyaxaelen. Bʉflaeyaxaelenbej takoewow —aech Jacob paxi, naekichachajba wʉti Siquem, Siquem paxbej.

18 Do jawʉt, Hamor, paxʉlan sʉapich, kaenejchaxoelax Jacob paxi jʉm-aechpoxliajwa. 19 Samata, Siquem kamta circuncidasiapon, xabich nejxasink xot Jacob paxʉlow. Siquem kaes pejme sitaenspon Hamor pejjiwxot. 20 Samata, jawʉt, Siquem, pax sʉapich, fʉlaech pejpaklowax poxade, japi asew jʉmchiliajwa ja-aechpox Jacob, paxi sʉapich. Paklowax laleyaxxot, jiw pejew mowaxot, jaxot japi jʉm-aech ampox pejpaklowaxpijiwliajwa:

21 —Wajpaklowaxtabijla duildepi, japi pachaem. Japi duilaxael, xatis wajtʉajnʉxot. Japi mowaxael pejew xatisxot. Ma-is xatis mowaxaes wejew japixot. Amxot satan xajʉp xatisliajwa, japiliajwabej. Xatis nakjiyaxaes japi pejjiw wathoꞌxot. Ma-is japi nakjiyaxael wajjiw wathoꞌxot. 22 Japox xatis jachiyaxaes kaemʉtaliajwas, japi sʉapich, kaenejchaxoelaxaespox ampoxlape. El wʉt, japi duilaxil wajtʉajnʉxot. Samata, puexa xatisxot poejiw circuncidaxaes. Me-ama japi pejkabʉan, xatisbej japox isaxaes. 23 Puexa japi pejew, choefbej, asamatkoi xatis wejwaxael. Jʉmch japoxkal owchiyaxaes. Jasox isas wʉt, japi, xatis sʉapich, duilaxael —aech Siquem, pax sʉapich, pejpaklowaxpijiwliajwa.

24 Do jawʉt, puexa japapaklowaxpijiw, jeltiꞌti, kaes pakdiachiwpibej, kaenejchaxoelax, Siquem sʉapich, Siquem pax sʉapichbej. Samata, puexa poejiw circuncidas. 25 Pelisox, tres matkoi wʉt, Simeón, Leví sʉapich, fʉlaechilisi japapaklowax poxade. Japapaklowaxpijiw puexa poejiw circuncidaspox wexaenkasfʉki. Samata, mamnika-eli. Jawʉt, Simeón, Leví sʉapich, espadatat bapi puexa poejiwkal, japapaklowaxpijiw. 26 Espadatat boesabejpi Hamor, japon paxʉlan sʉapich, pawʉlpon Siquem. Do jawʉt, pakoewow Dina bʉꞌfoli Siquem pejbaxot. Jawʉt, Jacob paxi chijialisi jiw webaxoti. 27 Do jawʉx, asew Jacob paxi pat japapaklowaxxot. Pat wʉt, patʉpa taen wʉti, japapaklowaxpijiw pejew noti. Pakoewow Dina wekitispoxliajwa, japox ispi mosliajwa. 28 Xabich oveja, pak, burbej, bʉꞌfoli. Japapaklowaxpijiw pejew, yotatpibej, bʉꞌfoli. 29 Puexa ommaenkpi xafoli, bachantatpi. Bʉꞌfolbejpi japapaklowaxpijiw wathoꞌ, yamxibej, japi pej-esclavosliajwa.

30 Simeón, Leví sʉapich, pat wʉti pax Jacobxot, Jacob jʉm-aech ampox:

—Xamal xankal natasaxaelam, xabich babijax isam xot japi jiwliajwa. Ma amwʉt, ampatʉajnʉpijiw, cananeos, ferezeos sʉapich, xabich nejweslaxaeli xan. Samata, japi kaeyaxtat natamejaxael. Do jawʉx, xatis nakchakifʉlaeyaxaeni chiekal naktoesliajwa. Tamakjiw, poejiw, kaesʉapich. Samata, xatis naktoesaxaeli malech —aech Jacob Simeónliajwa, Levíliajwabej.

31 Pe japi kolenje jʉmnot wʉt, jʉm-aechi ampox paxliajwa:

—Xanal takoewow tapaeyaxinil japon aton bʉꞌmoejsliajwa, me-ama pawis poejiw bʉꞌmoejtpow wʉt plata kanaliajwa, jachiliajwapon takoewowliajwa —aech japi kolenje pax Jacobliajwa.