Abraham tʉpox
25
Sara tʉp wʉt, Abraham asaow pawis fit. Japow pawʉl Cetura. 2 Abraham japowtat seis paxipon, poejiw. Kaen pawʉl Zimram. Asan pawʉl Jocsán. Asan pawʉl Medán. Asan pawʉl Madián. Asan pawʉl Isbac. Asan pawʉl Súa. 3 Baxael, Jocsán kolenje paxʉlan. Kaen pawʉl Seba. Wachakalpijin pawʉl Dedán. Do baxael, Dedán tres paxipon. Japi trespixot tresmʉtje nadofa. Japi Dedán pamojiw. Kaemʉt pawʉl asureos. Asamʉt pawʉl letuseos. Asamʉt pawʉl leumeos.4 Madián cinco paxipon. Matxoelapijin pawʉl Efa. Wachakalpijin pawʉl Efer. Terceropijin pawʉl Hanoc. Cuartopijin pawʉl Abida. Quintopijin pawʉl Elda. Puexa japilap Cetura paxi, pamojiwbej. 5-6 Abrahambej paxipon asew pejwathoꞌjiwtat. Japi paxi, pakdiachiw wʉt, Abraham kaenanʉla malech chaxduw. Do jawʉx, japi toꞌapon juimt julanlelsan, duilaliajwa atʉaj paxʉlan Isaacxot. Do asamatkoi, Abraham tʉp wʉt, Isaac puexa pax pejew xanmanpon pejewkolaliajwa.
Abraham tʉp wʉt, mʉthtaspon
7 Abraham laeja ciento setenta y cinco waechan. 8 Jaswaechan laeja wʉt, Abraham tʉp. Me-ama pejwʉajnapijiw pakdiachwaxtat tʉp wʉt, ja-aech-is Abraham tʉpon xabich patiꞌin wʉt. 9 Do jawʉt, Isaac, Ismael sʉapich, mʉthti pax Abraham. Jawʉt, mʉthti pax mʉaxwʉajxot, Macpela satxot. Japasat Mamre pej-orientelel. Majt japasat Efrón pejsat. Efrón, japon Zohar paxʉlan. Zohar, japon hitita-aton. 10 Japasat Abraham chajia wʉajt hititasxot. Jaxotde Abraham mʉthtas mʉaxwʉajxot, pijow Sara mʉthtasxot. 11 Do jawʉx, Abraham tʉp wʉt, Dios kajachawaech Isaac. Isaac duk mox minmʉthxot, ‘Dios pomatkoicha dukpon, nataenponbej’ pawʉlxot minmʉth.
Ismael paxipox, pamojiwbejpon
12-15 Abraham paxʉlan, pawʉlpon Ismael, nalaeltpon Agarxot. Japowlap esclava, nabistpow Saraliajwa. Japow Egipto tʉajnʉpijow. Ma ampilap Ismael paxi. Matxoelapijin pawʉl Nabaiot. Wachakalpijin pawʉl Cedar. Terceropijin pawʉl Adbeel. Cuartopijin pawʉl Mibsam. Quintopijin pawʉl Misma. Sextopijin pawʉl Duma. Séptimopijin pawʉl Massa. Octavopijin pawʉl Hadar. Novenopijin pawʉl Tema. Décimopijin pawʉl Jetur. Oncepijin pawʉl Nafis. Docepijin pawʉl Cedema. 16 Japilap Ismael paxi, doce poejiw. Kaenanʉla japilap paklochiw pejtʉajnʉchanxot. Do jawʉx, japi pamojiw docemʉtanpi. Japi docemʉtanpijiw pejwʉajnapijiw pejwʉlan wʉlduwpi pejtʉajnʉchan. Japi pejwʉajnapijiw pejwʉlan wʉlduwpi pejtʉajnʉchan.
17 Ismael ciento treinta y siete waechan wʉt, japon tʉp. Tʉpon, pejwʉajnapijiw, chajia tʉpi sʉapich, natamejlaliajwa sʉapich. 18 Ismael pamojiw mox duil Havila tʉajnʉxot, mox Shur tʉajnʉxot. Japi duil Egipto tʉajnʉtabijla. Japi duilxot mox nʉamt, Asiria tʉajnʉ poxaxaechpot. Jaxotlap japi duil pejlel. Asew, Ismael pamojiw, mox duila-el, japi nakaewaliajwa, me-ama padaelmajiw wʉt, ja-aech xoti.
Na-oꞌa nalaelapox kaen pawʉl Jacob, asan pawʉl Esaú
19 Ampawʉajan Isaac pejwʉaj, japonlap Abraham paxʉlan 20 Isaac cuarenta waechan wʉt, fiton Rebeca. Japow Betuel paxʉlow, Labán pakoewow. Japi arameosjiwlap, duili Padan-arama tʉajnʉxot. 21 Rebeca moejwaxil. Samata, Isaac Dios kawʉajan Rebeca moejwaliajwa. Dios jʉmtaen Isaac kawʉajanpox. Samata, Rebeca moejow wʉt, na-oꞌapow. 22 Na-oꞌiw nabefʉl Rebeca pejwoejtat. Samata, Rebeca xabich nabijat, japi nabeflaxtat. Japow nejchaxoel wʉt, jʉm-aechow ampox: “¿Ma-aech xotkat xabich ampox ja-aech xanliajwan?” —aechow, nejchaxoel wʉt. Ja-aech wʉt, Rebeca Dios kawʉajan matabijsliajwa ja-aechpoxliajwa japowliajwa. 23 Do jawʉt, Dios jʉmnot wʉt, jʉm-aechon ampox Rebecaliajwa:
“Nejwoejtat kolenje. Asamatkoi, japi pamojiw paklochiwaxael. Japi padaelmajiwaxaelbej. Samata, me-ama nabapi nakaewa. Kaen kaes paklonaxael. Wachakalpijin tatoꞌlaxael pakoewan, matxoelapijin” —aech Dios Rebecaliajwa.
24 Asamatkoi, Rebeca naxʉwal wʉt, faekow na-oꞌa. 25 Matxoelanalaeltpon ponapasoeyan. Ponabʉꞌlabejpon. Japonlap pawʉl Esaú. 26 Matxoelanalaeltpon, tʉaknajtakʉktas wachakalnalaeltpon. Jasoxtat japi kolenje nalaela. Samata, wachakalpijin wʉlduws Jacobwʉltat. Rebeca naxʉwal wʉt, Isaac sesenta waechan.
Esaú jʉmch mowapox pakoewanxot, japon pejwaxaelpoxan
27 Do jawʉx, Esaú, Jacob sʉapich, chiekal tiꞌsfʉlisi. Esaú jʉmch nejxasink nanʉamsliajwa atʉaj. Chiekal pachaembejpon wekaliajwa. Jacoblax chiekal nejmamach carpabachanxot. Japon kaes nejxasink kawetaliajwa carpabachanxot. 28 Isaac kaes nejxasink Esaú, nejxasink xoton choef xaeliajwa, Esaú pajali. Pe Rebeca kaes nejxasink Jacob.
29 Asamatkoi, Jacob chat-iapon naxaeyax. Jawʉt, Esaú nawiꞌan wʉt tathoetlel, xabich damalon wekaxtat. 30 Do jawʉt, Esaú jʉm-aech ampox Jacobxot:
—Xan xabich litaxaelax. Tajlit tʉpasian. ¡Xan nachaxduꞌe japoxnaxaeyax, pasoeyax, xan xaeliajwan! —aech Esaú Jacobxot.
Samata, Esaú asawʉlpon, Edom. Hebreojametat “Edom” —aech wʉt, jʉmchiyaxaelap ampox: “Pasoeyax” —chiyaxaelpox.
31 Jacob jʉmnot wʉt, jʉm-aechon ampox Esaúxot:
—¡El! Xam matxoelapijnam xot, xabich kaes nosaxaelam waj-ax pejew, waj-ax naknaetʉp wʉt. Xamlap kaes paklonaxaelam. Me-ama xan, jachiyaximil. Puexa japoxan xanliajwa wʉt, ja-am wʉt, ma amwʉt, naxaeyax chaxdusaxaelen xam xaeliajwam —aech Jacob Esaúxot.
32 Do jawʉt, Esaú jʉm-aech ampox Jacobxot:
—Xam najut chiekal nataenam xan tajlit tʉpasian. Waj-ax pejew, xan kaes nosaxaelenpoxan matxoelapijnan xot, japoxan xanliajwa ommaenka-el, xan tajlit tʉpasian xot —aech Esaú Jacobxot.
33 Do jawʉt, chiekal nejthʉꞌaxtat Jacob jʉm-aech ampox Esaúliajwa:
—¡Ma amwʉt, diachwʉajnakolax najʉmduꞌe Dios jʉmtaeliajwa, xam natapaeyaxaelam wʉt xan kaes nosliajwanpox waj-ax pejew, asamatkoi, japon tʉp wʉt! —aech Jacob Esaúxot.
Do jawʉt, Esaú chiekal nejthʉꞌaxtat jʉmduton Jacobxot. Ja-aech wʉt, Jacob kaes nosaxael pax pejew. Kaes paklonaxaelbejpon pakoewan Esaúliajwa.
34 Do jawʉt, Jacob chaxdut naxaeyax Esaú xaeliajwa. Japanaxaeyax pan, malis lentejasap. Esaú xaeyax kaechatoel wʉt, jaxot nant wʉt, chijiapon. Chinax nejchaxoela-elon kaes nosaxaelpoxliajwa pax pejew, japon matxoelapijin xot. Esaú chinax nejchaxoela-elbej japon kaes paklonaxaelpox pakoewan Jacobliajwa.