5 Tuuꞌmi ní ꞌiiⁿꞌyāⁿ chi vɛ́ɛ yā na trono miiⁿ ní caⁿꞌa yā: Ndísꞌtiī nꞌdiichí nī. ꞌÚú ní diíⁿ tanducuéⁿꞌē denduꞌū chi nduuví ngai. Ní ꞌiiⁿꞌyāⁿ miiⁿ caⁿꞌa yā chii yā ꞌúú: Dii, Juan, dingúuⁿ di nduudu sꞌeeⁿ ti nduudu sꞌeeⁿ ní nduudu cuaacu. Ní nducyaaca ꞌiiⁿꞌyāⁿ cuuvi cuꞌtéénu yā nduudu sꞌeeⁿ.

6 Cuayiivi caⁿꞌa yā chii yā ꞌúú ꞌtíícā: ꞌÚú dīnꞌdaí nducuéⁿꞌē. ꞌÚú ní yeⁿꞌe cuaaⁿ naachi íngaꞌā ní ndíí cuaaⁿ ná ꞌcuiinu tanꞌdúúcā letras A ndíí Z yeⁿꞌe alfabeto. ꞌIiⁿꞌyāⁿ chi yaaca yā ꞌúú ní caꞌá nuūⁿnīⁿ chi cuꞌu yā tanducuéⁿꞌē chi neⁿꞌé yā ní nguɛ́ɛ́ nadííꞌvɛ yā cáávā nuūⁿnīⁿ miiⁿ chi vida cueⁿꞌe daāⁿmaⁿ. 7 ꞌIiⁿꞌyāⁿ chi cuchɛ́ɛ yā yeⁿꞌē tanducuéⁿꞌē ꞌúú ní caꞌá tanducuéⁿꞌē chuū chi cuuvi yeⁿꞌé yā. Ní ꞌúú cuuvi Ndyuūs yeⁿꞌe yā ní ꞌiiⁿꞌyāⁿ sꞌeeⁿ ní cuuvi daiyá. 8 Naati ꞌiiⁿꞌyāⁿ chí ꞌvaꞌa yā ndúúcū ꞌiiⁿꞌyāⁿ chí nguɛ́ɛ́ iꞌtéénu yā o ꞌiiⁿꞌyāⁿ chi nguɛ́ɛ́ neⁿꞌe yā ꞌiiⁿꞌyāⁿ, ndúúcū ꞌiiⁿꞌyāⁿ chi nꞌgiiⁿꞌnúⁿ yā ꞌiiⁿꞌyāⁿ, ndúúcū ꞌiiⁿꞌyāⁿ chi caⁿꞌá yā ndúúcū nꞌdaataá o isaⁿꞌā chi nguɛ́ɛ́ yeⁿꞌe yā, ndúúcū ꞌiiⁿꞌyāⁿ chi nadiiⁿ denduꞌū yeⁿꞌe ngaatu, ndúúcū ꞌiiⁿꞌyāⁿ chi iꞌtéénu yā santos chi ídolos, ndúúcū ꞌiiⁿꞌyāⁿ chi yaadí yā, nducyaaca ꞌiiⁿꞌyāⁿ sꞌeeⁿ ní canéé chi caⁿꞌá yā nuūⁿnīⁿꞌyáⁿꞌā chi ngiichi ndúúcū yaⁿꞌā ní ndúúcū tuūu azufre. Chuū ní chiiⁿ chii ndii ꞌuūvī cúúví ꞌcuūvi yā.

9 Tuuꞌmi ní ndaā nanááⁿ ꞌúú ꞌáámá chɛɛ ángel naachi ndɛɛ̄chɛ yā chí vɛ́ɛ́ ꞌcuūtií yeⁿꞌé yā, ꞌcuūtií sꞌeeⁿ ndúúcū ndɛɛ̄chɛ̄ vaadī yaꞌai yeⁿꞌe cuaaⁿ na ꞌcuiinu. Ní caⁿꞌa yā chii yā ꞌúú: Díí, Juan, cuchíi di ꞌmuuⁿ ni ꞌúú ꞌcuuⁿꞌmíⁿ dii duꞌu chi novia chi nꞌdaataá yeⁿꞌe ꞌiiⁿꞌyāⁿ chi nguuvi ꞌiiti cuūchī.

10 Ní chuū ní yeⁿꞌe chi nꞌdiichí taachi caneé maaⁿ poder yeⁿꞌe Espíritu Nꞌdai yeⁿꞌé Ndyuūs. Angel candɛ́ɛ yā ꞌúú naachi vɛ́ɛ́ ꞌáámá yiīcū chꞌɛɛtɛ ní yaacu. Ní chꞌiⁿꞌí yā ꞌúú yáāⁿ chꞌɛɛtɛ ní dɛɛvɛ chi nguuvi Jerusalén chi cuchꞌééⁿ yeⁿꞌe na vaꞌai chɛɛti nguuvi yeⁿꞌe nanááⁿ Ndyuūs. 11 Yáāⁿ miiⁿ ní dɛɛvɛ́ ngii ndúúcū yeⁿꞌé Ndyuūs chi dɛɛvɛ́ ngii. Ní dɛɛvɛ́ ngii yeⁿꞌe yáāⁿ miiⁿ ní tanꞌdúúcā ꞌáámá tuūu chi yaⁿꞌai chííꞌvɛ̄ chi tanꞌdúúcā tuūu jaspe chí dɛɛvɛ́ tanꞌdúúcā cristal. 12 Ní vɛ́ɛ́ ꞌáámá nchɛɛ̄tī nuuⁿmaⁿ ndiivi na yáāⁿ miiⁿ ndúúcū ndichúúví cheendi vaꞌāī chꞌɛɛtɛ yeⁿꞌē. Ní vɛ́ɛ́ ndichúúví ángeles ꞌáámá ꞌáámá yā ní nguaindaí yā ꞌáámá ꞌáámá cheendi vaꞌāī chꞌɛɛtɛ miiⁿ. Ní chi duuchi chi canéé nguūⁿ vmnaaⁿ caꞌáámá caꞌáámá cheendi vaꞌai chꞌɛɛtɛ miiⁿ ní ꞌáámá yeⁿꞌe chi duuchi yeⁿꞌe chi nduꞌu ndichúúví tribus yeⁿꞌe ꞌiiⁿꞌyāⁿ chi Israel chi judíos. 13 Ní vɛ́ɛ́ ꞌiinū cheendi vaꞌāī nꞌgɛɛtɛ ꞌáámá ꞌáámá lado yeⁿꞌē yáāⁿ miiⁿ. Cuaaⁿ naachí canꞌdaā ꞌyáⁿꞌā vɛɛ ꞌiīnū cheendi vaꞌāī. Ní cuaaⁿ na ꞌniiⁿnuⁿ vɛ́ɛ́ ꞌiīnū cheendi vaꞌāī, ní cuaaⁿ ndiiyā vɛ́ɛ́ ꞌiīnū cheendi vaꞌāī, ní cuááⁿ na ngiiya ꞌyáⁿꞌā vɛ́ɛ́ ꞌiinū cheendi vaꞌāī. 14 Ní cimiento yeⁿꞌe yáāⁿ miiⁿ vɛ́ɛ́ ndichúúví tuūu chi cimiento yeⁿꞌē. Ní chi duuchi yeⁿꞌe nduꞌū ndichuuví apóstoles yeⁿꞌe ꞌiiⁿꞌyāⁿ chi duuchi ꞌiiti cuūchī, ꞌáámá ꞌáámá chi duuchí yā canéé nguūⁿ vmnaaⁿ ꞌáámá ꞌáámá tuūu miiⁿ.

15 Ní ángel miiⁿ chi ngāⁿꞌa yā ndúúcū ꞌúú ndɛ́ɛ yā ꞌáámá tááⁿ ndúú yeⁿꞌe ꞌdííⁿnguāaⁿ chi dicaadí yā yáāⁿ miiⁿ ndúúcū cheendi vaꞌāī chꞌɛɛtɛ miiⁿ yeⁿꞌē ndúúcū nchɛɛ̄tī miiⁿ yeⁿꞌē. 16 Ní yáāⁿ miiⁿ ní cuadrada ní chi chꞌeeꞌnuu dáámá nūuⁿ ndúúcū chi chꞌeēnūu. Ní ángel miiⁿ ní dicaadí yā yáāⁿ miiⁿ ndúúcū nduu yeⁿꞌe ꞌdííⁿnguāaⁿ. Ní caadi yeⁿꞌe yáāⁿ miiⁿ ní ꞌuūvī mil canéé ꞌuūvī cientos kilómetros yeⁿꞌē. Ní chí chꞌeeꞌnuu miiⁿ ní chi chꞌeēnūu ní chi yaacu yeⁿꞌe yáāⁿ miiⁿ ꞌāā daamá nūuⁿ. 17 Ní ángel miiⁿ dicaadí yā nanchɛɛ̄tī miiⁿ. Ní ngíí ꞌiinū ngɛɛcu cuūuⁿ metros chi ángel miiⁿ dicaadí yā. Ní caadí miiⁿ ní dáámá ndúúcū caadí yeⁿꞌe chi caadí ꞌiiⁿꞌyāⁿ chi snee iⁿꞌyeeⁿdí ꞌcūū.

18 Ní nchɛɛ̄tí miiⁿ ní chinꞌdai ndúúcū tuūu jaspe. Ní yáāⁿ miiⁿ ní chinꞌdai yeⁿꞌe dámaāaⁿ ꞌdííⁿnguāaⁿ puro. Ní tanꞌdúúcā chi ꞌnááⁿ vidrio dɛɛvɛ, ꞌtíícā yáāⁿ miiⁿ. 19 Cimiento yeⁿꞌe nchɛɛtī miiⁿ ndíí adornado ndúúcū tanducuéⁿꞌē tuūu chí yaⁿꞌai chííꞌvɛ̄. Cimiento chí vmnááⁿ vmnaaⁿ miiⁿ ní yeⁿꞌe tuūu jaspe, ndii chííⁿ ndii ꞌuūvī miiⁿ ní yeⁿꞌe tuūu zafiro, ndii chííⁿ ndii ꞌíínú miiⁿ ní yeⁿꞌe tuūu ágata ní ndii chííⁿ ndii cuūuⁿ miiⁿ ní yeⁿꞌe tuūu esmeralda. 20 Ndii chííⁿ ndii nyuⁿꞌu miiⁿ ní yeⁿꞌē tuūu ónice, ní ndii chííⁿ ndii niyaaⁿ miiⁿ ní yeⁿꞌē tuūu cornalina, ní ndii chííⁿ ndii ndɛɛ̄chɛ̄ ní yeⁿꞌe tuūu crisólito, ní ndii chííⁿ ndii niiⁿniⁿ ní yeⁿꞌe tuūu berilo, ní ndii chííⁿ ndii nuuⁿ ní yeⁿꞌe tuūu topacio, ní ndii chííⁿ ndii ndiichi ní yeⁿꞌe tuūu crisoprasa, ní ndii chííⁿ ndicháámá ní yeⁿꞌe tuūu jacinto, ní ndii chííⁿ ndichúúví ní yeⁿꞌe tuūu amatista. 21 Ní nduꞌu ndichúúví cheendi vaꞌāī nꞌgɛɛtɛ miiⁿ ní ndiichúúví perlas. Ní caꞌáámá caꞌáámá cheendi vaꞌāī chꞌɛɛtɛ miiⁿ ní ꞌáámá perla nūuⁿ. Ní yúúní chꞌɛɛtɛ yeⁿꞌe yáāⁿ miiⁿ dámaāⁿ ꞌdííⁿnguāaⁿ puro ní dinááⁿ tanꞌdúúcā vidrio dɛɛvɛ.

22 Ní ꞌúú nguɛ́ɛ́ nꞌdiichí mar ꞌáámá yaācū na yáāⁿ miiⁿ ti Señor chi Ndyuūs chi vɛ́ɛ́ tanducuéⁿꞌē denduꞌū poder yeⁿꞌe yā ndúúcū ꞌiiⁿꞌyāⁿ chi nguuvi ꞌiiti cuūchī miiⁿ, ꞌiiⁿꞌyāⁿ sꞌuuuⁿ chi Ndyuūs chi yaācū yeⁿꞌe yáāⁿ miiⁿ. 23 Ní yáāⁿ miiⁿ nguɛ́ɛ́ neⁿꞌe ꞌyáⁿꞌā ndíí nguɛ́ɛ́ ndúú ꞌiiyū chi dɛɛvɛ yeⁿꞌē ti Ndyuūs chi dɛɛvɛ ngii ní dɛɛvɛ yeⁿꞌe yáāⁿ miiⁿ, ní ꞌiiⁿꞌyāⁿ chi duuchi ꞌiiti cuūchī ní dɛɛvɛ yeⁿꞌe yáāⁿ miiⁿ. 24 Ní ꞌiiⁿꞌyāⁿ chi nadanguaⁿꞌai yā yeⁿꞌe naciones chiicá yā ná dɛɛvɛ yeⁿꞌe yáāⁿ miiⁿ. Ní reyes yeⁿꞌe yáⁿꞌāa ꞌcūū ndɛ́ɛ yā chꞌɛɛtɛ yeⁿꞌe maáⁿ yā ndúúcū honra yeⁿꞌe maáⁿ yā nduucú yā ndii yáāⁿ miiⁿ. 25 Ní cheendi vaꞌai nꞌgɛɛtɛ yeⁿꞌe yáāⁿ miiⁿ nguɛ́ɛ́ nduudi núúⁿmáⁿ nguuvi. Ní ꞌāā ntɛ́ɛ́ vɛ́ɛ́ nꞌgaaⁿ miiⁿ. 26 Ní ꞌiiⁿꞌyāⁿ sꞌeeⁿ yeⁿꞌe naciones yeⁿꞌe iⁿꞌyeeⁿdí ꞌcūū ní ndɛɛ́ yā yeⁿꞌē chi chꞌɛɛtɛ ndúúcū honor yeⁿꞌe naciones yeⁿꞌé yā. 27 Nguɛ́ɛ́ cuuvi cundaā na yáāⁿ miiⁿ denduꞌū chi nguɛ́ɛ́ dɛɛvɛ, ndúúcū ꞌiiⁿꞌyāⁿ chi diiⁿ yā chi nguɛ́ɛ́ nꞌdaacā, ndúúcū ꞌiiⁿꞌyāⁿ chi ngaⁿꞌa yā nduudu yaadi. Dámaāⁿ cundaa ꞌiiⁿꞌyāⁿ chi canéé nguūⁿ chi duuchi yā na libro yeⁿꞌe vida cueⁿꞌe daāⁿmaⁿ chi ndɛ́ɛ ꞌiiⁿꞌyāⁿ chi nguuvi ꞌiiti cuūchī.