Yeⁿꞌe mil nduūyū
20
Cuayiivi ní nꞌdiichí ꞌáámá ángel chi cuchꞌéeⁿ yā yeⁿꞌe vaꞌai chɛɛti nguuvi ní ndɛɛ́ yā na taꞌa yā llave yeⁿꞌe yiivɛ yáⁿꞌāa ndúúcū ꞌáámá cadena chꞌɛɛtɛ ca. 2 Ní ángel miiⁿ staꞌá yā ꞌiiti dragón chi cúú miiⁿ chi caneé tī ndii tiempo chi chóꞌōo chi nguuvi diablo o yááⁿnꞌguiinūuⁿ chi Satanás. Ní ángel miiⁿ dichiichí yā ꞌiiti dragón miiⁿ ndúúcū cadena chꞌɛɛtɛ ca. Ní caneé tī ꞌtíícā chɛɛti ꞌáámá mil nduūyū. 3 Ní ángel miiⁿ chinꞌdáá nuúⁿ yā ꞌiiti dragón miiⁿ na yiivɛ yáⁿꞌāa naachi canee chiichí tī. Ní nanꞌgaadí yā cheendi vaꞌai yeⁿꞌē. Ní sꞌneéⁿ yā ꞌáámá sello vmnaaⁿ cheendi vaꞌai miiⁿ. Ní ꞌiiti dragón miiⁿ ꞌāā ntɛ́ɛ́ cuuvi canncheꞌéí tī ꞌiiⁿꞌyāⁿ yeⁿꞌe naciones ndíí ꞌcuiinu ꞌáámá mil nduūyū. Ní cuayiivi ní canéé chi nꞌdaatií yā ꞌiiti dragón miiⁿ ꞌáámá tiempo ꞌlííⁿ nūuⁿ.4 Ní cuayiivi ní nꞌdiichí tronos ní ꞌiiⁿꞌyāⁿ vɛ́ɛ yā na tronos. Ní ꞌáámá ꞌiiⁿꞌyāⁿ caꞌá yā poder ꞌiiⁿꞌyāⁿ sꞌeeⁿ chi diíⁿ yā juzgar ꞌiiⁿꞌyāⁿ. Ní nꞌdiichí almas yeⁿꞌe ꞌiiⁿꞌyāⁿ ndiitaá daandu yā ti caⁿꞌa cuaacú yā yeⁿꞌe Jesucristo. Ní caⁿꞌa ntúuⁿ yā nduudu cuaacu yeⁿꞌé Ndyuūs. ꞌIiⁿꞌyāⁿ sꞌeeⁿ nguɛ́ɛ́ chiꞌtéénu yā ꞌiiti monstruo miiⁿ, ní nguɛ́ɛ́ chiꞌtéénu yā ꞌiiti santo yeⁿꞌé tī. Ndíí nguɛ́ɛ́ ndúú caꞌa yā lugar ꞌiiti monstruo miiⁿ chi sꞌneéⁿ tī sello yeⁿꞌé tī nchɛɛtɛ́ yā o taꞌá yā. Ní ꞌiiⁿꞌyāⁿ sꞌeeⁿ chꞌɛɛtinduuchí ntuuⁿ yā ní ngaⁿꞌa ntiiⁿnyúⁿ yā dáámá ndúúcū Cristo chɛɛti ꞌáámá mil nduūyū. 5 Chuū miiⁿ ní vmnááⁿ vmnaaⁿ chi ꞌiiⁿꞌyāⁿ sꞌeeⁿ nanduuchí ntuuⁿ yā naati tanáⁿꞌā ꞌiiⁿꞌyāⁿ chi nꞌdíi yā nguɛ́ɛ́ nduuchí ntúuⁿ yā ndíí chi chóꞌōo ꞌáámá mil nduūyū miiⁿ. 6 Dɛꞌɛ chúúcā yeenú ꞌiiⁿꞌyāⁿ chí yeⁿꞌé Ndyuūs, ꞌiiⁿꞌyāⁿ chi vmnááⁿ vmnaaⁿ caⁿꞌá yā chꞌɛɛtinduuchí ntuuⁿ yā yeⁿꞌē nguaaⁿ tináⁿꞌā. Maaⁿ ní ndii chííⁿ ndii ꞌúúví cuuvi ꞌcuūvi ꞌiiⁿꞌyāⁿ nguɛ́ɛ́ vɛ́ɛ́ poder yeⁿꞌe chi tuneeⁿ ꞌiiⁿꞌyāⁿ sꞌeeⁿ chi ꞌcuūvi yā. Ní ꞌiiⁿꞌyāⁿ sꞌeeⁿ ní cuuvi chiiduú sꞌeeⁿ yeⁿꞌe Ndyuūs ní yeⁿꞌe Cristo ní caaⁿꞌmaⁿ ntiiⁿnyúⁿ yā dáámá ndúúcū Cristo chɛɛti ꞌáámá mil nduūyū.
7 Ní taachi chꞌiinu ꞌáámá mil nduūyū miiⁿ nꞌdaatií yā yááⁿnꞌguiinūuⁿ chí ndíchiichi sa ní cuchɛɛ sá yeⁿꞌe yiivɛ́ɛ̄ chi vácūū naachi canée sa. 8 Ní caⁿꞌa sa chiica sa chi canncheꞌei sa ꞌiiⁿꞌyāⁿ yeⁿꞌe naciones yeⁿꞌe núúⁿmáⁿ íⁿꞌyeeⁿdī chi ꞌiiⁿꞌyāⁿ sꞌeeⁿ caⁿꞌá yā lado yeⁿꞌē sa. Ní canncheꞌei sa rey Gog ndúúcū yáāⁿ Magog chi yáāⁿ yeⁿꞌe yā. Ní nadidáámá sá nducyaaca ꞌiiⁿꞌyāⁿ chi diiⁿ sa caandaá. Ní ꞌiiⁿꞌyāⁿ sꞌeeⁿ ndúúcū sa ní nꞌdeee nꞌdáí yā tanꞌdúúcā yaⁿꞌā ndúútīi yeⁿꞌē yíícú. 9 Ní ꞌiiⁿꞌyāⁿ sꞌeeⁿ cueⁿꞌé yā nuuⁿmaⁿ iⁿꞌyeeⁿdī ní cuaaⁿ diituu ní nuuⁿmaⁿ ndiivi yeⁿꞌe campamento yeⁿꞌe ꞌiiⁿꞌyāⁿ chi yeⁿꞌé Ndyuūs ní yeⁿꞌe yáāⁿ Jerusalén chi Ndyuūs neené neⁿꞌe. Ní Ndyuūs dichoꞌó yā chi chingéē nguuchi yaⁿꞌā yeⁿꞌē na vaꞌai chɛɛti nguuvi. Ní ꞌiiⁿꞌyāⁿ sꞌeeⁿ ngiichi ndúúcū nguuchi yaⁿꞌā miiⁿ ní diꞌcuiīnú yā. 10 Ní yááⁿnꞌguiinūuⁿ miiⁿ chi diablo chi chinncheꞌei sá ꞌiiⁿꞌyāⁿ, ꞌáámá yā chinꞌdáánuúⁿ yā saⁿꞌā miiⁿ ndii nuūⁿnīⁿꞌyáⁿꞌā chi ngiichi ndúúcū tuūu azufre naachi ꞌāā chinꞌdáánuúⁿ yā ꞌiiti monstruo miiⁿ ndúúcū profeta chi nguɛ́ɛ́ caⁿꞌa yā nduudu cuaacu. Ní ꞌcueenú yā cuuvi na lugar miiⁿ ndii nguuvi ndíí nꞌgaaⁿ. Ní cueⁿꞌe daāⁿmaⁿ ní ꞌcueenú yā cuuvi.
Cristo nꞌdiichí yā nuuⁿndi yeⁿꞌe ꞌiiⁿꞌyāⁿ taachi chꞌiindí yā na trono cuɛ́ɛ̄ yeⁿꞌe yā
11 Cuayiivi ní nꞌdiichí ꞌáámá trono chi chꞌɛɛtɛ ní cuɛ́ɛ̄ ní ꞌáámá ꞌiiⁿꞌyāⁿ vɛ́ɛ yā na trono miiⁿ. Ní na yáⁿꞌāa ndúúcū nanguuvi cueⁿꞌe yeⁿꞌē nanáaⁿ yā. ꞌĀā ntɛ́ɛ́ mar táámá lugar naachí cuuví cuɛɛtineē na yáⁿꞌāa ndúúcū nanguuvi. 12 Ní nꞌdiichí ꞌiiⁿꞌyāⁿ sꞌeeⁿ chí nꞌdīi yā, tináⁿꞌā chi nꞌgɛɛtɛ yā chi ngaⁿꞌa ntiiⁿnyuⁿ yā ndúúcū tanáⁿꞌā tináⁿꞌā. Nducyaaca yā ní chɛɛtíndii yā nanááⁿ Ndyuūs. Ní Ndyuūs nanꞌguaáⁿ yā libros yeⁿꞌe yā. Ní nanꞌguaáⁿ yā táámá libro chí libro yeⁿꞌe vida cueⁿꞌe daāⁿmaⁿ. Ní Ndyuūs nꞌdiichí yā nuuⁿndi yeⁿꞌe tináⁿꞌā sꞌeeⁿ yeⁿꞌé denduꞌū chi canéé nguūⁿ na libro sꞌeeⁿ tanꞌdúúcā chi diíⁿ yā. 13 Ní ꞌiiⁿꞌyāⁿ chi chꞌīi yā nguaaⁿ nuūⁿnīⁿꞌyáⁿꞌā ní nanꞌdáa yā. Ní tanáⁿꞌā chi snuú yā na lugar yeⁿꞌe ꞌiiⁿꞌyāⁿ chi nꞌdíí ní nanꞌdáa yā. Ní Cristo nꞌdiichí yā nuuⁿndi yeⁿꞌe caꞌáámá caꞌaamá yā tanꞌdúúcā chi diíⁿ yā. 14 Tuuꞌmi ní vaadī nꞌgii ndúúcū lugar yeⁿꞌē ndúúcū ꞌiiⁿꞌyāⁿ chi nꞌdíí yeⁿꞌe ꞌáámá yā cannuúⁿ yā ná nuūⁿnīⁿꞌyáⁿꞌā chí ngiichi. Ní nuūⁿnīⁿꞌyáⁿꞌā chi ngiichi miiⁿ, chííⁿ chí ndíí ꞌúúví vaadī nꞌgii ní yeⁿꞌé ꞌiiⁿꞌyāⁿ chi nꞌdíi yā. 15 ꞌÁámá ꞌiiⁿꞌyāⁿ chinꞌdáá nuuⁿ yā na nuūⁿnīⁿꞌyáⁿꞌā chí ngiichi miiⁿ nducyáácá ꞌiiⁿꞌyāⁿ chi nguɛ́ɛ́ canee nꞌguūⁿ chi duuchi yeⁿꞌe yā na libro yeⁿꞌe vida cueⁿꞌe daāⁿmaⁿ.