22
Tuuꞌmi ní ángel miiⁿ chꞌiⁿꞌi yā ꞌúú ꞌáámá yíícú dɛɛvɛ naachi canéé nuūⁿnīⁿ yeⁿꞌe vida cueⁿꞌe daāⁿmaⁿ. Nuūⁿnīⁿ miiⁿ ní dɛɛvɛ́ tanꞌdúúcā cristal ní icanꞌdaā yeⁿꞌe trono yeⁿꞌe Ndyuūs ndúúcū trono yeⁿꞌe ꞌiiⁿꞌyāⁿ chi nguuvi ꞌiiti cuūchī. 2 Ní náávtaⁿꞌa yeⁿꞌe yúúní chꞌɛɛtɛ yeⁿꞌe yáāⁿ miiⁿ ní nduu ꞌúúví lado yeⁿꞌe yíícú mííⁿ cátaꞌai yáⁿꞌá yeⁿꞌe vida cueⁿꞌe daāⁿmaⁿ chi ngii nduꞌū ndichúúví naaⁿ nꞌguiꞌi. Ni caꞌaama ꞌííyú ní ngii ꞌáámá ꞌáámá naaⁿ nꞌguiꞌi yeⁿꞌē. Ní táꞌā yáⁿꞌá miiⁿ chííⁿ chi diiⁿ chi nduūvā yeⁿꞌe vaadī yaꞌai yeⁿꞌe naciones. 3 ꞌĀā ntɛ́ɛ́ vɛ́ɛ́ mar ꞌáámá denduꞌū miiⁿ chi Ndyuūs caⁿꞌa yā chi condenado chi canéé na yáāⁿ miiⁿ. Trono yeⁿꞌe Ndyuūs ndúúcū trono yeⁿꞌe ꞌiiⁿꞌyāⁿ chi nguuvi ꞌiiti cuūchī canéé na yáāⁿ miiⁿ. Ní ꞌiiⁿꞌyāⁿ chi dichííꞌvɛ̄ Ndyuūs canée yā miiⁿ. 4 Ní ꞌiiⁿꞌyāⁿ sꞌeeⁿ ní snaáⁿ yā naáⁿ Ndyuūs ní canéé nguūⁿ chi duuchi Ndyuūs nchɛɛtɛ́ yā. 5 Ní nguɛ́ɛ́ cuuví nꞌgaaⁿ yáāⁿ miiⁿ. ꞌIiⁿꞌyāⁿ sꞌeeⁿ chi nꞌgɛɛtinée yā miiⁿ nguɛ́ɛ́ neⁿꞌé yā mar ꞌáámá dɛɛvɛ yeⁿꞌe lámpara ní nguɛ́ɛ́ dɛɛvɛ yeⁿꞌe ꞌyáⁿꞌā caati ꞌiivú Ndyuūs ngíí dɛɛvɛ yā. Ní ꞌiiⁿꞌyāⁿ sꞌeeⁿ caaⁿꞌmaⁿ ntiiⁿnyuⁿ yā cueⁿꞌe daāⁿmaⁿ cueⁿꞌe daāⁿmaⁿ tanꞌdúúcā reyes.Tiempo taachi cuchií Jesucristo ní ꞌāā canéé niiⁿnuúⁿ
6 Cuayiivi miiⁿ ní ángel caⁿꞌá yā chii yā ꞌúú: Nduudú ꞌcūū ní nduudu cuaacu. Ní ꞌiiⁿꞌyāⁿ cuuvi cuꞌtéénu yā nduudu miiⁿ. Señor chi maaⁿ Ndyuūs yeⁿꞌe espíritus yeⁿꞌe ꞌiiⁿꞌyāⁿ profetas chi Ndyuūs ndɛɛvɛ́ yā, maáⁿ yā dichoꞌó yā ángel yeⁿꞌe yā chi ángel ꞌcuuⁿꞌmíⁿ yā ꞌiiⁿꞌyāⁿ chi dichííꞌvɛ̄ Ndyuūs denduꞌū chi ꞌāā canéé chi chóꞌōo ní ꞌāā snee niiⁿnuúⁿ.
7 Jesús ngaⁿꞌá yā ngii yā ndísꞌtiī. ꞌCaandiveéⁿ nī. ꞌÚú ní ndaá nuuⁿ. Dɛꞌɛ chúúcā yeenu ꞌiiⁿꞌyāⁿ chi ꞌcaandiveéⁿ yā nduudu cuaacu yeⁿꞌe Ndyuūs, nduudu chi canéé nguūⁿ na libro ꞌcūū.
8 ꞌÚú, chi Juan, chꞌiindiveéⁿ ní nꞌdiichí dendúꞌū chi ꞌtúúcā. Ní cuayiivi chi nꞌdiichí ní chꞌiindiveéⁿ chuū, candiitinꞌdií ná caꞌa ángel chi chꞌiⁿꞌi yā ꞌúú denduꞌū chi ꞌtúúcā chi neⁿꞌé iꞌteenú ángel miiⁿ. 9 Naati ángel miiⁿ caⁿꞌa yā chii yā ꞌúú: Nguɛ́ɛ́ diiⁿ di ꞌtíícā. ꞌÚú ntúūⁿ dichiiꞌvɛ́ Ndyuūs tanꞌdúúcā dii ndúúcū hermanos yeⁿꞌe di chi ngaⁿꞌá yā nduudu cuaacu yeⁿꞌé Ndyuūs ndúúcū nducyáácá yā chí ꞌcaandiveéⁿ yā nduudu cuaacu chi canéé nguūⁿ na libro ꞌcūū. Díí, cuꞌtéénu di Ndyuūs.
10 Ní ángel miiⁿ ní caⁿꞌa ntúuⁿ yā chii yā ꞌúú: Nguɛ́ɛ́ cunuuⁿ nꞌdéꞌei di nduudu cuaacu yeⁿꞌé Ndyuūs chi canéé nguūⁿ na libro ꞌcūū caati tiempo yeⁿꞌe dendúꞌū chi ꞌtúúcā ꞌāā snee niiⁿnuúⁿ. 11 Maaⁿ ní cuꞌnéeⁿ nī ꞌiiⁿꞌyāⁿ chi nguɛɛ nꞌdaacā idiíⁿ yā chi ꞌtíícā diíⁿ yā. ꞌTiicá ntúūⁿ ꞌiiⁿꞌyāⁿ chi nadacadiinúúⁿ yā yeⁿꞌe denduꞌū chi nguɛɛ nꞌdaacā, cuꞌnéeⁿ nī chi ꞌtíícā diíⁿ yā. ꞌIiⁿꞌyāⁿ chi dinꞌdaacá yā, cuꞌnéeⁿ nī chi diíⁿ yā ꞌtíícā. ꞌIiⁿꞌyāⁿ chi ꞌáámá diíⁿ yā ntiiⁿnyuⁿ yeⁿꞌe Ndyuūs cuꞌnéeⁿ nī chi ꞌaama diíⁿ yā ꞌtíícā.
12 ꞌCaandiveéⁿ nī chiiⁿ chi caⁿꞌa Jesús. ꞌÚú ní núúⁿ nūuⁿ ndaá. Ní ndɛɛ́ premios chi caⁿꞌá caꞌá ꞌáámá ꞌáámá ꞌiiⁿꞌyāⁿ premios chi tunee yā yeⁿꞌē ntiiⁿnyuⁿ chi yeⁿꞌe yā. 13 ꞌÚú ní ꞌiiⁿꞌyāⁿ vmnááⁿ vmnaaⁿ ndíí naachi ꞌcuiinu. ꞌÚú ní caneé naachi chingaꞌā ndíí cuayiivi chí ꞌcuiīnū tanꞌdúúca letras yeⁿꞌe alfabeto A ndíí Z, ꞌtíícā ꞌúú, ngaⁿꞌa Jesús.
14 Dɛꞌɛ chúúcā yeenu ꞌiiⁿꞌyāⁿ sꞌeeⁿ chi nandɛɛvɛ́ yā catecai yā caati cuuvi cutaꞌá yā nꞌguiꞌi yeⁿꞌē yáⁿꞌá yeⁿꞌe vida, ní cuuví cundaa yā cheendi vaꞌai yeⁿꞌe yáāⁿ miiⁿ ní choꞌó yā cuaaⁿ chɛɛ̄tī vaꞌai chɛɛti nguuvi. 15 Naati cuaaⁿ daami yáāⁿ miiⁿ chꞌɛɛtinée ꞌiiⁿꞌyāⁿ chi nguɛ́ɛ́ chiꞌtéénu yā Ndyuūs ndúúcū ꞌiiⁿꞌyāⁿ chí ngaatu, ndúúcū ꞌiiⁿꞌyāⁿ chí caⁿꞌá yā ndúúcū ndaataá o isaⁿꞌā chi nguɛ́ɛ́ yeⁿꞌé yā, ndúúcū ꞌiiⁿꞌyāⁿ chi nꞌgiiⁿꞌnúⁿ yā ꞌiiⁿꞌyāⁿ, ndúúcū ꞌiiⁿꞌyāⁿ chi iꞌtéénu yā santos o ídolos ndúúcū nducyáácá ꞌiiⁿꞌyāⁿ chi neⁿꞌé yā nginncheꞌéí yā ꞌiiⁿꞌyāⁿ ní ngaⁿꞌa yā nduudu yaadi.
16 ꞌÚú Jesús idichoꞌó ángel yeⁿꞌé chi caaⁿꞌmaⁿ cuaacú yā yeⁿꞌe nducuéⁿꞌe cosas chi ꞌtúúcā nanááⁿ ndísꞌtiī chi ꞌiiⁿꞌyāⁿ yeⁿꞌe yaācū sꞌeeⁿ. ꞌÚú ní ꞌiiⁿꞌyāⁿ vmnááⁿ vmnaaⁿ yeⁿꞌe ndaata yeⁿꞌe David ꞌúú. ꞌÚú ní ꞌííⁿnyúⁿ chí ngíí dɛɛvɛ nguɛɛtiyaaⁿ.
17 Espíritu Nꞌdai yeⁿꞌé Ndyuūs ndúúcū ꞌiiⁿꞌyāⁿ sꞌeeⁿ chi yeⁿꞌé Ndyuūs ngaⁿꞌa yā ꞌtíícā: Ndísꞌtiī cuchíi nī. Ní ꞌāā duꞌú nūuⁿ ꞌiiⁿꞌyāⁿ chi nꞌgiindiveéⁿ yā nduudu yeⁿꞌé ní canéé chi caaⁿꞌmáⁿ yā: Cuchíi nī. Ní nꞌdiī chí yaaca nī cuchíi nī. Cuchíi nī ndúúcū ꞌāā duꞌú nūuⁿ ꞌiiⁿꞌyāⁿ chi neⁿꞌé yā. Cuchíi nī ní cuꞌu nī yeⁿꞌe nuūⁿnīⁿ yeⁿꞌe vida cueⁿꞌe daāⁿmaⁿ. Ní nguɛ́ɛ́ dɛꞌɛ̄ vɛɛ cūndiꞌi yeⁿꞌé nī nuūⁿnīⁿ yeⁿꞌe vida cueⁿꞌe daāⁿmaⁿ.
18 ꞌÚú ngaⁿꞌá ngīi nduudu cuaacu caꞌáámá caꞌáámá ꞌiiⁿꞌyāⁿ chi nꞌgiindiveéⁿ yā nduudu yeⁿꞌe dendúꞌū chi canéé chi cuchiī chi canéé nguūⁿ na libro ꞌcūū. Nduuti chi ꞌáámá yā cuꞌneeⁿ ca nꞌdeēe nduudú nguɛ́ɛ́ ti chi canéé nguūⁿ na libro ꞌcūū Ndyuūs caꞌá yā ꞌiiⁿꞌyāⁿ miiⁿ castigo yeⁿꞌe yā yeⁿꞌe nducuéⁿꞌē vaadī yaꞌai chi canéé nguūⁿ na libro ꞌcūū. 19 Ní nduuti chi ꞌáámá ꞌiiⁿꞌyāⁿ divíi yā naⁿꞌa nduudu yeⁿꞌé Ndyuūs yeⁿꞌe dendúꞌū chi cuchiī chi canéé nguūⁿ na libro ꞌcūū, ꞌtiicá ntúūⁿ Ndyuūs nadivíi yā parte chi cuuvi yeⁿꞌe yā yeⁿꞌe libro yeⁿꞌē vida cueⁿꞌe daāⁿmaⁿ ndúúcū parte chí cuuvi yeⁿꞌé yā yeⁿꞌe yáāⁿ chi dɛɛvɛ yeⁿꞌe chi canéé nguūⁿ na libro ꞌcūū.
20 ꞌIiⁿꞌyāⁿ chí ngaⁿꞌa cuaacú yā denduꞌū chi ꞌtúúcā, ꞌiiⁿꞌyāⁿ miiⁿ ngaⁿꞌa yā: Cuaacu nííⁿnyuⁿ chí ꞌāā cuchii nuúⁿ. ꞌTíícā cuuvi. Cuchíi nī Señor Jesucristo.
21 Ní maaⁿ ní Señor Jesucristo yeⁿꞌe yú tée yā ndísꞌtiī nducuéⁿꞌē chi nꞌdaacā yeⁿꞌé yā, ní caneé yā ndúúcū ndísꞌtiī. ꞌTíícā cuuvi.