Jacob pejme chiekal pachaempox, pakoewan Esaú sʉapich
33
1-2 Jacob fol wʉtfʉk, taenon Esaú atʉaj fʉlaen wʉt, cuatrocientos poejiw sʉapich. Jawʉtlap, Jacob xabich pejlewla xot, diajkpon paxi, koliowje pijow sʉapich. Matxoelanuilax toꞌapon koliowje pej-esclavas, japi, paxi sʉapich, nuilaliajwa. Do jawʉtbej, Lea, paxi sʉapich, nuilax toꞌapon. Taxdukakolaxtat, nukax toꞌapon Raquel, japow paxʉlan sʉapich, pawʉlpon José. 3 Jacob chiekal matxoela fol pejjiw wʉajnalel. Mox wʉt pakoewanxot, Jacob siete veces sat makxabijkafʉldepon, pakoewan Esaú poxade wʉt, itpaeliajwa sitaeyax Esaúliajwa. 4 Pe jawʉt, Esaú najaeꞌen pakoewan Jacob poxadin. Pakoewanxot paꞌan wʉt, pakoewan wʉjaelton. Xusuwbejpon. Do jawʉt, japi kolenje nowpi, xabich nejchachaemil xot nakaewaliajwa. 5 Do jawʉx, Esaú chiekal itfulajʉ wʉt wathoꞌ, yamxibej, jawʉt wʉajnachaemt wʉt, jʉm-aechon ampox pakoewan Jacob:—¿Ampi jiw masikat? —aech Esaú wʉajnachaemt wʉt pakoewan.
Jacob jʉmnot wʉt, jʉm-aechon ampox pakoewan Esaú:
—Ampi tajwathoꞌ, ampibej tejew yamxi, Dios nakilachaemt tejew yamxiliajwa —aech Jacob pakoewanxot.
6 Jawʉt, koliowje pej-esclava, japi paxi sʉapich, mox soepapi Esaúxot. Mox wʉti, sat makxabijapi itpaeliajwa sitaeyax Esaúliajwa. 7 Jawʉx Lea, paxi sʉapich, mox soepa sat makxabijaliajwa. Taxdukakolaxtat Raquel, paxʉlan José sʉapich, mox soepa sat makxabijaliajwa. 8 Jawʉt, Esaú wʉajnachaemt wʉt, jʉm-aechon ampox:
—¿Ma-aech xotkat choef pin-iamʉtan xatoꞌam xanliajwa? —aech Esaú wʉajnachaemt wʉton Jacob.
Jacob jʉmnot wʉt, jʉm-aechon ampox:
—Tamakjiw bʉꞌwʉajnade choefmʉtan, japi xam malech chaxduiliajwan, chiekal nabʉꞌkʉsliajwam —aech Jacob Esaúxot. 9 Esaú jʉmnot wʉt, jʉm-aechon ampox:
—¡El, wʉaja! Xan-is xabich tejew choef. ¡Xanmande nejew choef! —aech Esaú Jacobxot.
10 Pe, Jacob jʉmbisnik wʉt, jʉm-aechon ampox:
—Wat, diachwʉajnakolax xam xabich nejchachaemlam wʉt, xan nataenam wʉt, ja-am wʉt, ¡japi, choefmʉtan, bʉflaem! Xam taenx wʉt, xabich nejchachaemlax. Me-ama tajut Dios taenx wʉt, ja-anxot xamliajwa. Ma amwʉt, xabich nejchachaemlax, xam chiekal nabʉꞌkʉltam xot. 11 ¡Xamliajwa jʉmbisnikax japi choef bʉflaeliajwam, malech chaxduwxpi! Dios nakajachawaet xabich kimaenkaliajwan. Chinax kaeyax naweweꞌpa-el —aech Jacob pakoewanliajwa.
Jacob xabich jʉmbisnik pakoewan Esaúliajwa. Samata, baxael, Esaú ow-aech bʉflaeliajwa japi choef, pakoewan malech chaxduwsi. 12 Jawʉt, Esaú jʉm-aech ampox pakoewanliajwa:
—¡Ma amxot chijias! Xan matxoela fʉlaeyaxaelen —aech Esaú.
13 Jacob jʉmnot wʉt, jʉm-aechon ampox:
—Wat, xam chiekal matabijtam yamxi fʉlaeyax itfiꞌil. Xan nejchaxoelx tajchoefliajwa, jelnaxʉwalpiliajwabej. Bichakal choef bʉꞌfolx wʉt, ovejakas xajʉpaxil fʉlaeliajwa. Ja-aech wʉtkas, puexa oveja tʉpaxael. 14 Kaes pachaem xamalkal wʉajnade matxoelaliajwam. Xanal bijiat fʉlaeyaxaelen, choef folpoxtat, yamxi folpoxtatbej. Jasoxtat pasaxaelen xamxot, Edom tʉajnʉxot —aech Jacob pakoewan Esaúxot.
15 Do jawʉt, Esaú jʉm-aech ampox Jacobxot:
—Najaw. ¡Pe xamxot kaesʉapich tamakjiw xamxotaxaeli! —aech Esaú Jacobxot.
Jacob jʉmnot wʉt, jʉm-aechon ampox:
—¡El! Diachwʉajnakolax naweweꞌpa-el poejiw xanxot namaeliajwa —aech Jacob pakoewan Esaúxot.
16 Japamatkoitat, Esaú, pejjiw sʉapich, nawia Edom tʉajnʉ poxade. 17 Pe Jacoblax chijia Sucot poxade. Jaxotde Jacob is pejba. Isbejpon bʉa-an pejchoefliajwa. Samata, jaxot pawʉl Sucot.a
18 Do baxael, Jacob chijia Sucotxotdin, dukaliajwa mox Shechem paklowaxxot, Canaán tʉajnʉxot. Jasoxtat, Jacob fʉlaen wʉt Padan-aram tʉajnʉxotdin, paton chamoeyaxtat Canaán tʉajnʉxot. Do jaxot, Jacob bijton, Siquem paklowaxtabijla. 19 Jacob, pejjiw sʉapich, bijaxot, jaxot sat wʉajton. Moton Hamor paxi cien kafefachan, platakal, japasatliajwa. Hamorlap Siquem pax. 20 Do jawʉx, Jacob is altar. Jaxotlap wʉlduwpon ampawʉltat, “Dioslap Israel pejDios”.